رواية/فيـنـوس ♥♒
للكاتبه/sαℓeмα🔏
ــــــــــــــــــــــــــــــ
رويدا شهقت ومها فنصت بصدمه وقالت : جااا
رويدا خبطت ع خدودها :عدي عدي بسرعه افتحي ...فكينه من المشاكل
مها عيونها دمعن وهزت راسها بمعني لا
رويدا تجبد فيها : تي عدي يامها بسرعه قبل تسمع جدتك
مها خذت نفس وطلعت وهي متعصبه
ورويدا مشت تجري عند جدة مها اتلهي فيها بيش ماتسمعش الصوت
مها فتحت الباب وكيف بتدوي وتهزب
رضا دفها وخش وسكر الباب وراه
مها بعياط : شن فيه شن تبي ...كنك ؟
رضا دفها ع الساس بقوه لعند مها خبطت ف الساس
وقدم عليها وقال : كنك انتي شن صارلك ولا عشان انا متساهل امعاك تحسابيها خلاص يوم تهزبي ويوم تكشخي وانا انمشي ونراضي .....كيف تبي اتسيبي وشن معناه كل شي انتهاء بينه مش لعبه عندك انا يامها راه يوم تبيني ويوم لا
مها دموعها ينزلن ع خدودها وتحاول توخر رضا من عليها لكن مقدراتش
مها ببكا : ماشاء الله ممثل دور الضحيه والمظلوم يارضا ...انا عمري ماتخيلت توصل بيك الحقاره للدرجه هذي
رضا مسح ع وجهه وهو متنرفز : شن تحكي انتي بس .....شن فيه
مها مسحت دموعها بقوه : انت عارف كويس شن فيه .....اكيد اللي تكلم فيها قالتلك شن حكيت انا وياها
رضا ضحك بصدمه : نكلم فيها ...غير دقيقه دقيقه قصدك انتي شاكه فيه !
مها سكتت
رضا قرب منها بعياط : احكي يامها
مها رعشت مع بعضها من صوت رضا العالي وغمضت عيونها بخوف
رضا وخر من عليها وحاط يديه ع راسه ويبرم ف مكانه وهو بيتفجر من الغضب
مها ببكا : اطلع يارضا....روح معش نبي نشوفك
رضا بحت فيها وهز راسه : حاضر حنطلع بس حطي ف بالك انه لو طلعت من هنا انسي حد اسمه رضا في حياتك ونوعدك انه معش حتشوفيني بعد اليوم يامها
وتلفتت لباب وهو يدعي ف خاطره انه مها اتقوله خلي نحكوا او راجي ماتمشيش ولا انا انحبك ماتخلينيش..... بس للاسف كل اللي يسمع فيه صوت بكاها بس ، طلع من الحوش وسكر الباب
ومها قعمزت ف مكانها وقعدت تبكي بصوت عالي
رضا قعمز ف سيارته والدموع ف عيونه ويفكر شن اللي صار فجأه بيش انقلبت الدنيا هكي ...معقوله بعد الحب هضا كله يسيبوا بعض بدون اي سبب منطقي
ــــــــــــــــــــــــــــــــ
الساعه 10:30 م✨
خش مهاب لغرفة نوم امه وباته .....سكر الباب وراه بهدوء وخوف وقدم للدولاب يفتش ويقلب فيه بسرعه يدور ع فلوس
سمع صوت حد جاي ف الممر .....رد كل شي كيف ماكان بسرعه وسكر الدولاب وكيف بيطلع حلت عليه امه الدار
امه : مهاب....شن ادير هنا
مهاب بتوتر : لا شي بس كنت اندور ع شحني وهكي
امه قدمت ع الدولاب وفتحاته : لا مش هنا شحنك
مهاب رشف خشمه وهز راسه : اها ......وكان بيطلع وبعدها رد وقال.... امي !
امه طلعت منشف من الدولاب وسكراته وتلفتت ع مهاب : نعم
مهاب حك خشمه وقال : عندك فلوس
امه رفعت حاجبها : عندي اها الحمدلله ياربي واجد ..لكن مانعطيش فيهن
مهاب مسح ع وجهه : تي عليش ياامي ....تو نردهن لكي راه
امه تعصبت وقالت : لكي ثلاث شهور تسلف وتقولي تو نرد وماشفت شي انا .....وين تصرف فيهن انت الفلوس اه
مهاب وجهه تغير لما امه سألته وين يصرف ف فلوسه وبان عليه الخوف والتوتر قاللها: باهي باهي خلاص مش لازم وطلع من الدار بسرعه
خش لداره وهو ياخذ ف نفس ويفكر من وين ايجيب فلوس حق ادمانه
لبس كبوطه وخذا نقاله ومفاتيحه وطلع
ــــــــــــــــــــــــــــــــ
الساعه 12:38م🌠
