اللعنات العشر (الجزء الثاني من مغامرات إلى عالم الأساطير)

التاسع والعشرون

مروان: الخيانة!

أصعب حاجه إن الشخص اللي بتحبه وتثق فيه يخذلك ويطعنك فى ضهرك، الخيانة هنا ليها معاني كتير
فى خيانة الزوج لزوجته أو الزوجة لزوجها  فى خيانة الصديق لصديقه  فى خيانة الأب لأبنائه
حاجات كتير ممكن تندرج تحت مسمى الخيانة
بس الشئ المشترك بينهم والمتفق عليه إن الخيانة أيا كانت نوعها فهي شئ صعب منافي للأخلاق سواء كانت أخلاق دينية أو أخلاق إجتماعية.
الجميع اتفقوا على بشاعتها وعدم كفائة أو أمانة الشخص اللى قام بيها.

بالنسبالي بقى  أنا مكنتش أتوقع إني ممكن فى يوم أعمل كدا أو أتوصف بإني خاين  ...  الموضوع كان صعب والأصعب إني مكنتش شايف قدامي وخسرت بسبب اللعنة دي حب إسراء وثقتها فيا،  كل حاجة كانت هتنتهي بسببها والكتاب كان هيحقق اللي كان بيتمناه بس *ضحك بخفة ثم تابع* هو اللي قال لإسراء ترجعلي علشان ينتقملها منى بس كانت الحركة دي فى صالحي علشان مكنش يعرف إني عمري ما هسيبها تاني وطالما أنا فى وعيي عمري ما هنطقها تاني

*نظر لها بإبتسامة ثم تابع* إسراء الحاجة الحلوة اللى فى حياتي ومن وجهة نظري هي الدواء لكل داء حصلي فى حياتي مستحيل أخسرها بعد كل دا بسبب لعنة سخيفة من كتاب أسخف

ضحكوا جميعا على ردة فعله وتعابير وجهه الساخطة على هذا الكتاب

سيف: اهدى طيب لحسن يصحالك
مروان: مبقاش يهمني خلاص المهم عندي دلوقتى إني مخصرش حد بحبه

ابتسموا جميعا فقد مروا بأمور صعبة فعلا

آسيا: لو خلصت ممكن أتكلم
نظر مروان إلى الرقم الذي على الأرض فوجده تحول إلى أربعة ابتسم ثم قال لآسيا: كدا رضى اتفضلي

آسيا: كل واحد فينا عنده ماضي صعب إنه ينساه أو يتخطاه بسهولة مهما حاول هيفضل ملازمه طول العمر.

لعنتي مكنتش جديدة عليا بالعكس أنا مريت بيها من قبل بس الاختلاف إني مكنتش عارفه أتحكم فيها زي زمان.

قبل كدا لما كنت مصاصة دماء بسبب لعنة بردو أصابتني بسبب شخص فى اليابان وبعد ما قتلته زالت عني وعن كل اللى نقلهم لعنته، ودلوقتي رجعت برضو بسبب لعنة من كتاب عمري ما كنت أتخيل إنه يكون موجود.

الفكرة إنه عامل زي الشيطان اللى بيفكرنا بذنوبنا لما نحاول نتوب ويقعد يوسوسلنا إن ربنا عمره ما هيقبلنا، هيقبلك إزاي وأنت عامل كذا وكذا وكذا... بس بعد كل اللى مريت بيه عرفت أد إيه إن ربنا كريم وبيغفرلنا ذنوبنا إذا تراجعنا وتوبنا إليه، ربنا مش بيقفل بابه فى وش حد طالما لسه الساعة مجتش يبقى إرجع هيقبلك مهما عملت إرجع وحاول تكفر عنها، تصدق وصلي وصوم  .. اعمل حج أو عمرة اعمل طاعات كتير فإن الحسنات يذهبن السيئات زي ما ربنا سبحانه وتعالى قال.

اللعنة دي فكرتني بذنبى بس خرجت منها أقوى وقربت من ربنا أكتر والحمد لله أنا فى رضى تام عن حالي دلوقتى ومبسوطة أكتر من أي وقت فات، بس  .. اللي كان نفسي يكون موجود معايا دلوقتي هو أحمد أخويا الصغير وحشني أوي كان فراقه من أصعب الحاجات اللي مريت بيها  .. الله يرحمه
نزلت دموعها بإختناق وصمتت فأخذها رعد فى حضنه ليخفف عنها