زوجتي السمينة

#زوجتي_السمينة
حلقة 13

في الليل البنات داروا سهرية بما انه آخر ليلة بيقعدوا هنا دايرات جو للسهرية
نوال: معقولة ساهرين هكي جيبولنا سمسام نسمسموه عالأقل
نجاح: ارقندي والدمدري وأنتي فالحة كان في بطنك
نوال: لا قالتها لواحد في فمها والتاني في يدها
نجاح: 😒😒 أمتى صار هذا
ريناد: حقا هيا نجوحة نبوا حلويات قابلين حتى بشاهي
نجاح: زعما حقا والله ماني مخلياته في خاطركن هو ماشي ماشي وحدة تجي معاي والباقي يقعد هنا عشان مايحسوش بشي
اكرام: أنا بنمشي معاك
ابتهال: ارفعي معاك التوأم متاعك لماتمشي بدونها
اكرام: الحسد الحسد الحسد
ندى: وين فاطمة ياريناد
ريناد: مش عارفة وين مختفية حقا
نجاح: هيا احني طالعين توا نشوفوها مرة وحدة
ابتهال: وين بتطلعن
نجاح: شن تخرطي ماهو الحلويات في حوشنا
اكرام: قصدك بنمشوا في حوشكم وكان يشوفنا حد من الاولاد
نجاح: كان جت في الأولاد ساهل كان جت في أمهاتنا أو ابائنا
اكرام :نمشوا بشوي بشوي ونطلعوا هيا بسرعة

ناضت نجاح واكرام وامشوا يتختلن للحوش خدن لمن وحطنه في صونية
نجاح: استني هدي حافظة حطي فيها تلات طروف من كل حاجة
اكرام: لمني
نجاح: تي غير حطي وانا بنجيب عصير لينا

خدوا الحاجات وطلعن
نجاح: تعالي نمشوا للمربوعة الاولاد
اكرام: استني يانجاح من هي هاديكا طالعة من المربوعة وماشية للحوش
نجاح: هييي من هي حي هذي فاطمة غبارتها مغبرة وين كانت
اكرام: فوتيها هيا ليش جاية هنا
نجاح: جايبة الحفاظة ليهم
اكرام: اها هي لحبيب القلب
نجاح: ايه لحبيبي 🥰

خشت نجاح واكرام وكان أكرم راقد والباقي ماهناش
نجاح: هيا نخلعوه
اكرام: هيا 😈
نقزن فوقه واااااااااك ونجاح بالدفع الرباعي
أكرم :ناض مخلوع وووووووووك كسرتولي ظهري كسرتولي عظامي
نجاح: جاك ملك الموت ياأكرم موت موت 👻
أكرم: هاهاها داير روحه ميت 🤪💀
اكرام: عنجد مهبلة كلا أنتم
أكرم :شاف الساعة تي خيركن جايات في هالليل الساعة 2 توا
نجاح: جبتلك حصتك هاك
أكرم: شكرا 😋😊
نجاح: عفوا
إكرام: قعدت تطلع في نجاح تي هيا مش وقتك يانجاح أمي وأمك ينوضوا يقتلونا
نجاح: مش حيديرولنا شي المفتاح عندي ونسكر عليهن يدبرن من وين يطلعن
أكرم: عليك استعباط فيه باب ثاني
نجاح: حتى الثاني مسكر 😏
إكرام: باهي مشي المهم كله يمشي هيا اطلعي

وروحن للحوش
وخشن للدار وبدت سهرية المبيت

في الصباح اليوم التالي:
بعد الفطور:
طلعوا يضموا في حوسة العرس ليمسح وليغسل .....
سعاد: نجاح وينك يابلوة
نجاح: ها يأمي
سعا:د جيبي المفتاح
نجاح: أول مرة وآخر نخلي مفتاح عندي ... هاك هذا هو
سعاد: بعد ماتكملن تعالن اغسلن الدبش دايرات أكداس في الديار خود وعرم
نجاح: باهي يأمي غير هنينا توا
سعاد مهنياتك
نجاح: باهي هيا بنمشي توا
طلعت للبنات لقاعدات برا مطلعات لبساطات
نجاح: هادوم شن بديرولهم
ابتهال: شن بنديرولهم بنغسلوهم
نجاح: شن يحسابوا جايبين مغربيات والله لفنهم وخلوا البلي في مكانه يرفعوهم للمغسلة يبوا غسل ونشر وقصة
اكرام: سيبت البساط والله اديري فينا خير ظهري متكسر يبي 10 سنين بيش يصلح حاله
نجاح: باهي من بنكلموا يرفعهم
اكرام: تو فيها سؤال يانكلموا اكرم أو أكرم او الاثنين يعني
نجاح أو سالم أو سراج
إكرام: كلا خوتك من تو تجيك مرت خوك ترشقلك يديها في نصها أنا حتى بساطات حوشي مارفعهم ويبدن بعدها في تنفيخ الراس
نجاح: طيح سعدك لأمس عمك سراج مروح ببساطات ياعيني قريب تجيب مش ناقصني غير نطلعوا من التكسيرات لتوا
اكرام: حي بنقولك زعما البارح فاطمة شن الدير برا الساعة 2 بروحها
نجاح :تي وين نعلم بيها شن حاطه معاها كاميرا
اكرام: باهي آخر سؤال
نجاح: اسألي وأنتي تقول في مدرسة يأبلة آخر سؤال
اكرام: خزي على وجهك ايه أمتى بتنزل وفاء أو بتستنى لين يجوا أهلها
نجاح: سؤالك لا يوجد له جواب تي وين نعلم بيها أنا ماتشاورش فيا راه خليني نمشي نكلم البلوة اكرم يجي يرفعهم أو يجي يغسلهم يدبر راسه هو وياهم
اكرام: ايه امشي أو نقولك هو في حوشنا بكري مشي امشيله خير ماتصرفي رصيد على هالبساطات الحرف
نجاح: باهي باهي
مشت نجاح لحوش عمها دقت الباب
طلعتلها ليلى
نجاح: مرت عمي نبي أكرم هنا هو
ليلى: ايه باهي الناديلك عليه
ليلى: مشت تو ليش مش جايات خواته هنا لينادن عليه ... أكرم نجاح برا
أكرم: خيرها شن تبي
ليلى: مش فاضيتلك أطلع واسألها
أكرم: تي غير روقي ياليلو
ليلى: على شن بنروق مخليين الحوش تقول مكب كناسة البلي الأحرف
أكرم: الحق مش فينا أنتوا لماتجوش الضموا
ليلى: حطت يديها في نصها شن بنقعد غادي وهنا هلبا عليه
أكرم: قصدي حتى عالكلبة ابتهال واكرام
ليلى: حتى أنت وخوك قايمين القدر تي نوض البنت من بكري تراجي
أكرم: وادي
ليلى: يرفعني ويرفعك 😡
طلع أكرم لنجاح
أكرم :ها شن فيه
نجاح: شكلك مش مروق
أكرم: في خاطره وين نشوفك حتى لو حامق نروق ... لا عادي شن فيه
نجاح: نبيك ترفع لبساطات للمغسلة لأنه نحن عيينا ظهورنا ورجلينا تكسروا
أكرم: خلهم يكملوا التكسير واغسلنهم
نجاح: نخلوهم ويرقدن ومادخلني فيهم حاصلة في كل حاجة وكله فوق راسي
أكرم: تي خيره هو ليجي ينق فوق راسي ويقولي شن يدير تقول أنا طول اليوم أنا مقعمز
نجاح: شبحتله بنص عين وين كان ماهو مقعمز عندنا الحق
أكرم: باهي هيا طلعوهم نرفعهن نحدفهن
نجاح: باهي