زوجتي السمينة

رواية #زوجتي السمينة
نبتدأ بالشخصيات الرواية
-الولد اسمه أكرم
عائلته:
أبوه اسمه علي وأمه اسمها ليلى
خوته عنده واحد أنور أكبر منه واثنين اخوات إكرام وإبتهال
-البنت اسمها نجاح
اسم بوها محمد وأمها اسمها سعاد
عنده أخين هما سالم وسراج
واخواتها نسرين ونوال طبعا هدوما اخواتها أصغر منها
-وعندهم عم اسمه حسن زوجته اسمها مريم
وعنده ثلاثة بنات ندى وسهى وسوسن
-وعم مش متزوج اسمه يوسف
-وعندهم عمة اسمها خيرية زوجها سعيد
عندها بنتين فاطمة وريناد وولد صغير اسمه لؤي

المقدمة:
مجتمعين العيلة كلها يجهزوا لعرس يوسف عمهم
والبنات ملتمات كلهم يبوا وحدة تمشي تكلم واحد من الأولاد يرفعهم للمحلات
سهى: هيا وحدة منكم تمشي تكلمهم أنا ماعنديش خو أنتن وحدة منكن تمشي تكلم خوتها
إكرام: أنور واضحة مش فاضي ديما
إبتهال: لا إلا أكرم مستحيل هو بالحال يكون مروق مايرضاش لا بال توا قارن حواجبه
سهى: أمالا يافالحات من نوايات بيرفعكن
نجاح: ههههه بوعجيلة جارنا في آخر الشارع
فاطمة: مانفتكرش عندك حد هنا اسمه بوعجيلة
نجاح: حول جديد شن مالك فيه
ندى: تصدقي فيها الكذابة هذي
إكرام: خطرت في بالي فكرة من يمشي يكلم أكرم
سهى: مني
كلهم شبحوا لنجاح
نجاح: إلا أنا ماتحاولنش معاي لو نخيط شكارة خيشة ولانمشي نكلمه
نوال: هيا سلم وخيتي آخر طلب
فاطمة وعد آخر مرة
نجاح: وااااااك والله آخر مرة ماعاد نمشيهله هالوجه الفقر هذا وينه هو
إكرام :شدت من خدودها وشحتلها يانجلي بطوطتي ياحنة هنا شفتيها وراء الحوش
نجاح: حولي من قدامي خير مانرفسك
إكرام: ههههههههه كله قابلة بيه المهم تمشي

مشت نجاح لأكرم
وقفت قدامه
نجاح :أسمعني من الآخير جاية عشان لبنات طلبوا مني مش عشانك كان تقعدلي ماجيتك ولاشفت وجهك
أكرم: اختصرلي الملدمة وخشي في الموضوع لأنه عارفة انه دوتك هلبا
نجاح: 😡😡 شي مستفز الصراحة عالعموم البنات يبوا يمشوا للمحلات اخواتك وبنات عمك وطلبوا مني نكلمك بس لاغير
أكرم :شن أنتي امالا مش من الماشيين
نجاح :لا مش ماشية ولاناقصني نمشي مع اشكالات زيك نخيط خيشة ونلبسها
أكرم :هههههههه تي على أساس كان مشيتي بتجي عليك حاجة هي هيا امشي من بحدا وجهي
نجاح: ياعليك واحد مغرور غير على شن شايف روحك على شوية نحافة بس
أكرم: نحيف خير من 6 في 60 ايواه
نجاح : جاية ناخد نصايحك من الاخير بترفعهم أو لا
أكرم: 5 دقائق مش في السيارة نطلع ونسيبكن
نجاح: يانجيـ..... !
أكرم: كملي يانجيـ
نجاح: شي هيا سلام وان شاء الله ماعاد نشوفه الوجه الفقر

نجاح: هيا يابنات خمس دقائق وإلا بيمشي
مشن البنات يجرن يلبسن وطلعن
إبتهال: حي وين نجاح مش بتمشي
مشن يدورن عليهم
سهى: نجاح تي خيرك مش لابسة
نجاح: ليش بنلبس وين بنمشي
فاطمة: هيا نجوحة بالله عليك امشي معانا بلاش منه الجو هذا
نجاح: لالا امشن مربوحة نلبس حتى قفاطين حنة كان مالقيتش
إكرام: والله يانجاح كان مامشيتي حتى احني مش ماشيين ايوا لخالق الراس قاطعه أنتي امشيتي كلمتيه عشانه وتبينا نخلوك هنا
نجاح :بدون نية باهي تمام عدي جيبيلي عبايتي تلقيها مرمية في الدولاب وخودي الشاربة عاقدة بيها أمي راسها
فاطمة :ههههههههه عطك الهناء تي كان عاقدة بيها أمك راسها شن قاعد شكلها
مشن دخلنها للدار وطلعن هديكا العباية لمن عام جدي قعمز ومرقعة مية مرة
طلعتها ريناد: 🙊 هدي عباية تنطلع فيها يانجاح
نجاح: جيبيها جاي ينطلع فيها شن خايف من يشبحلي هو عندي زي العسل هالعباية
فاطمة: باهي غير جيبي نحددوها رايحة تقول واكلتها بقرة
نجاح: خلوني براحتي بقرة لا ثور تي وين الشاربة يانواااااااال 😡😡 تي وقتها المشية هي

المهم لبسنها وطلعت
أكرم: لما شافها مش قلتي بتخيطي شكارة خيشة شن صار
نجاح: مادخلكش أنت
إبتهال: هيا نجاح اركبي أنتي من قدام واحني الباقي ندبروا راسنا من وراء
أكرم :عارفينها مش سادها من وراء 😂😂😂 تبي مكان على حسابها
نجاح: اسمعن يابنات والله لبنروح راه جيت عشانكن انا مش جاية نضحك حد راه 😡😡
فاطمة: تي هيا وراس كرومه فوت الموضوع احني قلنالها تمشي معانا.
أكرم: باهي هيا أركبن
وركبت نجاح بجنب أكرم وهو كل مرة يحدفلها في كلمة وهي بتنحرق واصلة لحدها
وصلوا للسوق

Aml Mohalhel
.
.
.
يتبع لو عجبتكم المقدمة نكمل الحلقات
نتمنى تنال إعجابكم 😍😍