اسكريبتات متنوعه بقلمي / إيمان شلبي

لماذا انا ( البارت الاول )

اسكريبت🖤بقلمي ايمان شلبي 🖤
أنا اتجوزت عليكي

كنا قاعدين انا وجوزي في هدوء كالعاده نتفرج علي التلفزيون وانا سانده راسي علي كتفه كعاده كل جمعه يوم الاجازه بتاعته اللي بنقضيها سوا في البيت حتي مش بنخرج  بناء علي رغبته !

سمعت جملته من هنا وحسيت أن قلبي اتشق لنصين
لوهله افتكرته بيهزر لكن لا انا عارفه نبره صوته إن كان بيهزر أو بيتكلم جد !

بعدت عنه وانا ببلع ريقي وبقول بارتباك:
- اكيد بتهزر صح ؟!

لف بصلي وهو بيقول بكل برود :
- لا مش بهزر انا فعلا اتجوزت عليكي وهجيب العروسه تعيش هنا معانا في الشقه

قومت وقفت ودموعي سابقه كلامي اللي كان هربان من علي لساني
مش عارفه اقول ايه ؟! مش عارفه اعمل ايه ،هو فعلا اتجوز ولا انا بحلم ؟!

- ا اتجوزت

هزلي رأسه بكل برود :
- اه حقي

- حقك ؟!

قولتها بصدمه وذهول ودموع رافضه ترحمني دموع غلبت كبرياء الانثي اللي جوايا

قام وقف وقرب مني وهو بيطبطب علي خدي بكل برود:

- اه من حقي اتجوزك واتجوز تلاته غيرك كمان ،متقلقيش ياوسام ياقلبي انا كده كده مش هطلقك انتي هتعيشي معايا هنا وهعاملك زيك زيها بالعدل كل طلباتك هتكون مجابه

كنت واقفه مبرقه ، عقلي مش قادر يستوعب الكلام اللي بيقوله ،هو في وعيه ؟!
يعني حاسس هو بيقول ايه ،شايف نفسه ،شايف بروده وهو بيتكلم وبيقولي بكل البرود اللي في العالم

" أنا اتجوزت عليكي !"

هو مش عارف ايه اللي ممكن يحصل فيا ؟!
طب مش عارف ايه اللي ممكن احس بيه بعد الجمله ديه !

هو اكيد بيهزر ، اكيد هيطلع كل ده مقلب بيختبر بيه حبي ليه

اكيد " كرم" ميعملش كده فيا هو بيحبيني

مسحت علي وشي وانا بقول بضيق:
- بجد ياكرم مش وقته هزارك ده

لقيته ضحك وهو بيهز رأسه وبيضرب كف فوق التاني وبيقول بنفس البرود :

- يابنتي هزار ايه والله انا اتجوزت

- يعني ايه ؟ يعني ايه أنا اتجوزت عليكي ،وليه ليه تتجوز عليا أنا مقصره معاك في ايه ؟؟
رد عليا أنا قصرت معاك في ايه

كنت بقول كلامي وانا ماسكه في هدومه  وبهز فيه بكل قوتي

بعد أيدي من علي هدومه وهو بيقول بكل برود وقسوه:

- مبقتش احبك ولا بقيت انبهر بيكي زي زمان بصي ياحلوه بأختصار كده
انتي كنتي عجباني بس كنتي صعبه عشان كده اتجوزتك وخلاص زهقت

بعدت عنه خطوه لورا وانا ببصله بصدمه وذهول  وكسىره قلب لاول مره احس بيها

عارفين احساس انك تحب شخص اوي ،وتثق فيه اكتر من نفسك تديله كل  حاجه ،تديله مشاعرك ،تفتحله قلبك اللي كنت قافله بخمسين قفل لسنين طويله ويطلع في الآخر شخص ميستاهلش كل ده !

يطلع شخص بيخدعك زيه زي غيره ،يطلع شخص كان غرضه يكسرك  ويخرجك من حياته فيما بعد بكل قسوه

عارفين احساس الخذلان من اقرب الناس لقلبك ؟!

اهو ده كان احساسي وانا واقفه قصاد شخص معرفهوش شخص كان مخبي وشه الشيطاني ورا وش ملاكي مخادع

قربت منه وانا بمسح دموعي وبقول بقوه :
- طلقني

قعد علي الكنبه وهو بيولع سجاره :
- مقدرش للاسف

- هو ايه اللي مقدرش بقولك طلقني

نفث الدخان من بوقه وهو بيفرد ظهره علي الكنبه :
- مفيش طلاق ياوسام

قربت منه وانا بشده من هدومه وبقول بغل :
- بقولك طلقني وإلا

- وإلا ؟!

قالها برفعه حاجب وابتسامه خبيثه فبلعت ريقي وانا بحبس دموعي

- ط طلقني ياكرم

- مفيش طلاق ياوسام واللي عندك اعمليه

مسحت دموعي بقوه وانا ببصله بتحدي :

- حتي لو قولت لكل الناس اني لسه بنت ؟!

- اااااه

شدني من شعري لدرجه حسيت انه هيتخلع من راسي
كانت راسي لتحت وهو بيقول بشر :

- لو فتحتي بوقك هموتك
- طلقني وانا مش هقول لحد

-لا ياحلوه وانا عبيط ؟!

- ابعد عني سيب شعري يا**** سيب شعري عاااااا الحقوني الحقووووني

سكتت وبرقت برعب وانا شيفاه بيسحب السكينه اللي علي الطربيزه وبيقول بشر :

- انتي مش لازم تعيشي

يُتبع

#لماذا_انا
#إيمان_شلبي