اسكريبتات متنوعه بقلمي / إيمان شلبي

مسك الليل البارت التالت

مسك_الليل
#البارت_الثالث_ماقبل_الاخير

ااااه انا فين انا فين

قالت جملتها وهي بتتنفض من السرير وبتبص يمين وشمال
كانت في اوضه لاول مره تشوفها سرير مستشفي وادويه علي الكومود

ايديها متجبسه وراسها ملفوفه بشاش

ثواني وبدء عقلها يسترجع اللي حصل
حطت ايديها علي بوقها وهي مبرقه وبتقول بهمس ونبره صوت كلها رعب

- ل ليل

خرجت من الأوضه وهي بتحاول تركز في الطريق
الرؤيه كانت مشوشه قدامها ،دماغها بتوجعها وكأن في شاكوش بيضرب فيها ،رجلها مش قادره تشيلها ،عقلها بيتخيل الف سيناريو كلهم اسوء من بعض كلهم هيوجعوا قلبها عليه

- يا انسه ياانسه انتي ازاي تطلعي كده وانتي شكلك تعبانه

وقفت مكانها وهي بترمش عينيها اكتر من مره بصدمه وذهول
الصوت ده هي عارفاه كويس اوي حفظاه عن ظهر قلب طب ازاي متحفظهوش وهو أول صوت كانت بتتعلم منه النطق وهي صغيره !

لفت وهي بتتنفس وبتقول بدموع

- ل ليل

ليل باستغراب : انتي تعرفيني ؟!

مسك بصدمه : ليل انت مش فاكرني ؟!

ليل بتوهان : انا اسمي ليل؟!

قربت منه مِسك وهي بتهز رأسها بدموع : ا انت ا انت بتعمل عليا مقلب صح ؟؟

ليل وهو بيهز  راسه بنفي : لا بجد انا معرفكيش انا فاقد الذاكره ،انتي مين

مِسك بدموع اكبر : ف فاقد الذاكره ؟!

ليل وهو بيتنهد بضيق : ممكن لو تعرفي اي اللي حصل تقوليلي ا..

قطع جملته ومسك بترمي نفسها في حضنه وهي بتدفن راسها في صدره وبتقول بعياط ورعب

- انت لو كان جرالك حاجه انا كنت هموت فيها أوعي ياليل اوعي تسيبني انا مليش غيرك

قالت جملتها الاخيره وهي بتتنفض في حضنه
اما عن ليل كان واقف مصدوم من اللي عملته ،قلبه بيدق بسرعه رهيبه علي وشك يقف من التوتر وكم المشاعر اللي حاسس بيها وهي في حضنه !

هو لحد دلوقتي ميعرفش هي مين بس متأكد انها شخص قريب منه اوي قريب من قلبه لدرجه لما قربت حس أن روحه كانت مفقوده ورجعت

لف أيده حوالين وسطها وهو بيسند رأسه علي راسها اللي كانت عند قلبه بالتحديد وبيقول بهدوء وتساؤل: انتي مراتي ؟!

اتجمدت مِسك وهي بترخي ايديها ارتعشت ،حست انها علي وشك السقوط
كلمه زلزلت كيانها زلزلت روحها حركت مشاعر حاولت كتير تخفيها حركت قلب ميت كلمه حركت جسم راقد في الضلمه طلعتها للنور بعد ما كانت فاقده الامل