انا لك وطن وانت لي امان

1

واسمـك يروعنـي إلـى مـر طـاريـه
واحـب ملقـوف ٍ يسـولـف وطــراه

وامـر بيتـك مـن بعيـد ٍ..ولا اجـيـه
وانـا لونـه فـي يـدي (مـا اتـعـداه)

قربو من البيت ولف عزام على مبارك : هد هد امانه
ضحك مبارك وهو عارف انه ينتضر البيت الي يحبونه
هد مبارك وكملوا يغنون لين وصلت الشيله للجزء الي هم يبغون وغنى عزام معك بحماس وضحك مبارك من حماس عزام وكمل معه :

ويلي على ادري حبنا ((ويـش تاليـه؟؟))
وويلي على ادري وش ورى الغيب ويلاه؟؟

عشـان اشـوف اذا محبتك..((ترفـيـه))
والله لا اقـفـي عنّك..((استغـفـر الله)) .....

ضحك مبارك وقفل المسجل من دخلوا لديرتهم ولف عزام : وش يقول الشاعر يا عزيّم ؟
عزام : علشان اشوف اذا محبتك ترفيه ... والله لا قفي عنك واستغفر الله
مبارك تنهد : واستغفر الله
دخلوا حوشهم ومشوا بالسياره لصندقة العلف نزلوا وطلع عزام للصندوق ومبارك عند باب الصندقه واخذ عزام الشد الاول واعطاه مبارك علشان يرصها جنب بعض ولفوا من جاء صوت خلفهم : ولاتعبتوا
كلهم بصوت واحد : ولا ندمت
قرّب منهم مشبب وهم يشتغلون : هاه بشرّو كم لقيتوا حزمه ؟
لف له عزام : ٣٠ يابوي وبقى من الدراهم الي اعطيتني الف
لف مشبب لمبارك ورجع ناظر عزام : خل الدراهم معك اقسمها بينك وبين خوك
رفع صوته : ومبارك غريبه ماله حس
مبارك لف له : ارحب
قرّب منه مشبب : عسى ماشر كنك زعلان
مبارك : ابد تعبان من الخط بس
مشبب : قد نهيتكم عن مسرا الليل وعيتو الا به
عزام : معليه يابوي اهم شيء انجزنا ولحقنا العرب من بدري
ناظرهم مشبب وقف معهم لحد ماخلصوا ونزل عزام من الصندوق ومبارك قفل باب الصندقه ولف لهم مشبب : وقفوا السيارة فالهنقر والحقونا للفطور لاترقدون الا وانتو مفطرين
عزام : على خشمي
مبارك : انا بوقف السياره وجايكم
مشى عزام مع بوه ولف عليه مشبب : علامه خوك
عزام الي مستحيل يقول لاحد شي عن مبارك وهذا الي مقوي علاقتهم في بعض ان كل شيء يصير يكون بين مبارك وعزام ولا يطلع من بينهم : ابد يابوي ولا شي خاطره من امس ماش
ناظره بحده مشبب : تكذب علي ياورع امس
عزام : والله مافيه الا العافيه تضايق من شي وانهيناه
مشبب اخذ نفس: بتفضحكم الليالي وانا بوك
عزام ابتسم من شاف امه طالعه ولف لابوه : الله لايجيب الفضايح
تقدم عزام لهيله الي رحبت فيه : ارحب ثم ارحب هلا بوليدي هلا
عزام : الله يبقيش ويحيش كيفش ياحبيبة خاطري
هيله : بخير يمي بخير انتوا كيفكم
لف ورا عزام : خوك وينه
جاء مبارك : موجود موجود بس ينتظرش ترحبين به
هيله : ارحب تراحيب الحيا والسيل
ضحك مبارك وهو يبوس راسها : الله يعافيش
لف عزام لامه : وين العرب يمي
ضحكت هيله : العرب فالمدارس
مبارك : يزيد داوم
هيله ناظرت مشبب بضيق ورجعت ناظرت مبارك : عيا يمي عيا مدري شبلاه
مبارك : ابد يا يمي لا تشيلين هم ولا يضيق خاطرش انا اشوفه الحين واحاول فيه
مشبب : لا تحاول فيه خله اذا مابغى الدراسه والمدرسه فحلال بوه موجود بيعزّه ولا تبغون يسربت مثل خوه فالمدينه
عزام اخذ نفس وهو عارف الموال : يبه الله يهداك عبدالملك موظف ومع امه واخته
مشبب : بس عصاني
مبارك : يبه انت طارد امه وضاربها وانت عارف ان امه يتيمه ولا لها حد وهو توه متخرج ولاقي له وظيفه طلع مع امه وخذا اخته معه وصاين نفسه ومراجله
مشبب بحده : خلوه يوصلني علم ان واحد منكم بس واحد منكم بس بيسوي سواته والله لاتبرا منه اجل بتخلون اراضي بوكم وتهيتون فالمدينه
هيله الي تحاول تهدي الوضع قبل يشتد : يالله يالله يمي اجلسوا وسمّو بالله وانا بجيب الشاهي وبجي
جلسوا وافطرو وعم الصمت كسر الصمت مشبب : مبارك متى تبغى زواجك
اخذ نفس مبارك بهمس مسموع : يا لا اله الا الله
رفع صوته : يبه قفل على الطاري الله يخليك ويطول بعمرك
مشبب : لين متى الي في سنك عيالهم في طولهم
مبارك ناظر بوه : بشوف
وقف وهو يقول تصبحون على خير قام للمغسله ولف وراه وناظر عزام الي جاي : ورا ما افطرت
عزام ابتسم : وانت تخلي الواحد يفطر
عقد حاجبينه مبارك : انقلع افطر وفكني منك
ضحك عزام : يارجال اصبح اصبح وعي
قطع كلامه دخول بوه وخذا نفس وهو يغسل ناظرهم مشبب وعقد حاجبينه: كمل كمل شايفين جني
عزام : بسم الله بس خلص كلامنا ي بوي
دخل مبارك المقلط ومن وراه عزام وبتوا فرشهم ونزلوا ثيابهم وسمّوا بالله وناموا