Save Us

Chapter 4: Umpisa

Nawindang ang lahat nang makita nila ang kalagayan ni Chloe na kapapasok lamang sa loob ng classroom. Hindi nila mapigilang makaramdam ng takot at pandidiri dahil sa itsura ngayon ng kaklase. Kung iisiping mabuti ay hindi na ito maituturing pang normal dahil sa lala ng kaniyang panlabas na kaanyuan.

"P-Parang hindi na siya si Chloe," komento ni Alison na wala sa wisyong napakapit sa upuan ni Willow. Maging ang katabi ay hindi nakaimik matapos niyang makilatis ang itsura ng bagong dating.

"S-She looks like a freaking monster," nandidiring pahayag ni Shilloh. "Fuck, I cannot stand watching her. It's creeping me out," dagdag niya pa at hindi man lang nag-atubili pang sundan si Meadow na agarang umalis sa kaniyang tabi para daluhan ang kaklase.

"Deputa, anong nangyari sa'yo?!" Magkahalong gulat at takot na tanong ni Mills. Ramdam niya ang bahagyang pagnginig ng kaniyang katawan at ang agarang paglamig ng magkabilang kamay lalo na at hindi niya inaasahan ang biglaan nitong paglitaw. Idagdag pa na sa mismong paahan niya pa ito natumba.

Nataranta naman kaagad ang katabi ni Mills na si Collins nang nag-umpisang maging bayolente ang dalaga kaya kahit napapangunahan ng takot ay mas pinili pa rin nitong hawakan ang magkabilang balikat ng kaklase para kahit papaano ay pigilan itong makagalaw.

Nang unti-unti na itong kumalma ay doon na siya inihiga ni Ms. Garcia sa kaniya mismong kandungan at saktong pagdampi pa lang ng balat ni Chloe, ramdam na niya kaagad kung gaano kalamig ang temperatura ng estudyante.

"S-Sir Winston," biglaang usal ng dalaga. Saktong pagbitaw niya ng mga katagang iyon ay ang siyang muling pagragasa ng dugo mula sa kaniyang ilong at ang pagiging dominante ng kaniyang mga ugat sa leeg na para bang pinipiga ang kaniyang mga kalamnan.

"Anong meron kay Sir Winston, Chloe? May ginawa ba siya sa'yo?" sunod-sunod na tanong ni Mills na halatang mas lalong naguguluhan sa kasalukuyang kaganapan.

"He i-injected me s-something," pagpapatuloy pa nito saka binalingan ng tingin ang guro na bakas ang matinding pag-aalala sa kaniya. "I c-can't control myself a-anymore, Ms. Garcia."

Sa halip na magpadala sa emosyon ay mas pinili ng maestra ang umayos bago nilingon ang kaniyang mga estudyante.

"Tulungan niyo ako, dalhin natin siya sa clinic," pasya niya na siyang hindi na rin nila tinutulan pa. Mabilis na nakakilos si Cody at siya na ang bumuhat sa dalaga bago kinarga sa likuran. Sumunod naman kaagad si Mills sa kaniya para magsilbing suporta sa likod nang sagayon ay hindi mahulog si Chloe.

Kung pagbabasehan lang ni Collins ang kaniyang naobserbahan sa inaasal ng kaklase, nakakatiyak siyang hindi na normal ang kinikilos nito. Para bang hindi na ito tao kung gumalaw kaya nakakaramdam siya ng takot dahil tila hayop na ito kung kumilos. Mas lalo lamang siyang dinunggol ng takot nang mapansin niyang nilalapit ng dalaga ang bibig nito sa leeg ni Cody na tila ba balak na nitong kagatin kaya kahit naduduwag man siya na lumapit ay mas pinili niya pa ring hawakan ang ulo ng kaklase para kahit papaano ay mailayo iyon nang kahit kaunti.

"Bilisan mo lang, Cody," untag Collins sa binata nang hindi man lang ito binabalingan ng tingin. Nang makarating na sila sa clinic ay si Ms. Garcia na ang nagbukas ng pinto, pinasok nila kaagad si Chloe sa loob at maingat na inihiga sa hospital bed. Agad na napabitaw si Cody nang mag seizure ang dalaga kaya hinayaan na niya lamang ang kaklase sa kamay ng nurse.

"Hawakan niyo siya nang mabuti. Bibigyan ko lang siya ng pampakalma," utos ng nurse at agad namang sumunod ang tatlo. Dalawang kamay ang hawak ni Mills habang sa paa naman si Cody, si Collins naman ang humarang sa gawing bibig ni Chloe nang magsimula ulit itong magwala. Nang saktong maiturok na ito ng nurse ay unti-unting kumalma ang sistema ng dalaga pero hindi pa rin bumabalik ang namumutla nitong balat, miski ang temperatura nito ay mababa pa rin. Patuloy lang din ang pagdurugo ng ilong at bibig nito na siyang hindi matukoy ng nars.