Application For Divorce [ 离婚申请 ]

၈၈

"ဪ.."

ဒေါက်တာဖြစ်သူက ညင်သာစွာပြုံးရင်း စကားဆိုသည်။

"တကယ်တော့ ကျွန်တော်တို့ဆီမှာ ကိုယ်ဝန်သည်တွေအတွက် လူမှုဖူလှုံရေး ထောက်ပံ့မှုတွေ ကောင်းကောင်းရှိတယ်။ မင်းတို့သာ အဲ့ဒီအတွက် လျှောက်လွှာတင်လိုက်ရင် အာဟာရပြည့်ပြီး လတ်ဆတ်တဲ့ အစားအစာတွေလည်း နေ့တိုင်း ရနိုင်မှာ။ နောက်ပြီး ကိုယ်ဝန်ဆောင်နေစဉ်ကာလကစ ကလေးမွေးဖွားပြီးချိန်ထိ ဆေးရုံကို လာသမျှတစ်လျှောက်လုံး ကျသမျှ အဖိုးအခတွေကလည်း အကုန်လုံး ဖရီးပဲလေ"

"အာ~အတော်လေး ကောင်းတာပဲ"

၎င်းနောက် ဒေါက်တာဖြစ်သူက သူတို့နှစ်ယောက်လုံးကို ကြည့်လိုက်ရင်း စူးစမ်းစွာဖြင့် ရုတ်တရက် အမေးဆို၏။

"စကားမစပ် နှစ်ယောက်သားက ဘယ်လိုပတ်သက်တာလဲ"

"ညီအစ်ကိုတွေပါ"

ထိုအခါ ဒေါက်တာ၏မျက်နှာထားက ပို၍ စူးစမ်းချင်စိတ်အပြည့် ဖြစ်လာရလေပြီ။

"ဒါဆို သူ့ရဲ့အမျိုးသားကရော?"

ချန်းကျင်းက မည်ကဲ့သို့ ပြန်ဖြေရမှန်း မသိပါဘဲ ထိတ်လန့်သွားမိသော်လည်း ချန်းရွှီကမူ ထိုသို့ မဖြစ်ခဲ့ပါချေ။ သူက တည်ငြိမ်သောလေသံဖြင့် အဖြေပြုလာသည်။

"တကယ်တော့ သူ့အမျိုးသားက ဒီအကြောင်းကို သိတောင်မသိသေးဘူး။ အဲ့ဒါကြောင့် အဲ့ဒီကိစ္စကို ဖြေရှင်းဖို့ အချိန်နည်းနည်းလောက် ကြာလိမ့်မယ်"

"ဪ အဲ့ဒီလိုလား။ ဒါဆို တတ်နိုင်သမျှ အမြန်ဆုံး ဖြေရှင်းပြီးဖို့ လိုမယ်နော်။ ပြင်ဆင်နေဆဲကာလအတွင်းမှာ တစ်ဖက်ပါတနာရဲ့ လက်မှတ်လည်း လိုသေးတာမို့လေ"

သို့နှင့် စကားပြောခြင်းအမှု ပြီးဆုံးသွားသောအခါ ချန်းရွှီသည် ညီဖြစ်သူကို ကူ၍ ဆေးရုံအပြင်ဘက်သို့ တွဲခေါ်လာပေးခဲ့သည်။ ၎င်းနောက် အပြင်ဘက်မှ လေအေးအေးများကို ခံစားရသည့်အချိန်မှသာ ချန်းကျင်းကိုယ်တိုင်ကလည်း အနည်းငယ် သတိပြန်လည်လာရခြင်း ဖြစ်၏။ သတိပြန်လည်လာလာချင်း သတိထားမိသည့် ပထမဆုံးအရာသည်ကား သူ၏လက်ချောင်းများ တုန်ရီနေကြောင်းသာ။