High Energy QR Code [ Myanmar translation ]

Chapter 24 _ စန္ဒရား

ထိုစီနီယာကျောင်းသား၏ နာမည်မှာ သီခွမ့်ဖြစ်ပြီး၊ အရပ်က ၁၉၀ စင်တီမီတာ ရှည်လျားသည်။ သူ၏ ခန္ဓာကိုယ်ပုံစံအနေအထားအား ခြုံကြည့်ရလျှင် အထက်တန်းကျောင်းသားတစ်​ယောက်နှင့် လုံးဝမတူပေ။ လူတွေကို ပြတ်သားပြီး တုံ့ဆိုင်းခြင်းမရှိသည့် ခံစားချက်ကိုပါ ပေးနေသည်။ တစ်ချက်ကြည့်လိုက်ရုံဖြင့် သူက ဝူယွီနောက်ကွယ်က လူဆိုတာ ရှင်ယဲ့ သိလိုက်သည်။ သီခွမ့်က ဝူယွီအား လူရှေ့မှာ ကျန်ကစားသူများကို အာရုံလွှဲခိုင်းထားပြီး။ သူကိုယ်တိုင်ကတော့ နောက်ကွယ်၌သာ လှုပ်ရှားနေတာဖြစ်သည်။

သူတို့၏ တွေ့ဆုံမှုမှာလည်း တော်တော်ပင် လျှို့လျှို့ဝှက်ဝှက်ရှိလှသည်။ ယောကျ်ားလေး သန့်စင်ခန်းထဲ၌ ဖြစ်သည်။ လူအားလုံးအတွက်အကျုံးဝင်သည့် ပိုက်ဆံ၏ စွမ်းအားကြောင့်သာ မဟုတ်လျှင် အဆုံးထိ သီခွမ့်ကို ရှာဖို့ ခက်ခဲမှာဖြစ်၏။

သီခွမ့်၏ ပုံကို ကြည့်ရသလောက် ရင်ဆိုင်ရ လွယ်ကူမည်မဟုတ်သည့် အင်အားကြီးသော ပြိုင်ဘက်ဖြစ်ကြောင်း ရှင်ယဲ့ အသိအမှတ်ပြုလိုက်သည်။

ရှင်ယဲ့ တစ်စုံတစ်ခုကို စဉ်းစားမိသွားပြီးနောက် ဘယ်ဘက်အင်္ကျီအိတ်ကပ်ထဲမှ မိတ်ကပ်မှန်လေးကိုထုတ်ကာ၊ အဖုံးကို ဖွင့်လိုက်၏။ ထို့နောက် သူ့အား သီခွမ့်၏ ပုံကို ပြလိုက်လေသည်: "သူ့ကို သိလား?"

"မမြင်ဖူးဘူး" မှန်က ဝံ့ကြွားစွာဆိုလေ၏။ "ငါက အဆင့်မြင့်ကမ္ဘာထိအောင် ကစားခဲ့တဲ့ သူလေ။ ငါလောက် ကစားသူသက်တမ်းရင့်တဲ့ ပြိုင်ဘက်က ဘယ်လိုလုပ်ပြီး ဒီလို ရှုပ်ထွေးပွေလီကမ္ဘာလေးမှာ ရှိနိုင်မှာလဲ။ သူက ဒီတိုင်း ဘာမှမဟုတ်တဲ့ လူသစ်လေးပါ"

"အခုကြည့်တာကော ဘယ်လိုမြင်လဲ?"

"သေအောင် ရုပ်ဆိုးတယ်" မှန်၏ အသံမှာ အလွန်ပင် မနှစ်မြို့သည့် ပုံပေါ်နေလေ၏။

ရုပ်ဆိုးတယ်....ဟုတ်လား? ရှင်ယဲ့ သီခွမ့်၏ ပုံကို အပြန်ပြန်အလှန်လှန်ကြည့်လိုက်သည်။ ဘယ်လိုပဲကြည့်ကြည့် သူက ခန့်ညားပြီး တောင့်တောင့်ဖြောင့်ဖြောင့်ရှိသည့် သူဟု ခံစားရသည်။ သူ့ပုံစံက ကြမ်းတမ်းပြီး အရိုင်းဆန်သည့် အလှမျိုးရှိပြီး၊ ထိုခန္ဓာကိုယ် ပုံစံနှင့်ဆို မော်ဒယ်တောင် လုပ်လို့ရနိုင်သည်။ အခုခေတ်မှာ ထိုကဲ့သို့အသွင်အပြင်မျိုးက ရေပန်းစားသည်ပင်။