Application For Divorce [ 离婚申请 ]

၇၂

ချန်းကျင်းက လုထောင်အား ခံစားချက်မဲ့နေသည့် မျက်ဝန်းတစ်စုံဖြင့် ငေးကြောင်ကြောင် ကြည့်လာခဲ့၏။

"မဟုတ်ရင် ဘာလို့ ကိုင်မီရား ဆိုတဲ့ စာလုံးကို ရှာမိပြီး ခဏလေးအတွင်းမှာပဲ ခင်ဗျားက ကျွန်တော့်ဆီ ရောက်လာခဲ့မှာလဲ မဟုတ်ဘူးလား?"

"မင်းတစ်ယောက်တည်းကို သီးသန့် ပစ်မှတ်ထားခဲ့တာမျိုး မဟုတ်ဘူး"

လုထောင်က သက်ပြင်းဖွဖွချလျက် အကျယ်တဝင့် ရှင်းပြလာခဲ့သည်။

"ကိုင်မီရား ဆိုတဲ့စာလုံးကို ရှာတဲ့လူတိုင်းကို system က မှတ်တမ်းတင်ထားခဲ့ပြီးသား။ ဒါပေမဲ့ မင်းကပဲ စစ်တပ်ဆေးရုံကနေ ထွက်သွားပြီးတဲ့နောက်မှ အဲ့ဒီစာလုံးကို ရှာခဲ့တာမို့ တစ်ခုခု ဖုံးကွယ်ထားတယ်လို့ သတ်မှတ်ခံလိုက်ရတာ။ အဲ့ဒါကြောင့် ကိုယ်က တာဝန်အရ မင်းကို မေးမြန်းဖို့အတွက် လိုက်လာခဲ့တာ.. ဒီလောက်ပဲ"

လုထောင်က မတ်တပ်ရပ်လိုက်၍ စကားဆက်ဆို၏။

"မင်းအနေနဲ့ နောက်တစ်ခေါက် ထပ်ပြီး အမေးခံရနိုင်သေးတယ်။ ဒါပေမဲ့ ကြောက်စရာမလိုဘူး။ ဒီအတိုင်း အဲ့ဒီတုန်းက ကြုံခဲ့ရတဲ့အခြေအနေကို အမှန်အတိုင်း ပြောပြလိုက်ရင် ရပြီ"

ဤကဲ့သို့သော စကားအသွားအလာမျိုးမှာ အမြဲအေးစက်နေတတ်သည့် ခင်ပွန်းဖြစ်သူထံမှ ရှားရှားပါပါး ဖြစ်တည်လာသော နှစ်သိမ့်စကားမျိုး ဖြစ်ဟန်တူ၏။ အတိတ်အခါက ချန်းကျင်းသည် တစ်ဖက်လူဆီမှ ၎င်းစကားမျိုး ကြားရရန် တစ်ခါမျှပင် စိတ်မကူးခဲ့မိပါချေ။ သို့သော် ယခု လက်တွေ့ကြုံရသောအခါတွင် သူသည် သေးသေးလေးမျှ မအံ့ဩမိပါဘဲ ကျောက်ရုပ်ကဲ့သို့ ငြိမ်နေခဲ့မိလေ၏။ ချန်းကျင်းက စိတ်မပါတပါနှင့် "အင်း" ဟူသော အသံခပ်ဖွဖွ ပြုပြီးနောက် ရုတ်တရက် အမေးစကားဆိုသည်။

"အဲ့ဒါဆိုရင် အဲ့ဒီတုန်းက ကိုင်မီရားနဲ့ ပြောဖြစ်ခဲ့သမျှ စကားတိုင်းကို...အမှန်အတိုင်း ပြောပြပေးရမှာလား?"

လုထောင်၏ကျောပြင်မှာ အနေရခက်စွာဖြင့် အနည်းငယ် တောင့်တင်းသွားရ၏။ သို့သော် တစ်ဖက်လူနှင့် မျက်နှာချင်းဆိုင်နေသည့် သူ၏မျက်နှာထားကမူ မည်သည့်ပြောင်းလဲမှုမျှ မရှိခဲ့ပါပေ။