Reality in My Dreams [2014] ✅

RIMD: Dream #9

Reality in My Dreams

 

RIMD: Dream #9

 

Kahit na naguguluhan ako sa misteryong nangyayari sa buhay ko ngayon, nakaramdam ako ng sobrang gaan na pakiramdam. 'Yung pakiramdam na parang wala na akong dapat na itago at alalahanin pa. 'Yung pakiramdam na parang. . .bago ang lahat. Totoo pala ang closure. Akala ko dati, imbento lang ng ibang hindi maka-move on sa ex nila. Totoo pala.

Masarap sa pakiramdam.

Naguguluhan man ako dahil nagising na naman ako nang hindi maalala kung ano ang itsura ng lalaki sa panaginip ko, okay lang sa akin.

Gusto kong ikwento kay Glezel ang bawat panaginip ko pero ayaw niyang maniwala sa aking totoo ang lahat, kaya bahala na. 'Di na lang ako magku-kwento sa kanya.

"Ingat sa daan." pagpapa-alala ni Papa sa akin bago ako lumabas ng bahay para maglakad papunta sa eskwelahan namin.

"Opo."

Isa pang masarap sa pakiramdam, ay 'yung alam mong magka-ayos na kayo ng Papa mo. Kinamuhian ko siya sa ginawa niya kay Mama. Galit na galit ako sa kanya dahil sa dami ng babaeng dinala niya sa bahay noon, at masamang-masama ang loob ko dahil hindi ko naramdaman sa kanya na proud siya sa akin simula nang umalis si Mama.

Hanggang ngayon, nasa puso ko parin ang galit, poot, sama ng loob at pagkamuhi ko sa ama ko. Pero alam ko sa sarili ko na hindi na ganoon kalala ang nararamdaman ko sa kanya. Dahil alam naman nating kahit magpatawad tayo, hinding-hindi na mabubura noon ang lahat ng nakaraan. At kapag naaalala ko iyon, pakiramdam ko, nagngi-ngitngit ako sa galit. Pero dahil maganda ang gising ko ngayon, pinigilan ko ang sarili ko.

Pagkapasok ko sa classroom namin, nginitian ko lahat ng mga kaklase ko na nakasalubong ko. Parang 'yung dati lang. Bago mangyari ang delubyo sa aming dalawa ni Kevin. Nang makita ko si Glezel, nginitian ko siya at umupo sa tabi niya.

"What's with the smile, girl? Nakaka-panibago, ah?" nakakunot-noong tanong niya.

"Wala. Maganda lang ang gising ko." nakangiti kong sabi. Sinimangutan naman ako ni Glezel. "Bakit?"

"Ikaw ba talaga 'yan?" halos naiiyak niyang sabi. "Bumalik na ba ang totoong Suzette na best friend ko?"

Tumawa naman ako at sinabi sa kanyang, oo. Para naman siyang batang paslit na ngumalngal at niyakap ako ng mahigpit saka paulit-ulit na sinabing, "Salamat sa pagbabalik, bespren! Akala ko, poreber ka nang monster, eh."

Napa-irap na lang ako at binatukan siya.

--x

Bukas na magsisimula ang Finals Exam namin at ngayon, hindi na ako magkanda-ugaga sa pagre-review dito sa kwarto ko habang nakadapa sa higaan ko. Dinner time na nga, pero hanggang ngayon, hindi pa ako bumababa. Gusto kong mataas ang makuha ko sa lahat exam. Gusto kong mag-focus na lang sa pag-aaral. Baka sakaling makalimutan ko 'yung sakit na pinagdadaanan ng puso ko ngayon.