Application For Divorce [ 离婚申请 ]

၄၁

"မ..မဖြစ်နိုင်တာတွေ လျှောက်ပြောမနေနဲ့"

လုထောင်က ၎င်းနှင့်ပတ်သက်၍ စွမ်းဆောင်နိုင်စွမ်း ကျဆုံးသည် ဟူသည်မှာ ဘယ်လိုမျှ မဖြစ်နိုင်သည့် ကိစ္စရပ်ပါပင်။ ထို့အပြင် ဤရက်ပိုင်း၌ သူတို့နှစ်ယောက်သည် မကြာခဏ ဆက်ဆံလေ့လည်း ရှိကြသေးသဖြင့် ချန်းကျင်းမှာ တားဆေးမတိုးတော့မည်ကိုပင် စိုးရိမ်လာရတော့လေသည်။

လုထောင်က သူ့အနားသို့ ကပ်လာရင်း ဆို၏။

"မင်း စိတ်မပူအောင် ကိုယ်သက်သေပြပေးရမလား?"

သို့နှင့် လုထောင်၏ လက်တွေ့သက်သေပြမှု အပြီးတွင် သူ၏ခန္ဓာကိုယ်နှင့် ပတ်သက်၍ ပြဿနာစိုးစဉ်းမျှ မရှိကြောင်းမှာ အတိအကျ သေချာသွားရသဖြင့် ချန်းကျင်းသည်လည်း စိတ်သက်သာရာ ရသွားရပေတော့၏။

နောက်နေ့မနက်ခင်းအစော၌ ချန်းကျင်းသည် ကွတ်ကီးမုန့်ချိုများအား စတင်၍ ဖုတ်လေသည်။ ၎င်းမှာ ချိုမြိန်၍ ချစ်စဖွယ်လည်း ကောင်းသဖြင့် ယူရိခါသာရှိလျှင် အကုန်လုံးကို စားသွားနိုင်လောက်သည်အထိပင်။ အများစုမှာ ပဲအရသာဖြစ်၍ ကျန်သောအချို့မှာ ရွှေဖရုံသီးနှင့် ပျားရည်အရသာ ဖြစ်၏။ သို့နှင့် ကွတ်ကီးများအားလုံးအား ဖုတ်ပြီးချိန်တွင် ချန်းကျင်းသည် အဝတ်အစားများအား လဲလှယ်လိုက်၍ ယွိအိမ်တော်ဆီသို့ မောင်းထွက်လာခဲ့ပေသည်။

မောင်းနှင်ချိန်မှာ တစ်နာရီနီးပါး ကြာမြင့်၍ နောက်ဆုံး ပင်လယ်ကမ်းရိုးတန်းကြီးအား မြင်ရချိန်တွင် ယွိအိမ်တော်ဆီသို့ ရောက်ရှိလာရပြီ ဖြစ်၏။ ချန်းကျင်းသည် ကားပါကင်အတွင်းသို့ သူ၏ကားအား ထိုးလိုက်၍ သူ့အား လာရောက်ဆီးကြိုလေသော ယွိအိမ်တော်မှ ဘဏ္ဍာစိုးကို ယဉ်ကျေးစွာ ပြန်လည် နှုတ်ဆက်သည်။ ၎င်းကားပါကင်အတွင်း၌ ပုဂ္ဂလိကယာဉ်များက များများစားစားမရှိပါချေ။

ရုတ်တရက် ချန်းကျင်းသည် ၎င်းယာဉ်များထဲမှ အတောက်ပဆုံးတစ်ခုဖြစ်သော အာကာသယာဉ် အသေးစားတစ်စင်းအား မြင်သွားမိလေ၏။ ၎င်းအာကာသယာဉ်မှာ အနီရောင်အဆင်းရှိ၍ ကားကိုယ်ထည်ထက်၌ ကောင်းကင်ယံမှာ မီးပန်းများ ပေါက်ကွဲနေသလို ပုံစံမျိုး ဖော်ထားခြင်းပင်။ သူသည် ၎င်းအား ကြည့်ရင်းကပင် တစ်ခုခုအား အမှတ်ရသွားမိကာ ဘေးနားမှ ဘဏ္ဍာစိုးဖြစ်သူကို မေးလာမိလေတော့၏။