Application For Divorce [ 离婚申请 ]

၃၉

"အဖွား..အဲ့..အဲ့ဒါက ကျွန်တော် တမင်သက်သက် ဖုံးကွယ်ဖို့ ရည်ရွယ်ထားတာ မဟုတ်ရပါဘူး။ တကယ်က.."

"အဖွားနားလည်ပါတယ်"

ယွိစီကွေးက နူးညံ့စွာပြုံးပြလျက် ချန်းကျင်း၏ခေါင်းအား ဖွဖွလေး ပုတ်ပေးလာခဲ့၏။

"မကြောက်ပါနဲ့ ရှောင်ကျင်းရဲ့။ မင်းရဲ့ အခက်အခဲကို အဖွားသိပါတယ်။ အဖွား မင်းကို ဒုက္ခရောက်အောင် မလုပ်ပါဘူး စိတ်မပူနဲ့ ဟုတ်ပြီလား။ ဒီလိုရုန်းကန်ရတာ မင်းအတွက် ဘယ်လောက်တောင် ခက်ခဲလိမ့်မလဲ။ မင်းလုပ်နိုင်တဲ့အတွက် အဖွားက အထင်တောင်ကြီးမိပါသေးတယ်"

ထိုအခါမှသာ ချန်းကျင်းသည် စိတ်သက်သာရာ ရသွားဟန်ဖြင့် သက်ပြင်းတစ်ချက်ချမိလေတော့၏။ သူ၏မျက်နှာကမူ ချီးမွမ်းခံရမှုကြောင့် အနည်းငယ် နီမြန်းလျက်ပင်။

ယွိစီကွေးက ဆက်မေးလာခဲ့သည်။

"အဖွားအစ်မရဲ့ ခြေထောက်ပေါ်က ခြုံထည်ကလည်း မင်းလုပ်ပေးထားတာပဲမလား"

ချန်းကျင်းသည် ဖြေးညင်းစွာ ခေါင်းငြိမ့်ပြလာခဲ့၏။ ထို့နောက် ယွိစီကွေးကပင် ဆက်ဆိုသည်။

"တကယ်တော့ သူလည်း အစကမသိဘူး။ ရှောင်ထောင်က စတိုးဆိုင်တစ်ခုခုကနေ ဝယ်လာပေးတယ်လို့ပဲ သိထားတာ။ ဟိုတစ်နေ့က အဖွားက သူ့ကို ဒီခြေအိတ်တစ်ဖက်နဲ့ အဲ့ဒီခြုံထည်ကို ယှဉ်ပြလိုက်ပြီး မင်းလုပ်ပေးထားတာ ဖြစ်နိုင်တယ်လို့လည်း ပြောပြလိုက်ရော သူအရမ်းတွေ မယုံနိုင်ဖြစ်နေတာလေ"

ချန်းကျင်းသည် ခဏမျှ ထိတ်လန့်သွားမိ၍ အလန့်တကြား မေးလာပေ၏။

"ကျွန်တော်လုပ်တာလို့ ပြောပြလိုက်တာလား!?"

တမဟုတ်ချင်းပင် နှမြောတသဖြစ်သော အရိပ်အယောင်အချို့က သူ၏မျက်ဝန်းအတွင်း၌ ဖြတ်ပြေးသွားခဲ့ရသည်။

"အဖွားက ကျွန်တော့်ကို သဘောမကျဘူး။ ကျွန်တော် လုပ်ပေးတာသာသိရင် သူသုံးတော့မှာ မဟုတ်ဘူး.."

ယွိစီကွေးက သူမ၏မျက်ခုံးတို့အား ပင့်တင်ကာ ဆိုလာ၏။

"ဒီတစ်ခါတော့ သူ ဒေါသထွက်မသွားပါဘူး"