Application For Divorce [ 离婚申请 ]

၂

သူကဆက်၍လမ်းလျှောက်နေသော်ငြား အနောက်မှ ချန်းကျင်း၏ခြေသံကို မကြားရပေ။ သို့နှင့် ခြေလှမ်းများကိုရပ်ပြီး အနောက်ကိုလှည့်ကြည့်လိုက်တော့ ချန်းကျင်း၏ ဖြူဖျော့နေသော မျက်နှာကိုသာတွေ့လိုက်ရလေသည်။

ချန်းကျင်း၏တစ်ကိုယ်လုံးက တုန်ရီနေကာ ပုံမှန်အတိုင်း ခြေလှမ်းဖို့ကိုပင် အနိုင်နိုင်။

“ စိတ်ငြိမ်ငြိမ်ထားပါ ဗိုလ်ချုပ်ကတော် ..အသက်ရှင်နိုင်ဖို့ အခွင့်အရေးက ဆယ်ရာခိုင်နှုန်းပဲရှိတယ်ဆိုပေမဲ့ ဗိုလ်ချုပ်သတိပြန်လည်လာဖို့ မျှော်လင့်ချက်ရှိပါသေးတယ်တဲ့ ” 

၎င်းရာခိုင်နှုန်းပမာဏကို ကြားသောအခါ ချန်းကျင်း၏တုန်ရီနေသောကိုယ်လေးက အနည်းငယ်မျှ ငြိမ်ကျသွားလေသည်။ လုံးဝကိုနည်းနည်းလေးပင်။ သူက ဖေလီ့ကို ကြည့်လာရင်း ခက်ခက်ခဲခဲနှင့် မေးသည်။

“ အဆိပ်ရည်ကိုထုတ်ပြီးသွားရင်ရော အကျိုးဆက်က ရှိလာမှာတဲ့လား ?” 

Zerg သည် အရေအတွက်အားဖြင့် များပြားသည့် အဖွဲ့အစည်းတစ်ခုဖြစ်ကာ အားလုံးကလည်း ရက်စက်ကြမ်းကြုတ်တတ်သည်။ ထို့အပြင် ၎င်းတို့က အဆိပ်နှင့်ပတ်သက်လျှင် တစ်ဖက်ကမ်းခတ် ကျွမ်းကျင်သည့် သတ္တဝါများလည်း ဖြစ်ကြလေ၏။ တစ်ခါတုန်းက ကပ်ရောဂါကူးစက်ခံထားရသည့် လူသားများအတွက် သီးသန့်ဖန်တီးထားသော တစ်လသက်တမ်းရှိကမ္ဘာငယ်တစ်ခုကို ၎င်းသတ္တဝါများ ကျူးကျော်လာခဲ့ဖူးသောကြောင့် သုံးရက်အတွင်း ထိုလူများအားလုံး သေဆုံးသွားခဲ့ကြရသည်။ ထို့ကြောင့် လက်ရှိတွင် ၎င်းသတ္တဝါများအား ကမ္ဘာ့အဆင့်အဆိုးဝါးဆုံး ဒုတိယရန်သူအဖြစ် သတ်မှတ်ထားခြင်းပင်။ Zerg များ၏အဆိပ်ကူးစက်ခံရသည့် မည်သူမဆို ကံကောင်းထောက်မစွာဖြင့် အသက်ရှင်နိုင်လျှင်တောင်မှ ၎င်းကူးစက်ခံရမှု၏ အကျိုးဆက်အမျိုးမျိုးကို ခံစားကြရသေးလေသည်။ ယခုတော့ လုထောင်က ကူးစက်ခံလာရလေပြီ။ သူ့အတွက် အကျိုးဆက်က မည်ကဲ့သို့ဖြစ်မည်ဆိုသည်ကို ချန်းကျင်းမတွေးရဲပါပေ။

ဖေလီက သူ၏နှုတ်ခမ်းအစုံကို တင်းတင်းစေ့လိုက်ရင်း တည်ငြိမ်သည့်ပုံပေါက်အောင် ပြင်ပြီးခါမှ ဆိုလာလေသည်။