البارت :الثاني عشر
الكاتبه :زمرد وليد
رائد :سمعت امي تحجي ويه شمس تخبلت وصحت يمه
شمس:اتاذيت من كلامها حيل ليش شنو شايفتني وهيج تحجي ويايه
وليش تعيرني اني ارمله اختنكت حيل وشفت رائد عصب على امه
اخذت ابني وكتلهم اترخص اني وان شاء الله توصلون بسلامه
سلمت على اخو وزوجته وطلعت اني وامي وابني امي حيل ضاجت بس محجت شي
رحت يمه وكتله مع السلامه رائد
جاوبني اني طالع وياج كتله ميحتاج ابقى هنا
طلعت وصلت الباب المطعم صاح وراي
كل الامي خاله من رخصتج دقايق
كلتله براحتك خاله
ها رائد تفضل
شمس اني اعتذر بنيابه عن امي ادري ضجتي من كلامها
حقج عليه شمس
اني ضحكت وكتله شبي كلام امك مثلآ تره محجت شي
وبالعكس اني مضجت منها ابنها وتريد تفرح بي
بس ضجت لان كالت ارمله بالعكس تره الارمله مو عار حتى تتعير
كال اسكتي كافي تحجين هيج
شمس:تقربت عليه وكتله ارجع اخذ راحتك
باوع بعيوني وتحسر اني اعتذر شمس
عفته ورحت للسياره اجه وراي نزل وليد وحضنه وباسه وسلم على امي
مباوعت عليه شغلت سيارتي وطلعت
رائد : اترخصت من اهلي وطلعت
طلعت وراها الباب المطعم حتى اعتذر الها ع الي صار
فاجئتني بردها من كالت امك حقها هيج تحجي
يعني معقوله اني ما اهمج بشي ؟؟؟
ليش هيج تتعاملين وياي بهل برود
ليش تأذيني ياشمس
خليها على راحتهااا اني كل لقاء لازم تصير مشكله بيني وبينها
رجعت على امي واخويه كتلهم يله باجر نرجع للبصره
امي باوعت عليه هاا رائد وصلتها للمحروسه
مجاوبتها لان عالم كاعدين كتلهم انتظركم بالسياره
طول الطريق واني ساكت محجيت حرف
وبالي يم شمس اريد اعرف ضاجت من كلام امي
وصلت لو بعدها شنو فكرت هسه بهل كلام
وصلت للفندق
امي حجت رائد قسم بالله تجر عدل لا تعرف دعوه الام شسوي
باوعت عليها بنضره غضب شبيج يمه
شنحجين
والك. رائد تعوف هل ارمله لا دعوتي اخليها دمرك يا رائد
شاب وتخبل والدنيا عيونها عليك تركض وره ارمله وعدها ولد مدكولي شبيك ولك تخبلت
عليت صوتي وكتلها ديري بالج تجيبين طاريها
كالت ها ولك ترفع صوتك عليه بسبب وحده تريد صيده مثلك
ولج يمه شتحجين صيده شنو يمه اصيح بعلو صوتي
واخويه يكلي اسكت
ولج يمه مو بحالي هاي ولا بالها يمي
ولج يمه صار اربع سنوات اعرفهاا واعرف هيه شنو
ولج يمه عوفيها بحالها ابوس ايدج
اي مو بحالك وتركض وراك هيه وابنها
ولك رائد ادمرك ولك اني ام احطمك والله
توكف بوجه امك علمود وحده ممعروفه منين ما منين
والله يا رائد اسوي حياتك جحيم اذا تقربت منها
لو اني لو الارمله
بت خالك شبيها ايلاف دكتوره وتخبل ومن قبل اكولهم الرائد محجوزه
رائد: لو تبقى ايلاف اخر وحده بالدنيا ما افكر بيها زوجه الي خلي يفيدج هل كلام
تدلل يا رائد خل اشوف منو يربح بالنهايه اني لو الارمله
عفتها ودخلت للغرفه
دخلت وافكر بكلام امي وشمس
اتاذت بسببي هل بنيه هواي اسف شمس بس هاي أمي 💔
سامحيني اذا جرحتج بشي احس دموعي نزلت وحدها
اول مره دمعتي تنزل على شخص بعد وفاه والدي
دخل عليه اخويه وشافني كاعد
كلي رائد هاي امنه ربتنه وتعبت علينه ملازم توكف بوجها
كتله امك الي سوته مو قليل بحق البنيه
كال حقك بس مهما يكون هاي امنه
حضني رعد نمت على جتفه دموعي تنزل وحدها
باوع عليه وابتسم كلي رائد هل كد تحبها
معقوله رائد صار عنده احساس ومشاعر وضل يحب
باوعت عليه وكتله شلون ما احبها واني اعرف شنو هيه
اعرف تفاصيل يومها وحياتها اعرف شبيها مابيها
اعرف نقاوتها واخلاقها شلون ما احبها واني وياها صار سنين
اني مو بس احبها رعد
اذا تريد روحي انطيها الها وما اكول لا
رعد :هههههههه واخيرآ وكعت بالحب وكعتك مووو
رائد:ابتسمت والدمعه بعيني اي وكعتني
رعد :هيه تدري بيك تحبها لو لا
رائد :متدري اخاف احجي اخاف اخسرها اذا حجيت لان اعرف تحب زوجها ودائمآ تجيب سيرته واني ما اريد خسارتها ضام وجعي بكلبي يا خويه
رعد :الله يساعدك يا خويه ويحنن كلب امي عليك
رائد:امين
يله اني طالع اخذ راحتك
رائد :اخذ راحتك خويه
طلع رائد كمت غسلت وجهي
واتصلت بشمس
هلو رائد
هلو شمس شلونج
الحمدلله زينه
وصلتي
اي وصلنه
وليد شلونه
زين الحمدلله
ليش كوه تحجين بعدج ضايجه من الي صار
لا مضايجه بس تعبانه وراي شغل الصبح
متأكده
اي متأكده وعندي طلب عندك
اي كولي
ياريت هل يومين منتواصل لحد مترجع وترتاح
رائد:خبالج عوفي مو وكته تره
شمس:ليش شحجيت حتى خبالي
رائد: شنو منتواصل انتي بيج شي
شمس:اي رائد اذا ممكن خلص وقت ويه عائلتك ومن ترجع نحجي
رائد :تمام براحتج
باي
باي
كلتلي هيج وراحت انتي ضايجه وهاي حجه حتى متحجين
اني هم اخليج ترتاحين مني هل كم يوم
شمس : امه اذتني بالكلام بس مبينت ابد
ما اريد نتعارك اني ورائد بسبب كلامها اخذت ابني ورجعت للبيت
اتصل بالليل وطلبت منتواصل الى من يرجع الكربلاء
خل يخلص وقت ويه العائله
نمت وكعدت ثاني يوم للشغل
شغل وتعب وناس
يله خل اغير جو اطلع من ضوجه البارحه
وصلت ولكيت الشباب موجودين
هلا بشمنه هلا هلا بهل طله هلا
كتلهم ها شماكلين مت الصبح ولكم
كالو منتظريج حتى تريكينه
اي بدت لواكتكم من الصبح ههههههههههههه
اي نتلوك للكمر عادي يعني
اسكت ميثم تره اطلع ضوجتي بيك والله مو كت تحشش
هسه دتعالي نتريك وبعدين نتعارك
ابو بطن انته ولا تشبع ابتليت بيك اني مووو ههههههههه
امون عليج شموسه
اهووووو ولكم اخذو هذا بده الغزل مالته والكلام الحلو علمود يتريك براسي
ضلو يضحكون يله عزلو تعالو نتريك
اخذتهم وطلعت
اجه كابتن سوري مرتب وحلو حيل
تفضلو شو بتطلبو هههههههههههه
خله المينيو وراح
زينب كالت يبو شكد حلو هذا ولكم
باقر باوع عليها كللها شبيج تباوعين للغريب مو بعينج احنه
صدك ضحكت عليهم حسيته يغار على زينب بس هيه ثوله متحس
نوب كتلهم تره صدك حلو هل كابتن هاااا شمس طالعه عينج ولج
ميثم كلي شمس صدك انتي شبيج معقده ولج دحبي انحبي
شو تخبلين وكل العالم تتمنى كلمه منج
تذكرين هذا ابو الجمله الحلو شلون لطش يريد رقمج
وضل يروح ويرجع علمود يشتغل هههههههههههه
والله راح بيها بوكتها يباوع عليج وكوه يحجي
كتله ميثم عوف سوالفك التافه واطلب يله
خلفله عليج اني سوالفي تافه
ضحكت وباوعت عليه كتله من تحب انته اني احب ههههههههه
كال ان شاء الله نحب سوه
كتله ديله اطلبو خل نرجع الشغلنه
اجه الكابتن مره ثانيه
جان زينب دكول ولكم كلبي ميتحمل
باقر خزرها وكلها بطلي لكافه
هههههههههههه
يحب زينب الثوله حسي شبيج
هاي الفطيره متحس
خلصنه اكل وسوالف ورجعنه للشغل
ناس ترروح وناس تجي تعب بتعب بس احسن من البيت
هذا اليوم كله محاجيه ويه رائد اكيد هوه بغداد اليوم الله يسهله
يله شباب نعزل اليوم تعبنه
يله تمام
كل واحد راح على بيته اشوفكم بخير حبايبي
وانتي بخير شموسه
رجعت للبيت تعشيت ورتبت البيت وغسلت ملابس وسبحت
حظرت ملابس الشغل مال ثاني يوم وضربتهم اوتي
اوووف تعب اليوم هلكانه اريد اناام
بس اجه رائد بالي يوميه نحجي هيج وقت اكيد نايم هسه
تعبت ونمت
رائد :سدت الجهاز وكالت منحجي يومين
اني هم كلت ع راحتها قررت ارجع للبصره بس زوجه اخويه كالت عفيه نروح البغداد
احنه اجينه اجينه كتلها الخاطرج بس
حيل فرحت
اخذتهم البغد اد زارو ورتاحو
طلعنه بالليل المول المنصور اجواء حلوه حيل
بس متهنيت بيها لان بالي يم شمس
اتمنى احجي وياها بس هيه متريد
يله براحتها اني باجر راجع ونحجي
خلصنه ورجعنه للفندق نرتاح
كله كاعد ويه امي واخويه
امي كالت اليوم ويانه كاعد شنو الارمله ماكو اليوم
باوعت عليها بنضره غضب ورحت الغرفتي
شوكت تبطلين هاي سوالفج يمه
شيصبرني
نمت من التعب واني افكر بشمس
كعدنه الصبح رجعنه للبصره وصار يومين محاجي ويه شمس
بس اوصل اخابرها
اريد اسمع اخبارج اشتاقيتلج
وصلت للبصره كبل الغرفتي
اتصلت بيها
هلا شمس
هلا رائد
اني وصلت الحمدلله ع السلامه
الله يسلمج
سالتها على ابنها بس احسها كوه تحجي او متريد تحجي ويايه
كتلها صاير وياج شي
كالت لا مصاير بس تعبانه من الشغل
ها الله يساعدج
ويساعدك
رائد :اشتاقيت اسمع اخبارج
شمس :اشكرك
شمس ليش تحجين رسميات وياي شبيج ؟؟
مابيه والله بس اكولك تعبانه
زين نامي ارتاحي هسه وباجر نحجي اني هم تعبان
باي
باي
انتي مو تعبانه بس متريدين تحجين وياي
ادري بعنادج وبقساوه كلبج
يله خليج براحتج
نمت وكعدت الصبح دزيتلها
جاوبتني وكالت اني رايحه للشغل
ضليت احجي وياها بالشغل
ورجعت حياتنه ورجعنه نحجي مثل اول تسولفلي واسولفها
وكتنه من الصبح لليل ويه بعض
امي حست عليه احجي وياها تباوعلي بنضره غضب
احسها عدو الي مو أم
شمس بالشغل خل اطلع للكورنيش اغير جو
طلعت ورجعت بالليل حجيت وياها ونمنه
ثاني يوم الصبح كعدت دزيتلها صباح الخير
ردت عليه صباح النور اني طالعه اوصل ونحجي
كلت انتظرها هيه توصل الساعه ٨ونص لو تسعه
اتاخر الوقت وشمس ماكو اتصل مترد اراسلها مترد
وين راحت هاي وليش مترد
شبيها شصاير وياهااا
التفكير دمار ومطايق احد
حتى الي يحجي ويايه.
اتعارك وياه وين راحت الساعه ٢ وهيه ماكو
شمس :دزيتله رساله ورحت على شغلي لكيت المكان مخبوص ورجال يصيح ويحجي ويهدد
كتلهم خير شكو كال ياخير وبضاعتي نقص وماعدكم مصادقيه واني وياكم والمحاكم
اتقربت عليه وكتله تفضل كولشي ينحل بل هدوء
كعد جاوبله مي وعصير
كتله حقك تاخذه من عيوني انطيني وصولاتك والبضاعه الي تريدها راح تاخذها واقل من سعرها
جبته بالسياسه لان اني الي سمعتي حتلو اخسر تتعوض الخساره بس السمعه لاااا
ضليت اراجع الوصولات والاورق وادقق والشباب ويايه
جهزت طلبه ونطيناه هديه ويه الطلب شفته ارتاح وغير اسلوبه
تشكر مني وطلع
هم ونزاح ولكم شهل تعب شهل ناس
الله يساعدج يا شمس شلون متحملتهم
ميخالف لازم نتحمل علمود مصلحتنه
عاشت ايدج والله تفكيرج يعجبني واسلوبج هم
يله ميثم بلا لوكه امشي كمل شغلك
شمس جوعانين الساعه ٢ تره
اي تعالو ناكل اني هم جوعانه
اكلت ورحت استراح فتحت الجهاز اووووووو
شنو هاي رائد خابص الدنيا
الساعه ٣ اتصلت عليه
هاااااا شمس وينجججججج
موجوده ولج شنو موجوده كلبت الدنيا عليج
شبيك موجوده عندي شغل
شغل ولج ياشغل هذا الي ميخليج تردين ليش تخبليني شمس
يصيح بصوت عالي وعصبي
اخر شي كتله اهدء خل نحجي
كتله اكو زبون وهيج صار ويايه ولازم احل الموضوع
اي علاقل طمنيني يابت العالم
شمس:ملزمت التلفون تره والله
وهذا منو الي يصيح
ماعاش الي يرفع صوته واني موجود
لا تتعاملين ويه هيج ناس بعد
شمس:هذا شغل لازم نكسب العالم
وائد: اكسبي ناس اودام افتهمتي
اي افتهمت
يله باليل نحجي اروح اكمل شغلي
رائد:روحي عيني كملي
سديت الخط ورحت
لكيت امي تسمعني احجي ويه شمس
جن جنونها عليه
رائد تعوف هل ارمله لو لاااا
احجي ولك مخلت عقل براسك ولك
اتركي الموضوع يمه
ما اتركه لو على موتي
اليوم بيت خالك يمنه معزومين ما اريد الخلقه مكلوبه
راح يجي خالك وبنته وزوجته
هلا بيهم اصلآ اني طالع
ماكو طلعه رائد راح تكعد وتتعشه ويانه
وهذا امر
صار يمه راح ابقى
صار العشه
اجو بيت خالي وبنتهم هم وياهم
تتموع وتدلع حتى تثير انتباهي
تعشينه وخلصنه اجت كعدت يمي
شلونك يا الثكيل
هلا ايلاف اني زين انتي شلونج
والله صرت بخيرمن شفت وجهك الحلو
اشكرج
امي شكد حلوين وانتو سوه اووف يا خويه شوكت نفرح بيهم
خويه شوكت متقررون احنه وياكم
ان شاء الله عن قريب افرح برائد وايلاف
باوعت على امي بعصبيه وكمت الغرفتي
شويه واحس الباب انفتح
اكدر ادخل اي ايلاف تفضلي
اجت كعدت يمي ع الجربايه
شبيك رائد شوكت تحس بحبي الك
اني ميته عليك
ايلاف سدي الموضوع
ما اسده رائد وبعدين اني شناقصني جمال ودالال
ودكتوره والكل يتمناني
محجيت شي
اجت تقربت مني ولزمت ايدي تقربت عليه انفاسها على ركبتي حاولت تبوسني دفعتها
وكتلها اطلعي بره
باوعت وكالت بسيطه رائد
طلعت الاهلها اخذتهم وطلعت
امي عرفت صوجتها البنت اخوهااا
ولك رائد شسويت وياهااا
مسويت شي هيه قليله ادب بنت اخوج
تخسى ولك هاي بنت اخويه متحجي عليها كدامي
ولك هاي ايلاف مو الارمله الي تتمعشك وتحبها
كافي يمه شلزكتي بسالفه الارمله
ضليت اصيح بالبيت اتركيها طلعيها من بالج البنيه مو يمج
حرام تتهميها يمه
ولك ثاني مره تعلي صوتك عليه بسببها
ولك امك اني ربيت وتعبت تالي تعبي يروح الارمله
ليش ولك يمه شنو الي ناقصك
يمه شلون راح تفهميني
متفهميني
شفهمك ولك شبابك يروح وياها ليش ولك حرام
ولك رائد اتبره منك اليوم الدين اذا تقربت الها
وطول عمري ادعي عليك ما اخليك ترتاح
كاافي اسكتي اسكتي
صيح ولك صيح
صيح على امك الي ربتك يالمعدل
اشوف امي صارت عصبيه حيل وهيه مره جبيره ومتخربطه خفت عليها
عيونها دم صارو
وبس تصيح عفتها كلت بلكي تهدء خل اروح الغرفتي
صعدت ضلت تحجي وتصيح وسكتت
صار هدوء
وره شويه اسمع زوجه اخوي تصيح الحكووو خالتي تخربطت
نزلت اركض بدون شعور امي ولكم امي شبيها
اخذتها للمستسفى وعقل مو براسي
حالتها تعبانه حيل
ضربوها ابر ومغذيات صارت زينه
اجت ايلاف دكتوره بالمستشفى الي اخذت امي الها
تباوع عليه
وتضرب امي ابر
وتنطيها علاج
انتظر امي تصحى اعتذر يمه اذا زعلتج لو عليت صوتي عليج
بس ارجعيلي ما اريد شي بالدنيا
صحت امي ورجعتها للبيت بس حيل تعبانه
كاعد كبالها وهيه ع الجربايه
كلتلي رائد اني موتي بسببك
كتلها يومي قبل يومج يمه
رائد اختار يمه من هل لحظه لو اني لو الارمله
يتبع
