البارت التاسع ::
الكاتبه :زمرد وليد
صعدت شمس للمنصه مشفت منها شي
شفت وحده لابسه بنطرون رسمي وستره وشال بيجي وتقدمت
اتقدمت ع المايك وصار وجها ع الحضور
بوقتها احس جسمي مو بمكانه
احس نفسي يصعد وينزل
معقوله هاي شمس شنو هل تغير شنو هل قوه الي هيه بيها
معقوله واكفه كدام هل كد ناس وتحجي بزوجها وبكل ثقه وحب
عرفت هيه كدرت تكمل حياتها وتشق طريقها
عرفت ذاك الحزن ماكو والالم والكسره
اخذت تلفوني وصورت فيديو قربت الفيديو عليها
صايره احلى بهواي ضعفانه
تحجي وهيه ممهتمه الاعداد الناس الموجودين
معقوله هاي انتي ؟؟؟
ليش من سمعت اسمج نفسي يصعد وينزل
ليش اذكرت طلعتتنه وسوالفنه وضحكتج
ليش اني كلت عليج هل كلام واني ما اعرفج
افكار تروح وتجي
خلصت كلمتها وتشكرت من الاداره
اتقدم المدير كرمها وكرم ابنها
شفت ابنها كلبي طاك عليه كبران صاير زلمه
شفت ناس ترحب بيها وتسلم عليها
شلون اكدر احط عيني بعينج
اريد احجي وياج بس ما اكدر
اريد احضن وليد مشتاقله
شلون تصير عندي جرئه اتقرب منها
خاف بعدها منست موقفي وضايجه مني
اصدقائي كاعدين يمي اسمعهم يحجون بيها
يكولون والله طلعت مره زوجه صاحبنه
اندريت عليهم بعصبيه وكتلهم انتو ماعدكم اخلاق
شنو هيج تحجون ولكم
كالو شبيك شدعوه انفعلت
عفتهم وكمت من مكاني
ضل بالي وفكري يمها اريد اتقرب بس ما اكدر
خاف تردني
عيني عليها بكل لحضه ودقيقه
شفت ولد موضف ويانه تقدم وسلم عليها وما اعرف شنو كللها
شفتهم راحو سوه كعدو على طاوله
هنا اني صارت عصبي حيل وما اعرف شصرف
كمت من مكاني ورحت على الطاوله الي همه بيها
تقربت بس تراجعت ما اريد اغلط مثل غلطي الاول
اصحى وارجع المكانك
رجعت كعدت بدت الاحتفاليه والفعاليات الي بالشركه
وموسيقى واغاني وناس تصعد منصه وناس تنزل
كلشي مفهمت بس بالي مشغول بيها
اثناء الاحتفال مطلوب مني اوجه كلمه للحظور الموجودين
اني واحد من الاشخاص الي مختارتهم الشركه للتقديم حسب الكارزما والاسلوب طاح الاختيار عليه لازم اني اصعد ع المنصه واحجي
اني من شفتها طار الكلام وطار كلشي من بالي وممستعد اقدم اي شي
كان موقف محرج حدآ بالنسبه الي
انطوني خبر لازم ربع ساعه اصعد القي كلمتي
وصل السره هيه من ضمن الناس الي كاعدين قريبه ع المنصه
لقيت كلمتي ومن ضمن الكلام تكلمت عنها
وكلت اكو ناس اني فرحان بوجودهم ويانه اليوم
وجودهم احلى شي بهاي الحفله مكنت متوقع هل حظور القوي منهم
ربي يوفقهم ويسعدهم بحياتهم ونشرف بيكم ويانه
نزلت اجت عيني بعينا وابنها كاعد بصفها عرفني كام
بدون تردد رحت حضنته وبسته
باوعت عليها وكتلها شلونج ام وليد
شمس:الحمدلله تمام انته شلونك
رائد :اني الحمدلله بخير اسأل عليكم
شمس:تسأل عليك العافيه ان شاء الله
رائد :نكدر نكعد على ذيج الطاوله مشتاق الوليد
شمس :تمام
كعدنه سولفنه وباوع بعيونها اني بحلم لو بعلم
حجيتلها على سفري وحياتي صار سنه محاجين
هيه هم حجتلي شلون مخلصه وقتها وكامت تشتغل وفتحت مشروعها الخاص
حيل فرحت الها
حسيت بقوتها وشجاعتها
حسيتها نهضت من جديد
ضلينه نسولف اخذنه الوقت ومندري بالعالم
كلش فرحت بشًوفتهم
احساس الاول رجعلي اول ملتقينه
كتلها بعدج بالبصره كالت اي بعدني
بس لازم ارجع هسه لان الطريق بعيد عن عيالي
كلتلي هيج اني ما اريد تروح نريد نبقى نسولف
كتلها اكدر باجر اعزمكم ع العشه اتمنى متردوني
تعذرت ومقبلت
كتلها وذا اكولج الخاطر وليد
كالت تمام ان شاء الله
كتلها باجر ب ٦ موعدنه بفلان مكان
هذا رقمي خلي يمج
اتفقنه نطلع للكورنيش ونتعشه بره
كالت لازم نروح اترخص منك
وصلتهم لسياره وراحو واني رجعت للبيت
الفرحه والضحكه مفاركتني دقيقه
شيجيب باجر
راح ارجع اشوفها
اباوع بالمرايه واضحك
سبحت بدلت ونزلت يم اهلي
كاعدين اخويه وزوجته وامي وابنهم
امي شافتني العب ويه ابن اخوي واضحك
كالت رائد شبيك تخبلت اليوم شبيك يمه
اول مره هيج تضحك وتشاقه
رد اخوي عليها اكيد اكو شي مفرحه كولنه شبيك ياخوي خل نضحك وياك
امي يله وليدي المدلل كول شبيك اليوم شهل طاقه الظاهر الشركه مكرمتك مووو
اخوي اكيد يمه اكراميه مال عشرين سنه
اكولك رائد مدام عندك فلوس ونايم عليهن باجر عكبه تموت هذا المنو تعوفه
امي ردت عليه اي والله رائد ولك يمه صارت امنيتي اشوفك عريس واطفالك تارسين البيت
رائد :سدو موضوع الزواج
ليش وليدي شكدك تصير بعد والعمر يمشي يا يمه وانته شاب حلو والف وحده تتمناك
بس كول اجيبلك احلى وحده بالبصره
رائد : يمه سدي هل موضوع ولا تعكرين مزاجي الله يخليج
براحتك ضل سفر ونسه ولبس متعرف شتريد من حياتك
عفتهم وطلعت الغرفتي افكر باجر
شراح البس وين راح اخذهم شلون راح يكون يومنه
........................
شمس :بعد رساله رائد رزلته وبعد محجيت وياه ولا تواصلت ابدآ
مستحيل رجال غريب يحجي هيج
مرت ايام وشهور وحياتي نفس ماهيه ونفس الروتين
وعلي وياي بكل دقيقه وبكل خطوه ميروح من بالي
مر تقريبآ ٣ اشهر من عركتنه اني ورائد
فد يوم داتصفح بالفيس وشفت منشور نجاح حفزني
انو لازم اسوي شي خاص الي بدل كعده البيت وهم الهي نفسي
فتحت بوتيك ملابس الملابس راقيه ومموجد منها بالسوك
كانت بدايه صعبه بس اتجاوزتها
تعرفت على ناس ساعدوني هوايه وضليت اسافر اجيب القطع الي اريدها
اروج عن طريق النت صارو عندي زبائن ومشروعي نجح واخذ مستوه حلو
خليت ناس ويايه تشتغل وسعت مجال عملي
صار الي اسمي بالسوك والعالم تعرفني
تعرضت الهواي مضايقات كولهم اتجاوزتهم واستمريت بشغلي وحياتي رجعت طبيعيه
...................
بفد يوم وصلتني رساله من رقم غريب
سلام
عليكم السلام
——————
شمس اني اعرفج
—————
ليش منو حضرتك ؟؟
——————-
واحد روحه بيج وعقله يمج ونفسه تريدج كان هذا كلامه الي
كتله كول منو انته كال ما اكلج بس اني اعرفج حتى قبل لا تزوجين
كتله شلون تعرفني كال اعرفج ونفسي بيج من زمان
——————-
كتله دكول منو لو احظرك
كال احظريني عادي مو مهم عندي الف خط غيره
بس خلي بالج شغله انتي رحتي مره مني ما اخليج تروحين مره ثانيه
ومراقبج بكل خطوه وشغله تسويها
———————-
كتله بطل قله ادب ولا تدخلي بعد لاديصير شي ميعجبك
كال ادخل والله متخوفيني
اني حظرته
رحت سولفت الاخويه وشوفته كلامه
كال يولي حظري وخلص
وره اسبوع رجع
من غير رقم
وكاتب شعبالج تحظريني ما ارجعلج
ولج عمري ٣٥ لا زواج ولا شي بسببج
وتريديني اعرفج باحلامج
كتله عيب هل حجي اتركني
كال ما اتركج الاخر نفس بيه
اخذت الجهاز. ونطيته الاخويه اتصل عليه وفتح مايك
سمع صوت اخويه
كله لا تحجي وياي انته اريد الي يمك تحاجيني
اخوي كله انته متستحي والله اطلعك اطلعك
ضل يضحك يكله كل ارقامي كلك طلعوني بس اختك ما اعوفها
رحت حذفت الوتساب وحظرته
ضليت افكر هذا منو وشيريد مني
اني ما اعرف احد بحياتي بس علي واني طفله فتحت عيوني عليه
هذا منو ياربي
حيل ضجت من هل سالفه
—————خابرت على زوجه اخويه يله تعالي ناخذ الاطفال نونسهم ونغير جو
طلعنه تونسنه ورحت اخذتهم للاعلاب
سوالف وضحك رجعت تقريبآ وقت متأخر
لكيت رساله من شركه زوجي ولازم احظر حفل نهايه السنه
متصلين عليه بس صامت ومشفت الى ان دزولي رساله
لازم يومين اروح للبصره حجيت ويه اهلي وخابرت حمايه ورحت
اني وابني وصلت هناك رحبو بيه عيالي
وعمو شاف ابني وضل يبجي
وراها كمت حظرت ملابسي مال باجر لازم اروح للاحتفال
رحت على ضياء ها ضياء تروح لو تعبان
كلي شدكولين انتي كتله انته عندك شغل وتتعب نروح اني وليد
كال يله تمام واني انتظركم علمود ترجعون ونطلع كتله تمام
اجه اليوم الموعود ما اعرف احد هناك وهوسه
كعدت اني وابني بمكان وحدنه
كل شخص لقه الكلمه مالته وصل السره اليه
قدمت كلمتي والكل حيو الكلام الي كلته
اجه مدير الشركه كرمني وتقدم الي بالشكر
وبعض اصدقاء زوجي اجو سلمو عليه ما اعرفهم بس للمجامله سلمت
رحت اخذت مكان وكعدت اني وابني
اجه شخص طلب مني توقيع للشركه هوه موظف رحت وياه وقعت ورجعت المكاني
اثناء الاحتفال سمعت صوت رائد
درت وجهي شفته صاعد يقدم كلمه
يمكن رائد ارتب واحد بالموجودين والعيون عليه شخصيته حلوه واسلوبه احلى والناس حيل تحبه بالشركه
قدم كلمته وكال كلام بنهايه الكلمه حسيته موجه الي
خلص ونزل باوع عليه من بعيد وعلى ابني
اجه اتجاهنه وحظن وليد كل قوته
وابني هم كله عمو مشتاقلك هواي
كله حبيبي واني اكثر مشتاق الك
احس الارتباك والخجل عليه سلم عليه
وكال تعالو نكعد هناك بعيدآ عن الهوسه
كعدنه وحجالي حياته وشلون خلص هل ايام سفر وشغل
وكلي انتي حياتج شلونها بديت احجيله على مشروعي
وشلون حققت شي حلوه بفتره قصيره
شجعني وفرح الي هوايه
ضلينه نسولف اخذنه الوقت ولازم ارجع لعيالي
لان حمايه منتظرنه نطلع
اترخصت منه وكتله لازم اروح
كال عندي طلب ياريت مترفضونه كتله تفضل
كال باجر عازمكم ع العشه انتي وليد
رفضت بس كلي الخاطر وليد وافقت
وصلني لسياره ورجعت لعيالي
——-________
رائد :حظرت ملابسي وحيل فرحان راح اشوفها باجر
راح ينعاد اول لقاء بينه ولازم يكون احلى من القبله
وين راح اخذهم وين رام نروح احجي بيني وبين نفسي
نمت وكعدت بالليل لكيت امي محظره العشه
هلا حبيبي نوم العافيه تعال تعشه يله
اجيت يمه بس اغسل
تعشينه وكعدنه نسولف بامور الحياه والسياسه والبلد والاوضاع
كتلهم اني بالمستقبل ما ابقى هنا
ضلو يضحكون كالو اخذنه وياك
كتلهم شي اكيد وياي
رعد : اي نروح وياك تخاف على فلوسك
رعد اخويه الي اكبر مني
ضليت اضحك وكتله اني وفلوسي فدوه الكم
امي كالت اسم الله وليدي
...............
رجعت صعدت الغرفتي
وبالي شمس كلت خل اراسلها باجر راح نلتقي ولازم اكولها المكان بالضبط
دزيتلها مجاوبتني
كلت يجوز نايمه تعبانه
وره ساعتين جاوبت هلا رائد اعتذر طالعين وماعندي نت
اهلآ شمس سفره سعيده ان شاء الله
شمس :اشكرك
رائد :وين سفرتكم اليوم
شمس :والله ويه حمايه رحنه تعشينه ورحنه للعشار
حماهاااا ؟؟؟؟
ليش من كالت هيج ضجت !!!!
رائد :اها بالتوفيق ان شاء الله
شمس :اشكرك
رائد :باجر راح اشوفج يم بدر شاكر السياب ع الكورنيش
هذا مكانه الاول
شمس :تمام
رائد :تندلين مو
شمس :اي اندل
تمام باجر نتواصل ان شاء الله
رائد :تمام تصبحين على خير
شمس :وانت بخير
اليوم طالعين تونست وغيرت جو اكيد مرتاحه يارب دوم اشوفج مرتاحه
اتصفحت فيس ونمت
ثاني يوم طلعت للسوك الصبح اخذت شغلات الوليد
ورجعت الظهر تغديت ونمت كعدت العصر
راح اروح التقي بيها ليش هل توتر قابل اول مره شبيك يمعود
سبحت وبدلت وتعطرت اخذت شغلات وليد وطلعت
خابرتها كتلها على موعدنه كالت ساعه اني يمك بنفس المكان
طلعت انتظرها بمكانه المحدد
نزلت هيه وابنها من السياره
لابسه قميص ماروني وستره رسمي وبنطرون رسمي
هاي ليش كل يوم تحلى اكثر
صفنت وماعندي كلام اكوله
رحبت بيهم واخذتهم كعدنه على مسطبه ع الكورنيش
انطيت شغلات وليد وكعدنه نسولف
جبنه حب نكرز واني اشاقه ويه وليد
هيه كامت تصور الشط والشارع اباوع عليها
الله يحميج ان شاء الله
صحت عليها تعالي تعالي
كالت ها خير
كتلها فد صوره اني وحبيبي هذا
ضحكت واخذت صور النه
كتلها تعالي اخذلكم كم صوره يله
كعدت يم ابنها واني اصورهم
شكد حلوين هل اثنين
رجعنه كعدنه كال ابنها ماما خل نصعد بالسفينه
عود بالشختوره ههههههههه ضحكت حيل من كال سفينه
كتله تعال يله نصعد
صحت حجي تعال اخذنه جوله
كال قريبه لو بعيده كتله بعيده
صعدنه اني وياهم
كاعده كبالي وصوت المي والهوه الحلو
وليد يلعب بالمي وهيه احسها فرحانه حيل
كمت اني كعدت بصفها خجلت مني هيه
باوعت عليها كتلها شمس
كالت ها عيني
كتلها شنو ابالج بهل لحظه
كالت افتح فرع ثاني المشروعي
كتلها واني وياج بكل خطوه تخطيها
دارت وجها عليه وتشكرت مني
ضليت صافن مكدرت انزل عيوني منها صار وكت غروب عيونها تخبل
احسهاا خجلت حيل
بصوت ناصي واتقربت منها
كتلها خليني وياج شمس خلينه نتواصل اني وياج
باوعت والخجل بعيونها ان شاء الله رائد
كتلها اشكرج من كل كلبي
كتلها انطيني اخذلج صور على هل غروب الحلو
عيونج تخبل لمعتهم
وجهج
كلشي بيج حلو لو اني اشوفج حلوه
اصور بيها واحجي
اخذت كم لقطه حلوات حيل
وصورتها هيه وابنها
واخذت اني وليد هم
الغروب والمي وشمس وليد اشياء حلوه ياربي
ما اريد انحرم منها
اريد هل شي مستمر
خلصت جولتنه ورجعنه
رادت تنزل مكدرت
باوعت عليها ومديت ايدي الها
باوعت وكالت اني انزل
كتلها تعالي لا تعاندين متكدرين وهسه يجي الموج وتروحين بالشط
ضحكت ومدت ايدها
اول مره شخص يلزم ايدي
اول مره احس بشي حلو لزمت ايدها حيل ما اريد اتركها
نزلت واني لازم ايدها
كالت ايدي
كتلها اعتذر
طلعنه تمشينه
اكو مدينه العاب دخلنه بيها
صعدنه دولاب الهوه
لعبنه العاب هوايه
حسيت نفسي طفل
بعمري ممسوي هيج شصار بحالي اني
حيل فرحان بوجودهم وياي
خلصنه العاب وكعدنه بمطعم نتعشه
جاوبو الاكل اكلنه
وكعدنه نسولف على شغلها
انطتني الجهاز اكلب بمكان العمل مالتهم. والموقع وينه
اثناء ما مجاي اشوف الصوره
وصلت رساله
——————
شمس مشتاقلج عوفي عنادج وياي وخلينه نحجي
...............
يتبع
رئيكم تعبت بيها
