My Lover With Split Personalities [မြန်မာဘာသာပြန်]

၂။ ဥက္ကဌ၏ဒေါ်လာမီလီယံသတို့သား(၂)

နောက်နေ့မနက်တွင် ကျန်းချန်ဖေး စောစောအိပ်ရာထခဲ့သည်။ သူ့ခေါင်းက ပတ်တီးကိုဖြည်ကာ အမွှေးကြမ်းများကို ရိတ်လိုက်ပြီးနောက် ပြုံးလိုက်သည်။ မှန်တွင် အရိပ်ထင်နေသည့်အမျိူးသားက ကောင်းကင်ကြီးအက်သွားလောက်သည်အထိ ချောမောခန့်ညားလေ၏။

သူက ဝတ်စုံပြည့်တစ်ထည်ရွေးပေးပြီး အိပ်နေသေးသည့် သူ့ဇနီးထံ ပစ်ပေးလိုက်သည်။
"ဒီနေ့ မင်းငါနဲ့အတူ ကုမ္ပဏီသွားရမယ်"

"ဟမ်၊ ခင်ဗျား ကုမ္ပဏီသွားမှာလား"
ကျောင်းချီက မျက်လုံးများကိုပွတ်ကာ ထထိုင်လိုက်သည်။ သူက အိပ်ရာပေါ်ပစ်တင်ထားသည့် ဝတ်စုံကိုကြည့်လိုက်၏။ ငွေရောင်မီးခိုးကုတ်နှင့် အနီမှိုင်းမှိုင်း ရှပ်အင်္ကျီက အတော်လေး ပူအိုက်စေသည့်အထည်များဖြစ်သည်။
"ခင်ဗျား ငါ့အင်္ကျီတွေနဲ့ ဘာလုပ်နေတာလဲ"

"မင်း ဒီနေ့ဒါဝတ်ရမယ်" ဥက္ကဌက မေးစေ့ကို ပင့်ပြကာ အထက်စီးဆန်လှသည်။ သူနှင့်၇နှစ်တိတိ နေလာသူတစ်ယောက်အနေဖြင့် ကျောင်းချီမှာ သူ့မျက်ဝန်းနောက်က အဓိပ္ပါယ်ကို ရှင်းရှင်းလင်းလင်းဖတ်နိုင်သည်။
'မင်း ဒီလို သားသားနားနား အင်္ကျီမျိုး ဘယ်တုန်းကမှမမြင်ဖူးမှန်း ငါသိတာပေါ့'

"..."

ကျောင်းချီမှာ ထိုကြီးကျယ်သောအဝတ်အစားများကို တိတ်တဆိတ်သာပြန်ထည့်လိုက်ပြီး အလုပ်အတွက်ဝတ်စုံကိုသာ ရွေးထုတ်ဝတ်လိုက်သည်။

ယွီယွမ်က ဒီနေ့ အလုပ်အချိန်စာရင်းကို ပို့လာသည်။ ကျောင်းချီလည်း သူ့အာရုံစိုက်မှုလိုအပ်သော ကြီးကြီးမားမားအဖြစ်အပျက်မျိုး မရှိတာအတည်ပြုလိုက်ပြီးနောက် ချက်ချင်းဆိုသလို သူ့အတွင်းရေးမှူးကို ညွှန်ကြားလိုက်သည်။
"တကယ်လို့ အရေးပေါ်ကိစ္စတစ်ခုခုရှိရင် ငါ့ကိုရှာဖို့ ရှီးဖေးနည်းပညာဆီ လာခဲ့"

သူဆက်သွယ်ထားသည့် မိသားစုဆရာဝန်က နေ့လယ်ပိုင်းတွင် တွေ့ရန်အချိန်းအချက်ပြုခဲ့သည်။ သူက ဒီကျန်းတာ့တျောင်းလိုအခြေအနေမျိုးနှင့် ဒီမနက် ကုမ္ပဏီကိုတစ်ယောက်တည်းသွားခွင့်ပေးဖို့ စိတ်မချနိုင်ပေ။ဒါကြောင့် ဒီလူမပြောရင်တောင် သူက လိုက်ဖို့အသင့်ဖြစ်နေပြီ။