ليلة من فبراير

part 54

ـ كلهن كعدن من سمعن سفرة وحجن بصوت واحد... سفررررة
اييي سفررة

نغم ـ مال شنو هالسفرة

ـ اليوم 21 اذار يعني عيد الربيع
والناس يحتفلون بي فراح نطلع سفرة كلنة سوية

خطية كمزن من مكانهن ركضن للحمام يغسلن وجهن ..
مو مال اسبحهن من الصبح
الجو صح حلو بس بي برودة هالوكت

ريكتهن ..وسويت ريوك لياسر ودزيته بيد نغم
لا تلحين بدك الباب هي مرة وحدة ماجاوب يعني نايم

ـ لا خلي يكعد مو راح ياخذنة سفرة

ـ ادري ياخذنة سفرة نكعدة من النوم عوفي ..
يلة لاتتاخرين
راحت دكت الباب ما فتح راسا رجعت

ـ يمكن نايم ..

ـ عوفي الصينية هنا هسة اغطيهه من يكعد بس احميلة الجاي

راحن البنات غسلن وبدلن وكعدت امشطلهن جهزتهن ودخلت سبحت وطلعت غيرت ملابسي ومشطت لميت شعري وطلعت كذلة

صبا ـ نونةة حبيبتي اريد البس تراجي

الحان ـ ااني هم عفيةة

ـ مو خاف تضيعنهه

نغم ـ لا اكو نوعية حلوة تنقفل هاي تشبه الكرستال

ـ وج هاي غالية الوحدة بالفين ونص

ـ عفية نونة بس هالمرة اشتريلنة

ـ كسرن خاطري خطية ..
اخذتهن ونزلت جوة للهول كلبت بالاكسسوارات لكيت كم وحدة حلوات
اخذت لكل وحدة كلادة صغيرة وتراجي شفت سعرهن علئ الف ونص يعني صار الحساب عليه تسعتالالف ..

عفت نفسي وما اخذت شي الي
سجلتهن عليه بالدفتر وصعدت

نغم ـ ما اخذتي شي

ـ صار الحساب هواي علية

ـ رجعي كلاتي واخذي شي الج

ـ لا ماريد حبيبتي ماحبهن
انتي وخواتي لبستن هذا اهم شي
عوفيني خلي اجيك شنو اخذ بعد لا انسئ شي..

كملت كل شي ونريد ننزل بالهول ننتضرهم ..
وية نزلتنة دك الباب ياسر
طارن البنات عليه..

نغم ـ هلوو عموو جبتلك ريوك بس جنت نايم

ـ ياهلا بالحلوات
اشنو العرايس القمورات اشنو هالجمال

نهاوند ـ صباح الخير

ـ صباح الورد

ـ هذا ريوكك جاهز

ـ لا اتريكت ابيت اميل
رحنة نجيب سيارتنة وطلعتو من وكت

ـ عدكم سيارة؟

ـ اي عدنة سيارة كيا ..

ـ اها عبالي ماعدكم

ـ اني واميل اشتركنة بفلوسها
وخليناهه بيد سايق يشتغل بيهه نفرات..