خطاب :هذين كل الاقوال .. والكيس هدا عبارة عن كل الادلة
اني هزيت كتوفي بأستغراب :ايي وشن بندير اني.. " تابعت نظري من الكيس والاواق متوجهة ليه.. وتعابيره الحازمه والجديه "
خطاب :الايام هدي ح تمشي انتي.. لحوش هلك تحطي كل كاميرة في كل باب من الحياش.. بدون ما يشوفك حد.. وركزي وين تحطيهن.. لانهن صغار الحجم هن
اني :اوك
خطاب يتاوب :و تصبحي على خير.. خليك واضحه معاي بلا جو السراقين
-طبست راسي منحرجه.. وهو مشي رقد في صالون.. واني في الدار.. وفاتت الايام خطاب شبه اليوم كله برا الحوش.. واني يا على التلفزيون يا على النت.. يا نطيب .... بعد مرور ايام .. يتبع
.............................................................................
-في ليلة من الليالي.. تعمها صيحات الالم.. صراخ من اعمق الاعماق.. ضجيج وازدحام البشر.. والمشاعر..
"اين هذا المكان يا ترى! "
-تماما .."عند صالحه" :
صالحه تبكي:بنموووت بنموووت
القابله :تبارك الله تبارك الله الصلاة على النبي حويته عليه حويته
-ونختم هدا الالم بصرخه صغيره.. طفل بريئ..البريئ من هذا الوحل.. من هذه الذنوب والمعاصي.. من هذه "الام" تماما..
صالحه شبحتله ومدت ايديها رفعتهم :هاتي هاتي عطيهلي
-مدتهلها القابلة.. و صالحه تشوف للقطعه الصغيره بي كل حب و ود
القابلة :شن بتسميه يا صالحه!
صالحه تنهدت وقالت من وسط خاطرها :بمعنى الود.. ح نسمين داوود
القابلة :ان شاء الله يبدا وديد عليك وتجيه الوداده لي ايامها كلها سعاده
صالحه ابتسمت : همم ولدي امير ناقصه الصولجان والشنبير
القابلة ضحكت :لنساوين الشنبير يا صلوحه شن جاك
صالحه :خلاص نلبسه تاج
القابلة :باهي ياحنه هي سلامتك
صالحه رفعت راسها :شيمااء تعالي اعطي لي عمتك البياض
القابلة قربت منها وحطت فلوس :هادي نحيلة الوليد ان شاء الله تفرحي بيه
صالحه :سلمك سلمك.. يا شيمااء
شيماء :هي هيا جايه
-شوي جت شيماء معاها كيس فيه خضرة وعصير وسبيزه..
شيماء بضحكه :معليشي عمتي تفركست معاش عرفت ما نحطلك
القابلة :ههه معليشي بنتي من الفرحه هيا مالا بسليمتكم تصبحو على خير
شيماء و صالحه بأصوات متقطعه :وانتي من اهل الخير.. سلمك
......
صالحه شبحت لبنتها:روحت سليمه!
شيماء تنهدت :ووووه يام شي ما رتحتلها
صالحه رفعت حواجبها :خيرها شن دارت!
شيماء :تحوس.. مرة نلقاها تلف في السور.. مرة وراء الفرن.. شوي شوي نلقاها جنبي لين ننخلع
صالحه شهقت:رديي باالك منها ردي بالك
شيماء :الحق عاونتني عمتي سعديه لولاها ابصر شن درت
صالحه :ردي بالك منها حتى هي.. اكيد مقهورة توا ههه ولي العهد جي لي بيكسر خشمها.. وهدا وين البوسيفي بيجي في طوعي زين
شيماء حطت ايدها على بعض :ياام اتقي الله في عباده.. والله عمتي سعديه مافيش خير منها.. زهرة وسليمه هادو لي مفروض تقطعي علاقتك بيهم
صالحه :عدي عدي ما هناك ضرة تحب زفرة ضرة ايواه
شيماء :باهي ره المهم ردي بالك من سليمه بذات ليوم لما قتلها انك بتجيبي وجهها تغير مع بعضه وشهقت
صالحه هزت راسها يمين يسار بالنفي:ههه لالا غير يتهيالك بس
شيماء صفقت بيديها :اني اهو قتلك.. بس قصري الدوه معاها يام
صالحه :ناقص والله تعلميني شن ندير وشن ما نديرش نوضي نوضي ضمي الحوسه سلم بنتي ترا
-وبالفعل دارت شيماء زي ما قالتلها امها .. ضمت الحوسه.. وغسلت خوها.. وغيرتله حوايجه ورضعاته صالحه.. ورقدو.. فاتت الايام.. ويوم من الايام طقطق الحوش
7:30
البوسيفي :هيا هيا يا رسول الله صبح يا فتاح
-تقدم بخطوات بطيئة.. وفرك وجهه وهو يتاوب .. فتح الباب . .
اني :صباح الخير بوي .. "ومديت ايدي "
بوي سلم عليا :اهلين اهلين
اني:الف مبروك يتربى في عزك
بوي:سلمك.. هي خشي!
-خشيت .. واني نتفحص في الحوش بعيوني.. والحوش هاادي .. لعند ما قعمزت على الصالون في الصالة.. وبوي خش داخل .. نسمع في صوت عياط العيل.. و صالحه.. اخخ ياروحي على امي لي كلتها في روحها.. تنهدت.. واني حاسه بخنقه.. حطيت كاميرة على ايد الكرسي.. بس حسيت في شي تحت الفراش.. جيت بنحول الفراش.. خشت عليا صالحه
صالحه مكشرة وجهها :صبح صبح يا فتاح خيرك جايه
اني نكاير فيها :همم الحوش حوش بوي
صالحه :طالعه لي امك شنقبه افف
-ابتسمت مكر فيها
صالحه :شني مطولة مالا
اني :ايي يا حنه
صالحه :افف لصصصقه "وعطتني بظهرها.. وطلعت "
-خليتها تبعد شوي.. وطول نضت حولت الفراش.. ولقيت.... يتبع
............................................................................
خلاص قاربت هلبا هلبا النهايه وليلتكم سعيده حبايبي❤غدوا ح يكون في تعويض ان شاء الله ❤بس والله في ضغط كبير ونجهز في مفاجئة ليكم حبايبي ❤تفااعلو وقولولي رايكم وتوقعاتكم واحزرو المفاجئه ❤
#فاطمه_سالم_الورفلي
احدى عشر
Start from the beginning
