#لعائلتنا_اسرار
الحلقه :الاولى
بقلم :فاطمه سالم الورفلي
"جزء الثاني لسلسلة الروايه عشمتني فيك"
.............................................................................
في فترات طبيعي ح يطلعوا من حياتك ناس وح يخشوا ناس .. بتتعلم هلبا وح تنصدم في هلبا ناس..ومن هكي تاخد منهم دروس..ويخلوك حادق وفاهم الحياة صح ..وح تفقد أعز الناس ليك سوى بموت..سوى بفراق..وتتمنى لو كان خبر وفاتهم او فراقهم حلم ..ح يكون كابوس بنسبه ليك..وبتقابل جميع فئات من البشر في حياتك ناس اضرك وناس تنفعك ناس تكسرك وناس تبنيك ناس تشجعك وناس تحطمك ناس تخذلك وناس تخونك ناس تحبّك وناس تكرهك حتى بدون سبب....اتخليش شيء يفوت عليك خليك مركز وصاحي لكل موقف وتفصيله من التفاصيل سوى من المواقف او التعابير..ماتقعدش لآخر لحظة شارد وفي عالم تاني ..خليك إنسان واقعي وأصلي وتوقع من كل شخص أي شيء , رد بالك تندم وتتحسر على معرفتهم هما مُجرد دروس سيوره مع الوقت تنساهم ..واهم حاجه ما تنساش ان على نفسك حق لنفسك..حب نفسك واعطي فرصة لنفسك في كل مرة اطيح فيها صدقني مافيش حد يقيمك من الوطا غيرك , حقق أهدافك وطموحاتك وأحلامك ماتخليش شيء يوقف قدام طريقك ..وخليك بأصلك متخليش زلات الناس تغيرك ولا تحطمك..حافظ نقاء قلبك الطيب ولازم تحب وتعطي فرصة لكل شخص حبك وعطاك عيُونه مقابل حُبك , وتفكر إن حتى وجودنا في الدنيا ليه نهاية..ولازم قبل نهايتنا نديرو بصمه نفكرو بيها الناس بخيرنا , واخيراً شوف للحياة بإيجابية وعمرك ماتقول خسرت اقتنع بقضاء ربي 🍃
............................................................................
"اما الان نبدو في روايتنا❤"
....
سمعت صوت مسج لتليفوني.. فتحته ولقيت مسج من خطاب "غدوا تماما تعالي للمقر"
-شفت الرساله نصدمت واستغربت.. زعما شن يبي مني! .. شن في!.. واني بين افكاري هذي خشت عليا شيماء..
شيماء تمسح في دموعها:حاسه روحي نادمه انه درت هكي
اني تنهدت :بلعكس يا شيماء لي درتيه عين العقل
شيماء :ولو .. ما كنتش نبي نوصل للمرحله هدي.. كل لي نبيه امي اتوب.. على اقل نلاقيها في الجنة
-معاش عرفت ما نقول .. التزمت بالصمت وخلاص
شيماء طبست راسها وشبحتلي :محجوبه ساعديني بالله عليك
اني :لو نقدر كيف.. ح نساعدك اكيد .. بس حالي من حالك شوفة عينك
شيماء تبكي :كله من سندس كله
اني :استغفر الله.. سندس شن دخلها يا شيماء..
شيماء :ها يعني بتحطي اللوم كله على امي مثلا!
-سكتت وخلاص.. عرفت شيماء اعصابها تالفه ومش ح تتحمل ايي زلة كلام.. وحتى لي صار واعر عليها مش شوي
شيماء :كلكم سلبيين مافيكمش فايده منافقين "ومشت تجري لدارها"
-خديت طاسه لي على الرخامه.. وعبيتها مايه ولحقتها لدارها.. لقيتها تبكي وشاده مخدتها
