#لعائلتنا_اسرار
الحلقه :التانيه
بقلم :فاطمه سالم الورفلي
............................................................................
عندي اني :
وقعدنا نمشو لين وصلنا للمقر.. خشينا ولقينا قدامنا خطاب..
خطاب :صباح الخير
شيماء تنهدت بنفاد صبر :قول لي شروطك هيا نبي امي وينها امي بنشوفها ولازم تروح معاي ليوم
خطاب ضحك :هيي لازم توقع تعاهد ولازم في اوراق توقع عليهن.. وين وين يا للا
شيماء خبطت الوطا برجلها :شني يعني مخلينا نجو هنا على فاضي
خطاب برفعه حاجب شبحلي :قولي لي اختك تحترم نفسها .. وتحترم المكان لي هي فيه.. واني بنقدم مساعده.. ومش مجبر نساعدكم .. فا توزن كلامها
شيماء بعصبيه :انت قلت نروح خاطري مجبور.. يعني شني ها شن يعني كلامك.. خليك قد كلامك خليك راجل
-خطاب شبحلها ببرود.. وتأفف شاف لساعته لي في ايده.. وعطانا بظهره وتقدم خطوتين
شيماء :نكلم فيك انيي
-الناس كلها شهقت.. وانتبهت لينا.. الانظار كلها محاوطتنا..
اني بلعت ريقي: اسكتيي بتلمدي علينا الناس
شيماء شبحتلي والدموع في عيونها :مش قادره نتحمل محجوبه حسي بيا نار نار والعه فيا ناار شايطه
اني ضغطت عليها وقلبي نعصر من كلامها :حاسه بيك خلاص خلاص اهدي
شيماء نفجرت بالبكي: ماحدش حاس بيا بلا كدب كلكم كدابين انتم كلكمم
-ضغطت على فمي بقوه.. من قوه الحمل لي على كتافي.. والمسوؤليه.. ونفاد صبر.. ونهد حيلي.. والوجع ملاحقني.. وبالحيل كاتمه ما في قلبي.. وزايدتني شيماء على ما بيا..
شيماء حضنتني وشوشت في ودني برجفه:ساعديني محجوبه ساعديني بالله عليك
اني تنهدت :والله لو بيدي حاضر.. لو كان روحي نعطيها حاضر.. اهدي بس
-سكتت شيماء ونحس بدموعها تقطر عليا.. لين تحسستها عليا نبل كتفي منها ..
اني تبعدت عنها:خلاص امسحي دموعك
شيماء رشفت خشمها :امشيله انتي
اني مديت ايدي مسحت دموعها وهزيت راسي بأيجاب :حاضر خليك هنا تو نمشي ونجي
شيماء عقدت حواجبها :لاا بنمشي معاك
اني :باه تعالي معاي وخليني اني نحكي باهي
-هزت راسها بأيجاب شيماء وهي تشوفلي بترجي..ضعفت و رق قلبي عليها..سلمت امري لله..التفتنا على جنب لقيناه على اليمين..واقف جنب مكتب استعلامات.. توجهنا ليه وقربنا منه
اني :معلش خطاب ممكن شوي من وقتك .. نحكي معاك
خطاب نفخ الدخان في وجهي وشبح لي شيماء وقال :عرفت كيف توزن كلامها ولاا ست الحسن
