#لعائلتنا_اسرار
الحلقه:الخامسه
بقلم :فاطمه سالم الورفلي
............................................................................
ويلاااا نبلشش 🔥🍃
..............................
عندي اني :
لقيت سندس وخطاب ومحمد.. مشهد لا على الخاطر ولا على البال..
محمد :زواجة الدهر ان شاء الله "مبتسم و ولاكأنه.. ولا حتى تحركله ساكن "
سندس :مش عيب عليك يا محجوبه تخونيني
" الدنيا ستدور ، والمشاهد ستعاد ، والأدوار ستتبدل وكل ساقِ سيسقي بما سقي " 🖤 !
اني تنهدت وكتفت ايديا على بعض :ومش عيب عليك لي درتيه فيا! .. مش عيب عليك تشوهي سمعتي!؟ .. مش عيب عليك تخربي حياتي!.. ولا هدا حلال مثلا.. وبعدين اني ما درتش شي عيب تزوجت بشرع الله وبس
سندس قعمزت على الوطا وتبكي :حسبي الله فيكم .. حسبي الله فيك انتي وانت يا خطااااب
خطاب بدون ما يشوفلها..التفت ليا وقرب مني وشد ايدي وخدي من الشنطه شدها بيد التانيه..وشد ايدي:هيا محجوبه وقت عليك
-شديت في ايده.. بينما نشوف تارة لي محمد لي مكتف ايديه على صدره ويشوفلي مبتسم عادي جدا.. وتارة نشوف لي خطاب لي يمشي وشاد ايدي على اصوات بكاء وشهقات سندس .. وهو مبتسم لدرجه شكيت انهن اوتار .. انغام موسيقى مش اصوات بكاء.. مش عارفة القوة لي في محمد كيف.. والبرود لي في خطاب من وين.. نقولو اهو محمد ما حبنيش.. بس خطاب لو ما حبش سندس ره ما انتقمش!.... اووف معاش عرفت شي.. هزيت راسي يمين يسار.. بينما خطاب فتحلي باب السياره لي مزينه بالورود.. واستيكرات.. ومنظفة تنظيف كامل شامل. لدرجه وجهي انعكس على السياره.. و ريحه السياره فايحه فانيلا قويه .. تضرب لعصب السابع.. شكله غاسل السياره غسل بالمعطر..ركبت السياره.. واني نستنشق في الريحه لي عجبتني منعشه وحلوه.. بس من قوتها اصبحت مش مريحه.. لدرجه حسيت رقبتي وجعتني .. تنحنحت.. وحطيت ايدي على مفتاح الروشن.. فتحته.. واني حاطه ايدي التانيه على رقبتي وتنحنح.. بينما خطاب يحط في شنطتي في الكوفني.. وشيماء طالعه من الحوش تصكر في الباب.. صكراته بالمفتاح.. وتوجهت السياره حاملة شنطه صغيره.. و شنطتي التانيه.. حطهم خطاب برضو في السياره.. وهي فتحت الباب وركبت.. بينما جت سياره درست.. محملة بالحديد الخيمه والخيمه برضو.. نزلو العمال..
خطاب :مسافة الطريق وراجعلك يا السيد
السيد "عامل " :تمام يا افندي نظم امورك ما تخممش
خطاب: مااشي هيا مالا نستأذن
السيد ينزل في الحديد :اذنك معاك يا افندي اذنك معاك
-التفت لي شيماء جيت بنكلمها..ركب خطاب
شيماء تواسي في وشاحها :جي عمي بوخريص!
خطاب :اي جي معانا.. هو ومرته.. وصلتهم وعلى المغرب امك تطلع حتى هي
شيماء :وليش ما تطلعش توا!
