ليلة من فبراير

part 28

ـ اي والله

ـ دنصي صوتج لا يسمعنج يالفهيمة

ـ  همست والله خاله شبيج
هالذهب لو عندي افتح بي محل صياغه واعيش احسن عيشة

ـ عندج عقل تجاري حلو
بس زين تباوعين علئ الذهب ولاغير شي ..

ـ ماكو شي يستاهل اباوع عليه
هنة محلوات وهدومهن محلوة ومكياجهن يضحك بس الذهب حلو بيهن

ـ هههههههههه واني هم هيج

ـ لا خاله انتي حلوة ومرتبة ومكياجج يخبل

ـ اممم والله طلعتي ام لسان و مو هينة

ـ لا والله خاله هذا الصدك

ـ اي اي ضحكي علئ عقلي ..
دتشوفين هذيج الكاعدة بالزاوية وتكرز

ـ اي هاي لابسة ثوب سمائي

ـ لج ثوب شنو
اسمة فستان ..
المهم دتشوفين شلابسة بركبتهه وايدهه
شوفي عليهه بس لاتركزين هواي
لا تخليهه تنتبه

ـ باوعت عليهه وباوعت علئ كل النسوان اليمهه.. هاي لابسة فضة

ـ ههههههههههههههه لج يافضة هذا بلاتين والماس يالهبلة

ـ استغربت
شنو بلاتين انوب اول مرة اسمع بي ..

ـ لج هذا معدن غااالي ويجنن ويبجي هم الناس الثكيلة تلبسه
خصوصا من يندمج وية الماس واحجار معينة يصير فد شي

شوفيهن وحدتهن متسوة تفلة
وهيج مدندشات
هذا كلة من لحمنة احنة وجهالنه
رياجيلهن يشتغلون بالحكومة
وياخذون فلوسنه
علمود هالشكول الزفرة تلبس وتتونس وتعيش
وانتي وغيرج الكم الشارع تعيشون بي

يلة كافي حجي عليهن خاف يسمعن
لازم ادخل واجاملهن
لان اتأخرت عليهن ..

ـ جانت تحجي خاله عليهن وهية تبتسم وتضحك بوجوهن
وراسا عافتني ودخلت يمهن
تعجت من اسلوبهه
شلون تكدر تضحك بوجه ناس هية متحبهم وستوهه حجت عليهم
شلون كدرت تغير نفسهه بهالسرعه وتدخل يمهم تضحك وتسولف وتتشاقة وية هاي وذيج..
عجبني اسلوبهه يمكن هيح احسن ..
لان الكل يحبهه ويحسبلهه حساب
وماخذة الكل بلسانهه الحلو

ـ اكوول يالحبايب رايدين شي اشغللكم شي بالسي دي

ـ لا ام مهند خلينة نسولف هو اني اجي لبيتج علمود اللمة الحلوة وية الصديقات

ام مهند  ـ يلة براحتكم

نهاوند ـ صارت عيني علئ هاي الحجت وية خاله لابسة شكد بتووت ذهب بيدهه
عزة شنو هاي بكل ايد لابسة 12 بت
ومحابس بكل اصبع
حتئ باصابع رجليهه لابسة محبسين

وتراجي مالتهه عبالك كلاده شكبرهه
اشو اني امي لبستني تراجي بكد الدكمة الصغيرة ..اذني ورمت
هاي شلون هيج لابسته هالكبرة باذنهه وعادي متوجعهه