علاقات زائفة

البارت السادس والثلاثون

وصلونه صميم وبنان لبيت اهل عمر
تسالمنه وراحو ..

نزلت واجه عمر لزم ايدي ، فتح باب الشارع جان شايل مفتاح وياه ...

عمر : نورتي ديرتي وبيتي وكلبي واهلي وعشيرتي وكل طوايفي ..

واكف كبالي ويحجي ...

انطيني ايدج نفوت ، لا ايدج شنو تعاي ...

شالني ..

حور : لا عمر والله عيب استحي نزلني الله عليك ..

عمر : ول عليش مستحيه انه زلمتج ...

حور : والنعم منك ، بس اخجل نزلني ..

غلس عليه وكام يصيح بصوت عالي اباب الهول مالهم ..

عمر : حجية حجيتي ام عمر وينج ، حجيه جبت جنتج واجيت ..

يصيح بعلوو صوته ويضحك فرحان من كل كلبه ..

شبكته من ركبته وطبعت قبله عليها ..

عمر : لا ياالله هاي شسويتي يولو شو عيدي مافهمت ..

حور : هههه قابل امتحان عندك ومافهمت ..

عمر : امتحاني عديتو وطلعت امتياز فد هساع داخل دورة ولازم انجح بيها ، درسيني بشرفج ..

حور: وين الحجيه ، راح تضل شايلني ، خلي نفوت يمعود هههههه..

عمر : والله عجبتني السالفه ، خايف افوتن ويجلبون بيج وما يهدونج ، هساع لو عندي درج خارجي جان طفرنه منو ...

حور : هههههه طلعت تحشش ..

عمر : من ضيم كلبي وقهرو..

جر حسره ،

عمر : يولو شسويتي بعمر فينتي حضو وسنينو ...

حور : الصعب للصعب ...

عمر : صح بالله الكريم ، بيه لذه ، هساع انتي هلكد ماعزيزه عندي ، لو يردون روحي انيطهم مقابيل تضلين يمي ...

حور : اسم الله على روحك ، بس نزلني ايدك متعبت .

عمر : يول شخفاتج جنج ريشه ..

حور : خسرت هواي من وزني ذيج الفتره .

عمر : لا تذكرينها ولت وراحت ، من طلعنه قوس بغداد انتهت حياتج ذيج هساع حياة جديده بيها عمر وعمر وعمر وعمر ..

حور : هههههه حلوة هاي ..

عمر : مو احسن بله ..

حور : اي والله احسن بهواي..

رجع يصيح ..

عمر : حجيتي ما تريدين جنتج راد بيها لبغداد وانتي خسرانه ، ماشفتي لبوه ابنج جابها وراحت عليج ..

ورة شويه طلعت ، تلف بشيلتها ، قبل لتشوفني جانت مدنكه تباوع لطريقها لان كاشيهم شويه محفر ..

الحجيه : شبلاك عمير جاي اصلي وماكدرت اكطع عليش هارج الدنيا ..

عمر : تعاي شوفي شجبتلج ..

رفعت راسها وضحكت ،..

الحجيه : يااااا وجبتها وسويتها صدك ..

عمر : حجيتي كتلج ما ارد لو النصر لو الشهاده ..

حور : نزلني اسلم اللي يسمعك جنت بحرب ..

باوعلي وخوزر عينه

عمر : عليج هو الله ماجنت بحرب ، ولج جنت بحرب البسوس ..

ضحكت من كل كلبي ، عاد نزلني ورحت بوست الحجيه ..

الحجيه : حياهم الله جثير الهله بأبني وخطارو ..

عمر : الله حيهم حجيتي ، فد حوريتي من اهل البيت صارت مو خطار ..

الحجيه : ولك تزوجتها وماعازمين لا عمامك لا خوالك ، لا احد يدري ..

عمر : نفوت جوه واحجيلج ، دخلنه هو شابك امه ويكرص بخدودها ويبوس بيها ، حبيت حبه لأمه ..

مادام هيج يحبها راح يحبني الي هم ..

لان اللي ماله خير بأهله ماله خير بزوجته ...

الحجيه : اكعد حاجيني شلون تزوجتها واحنه ماعنده خبر لا اخوتك لا ابوك لا عمامك .

عمر : عليش منفعله باجر اعزم اهلي وعمامي والديرة كلها واسوي عرس لا صار ولادار ولا احد سوه مثلو ...

الحجيه : اي يمه لازم تسوي عرس ..

عمر : اسوي فد ترتاح حوريتي  ..

الحجيه : خالتك راح تجي بالطريق خابرت شنو نكللها ..

غمزلي واخذ امه ودخلو للغرفه  ...

اني ضليت كاعده اباوع للبيت بسيط ابسط من البساطه نفسها ، اول منفوت طرمه صغيره ٥ في ٤ وبعدين هول
هم صغير بيه كرويتين ، تعبانات شويه ، عليهن مفارش نظيفه ومرتبه ، ليغاد مزهريه بيها ورد صناعي ، ولوحه معلقه على الجدار بيها صورة رجال معكل صاعد على فرس ، اعتقد جدهم  ، الكاع مفروش عليها حصير ...

لهناك واسمعهم يحجون لان البيت صغير كلشي ينسمع بيه

الحجيه : عليش اجذب احجي الحقيقه ، باجر عكبه اهلها لو يدورون  عليها مايرادلك فزعه عمام ...

عمر : لا ما يرادلي لا تخافين اللي اريده منج  تكولين للكل ، عمر خطب بنيه من بغداد ، وانتي وياي جيتي وعقدنه وجبتها ، واهلها ماكدرو يحضرون لاسباب طائفية فد ابوها اجه وياي ، ما اريد تصغرين حوري جدام احد ، وباجر عكبه تتعير بأهلها ..

الحجيه : وابوك شلون  نسيتو ؟؟؟

عمر : ما ناسيه ، فد متأكد يهوس ويمل ويتقبل الواقع..

الحجيه : لك يمه وين يتقبل يكره ما يكره الروافض ..

عمر : يمه روافض شنو ، مسلمين حالهم حالنه ، هذا ابوي عقلو ضارب عبن عاشر شكو ارهابي كلب ، هذا مو صميم واهلو ، يموتون على بنان واهلها عليش ماعدهم هاي المسميات ...

الحجيه: وتجيب اهل صميم لأبوك ...

عمر : ربج يسهلها فد انتي اوكفي وياي وسانديني وعينج عليها لو طلعت ، ابد لا تخلين ابوي يغثها لو يسمعها حجي ، فد اسمع مأذينها لو باجيه بالله الكريم طالع منكم وماعاد تشوفون وجهي..

الحجيه : عليش تهدد يمه انه احبها للبنيه فد خايفه من ابوك ، واحد يابس وعنادي ..

عمر : يلين بمرور الزمن ...

اندكت الباب الخارجي طلع عمر من الغرفه ابتسملي ، بس اني جنت حيل ضايجه ، خفت من رده فعل ابوه ليروح يأذي عمر وتصيرله مشاكل بسببي ...

طلع فتح الباب فاتت خالته.. شافتني وكالت ..

_ من هاي الصركعانه يول .

الحجيه : هله ب ام عويدل تعاي احبج ..

راحت باست اختها وكالت الها ..

الحجيه : عليش صركعانه يولو هاي الغاليه مرت الغالي ..

الصركعانه ( مصيبه او مشكله)

ام عادل : به يووومه تزوج عمير وماندري ..

حجتها ولطمت صدرها ، مره ضخمه طول بسمن ..
سمرة طوخ بس تنطي شبه لعمر بالملامح ...

كمت اسلم عليها ، هيه هم لزمتني بوس بوس ههههه.

ام عادل : هله يمه هله حبيبه شلونج شلون كيفج اهلج وين جيتي وحدج .

عمر : خاله كلهن تجاوبهن ماكو ترك ..

ام عادل : اسكت يا مصكوع ، تتزوج من ورانه ..

الحجيه : لا فد عقد ما متزوجين، هنا يتزوج بنص عمامه وهله ..

ام عادل : ساعه المباركه واحني عموري بيدي ..

الحجيه : ليش لا انتي امو الربتو ..

عمر : الله يخليج خاله 

راح باسها براسها ...

الحجيه : اخذها يمه ترتاح فوك خاف تعبت من الطريق وانه اسوي الغده واصعدو .

عمر : لا انه اخذو فد ندهيني ...

الحجيه : زين زين ..

ام عادل : شلون ياخذها بخلوه وهم فد عاقدين ...

الحجيه : عوفيهم لاعيب ولا حرام مرتو ، وبعدين جايين من طريق طويل تعابه وين ينامون هنا بنصنه ..

همه يحجون واحنه نصعد الدرج نسمع حجيهن ونضحك..

عمر: توز امي علي ، ماتعرف الحجيه جانت تتختل وي الحجي ..

حور : ههههههه عزة اسكت لتسمعك عيب ..

عمر : ما عيب ، بالله جانت تتختل ، وجدو الله يرحمو يلكفها ويلعب الصونده عليها ، لا تشوفينها هيج ، بزمنهة جانت برعه ...

حور : هههههه عزة عمر هاي شلون هيح تحجي هسه تسمعك..

عمر : لحضه اكللها واجيج واشهد خالتي بالسالفه ..

هد ايدي وراد ينزل ...

لزمته من ردنه ..

حور : تعال الله عليك والله عيب لتفشلنه ..

عمر : هاي حجيتي ( الحجيه يعني مالتي  ) كوم اتشاقه وياها ما تزعل ..

حور : الله يحفظك الها ويحفظها الك ..

هاي نحجي واحنه واكفين على الدرج ، صعدنه اكو ممر وبيه ٣ غرف فتح باب غرفه منهم وفات علك الضوه وصاحني فتت وراه ...

غرفه شبابيه ، جربايه ام النفر ميز تواليت صغير على فرج مال شعر وجل وعطور ٢ ...

بردات لونهن بيجي فاتح والفرشه بيجي بس مشجر ...

صغيره حجمها نص غرفتي اللي جانت بيت اهلي ..

بس الفرق هاي دافيه كلبي مأمن بيها ، احس بيها حنيه ، عكس غرفتي بارده وماشفت بيها غير بس الخوف والرعب ..

عمر : كعدي ...

حور : كاعد اتفرج على غرفتك .

عمر : ابدلها فد اتفرغ اجيبلج غرفه مال عروسات ..

حور : عليمن هاي كافيه ، وحلوه اصلا ..

عمر :ههههه وشلون يابه انه وين انام بالكاع ..

حور : ليش مو هاي جربايتك ..

عمر : وانتي وين ؟؟

حور : بأي مكان اهم شي قريبه عليك ..

عمر : هذا فراشج يولو منا وجاي مالج مخده وسرير غيروو..

يحجي ويأشر على صدره ...

تقربت يمه ولزمت ايده وضليت العب ب اصابعه صافنه عليهن واحجي ..

حور : شيصير لو شايفتك من زمان ، من قبل لا يأذوني ، قبل لا اتعذب ، مرات افكر لو مو انت جان شسويت ، شلون عشت ، عمر اني متت وانت رجعتني للحياه ، اني تعبت شفت اشياء عمري كله لو اضل اشرحلك ما اكدر اوصلك حجم الاذيه اللي تعرضتلها ...

رفعت راسي شفته يباوعلي ، عاوج راسه ومقهور وعيونه تدمع اكو دمعه واكفه بطرف رمشه ، مديت ايدي مسحتها ..

حور : انت بطلي ، منقذي ، حبيبي ، زوجي ..

عمر : ضيفيلهم ظلج ...
حجاها بصوت مبحوح ..

حور : شو ظلي

جرني من ايدي كعد على الجربايه وكعدني على رجله ...

عمر : هلكد ما جنت محاوطج بالجامعه جماعتي طلعولي لقب رجل الظل ،جنت خايف تحبين لو تنحبين  خايف لا واحد يعجبج وتقبلين بيه ، جنت خايف منج وعليج ...

حور : خايف عليه فهمتها مني ليش

عمر : صعبه يولو با الف يا الله يلا اكدر اتقرب واحاجيج ، مرات من تنطيني وجه فد افرح جنج تكوليلي احبك عمر ...

حور : جنت اضوج منك ...

عمر : وانه من اول موقف حبيتج ..

ضل يحجيلي ويشرحلي احساسه شلون من تعرف عليه وشلون حبني ، وضعت بملامح وجها الانفعاليه الرجوليه من يحجي ويشرحلي حبه ....

صاحته امه  علمود الغده كام طلع واني كمت نزعت الجبه والحجاب وكعدت ، فتح الباب برجله وفات جايب الصينيه خلاها بالكاع واجاني مدلي ايده ..

عمر : كرصيني يولو

حور : ليش ؟؟

عمر : بشرفج كرصيني ..

كرصته خفيف ..
عمر : اقوى

كرصته اقوى ضحكت ..

حور : ليش غير اعرف ..

عمر : ما مصدك انتي بيتي وغرفتي ، طلعت اجيب الغده ورجعت مديت راسي خاف حلمان ...

حور : والله مو حلمان ..

ابتسم ..

وكعدنه تغدينه ...

واخذ الصينيه وكال ..

عمر : اخذي راحتج نامي هين وانه نازل جوة ، كومي قفلي الباب لو انه اقفل ...

حور : انت اقفلها لان اريد انام وخاف تجي تدكها وما احس عليك  ..

عمر : ماشي ...

اجه تقرب يمي ..

باسني بكصتي وشمها حيل ...

عمر : اخ يا ريحتج ، بالله ريحه ورد ..

حور : هههه شكرا ..

عمر : ارتاحي يابه رايح انه ..

حور : الله وياك ..

وصل للباب صحته ..

حور : عمر

عمر : امبله ..

حور : اريد اروح للحمام ...

عمر : يله امشينه ...

نزلنه جوة على السريع فتت غسلت وطلعت ..

عمر : هذا هو ..

اشرت براسي اي ...

صعدت وهو هم صعد ورايه ...

قفل الباب ورحت على الجنطه اللي نطتنياها بنان ، فدوة لكلبها خاله ملابس بيت وداخليات وحتى عبايه اسلاميه وشال كلهن جدد بيهن علامه ...

اووف هالبنيه متتجازة ابد ...

بدلت بتراكسود منهن ومددت والنومه نومه ، مفزيت اله المغرب اباوع ضوه خفيف مال كلوب الصفر ...

فتحت عيني واشوف عمر جايب كرسي وكاعد يم راسي وغافي ....

كمت وكعدته ..

حور : عمر نايم ..

كعد ابتسم  وكال ..

عمر : ها يابه الكوه

حور : الله يكويك ، عليش نايم هنا ..

عمر : اذا بستج بحلكج هساع احد يكلي ليش .

حور : ليش ؟؟؟ رفعت حاجبي بتحدي ..

عمر : اكزكز عليج اريدن اكلج وانتي تحجين لهجتي ...

حور : شكثر تحبني ..حجيتها وضحكت ..

عمر : يولو انه كوة كاضب نفسي ما هاجم كعدي راحه واستجني . 

حور : يعني لاي درجه تحبني ..

عمر : لدرجه ، احدر لبغداد كل ما يضيق عليه النفس ، حت اشتم هواج اللي تتنفسينه واشبع عيوني بشوفتج وارد ..

حور : هاي من تخرجت جنت تجيني ..

عمر : بالله ٣ نوبات بالاسبوع انه اجيج ، طريق رمادي بغداد ، صار عبالك رايح لراس الشارع ...

حور : زين ليش نايم على الكرسي ..

عمر : ادحك لوجهج حت تردلي عافيتي .....

حور : يالله شكد حلو حجيك ، تصدك من جانت بنان تتغزل بحجيكم جنت ارزلها ، لان جنت لا احبكم ولا احب اسمع حجيكم ..

عمر : وهساع ..

حور : منك وبيك انه ، واتحجه مثلك منا وغاد ...

عمر : هله بمهرتي .

حور : هله بخيالي . 

عمر : الله حيو ياب ..

حور : يحفظك الله حبيبي ..

عمر : يسلمج يابه ...

ضلينه نسولف على ما نمنه هو فرش اله بالكاع واني على الجربايه...

شكد كبر بعيني ، لان اخذني الي محبه بيه ، مو رغبه ، متجرأ ويايه ولا طلب مني اي شي ، ارتاحيت وامنت ، بكل موقف بكل حركه منه بكل كلمه تطلع من حلكه ، يثبتلي هو رجال بمعنى الكلمه ،،، عدا شكله الحلو  ،
عيونه سود مثلي وجها اسمراني ، شعره اسود ويمشط صفح دائما ، مربي لحيه وشوارب ، حلوات وزايدته رجوله ....

نمت وحمدت ربي على عطيته ، وقررت ارجع لصلاتي لان طيله فتره حبستي بيت اهلي اني قطعت الصلاه لان جسمي خاوي ومجنت اكدر اطلع اتوضه دائما ....
لو اغلب الاحيان طالع دم من جسمي ...

_________________

رونق

تخبلت كمت الطم هذا مخبل رسمي ناوي يموتني وياه ..

كمت وشككت الورقه وطز بيه اريد اشوف شلون يطلبني بيت طاعه ، ماروح لو يموت ..

للعصر بابا خابره وكاله تعال اريدك بشغله ..

بابا كلش ضاج منه ومن تصرفه بس ماما حسيتها فرحت ، لان حيل تحب سنان ومتعاطفه وياه، ماما بطبعها صاحبه قلب ابيض ومتحقد على احد وتتمنى تساعد الغريب قبل القريب لهذا تكلي تحمليه وحاولي وياه لحد ما يتعالج ، خطيه ابو بنتج ، هاي من تكبر تحتاج اب ، البنيه تنكسر بدون ابوها ، لهذا فرحت بقرار المحكمه ...

اجه سنان طلع بابا دخله للأستقبال وحجه وياه تقريب نص ساعه وراها اجاني وكلي ..

حاتم : رونق حبيبتي زوجج يريدج بكلمتين روحيله ..

هزيت راسي وفتت جان كاعد وكام اجه يمي ...

شنو نضرات اشمئزاز باوعتله وكره وحقد كلهن التمن ، لان كاعد يجبرني على شي اني مرايدته ....

همس

سنان : شلونج ..

رونق : جنت زينه قبل لا اشوفك .

سنان : رونق احبج والله العظيم ما اكدر اعيش من دونج ولج اغار عليج من ظلج اريدج اليه وبس والله العظيم كل دقيقه بدونج كاعد اموت وكل مجالي كاعد اضعف وانسل رونق كاعد اموت تعرفين شنو اموت ..

رونق : بس انت أذيتني

سنان : اسف والله العظيم اسف الله ياخذني اذا اذيتج بالنبي احبج بمنو تردين احلفلج وتصدكين ، من يوم اللي رحتي وعفتيني النوم هجر عيني ، الله يخليج بس انطيني فرصه اذا مو علمودي علمود بنتنه ...

عطت بيه ...

رونق : علمود علياء لازم ننفصل ..

سنان : ننفصل ليش وشلون ؟؟؟

يباوعلي بنضرات توسل ..

رونق : لان ما اكدر اعيش وياك ولا اكدر اكمل حياتي اذا رجعتلك راح اكرهك واني ما اريد اكرهك  ...

سنان : شتريدين اسويلج اكثر من السويته، شو مدللج دلال كلشي تريديه يجي يمج ، غرفتج احسن اثاث اثثتها حمامج وحدج ، زوجج يحبج عندج طفله ، شتريدين اكثر ...

رونق : لترفع صوتك من تحجي ويايه ، وغصبن عليك توفر كل اللي ذكرته ، لان هاي ابسط حقوقي ، واذا على عزلتك لحمامي فهذا من الشك مالتك والمرض مو لسواد عيني ...

سنان : لج اهلي كم مرة اجوج ويتوسلون بيج ترجعين واني كم مرة ذليت نفسي وجيتج وتوسلت ومرجعتي ، شتريديييين اكثر بعد ذل وانذليت اهانه لكرامتي وانهانيت ، فهمينيييييييييي...

اجه بابا على صوته ..

حاتم : سنان متفقنه هيج كلت احجي وبس على شنو تصيح عليها ...

اباوع ايده ترجف ودخل اصابعه بشعره وكال ..

سنان : اعتذر عمي بس انطيني دقيقه احجي وياها ..

حاتم : بدون انفعال ..

هز راسه ب اي ..

طلع بابا وهو كعد على القنفه يلهث من العياط وحركه الدم ..

هو يحجي ب احر ما عنده واني اجاوب ب ابرد ماعندي ..

رفع عينه وباوعلي ...

سنان : وهسه شنو ..

رونق : تطلكني ..

سنان : وعلياء ..

رونق : تبقة عندي وشوكت متحب تعال اخذها يمك ..

سنان : لا والله هوواي خايفه عليه وعلى بنتي انتي وحده انانيه وكل همج نفسج وبس ، لان لو بنتج تهمج وبيتج ، جان مطلبتي ننفصل اصلا ....

رونق : ماريدك وخلص ..

سنان : شتريدين اعتذار واعتذرت منج توسلت ،نزلت نفسي شسوي اشك هدومي ...

رونق : انطيني فرصه افكر ..

سنان : الج يومين واجي الكاج انتي وملابسج وبنتج جاهزين ، غير هذا الشي ماعندي وبينه المحاكم ومحلوة اخذج بطلب من المحكمه لان اذا جبتج غصب عنج ، اشوفج نجوم الظهر ...

صفنت عليه عافني وطلع ...

كعدت وخليت ايدي على راسي شلون مصيبه يربي شلون قهر ...

______________

بنان

من بعد ما وصلنه حور وعمر اتجهنا لعيالي ، سلمنه وكعدنه شويه واستأذنه منهم حتى نصعد نرتاح ونام ...

سبحت وطلعت بدلت ومددت  فوك بغرفه صميم ، وهو هم سبح واجه مدد ..

صميم : تعبان بنان ..

بنان : الله يساعدك .

صميم : جسمي كلو يوجعني ..

بنان : اندار افركللك ..

صميم : علواه ...

نام على بطنه وبديت افركله ...

بنان : حبي ..

صميم : هممم

بنان : تحبني ..

صميم : هذا سؤال بله ، طبعا احبج ..

بنان : هم يجي يوم وتزعلني ...

صميم : ازعل الدنيا كلها وما ازعلج ، انتي ممستوعبه شكثر انه احبج ...

اندار ونام على ظهرة وسحبني نيمني بحضنه ...

صميم : انتي جنتي حلم بالنسبه الي وشي مستحيل يتحقق ...

بنان : اوعدني متزعلني بيوم من الايام ومتخلي دمعتي تنزل بسببك..

باس راسي وكال

صميم : ول ياب ومحمد اوعدج مستحيل ازعلج وابجيج منا وجاي ....

بنان : صميم اذا خنتني بيوم من الايام ، متسحيل اسامحك وبيوما اتطلك منك ...

صميم : رجعنه بنان...

بنان : اوعدني اذا خنتني تطلكني ..

صميم : ياستار شلج بهالحجي السم ، هاي نوم هم ما انام ، نامي وحدج عاب هيج عيشه جايفه...

شمر المخده عليه وطلع ...

انقهرت كلش ، سحبت موبايلي كمت اكلب بيه ، لهناك اجتني رساله ، فتحتها ، ضحكت ، حيييل زهورة شذكرها بيه ...

هاي صديقتي من الاعداديه ، شلون تعرفت عليها ...

جنت اني كلش كسلانه واحب انام هووواي بالدرس ههههه ...

مرة بدرس الانكليزي ، نمت والمدرسه واكفه فوك راسي ومنتظرتني شوكت اكعد بحيث عايفه الدرس ومشارحته ، عاندت ، لان اني نمت بدرسها ونزلت عقوبه بيه اسبوع ما احضرلها درس ، ف بيومها جانن حور ورونق غايبات ، بالفرصه طلعت بالساحه افتر تعبت  وكعدت على المصطبه كمت ابجي تذكرت الرزاله مال المدرسه ، انمدت ايد بيها كلينس التفتت واشوف بنيه تباوعلي ومبتسمه ، اخذته منها وتشكرتها ، من بعدها صار سلام بينه ، تبادلنه الارقام وصرنه صديقات اني وياها ، كلشي نسولف بالتليفون بس بالمدرسه اله البنات غايبات يلا نكعد سوة لان حور متحب تختلط هواي ...

والى الان احنه صديقات ونتراسل بس الها فتره كطعت مني ، واني هم التهيت ، وهسه رجعت راسلتني ،  خابرتها...

بنان : هلو زهورة ..

زهراء : امشي بذاته والله زعلت متسألين اله اني أسال ..

بنان : حقج والله بس صارتلي شغلات توكف شعر راسج لو تسمعيها تعذريني ..

زهراء : غردي يلا ، ولك اكعد ماما ، ليش تصيح مو كاعد اخابر ، سوالفكم كلها تطلع من اتصل ..

بنان : هههههه هاي ابنج الله يخليه ..

زهراء : اي خبلوني والله جانو هادئين اني لزمت الموبايل وهمه تخبلو ، شكو عركه قديمه تذكروها وصارت من الروس ...

بنان : الله يساعدج ..

زهراء : عوفج مني واحجيلي ..

بنان : سمعي دادة ________________ وهذا كل الصار ..

زهراء : جذب ناصبه عليه مو؟

بنان : لا وداعه بابا ...

زهراء : صدمتيني ، عفيه صميم اللي كتل روحه وسحلها سحل هيج سوه بيج ..

بنان : اي والله شبيج ..

زهراء : شكد فاهيه واحجي لامج لابوج وخلصي منه ، شكو كملتي وياه..

بنان : يلا الصار صار وهسه الحمدلله احسن ..

زهراء: الله يهديه الج ويسعدكم ، يلا اني اروح حبيبتي ، زوجي اجه وهم اصبله غده واغدي الجهال ..

بنان : ههههه روحي لزعاطيطج ..

زهراء : يجيج يوم وتصيرين مثلي ، لتكطعين ..

بنان : ان شاءالله ..

يتبع .......

_________________________________________