علاقات زائفة

البارت السابع والاربعون

يالكلك عيوب كبار بيمن تعيرني ...

كاعدين كلنا وحجت زها ..

زها : عيوني صميم ، حجيتلك ويه اهل امل وكالو تفضلو بأي وقت يعجبكم ..

صفنت عليها هاي شبيها مصخنه ، اباوع الكل عينه عليه وعليها وعلى صميم ، يريدون يعرفون موقفه شنو ، يعني شكلي زباله جان بنصهم ..

حجه عمي ...

موسى: شنو سالفتج زها شو جايه حاميه ..

زها : كاعد اخطب لاخويه بيها شي ..

موسى : وانتي ياهو كالج خطبيلو ..

زها : مو اله يكول انه اريدله وحده وهو من سمع سكت ما علق ..

موسى : انتي صدك تحجين لو جايه تحركين دمنه ب هاي الظهريه .

زها : على شنو احرك دمكم ، اخويه فراشه بارد ويحتاجله مرة تدفيه ، عليش زوجته هاجرته ، شبدر منو وهيج مجافيتو ...شنو عايز عليها وعلى فراشها
الف وحده تتمناه ..

اني كمت متحملت صعدت فوك ، وكبت العيطه بينها وبين عمي ...

كمت افتر بالغرفه اروح واجي ، موقف صعب خصوصا الكرايب كلها كاعده ، تخبلت ..

وره ربع ساعه انفتح باب غرفتي التفتت صميم ..
درت وجهي اجه تقرب وكال ...

صميم : بكلمه منج انزل انهي هاي المهزله كلها ...

بنان : يعني تعرف مهزله ..

ضل صافن عليه ..

بنان : روح كمل الشي البديته لان الرجال لازم يكون كد كلمته ...

صميم : انه رايدج الج ، فد كولي اي هسا اروح اجيب الشيخ ، واخليج اميرتهن ...

بنان : ماريد روح تزوج اني اصلا نفسي ماتت من يمك ..

صميم : انتي عليش متشوفين اله المواقف القبيحه بعلاقتنه ، شي راح وانتهى واصلا ما يستحق الذكر ، عليش ما تنسين وتعيشين حياتج ..

باوعتله بنظرة كلها كره واشمئزاز ...

بنان : اي موقف قصدك ميستحق الذكر واي مواقف جميله بعلاقتنه غير بس البداياات ، اذا جنت تقصد خياناتك ، موقف عابر ممكن اعتبره عابر وميستحق اعلق عليه لان انت متهمني ، بس اهلي والسويته وياهم شلون تريد اسامحك وارجع وياك مثل قبل ، انت بهذا موقفك محيت اخر خط حب بكلبي الك ..سواء تزوجت او لا حبيت او لا ميهمني بس تزوج بغير بيت لان ما اتحمل استفزازك الي اكثر من هيج ولا قباحتك انت واللي راح تجيبها وياك لان اعرف راح تتفننون بعذابي ...

صميم : لتعاندين بنان انه لحد هاي اللحظة شاريج ورايدج ترجعيلي لتركبين راسج تراج تندمين ..

بنان : ما اندم على شي اني تركته ولو بيه خير الي جان تمسكت بيه ..

صميم : عجل سمعي ، انه متزوج وهين كبال عينج ، مادام انه ما اهمج عليش ترديني اطلع بيت ثاني ..