جبروت السنين

البارت الخامس عشر

#جبروت السنين
الكاتبة :Sarah
البارت الخامس عشر

تحس ضلوعك موش ضلوعك
وتحس بدمك
يجويك،
وكلها تشوفك من جاي
توج
بس محد يكدر يطفيك
صير
رماد ورد لم روحكَ
بس
كليبك عينةة عليك. 🖤.

رحت حضنتها وبستها من خدها وكتلها : كمر وربي
شهد جانت لابسه بدلة وردية تاكل وتشرب عليها
طالعة اميرة بيها
وطكيتها بهلهولة :كللوووووووووش
بيبي نجاة :فلك طرج هم تعرفين تهلهلين
هزيت راسي بغرور وكتلها :شعبالج لعد اني حور مو لعب جعاب

دخلو كلهم وكعدنة شهد والخطار كامو يتوافدون
وعمات سالم ٨ عمات وبناتهن وجهالهن والجيران وعماتي ونسوان عمامي وبناتهن وبيبي نجاة
وبقية الكرايب البيت انترس اوادم وماكو محطة رجل
بيبي نجاة جابت ملة تقرة مولود وحفلات
بدت الملة تقرة
وعمات سالم لعبن لعب
يردحن ويهوسن
(وعلى عناد خالاتة لعبن لعب عماتة)

(وبعينه كزازة المايصلي ع النبي)
هي كالت الملة هيج وكلهن كامن يصلن ع النبي

نوب كالت سوو درب لام الولد خلوها تلعب جولة
وجان تدخل خالتي بالساحة وبقت تركص وتهوس

كالت وحدة من عمات سالم :وين اخت العروس عيني شو ماتركص ويانة
ضحكت وكمت وياهن وكامت الملة تقرة واني ذبيت لحم وتوليت الساحة ودوك عيني دوك

اجتي عمتي نورس :حور تعاي شوي
حور :ها عمة
العمة نورس: انطيني شي حتى اروح وياجن للزفة مجايبه شي وياي
حور :تعاي
صعدنة للغرفة وطلعتلها الفساتين مالاتي
شافتهن كلهن واختارت مالتي الجديد
.. لا عمة هذا اريد البسه بالزفة
.. لا شلج بي هذا احله الابستة
.. عزا فشله هذا كصير فدمرة
.. شون يعني تعزينة علي
.. هاهيه اخذي حلالج
عفتها ونزلت جوا
شغلت السبلت لان الجو يصمط صمط
والركص هم يخلي الواحد يستحر
ركصنة شوية

واخذنة شهد اني وعمتي نورس حتى تلبس البدله البيضه لبسناها الها وعمتي سوتلها الطرحة اباوع ع اختي بحياتي يوم ممفاركتها شلون راح اتحمل تروح وتعيش بغير محافضة طالعة مثل الملاك بالبدلة البيضه والمسكة البيضه والطرحة الطويله
خابرتني خالتي وكالت يلا ستعجلو راح تجي الزفة
اني اخذت صاية وياي من نطلع البسها فوك فستاني
ونزلنة جوا
شوية وكالو راح يدخل العريس
دخل سالم جان لابس قاط نيلي طالع عريس بمعنى الكلمة باوع ع شهد وميل راسه وضحك
وكفت شهد هو باس راسها وكعدو
وعماتة وخالتي شوية هوسن وكالو يلا
سالم لبس شهد الكبوس ولزم ايدها وطلعو وكلها تصفك وتهوس

كالت خالتي:حور انتي ونور روحن وية احمد (احمد ابن خالتي)
حور :ماشي
شمرت الشال شلون مجان ولبست صايتي
وطلعت شلنة بدلة شهد اني ونور وصعدنة شهد بالكوة لان بدلتها منفوشه حيل ندخل بالبدلة ونرد ليورة بستها من خدها ورحنة ركبنة وية احمد
كعدنة ليورة اني ونور واجة ابن عمهم كعد بالصدر يم احمد وكال : شبي هذا ابو العروس الا تنزف من الناصرية صدك جذب من خرب بغيرتة
احمد :ولك اسكت الكاع محظورة اخت العروس ويانة
دار وجهه عليه وكال :لا تزعلين كله ولا اخت العروس ههه
حور :احترم نفسك وقيم كلامك ولتحجي ع ابوية
كال :بربج اكو زفة من الناصريه لبغداد
حور جاوبته بعناد وكتله :ايي زفة اختي

٣ ساعات ونص زفة متنة حر واصوات الهورنات والديجي ولد عم سالم علكوهه علك ٣ ساعات ونص وهمة ع ركصة الوحدة وبهالحر ولا تعبو لعبو جولة
واخيرا جان نوصل كلها دخلت وكعدنة شهد
بقينة نركص وفرحانين
نسحبت من شعري باوعت بيبي نجاة
حور :اييي بيبي هدي شعري
بيبي نجاة :شنو هذا اللابسته مو عيب
حور :غير بتج اخذت ملابسي
بيبي نجاة :شني غحط ملابس يالمصخمة
حور :اي ماعندي
بيبي نجاة :يافلك وضلين بهذني هديماتج سيقانج كلها طالعة فاضح اكثر ماساتر
حور :بيبي غير بيت خالتي دشوفين بس بنات ماكو احد
اجتي خالتي كالت :دادة خليهن براحتهن محد يدخل حفله بنات
بيبي نجاة هزت ايدها بعدم رضا وعافتنه وراحت

خالتي :يلا تعالي نصعد شهد راح يزفون سالم
صعدنة شهد بغرفتها وزفو سالم وركصنة شوية يمهم ونزلنه جوا والكة الوادم كلها تردح صدك لو كالو العرسان ثنين والمجانين ألفين
انيهم طبيت بالنص ودوك عيني دوك ل١٢ بليل احنخ نردح ونرجع ليورة رجليني غدن خيوط من التعب ولا كعدت اليوم بس تستاهل شهودة شعندي غيرها احبل اجيب

بعدين كلها تعبت خالتي صاحتنة اني ونور نفرش للخطار
فرشنالهم ونامو رحت سبحت وظفرت شعري وبدلت وكعدت
بقيت ادعي لشعد ربي يتمم عليها ويوفقها
فتحت موبايلي جسور مدازلي اي شي كلش ضجت
شبي مطنكر عليه ابو الطناكير

اجتي نور كعدت يمي :حور اذا ماتنعسين تعالي كعدي يمنة اني واحمد
حور :اي جاية
طلعت لكيت احمد وابن عمة كاعدين بالطارمة ويشربون نركيلة
ونور كاعدة يمهم شافني احمد وكال :هلا بأخت العروس
حور :هلا بيك حمود
كعدت يمهم كال أحمد:ادعولي أتزوج
حور : ليش خاف شفتلك وحدة صاكة وخليت عينك عليها
أحمد :يي والله
كال ابن عمة : بس لا تسوي مثل اخوك وتزوج وحدة من غير محافظة رحمة لجدك مابينة حيل زفة
أحمد : ولك غير اطرب ع المحافضات اتزوج من الناصرية
حور :ههه خلي اروح انام ماعدكم سالفة

عفتهم ودخلت جوا نزعت الصاية جنت لابستهه فوك بجامتي
ومددت بفراشي غطيت راسي وفتحت الموبايل
لكيت جسور نشط الان هذا ويامن ديحجي بهالوقت
ضليت اكتب وامسح مترردة ماريد احجي وياه اريد هو يحجي وياي
رحت ع الانستا لكيتة ناشر صورة الة وطالع يخبل
يبوو من اروح فدوا لطولة دخلت ع التعليقات شفت بنية معلقتله كاتبة منور يالغالي وهو راد عليها
احس نار كامت تطلع من اذاناتي دخنت
يكلها بنورج وردة رحت ع حساب البنية سويتلها متابعة
وكمت اتوعد لجسور اني الة دزلي مسج كاتب
.. شعندج كاعدة بهالوكت
رديت عليه واني اضغط ع الحروف حيل ليكول داتعارك وياهن :
انت مالك دخل بيه خوش التهي بمعجباتك
.. يا معجبات
.. لا والله ع الاساس ماتدري مو الي بالتعليقات كاتبتلك منور الغالي
... هاي جنتي تدورين وراي؟
.. جسور
.. عيونة
.. منو هاي
.. انتي مو زعلانة معليج
.. جسور تحجي لو اكلب الدنيا والله
.. احجي عدل لا افركلج حلكج
.. منو هاي
.. بنت خالتي
.. وليش تكلك الغالي؟
.. غير ابن خالتها
.. ادري ابن خالتها بس ليش تكلك الغالي
.. حور يلا تصبحين على خير
.. اي اي اشرد
.. طفلة مو بيدج
.. اي طفلة يلا
.. وشلعتي كلبي
.. باي

طفيت الموبايل واني افور فور دخنت ردت انام بس بيبي نجاة العزيزة الله يحفظها بس تشخر ماخلتني انام صوتة الشخير مالتهه يدك بالراس كمت متنرفزة من مكاني
ورحت يم خالتي لكيتها كاعدة
حور :خالة عادي انام يمج
الخالة ام سالم : تعاي بنت الغالية
حور :خالو وين
الخاله ام سالم : نايم بالاستقبال يم الولد
رحت حضنتها بيها ريحة امي غفيت ع صدرها وبعد محسيت ع شي فزيت ع اخر صوت جنت اتوقع اسمعة شهيدة
شهد :لج حور لج كومي سكد تنامين
حور :خرب بحظي المصخم لج حتى بصباحية عرسج عايفة العالم كلها وجايه تكعدين حور حتى هنا لحكتيني

شهد :كومي لج بيبي نجاة تكول ترجع ويانة وتحولت نبرة صوتها للبكاء فدوا حورية لا ترجعين
حور :ع بختج شهيدة كولي غيرها اني ارجع بعد مااجيت مستحيل كليلها ماترجع وياكم
شهد :خوش هسة اكللها
حور :لعد منو راح يرجعهم
شهد : جسور صايرتله شغله هنا وبيبي نجاة خابرتة يرجعهه

هي كالت جسور جنت نايمة بفراشي شمرت الغطة وطفرت يم شهد :منو جسور عليج الله

شهد :شبيج طفرتي اممم من عرفتي بحبيب الكلب هو راح يرجعكم ولج بس لا راح ترجعين
حور :لا شهد استغفري ربج معقولة هالكلام عليه استغفر الله أن بعض الظن إثم
نزلت شهد واني غسلت ونزلت وراهه لكيت الييت هوسة
بيبي نجاة وعمتي نورس كاعدات يم عمة سالم
كعدت يمهمن
كالت بيبي: انتي ترجعين ويانة شعدج باقية هنا
حور :لا بيبي ارد ابقه هنا
بيبي نجاة : اسمعي حويرة هي حجاية وحدة مااثنيها ترجعين ويانة يعني ترجعين
كالت خالتي : ام غانم (بيبي نجاة) خليهه هنا مشتاقتلها
بيبي نجاة :لو انتي مشتاقتلها تعالي هناك شوفيها البت ماضل هنا وهسه يلا كومي بدلي ابن عمج راح يجي بساع
خالتي :ع بختج دادة دعوفيها شرايدة منها
بيبي نجاة :لا ابوهه خابر وكال جيبو حويرة وياج

ضجت كلش تمنيت ابقة بس مااكدر احجي ويه بيبي نجاة وخصوصا كلها كاعدة عيب رحت للصالة لكيت احمد يتريك
كعدت يمة وكمت اتأفأف
أحمد :لج شنو هاي بيبيتج كارثة بالقرآن
حور :شبيها ليش
احمد :يمعودة لو شوفين شسوت بيه من شافتني لابس برمودا وكاعد بصالة والله لعبت بية لعب نوب حتى صفت اني صفت وياها
حور :حتى انت ماسلمت منها
احمد :الله يساعد جدج اتوقع مات من وراهة
حور :هههه اي والله يمكن
كمت بدلت وكلت لشهد راح اروح ضاجت خطية بس مبيدنة شي كملت ورحت ع المطبخ صبيتلي استكين جاي اشرب من القهر

كالت بيبي نجاة العزيزة :خل واحد يدلي جسور ع البيت مايندلة
حور :انطيني بيبي اني ادلي
اخذت منها الفون ودليت جسور ع البيت كال عشر دقايق الكاكم جاهزين انطيت الموبايل لبيبي ورحت لفيت شالي
اجة احمد شافني كال : عود صدك راح تروحين
حور :اي والله
احمد :بس بعدني مشبعت منج
حور :شنو
احمد:قصدي مشبعت من خبالاتج
حور : انـ
بعدني ممكملة ندكت الباب طلع احمد واجة كال :هذا ابن عمج اجة يكول يلا خل يجن
حور : اي هسة
رحت كلت لبيبي نجاة وعمتي يطلعن لجسور طلعن كبالي طلعت وراهن وطلع سالم سلم على جسور
كال احمد :مو تنسينة الخبلة
حور : لا شلون انساكم شعندي غيركم هههه
احمد :هههه يلا توصلين بالسلامة
سلمت عليهم وصعدت ورة اني وعمتي وبيبي بالصدر يم جسر

كالت بيبي نجاة :ولج حويرة ويامن اجيتي امس
حور :وية احمد
باوعلي جسور بالمرايه وخزرني:يا أحمد هذا
حور :ابن خالتي هذا الفتحلك الباب
جسور : هذا ابو البرمودا
حور :اي هو
جسور : مبين مو راحة
بيبي نجاة :اي والله حبوبة جنة بت موش ولد لاكط حواجبة ولابس برمودا والشعر شطولة الكبر
حور : بيبي ترا مارضة واحد يحجي عليه وهو حر بروحة ليش تدخلون
بيبي نجاة :انجبي انتي الغمة

كالت عمتي نورس :انه امس شفت وليد صعد وياه
حور :اي هذا ابن عمهم
عمتي نورس: وانتي صعدتي وياهم
حور :اي
عمتي نورس: يالمصخمة تكولينها بوجهي تصعدين ويه الولد خ نصل وانه ارد اشوف ابيج شلون خالج ع حل شعرج تصعد وي الولد عرف ورف
حور :يا هاي شجاكم يناس ابن خالتي مو غريب
جسور: وانتي ليش تصعدين وياهم ماصعدتي ويه أمي (جسور يكول لـ بيبي نجاة يمة) وعمتي
حور :هسه شصار يعني

ضرب الستيرن بقوة فززني من مكاني وكال : وحك علي ابنبي طالب راح انزل اكسر راسج
وخزرني بنظرات لو جانت النظرات تقتل جان قتلتني نظراتهه من حدتهه وغضبهه اباوع عليه عيونة صار دم
حور :شنو تكسر راسي شسويت اني

بيبي نجاة : انجبي ولج يالمصخمة ولا تراددين ابن عمج وحسابج بعدين سهله مانصل واشوف غانم انه نشدت خالتج عنج وكالت راحت وي نور ماعدالي رايحة وية هذا البنيه لو ادري جان حركت ابيج وشعلت ساسج

. يربي شجاهم عليه ديحسسوني اني جارمة بالاسلام مصاعدة وية ابن خالتي وهو مو غريب كلش نهضمت كلهم دارو عليه ويرزلون ويتوعدون واليوم واليوم وفوكاهه يردون يوزون بابا عليه ماادري شنسويتلهم اني وحتى ماعندي احد يدافعلي كلها ضدي حتى ابوي وجسور خليت وسكتت

رجعت كالت بيبي نجاة : انه ارد اعرف هذا ابن لطامتج قصدي خالتج ابو مايشوفة
حور :شبي
بيبي نجاة :مايشوف شعرة
حور :بيبي فدوا معليكم بيه شلنة دخل وسدو الموضوع
دارت عليه وكالت :لو بس اعرف عليمن طالعة لسانج هالطولة

جاوبتها عمتي نورس: عليمن قابل اكيد ع امها
كمت ارجف من جابو طاري امي كتلها :عمة امي شدخلها بالموضوع
عمتي نورس: شو عيني سكتي ع الاساس امج شكد شريفة كلها خلك وحدة ك...
حور كمت ادخن من العصبية وارجف كتلها بغضب :شريفة ونص
قاطع كلامي جسور من زكح بينة :كافي ولا كلمة راسي يوجعني بسجن
بيبي شهكت وكالت :يمة اغديلك فدوا اسم الله عليك يبعد حبوبتك شجرالك
جسور : مابيه شي يمة شوي وجع خفيف

ضليت طول الطريق ساكتة واباوع من الجامة واطحن بروحي من الاعصاب اكثر شي ممكن يخبلني من يجيبون طاري أمي بالموزين اذكرو محاسن امواتكم لعندي يطبقون هالشي بس بالمكلوب

وصلنة دخلت للبيت سلمت ورحت ع بابا سلمت عليه وسأل ع شهد طمنتة وكتله : صدك بابا مخابر بيبي علمود ارجع
بابا :اي عبن ماريدج تبقين يم خالتج ادري بيها تترس راسج عليه
هزيت راسي وكمت حتى النقاش مالة داعي بعد المن اتعب لساني لو احجي منا لباجر منو راح يسمع لحور منو راح يهتملها منو راح يفكر بأمرها منو يعرف شتريد متريد لا أنيس ولا ونيس وحتى من بيت خالتي الشي الوحيد الباقي من ريحة امي حرموني حسبي الله ونعم الوكيل على من كان السبب خاف جانت شهد موجودة افضفضلها هسه هم راحت دخلت للغرفة كلش استاحشتها مو حلوة بدون شهد دمعت عيوني شلون راح اكدر بدونها وكأني تذكرت كل سوالفنة ولعبنه وخبالاتنة اني وشهد تنهدت بتعب ومسحت دموعي ورحت سبحت وجيت نمت كلش تعبانة نفسياً وعقلياً وجسدياً

كعدت الساعة ب ٧ المغرب
كمت ادور ع موبايلي دخلت سلوى كالت :عبالي نايمة
حور :ليـش
سلوى : بيت عمي شهاب عازمينة ع العشه راح نمشيلهم تجين ويانة
حور :لا مااجي نعسانه راح انام
سلوى : جا خوش وحسين هم راح يضل هنا ضلي وياه
حور :ماشي
طلعت سلوى لكيت موبايلي مصفر شحن خليته ع الشحن ورجعت نمت
حسين :حور كومي
حور :ها حسين
حسين :راح اطلع شوي صارتلي شغله مهمة خوما تخافين بوحدج
حور :لا عادي روح بس لا تتأخر
حسين :لا ماتأخر
طلع حسين واني حتى النومة طارت من عيني وشبعت نوم اخذت موبايلي و
نزلت جوا رحت خدرتلي جاي وصبيتلي جاي يمكن اني اكثر شخص يستهلك الجاي اعشقة اخذت كلاصي وكعدت بالصالة
فتحت الموبايل لكيت جسور متصل علية هواي
دزيتلة مسج
.. ها شرايد متصل علية
رد عليه :ليش ماجيتي وياهم
حور: مااجيت لان ماريد اشوفك
جسور :خوش حور انه الج

مارديت عليه لان بالحقيقه كلش جنت ضايجة منة بسبب موقفه الاخير شاف بيبي نجاة وعمتي التمو عليه وبقو يرزلون بيه وهو مكلف روحة يدافعلي بالعكس صف وياهم خليت ع مسلسل كوري احبة وكعدت اتابع واشرب جاي

فجأة طفت الكهرباء والبيت صار ضلام هندس تسلل الخوف لكلبي لان وحدي ضليت ادور ع موبايلي هسه هذا وين اختفى لكيتة ع القنفه شغلت الفلاش ورحت للمطبخ ارد اغسل الكلاص مال جاي غسلته ورحت احول بالكهرباء بس ماكو اصلا كهرباء
رجعت للصالة سمعت اصوات خطوات بالمطبخ عقلي الباطن كام يتخيل هذا حرامي ارتعش جسمي من الخوف وسرت رجفة بكلبي بلعت ريك وبللت شفايفي وكلت بصعوبه واني اكطع بالحجي : ها حسين اجيت
ماكو رد كمت واني كلي ارجف من فوك ليجوة شكد جبانه بهيج مواقف اصير خرب بحضي دخلت للمطبخ غمضت عيوني وجهت ضوة الموبايل بحذر
ع الباب فتحت عيوني بحذر شديد وبطئ
وهنا جان اشوف اخر شخص اتوقع اشوفة
نصدمت صدمة عمري وارتديت للخلف بخوف وهلع
يتبع.....

حال حور 👇👇

(البارت الجاي بي جلطة ثلاثيه الأبعاد 😁
هم كولو ماأغششكم)