جبروت السنين

البارت التاسع عشر

#جبروت السنين
الكاتبة :Sarah
البارت التاسع عشر

*من لـمِ يطرق بابنـا والـروحُ ترتجف فـلا مرحباً بـهِ والنبـــضَ منتظمَ!!

حور
دخلو جسور وعمي للاستقبال التوتر موتني وكغت يم باب المطبخ اسمعلهم وهمة صوتهم عالي من يحجون
كال عمي :خوية غانم والله انة مفتشل منك وماادري شكلك حتى حجي ماعندي احجي
جاوبة حسين بسرعة : خير عمي كول خوما اكو شي شصاير
جسور :لتخاف ماكو الا الخير ان شاء الله
كال ابويه :سولف يااخوي شصاير
عمي شهاب :تتذكر من خطبت حويرة منك ليوسف وكتلي لا بعدها صغيرة وماازوجها
كاله باستغراب :اي ماناسي
كال عمي:وانة اجيت اخطبها مرة ثانية
شديكولون شديحجون شنو يخطبني مرة ثانيه
ماتحملت ورحت اباوع عليهم من الشباك مطلعة بس تك عين
شفت حسين سكت وباوع لابوية منتظرة يحجي

راد يحجي ابوي سرعان ماقاطعة عمي وكالة لجسور مو ليوسف
رد لوني الباهت الحمد لله عبالي ليوسف جاي يخطبني
باوعت ع ابوية عيونة طلعن من مكانهن من هول وشدة صدمتة وحتى حسين مبين على معالم وجها الاندهاش والاستغراب
جاوب ابوية باستنكار :شنو هالحجي خوية انت قبل اسبوع خطبتها ليوسف وهسة رايدها لاخو لا هذا مو حجي مااقبل بهيج انة
عمي شهاب :اسمع يغانم انة مو صغير ولا انه غشيم ادري بحور مارضت بيوسف عبن كلنا أسألك تكلي دتفكر البت وازيدك من الشعر بيت حتى يوسف جان ماراضي ويكولن اعتبرها اخيتي بس انة ردت اجيب بت اخوي جنة لبيتي احسن من الغريبه
ويوسف جان قافل ويكولن اختي مااكدر اتزوجها وجنت حاير شلون اكلك لحد ما وصلني رفض البنية ادري بيها رافضة
كالة ابوية بغيض : وشبيها بنتي حتى ابنك مايريدها
عمي شهاب :البنية مثل اختة واليوم اجانة جسور وكال انة رايد بنت عمي ع سنة الله ورسولة وانة من اول يوم شفت حورية كلت هاي أخذها لواحد من ولدي شتكول ياخوي والله انة فرحان بت اخوي تجي ابيتي جنة نخليها بعويناتنة

باوعت ع اخواني ساكتين كلهم محد فتح حلكة ونطق حرف مشيت ع اطراف اصابيعي وبقيت بالباب مال مطبخ اتسمع عليهم نجيحة هم سامعة الحوار الدار بينهم راحت طيران لفت شالها باوعتلي بغضب والشرار يتطاير من عيونها ودخلتلهم تولول وتعيط
نجيحة :مامرجية منك يبو جسور لا مو هذا العشم بيك توكف بنتي سلوى لابنك ومن شفت البغدادية غيرت رأيك وتكلبون الحجي
حور
اني شفتها راحت رحت وراهه اباوعلهم
كام جسور ع حيلة وكال :محد موكف بنتج خالة حجي نسوان حجيتن الحجي وصدكتنة انة لو رايد سلوى جان اخذتها من زمان عدت وصقلت كتلكم مكانتهه بمكانة مها وعيب هذا الحجي خالة جايه تتهميني موكف بنت عمي
عاطت نجيحة بغضب :والله وكبرت يجسور وجاي تعلمني العيب والله حرام عليكم تكسرون خاطر بنتي وين ترحون من ربكم خطيتها بركبتكم مثل ماوكفتو قسمتها

باوعت لجسور مسح ع لحيتة بايدة وزفر بنفاذ صبر ورجع كال :خالة بنت عمي سلوى مارايدها ومثل ماكتلج انتن حجيتن وصدكتن حجيجن فكافي مالة داعي هذا الحجي
عاط عمي شهاب :جسور عيب احترم خالتك
جسور :والله شسوي اذا هي تريد تلبس بنتها كوة بيه كتلكم انة رايد حور مو سلوى
صاح عمي بغضب مخيف :جسوررر
باوعت لاخواني عيونهم ناطة من الاعصاب هم حقهم ميرضون واحد هيج يحجي ع اختهم حتى لو ابن عمهم بس مايكدرون يحجون لان النقاش بين ابويه وعمي وهمة ممنوع يتدخلون عدهم احترام جبير الهم ابداً ميدخلون او يقاطعوهم اما جسور كل شوي يحجي لو يمسح ع لحيتة بايدة هاي حركتة اعرفها يسويها من يكون معصب ومتوتر صرت اعرف كل شي بيه اخير شي
كال جسور :بوية المن جاي تصيح بيه انة ماكلت شي غلط وانة ماوكفت بقسمة سلوى تنهد وكال يلا مرخصتكم فيمالا
طلع وماانتضر ردهم اصلا اني ركضت للمطبخ قبل ميشوفني