🌙حسناء القايد🌙
👑oumaima mega 👑
⚡37⚡
حتى جات لعندهم تاني حشمانة تقول منعرف اش لابسة و عينيها في لرض و شادة الفوطة خايفة لا طيح ليها ... دارت عرشية بجسدتها لعندها تطلعها و تنزلها و تبشرت بشارة من العين عروس سيد القايد غزالة و مافيها مايتعاب و لا يتعيب ... فاخيتة غا تسوط تما من ورا عرشية و تنهد و تنهج صدمتها بانت على وجهها
عرشية : غانحيد ليك ا لالة ديك الخميسة
حسناء شنقت عليها : لا لا غا خليها في عنقي
عرشية : باش نغسلو ليك ا لالة
حسناء : غا خليها الله يعطيك الستر
عرشية : بخاطرك ا لالة جلسي في القعدة ...حسناء معاودتش الكلام تمشات بشوية و جلست مقردة و مجموعة على راسها
عرشية : فاخيتة ديري خدمتك ...فاخيتة تنهدت و هزت الحجرة تاع الحمام و مشات جلست على طولها عند رجلين حسناء و تشوف فيها من تحت العين كيف جالسة مكونة غا تشوف بدوك العينين الكبار...و تحلفها فيها ...هزت ليها رجلها في حزتها و مرقت الحجرة في الصابون البلدي ...و هزت ليها قدمها و بدات تحك ليها ...حكة صحيحة كيف كيحكوو الصنايعية النحاس
حسناء قصحتها : ايي ...و هربت رجلها من عندها ...فاخيتة هزت يدها و السم كيقطر منها زعمة مادارت ما فعلت ...و حتى دادة عرشية كلشي داز على عينيها و نطقت بهضرة مجهدة وقاسية : حيدي نتي من تما العالية ديري خدمتها ...ناضت فاخيتة من مكانها و دارت عند عرشية لقات عينيها كيف البارود مطرطقين فيها و هي تحني الراس ...عاد نزلت العالية تفرك ليها في رجليها بشوية ...و جاو لعبدات لخرين يغسلو ليها في شعرها و لحمها و هي مكونة على فوطتها ...فاخيتة فركعت ليها المرارة كيحسابها كتفشش عليهم و هي خايفة غا من خيالها ...و من ناس لي متتعرفهمش و دايرين بيها ما مولفاش هاد الخنات(دلال) كامل ...تاسلاو ليها ...فركو ليها يديها و رجليها و عطروها حيدو منها ريحة الحنة باش مايشمهاش سيد القايد فخر الدين
عرشية : لالة خاصك تحيدي الفوطة باش نكملو ليك الغسلة و تشليلة
حسناء : لا لا بلاش غسلت ليا مي قبل مانجي لهنا
عرشية : عارفين يماك غسلت ليك و ليني خاصنا ندوزوك تدويزة وحدة ...كرزت على فوطتها تحفظت و دارت ليها براسها لا ...عرشية تنهدت و قالت لعبدات يخرجو و يخليوها معاها الراس في الراس
عرشية : لالة حسناء ديريني في مقام ميمتك وراه دازو على يدي بزاف دنسا معندك مناش تخافي غير حيدي لفوطة و ستري عورتك بيدك و خليني ندوز عليك ...حسناء هزت فيها العين و حارت واش تخليها ولالا حيت مامتعودة حد يشوف عورتها ومها مقرسها على سترتها ...وليني معندها مادير هزت ليها راسها بايه و حيدت لفوطة و عرشية بنفسها كفدت يدها و غسلت ليها كرمتها بزيت و العطور تاخلاتها تشعل بالنقاوة ...عاد رجعت لبست فوطتها و عيطت على الخدم ...يدخلو ليها فوطة جديدة .. بدلات بيها بالكشايف و ما ورات لوحدة فيهم شنو مخبية ... فاخيتة غا كارهاها عصبتها و كرازاتها ... جاوها فعايلها فشوش خاوي حتى بنات الدار لكبيرة مداروش فحالو
عرشية : العالية عطيني حويجها ...حسناء باقا غاتشوف كيف خبز ربي في طبكوو
العالية هزت الرزمة و حلتها و هي تشهق مخلوعة : ويليي ا دادة واش غيدخل بيها سيديي بهادشي ؟
🌙حسناء القايد🌙
👑oumaima mega 👑
⚡38⚡
حسناء غا سمعتها تقولي جاتها تصرفيقة للخد ...و قلبها ضرب ضربة مجهدة..عاد عاقت و فاقت بلي هاد الحمام و هادشي معموول على ود سيدهم القايد ... ركبتها الخلعة و ولات كلها التفتف ...اش غدير واش غتعمل دابا بدات ترجع بشوية من وراها
عرشية : العالية طيري من هنا وجدي لالة الحويج تلبسهم ...العالية ماعودت من وراها غا الصلاة على النبي و دارت خرجت من الحمام و مشات تجريي ...و عرشية دارت عند حسناء لقات عينيها في لرض مخرجاهم و تقفقيفة شاداها من راسها لرجليها ...هزت وحد الحايك من حويجها و قربت و لواتو علييها كيف الكبالة ...باش تغطيها على لبرد تامبقا يبان ولا شبر من لحمها و غطت ليها حتى راسها و وجهها ...و خرجتها من الحمام غادين بيها زربانة كان طايح الضلام ديك الساع...حسناء قلبها تيتحسك و روحها غاتزهق منها ...اش غتدير و اش غتعمل ياربي و تبوريشة طالعة معاها ...تادخلوها لجناحها و سدو من وراها الباب و حيدت ليها عرشية اللحاف ...هزت فيها عينيها كبار زينين و تناخد و البكية غتخرج ليها ...كانو العبدات جوج هازين صينية فيها لباس جديد زاهي ...هزت اول حاجة هو سروال قصير بيض ...كيبين سيكان
عرشية : كلشي يدور يعيطي وجهو لحيط ...داكشي لي دارو نيت ...و هزت وحد الحمالات تاع الصدر واقفين ...حسناء تتشوف فيهم معرفتهم شناهما ...تالبستهم ليها عرشية و وقفت ليها بيهم الصدر و لبستها لكيلوط لي معرفت منين تلبسو...لبساتو ليها غا عرشية و كتحس بيهم مزيرين عليها قنطوها من دابا ...عاد لبستها السروال القصير البيض تاع العريسات و تاع ليلة دخلة...و لبستها ديباردو ...عاد فوقمنهم قميص بيض جوهارة زيين و خفييف ...كاع عنقها باين و صدرها من فرقتوو واضح ...عزلو ليها العرض و الطول ...و دارو العبدات جايبين ليها مضمة تاع الصم كلها دهب لبسوها ليها و زيروها بيها ...و حطو على عنقها فوق من ديك الخميسة سنسال من الجوهر كيبري ...فلتو ليها شعرها و نشفوه بالبخور ...و رجعو شدوه ليها و جبدووه بالفنيت و الكصة هزوها ليها جامعينها و خلاوه مطلوق ...و على جبهتها صايبو خيط الريح مدهب ...و جالوق لبسوه ليها في يدها و الخلاخل في رجليها ...و نوبة نوبة يعطروها بشي عطور ريحتهم زينة تاع الروح ديال النوار ...حسناء واقفة في مقامها من حدهم يلبسوها و عقلها مشروب و وجهها مشحوب ...عارفاهم كيجهزوها باش يديوها لداك سيدهم لقايد يدير فيها ما بغا هاد ليلة ... ترعد و تدور في جنابها وقلبها غيوقف بالخلعة ...و تطلب ربي لي خلقها في خاطرها هو لي غيقد بيها و يحميها ... تاسلاو ليها و زوقوها و حطو الكحل الحر في عينيها و العكر العصري في فمها ...و هزو يديهم عليها حيت البنت كتفتن العين بلا زواق عاد فاش حطو ليها هاد الزينة ... جلسوها في الجلسة كيف المرجانة غا ترمش في دوك العوينات و دنيا ديرا بيها و قلبها يضرب في حلقها فاخيتة غا واقفة وحادرة الراس طلعت بنت الحداد ياقوتة مخفية بين الحموم و هادشي غيفركع ليها المرارة ... ودخلو ليها صينية كبييرة زينة فيها طبسيل ماكلة ...دجاج مصايب على حقو و طريقو و طبك نحاس فوقو الديسير بنوايع و شكال و وسطو موس خضاري ...و حطوه ليها فوق طبلتها
العبدات
تحضيرات
الخلخال
🌙حسناء القايد🌙
👑oumaima mega 👑
⚡39⚡
حسناء شافت في هاد الخير و غير تفرك في يدها و هزت عينها تشوف فيهم واقفين عليها يتسناو فيها تاكل ...حدرت الراس كتخمم و ترعد و تسرط ريقها ...غيوكلوها كيف كيوكلو النعجة قبل ما يدبحوها ...و غيهزوها بزواقها لعند سيدهم القايد ... هزت يدها و حطتها على طبسيل و بدات تاكل بشوية عليها ..و تهز بالحبة بالحبة ...مغاتساليش من الماكلة تايعياو و يمشيو فحالهم و يكون حتى سيدهم مل و نعس ...هادشي لي قالها عقلها
〰️〰️〰️〰️〰️〰️〰️〰️في الصالون لتحت ....جالسة ثورية بالتكاشط هي و بناتها جوج ...و شروق هازا جلايلها و تاكل في ضفرانها و تجدب و تمشي و تجي و تخبط في جنابها و في فخاااضها
شرووق : هاااااويليييي ا مييي على مصيبتيي اميي تااامن بنت الحداد ردها عروسو و انا مزال معلقة
ثورية : شروق باركا من هاد الغوات و اللغا و النوااح غادي غير يزيدك في الهينون(الهم )
شروق : اشمن هينون اميي واش عاجبك هاد الضحكة لي انا فيها جالسة و نربي ليه في الدراري وهو ما بقات ليه غا عبدة من عبيد القصر يتزوجها وانا حلف مايشوف فيا
ثورية ناضت من مكانها تدوي و تتكلم : جلسي دابا لا يسمع لغاك شي حد و انا غندوز عند لالاهم سلطانة نشوف اش مخبعة تحت راسها وناوية تعمل مع ديك بنت الهجيج
شروق شنقت على يماها : عافاك ا ميي ماشوفي ليا الله يعطيك الستر
في الصالون لاخر ...جالسة لالة سلطانة و متكية على دراعها فوق ديك الملاية و قدامها خير الله ماكلة ... و عبدة تمسد ليها يديها و عبدة خرى تنيش عليها بريش الطاووس ...باش تبرد عليها الحر..و هي جالسة و معاطياش للهم وجه
ثورية وقفت عند بابها تبلحس و تملحس : لالة سلطانة
سلطانة هزت غا عينها بانت ليها مرت خوها ثورية : ثورية دخلي
ثورية حطت شربيلها عند لباب و دخلت لعند سلطانة جلست حدا رجليها متبسمة و متبشرة
سلطانة عينها منيشة عليها : اش جابك لعندي في هاد ليل
ثرية : وااالو ا لالة سلطانة غا جيت نقرقب معاك الناب شفتي ديك بنت الحداد لي اختارها سيدي فخر الدين ماتليق بمقام ماتعمر العين
سلطانة هزت فيها حاجب تنزلت الراس : ولدي فخر الدين كيتخير لي بغا ولي تشهى ومعند حتى حد للحق يدخل في خيارو ولا شوارو
ثورية هزت لعين كيف اللفعة الكرطيطة : ماشي قصدي ندخل في ري سيدي فخر الدين غا هو بانت لي معيفينة و مسخة و بغيت غير نعرف واش تاهيا غاتصيديها في الشبكة
سلطانة تبسمت و ضحكت ضحكة ثقيلة : الشبكة صيدتها في يوم تنطقت سيرتها في مقامي خاصها غا تشد السنارة و قبل حتى ما تكمل الشكوا من فمها ولدي فخر الدين غيرمي عليها طلاقها في عنقها ويرجعها لعفنها وخنزها
ثرية : هي بنت لحداد مغطولش معانا
سلطانة تبشرت بشارة مشرارة : ولدي ليا وحدي تكون حتى بنت وزير غيطلقها ولدي ويجيب مرا خرى في مكانها و حتى وحدة مغاتجي و تعمر بلاصتي و لا تطول العشرة في قصري
ثورية حيدت لبشارة و طولت فيها شوفة مشرارة و هي لي باغا بنتها تحط رجليها في مقام سلطانة باش يعلا شانها وتشد لجام الحكام و ليني عارفة نبايصها و فعايلها تهنا بعدا من هاد بنت الحداد لي خرجت ليهم حكايتها من الجنب