حكمة الذئب

بارت23

صباحو حبايب ❤
(23)

#حكمـة_ذئب

#بقلم_شمس_السعدي

كان يتشبث بآخر خيوط النعاس كي لايواجه قدر صباح جديد يحمل معه نذير الشؤوم !!

من اجمل الصباحات الي مرت عليه .. الشمس رغم حرارتها بس تبعث للنفس الراحة والدفئ الداخلي ..
استلم النتيجة وجان معدلة عالي ..
من صغرة ويتمنى يكون دكتور ومايعرف اذا هذا المعدل راح يخليه يحقق امنيته ..
بوجود خمس درجات الاصدقاء الرئيس وغيرها اكيد راح يكون التنافس صعب ..
بس رغم هيج جان فرحان انه واخيرا ارتاح بعد تعب سنين من الدراسة ..ذلك الطفل الصغير والكبير بعقله .. كبر بسرعه دون اقرانه .. كان يحاول ان يكبر ويتعلم لينقذ والدته من تلك الهموم التي تحيطها ..
ولينشف دمعها الذي يبلل وجناتها ووسادتها كل ليلة ..

كان حكمت يتذكر كل حياته من صغرة وشلون يمسح دموع امه بيده بكل مرة .. بس منا وجاي ماكو دموع راح تفرح دوم وخاصه من تسمع ببشارة نجاحه ..
دخل فرحان للبيت وبسرعه اتجه الغرفتها ..
الابتسامة ماليه وجهة ومخلي نتيجته ورى ظهرها ..
انتبه الذيج الدموع الي مستمرة بالنزول ..
بس هالمرة ليش وشكو ؟؟
سألها : شبيج يمة..
صفنت وبدأت تتلعثم ..
قرفص كدامها : يمة فهميني شبيج
مسح دموعها مثل كل مرة ومن غير مايعرف شبيها طلع النتيجة وخلاها گبالها ..
ابتسم : ابشري ياام حكمت نحجت ومعدلي عالي شوفيه ..

شهگت امي وشهگاتها زرفن گلبي رغم هالمرة جانت شهگت فرح ..حضنتني وماادري جانت تضحك لو تبجي .. اختلطت مشاعرها ..
لزمت وجهها بجفوف ايدي .. ام حكمت مااريد هالدموع تنزل بعد حتى لو بالفرح .. اضحكي دوم ونوري حياتي بضحكتج ..
ماكو شي يستاهل دموعج .. الي يأذيج بس گولي واني اخذلج حگج ..

رضاء جانت تبتسم وخايفة بداخلها لايكره جده لو يتعارك وياه من يسمع قرارة ..
بهذه اللحظة دخلت بسمة عليهم :
عمة عمة وينج وينج ..
شافت حكمت حاضنها وهي تبجي ..
سالتها بسمة :
ليش تبجين ليش تبجين شسوالج حكمت ..

ضحك حكمت ورد عليها : هاي دموع الفرح بسومة مو اني نجحت نجحت .. جان يقلد كلامها

ضاجت منه .. ليش تحجي مثلي تتمضحك علية ..
ضحك : لا والله حبيت اشاقة وياج نجحت وراح اصير دكتور ..شهگت : عليك العباس العباس تصير دكتور وتداويني اريد اصير زينة زينة مثل البنات واخش المدرسة

ضاج عليها ولااراديا حضنها من فرحته مايعرف شيسوي دفعته ..
- عيب عيب لاتشبگني بعد .. بس اذا صرت دكتور وانطوك فلوس جيبلي بتوت بتوت ..

سألها : بتوت شني
ضحكت وخلت ايدها على حلگها :
ذني الي نلبسهن بيدنا ويخرخشن يخرخشن ..
ابتسملها : تتدللين

التفت الامة اني راح الجدي ابشرنه ..
ردت امه عليه : يمة حكمت جدك خاف يحجي وياك بشغله افهم منه مو تضوج لو تستعجل ..

عكف حاجبه : شكو يمة صاير شي
ردت : لا ماكو شي بس انت روح بشره وافهم منه ..

باوعت رضاء البسمة وهي تقيس بشعرها ..
رفعت راسها : عمة شعري طال طال .. اريد اسوي مثلج ظفيرة ظفيرة مااگصه بعد ..ضحكت رضاء واشرتلها تجي يمها.. 
سألتها : بسومة انتي تحبين حكمت ..
ضحكت بسمة : احبنة احبنة عبنه مثل اخوي بس مرات يضحك عليه عليه يضوجني ..

ابتسمت : ياربي هاي طفله وماتفهم شيفهمها بالعرس
بعمري من تزوجت حسن هم جنت ماافهم شي اوووف يربي انت حلها .

حكمت :
رحت الجدي فرحان واريد ابشره دخلت للديوانية لگيته يصلي انتظرت يكمل تربعت وگعدت يمة واني اراقب حركاته وتسبيحاته ..
طبع جدي يطول بالصلاة .. هو جان يصلي واني اتگله
كمل صلاته اتنهدت ..
تقبل الله جدي
ابتسم : اتقبل الله اعمالك وليدي ..
هاي اللمعه الي بعيونك لمعة نجاح مووو اعرفها هاللمعه من صغرك من تجيب الشهادة تعاين عليه بهاي النظرة ..

هزيت راسي : اي جدي نجحت وبمعدل عالي ..ضحك وحمد الله وشكره وفك ايده .. حضنته وهو يطبطب على جتفي :
- شتريد هدية ..
- انت مامقصر وياي جدي شو كلشي اريده يجي ..

اتنهد .. الله يكملك بعقلك وليدي ..
يله روح الامك خليها تسويلنا صينية مرتبة وتعال نتغدا وحدنا مااريد اگبال ذنيج ..
على عيوني مخليهن بالبيت ..
گمت من مكاني : صار جدي

رحت الامي لگيتها لازمة سبحتها وتستغفر وتدعي ..
حجيت وياها : يمة ..
بعدني ماكملت فزت ولونها انخطف ..
- هايمة شبيك
- اني شبيه لو انتي احس بيج شي
- لا يمة مابيه جدك كمل اصب غدا ..

اتقربت من الجدر فتحتهن وادري امي تموت من هاي الحاله ماتحب واحد يفتح الجدر وياكل تگول البركة تطير ..
شفتها فاصوليا شهگت ..
- هلا يمة اليوم مسويه فاصوليا ..ابتسمت : علمودك طبختها ووياها الرشاد والفجل ..
ضحكت : الله الله .. خلي اعاونج واصب جدي يريد وحدنا ناكل يگول لاتصبيلي وياهن واشر براسي لبرة
دخلت عمتي بتول :
- ليش عيني انبزز لو نگس ماتاكلون ويانا ..
استغفرت ربي ردت ارد لزمت ايدي امي ..
بس ماگدرت اسكت..
- هذا راي جدي مايريد يگابلجن اييييه الله العالم شگد حارگات روحة الهيج متضايگ من الجمعه وياجن بنفس السفرة ..

خزرتني امي ..
ردت عمتي بتول : والله وكبرت ياابن رضوه .. وسمعت نجحت اي ليش لا كله بتعب وفلوس جدك ..
اشرتلها : قصدج تعبي اني واضرب على صدري .
رجعت لورة ووجهها اتغير ..
ردت : بعدك ماصرت دكتور وكشخت علينا اذا وياي هيج تسوي وي بنتي شتسوي ؟؟

عقجت حاجبي مستغرب : بنتج منو ؟؟
قصدج بسمة ؟؟ بسمة الي شمرتيها شبيها ليت گلبج مثلها بس تدرين همزين ماربتيها انتي جان طلعت مثلج لاعبالج انسى الي سوتيه بيه اني وامي .. بس يجي يوم الحساب..

عاينت الامي : يلة يمة من تكملين صيحيلي..
وطلعت ..

رضاء جانت خايفة من بتول تحجي وتضيع فرحتة بنجاحة ..
باوعتلها وهمست : بتول لاتجربين حظج بعد..  جدي مو مثل الاول اصلا منتظر فرصه تجي ويخلص منجن فوتي حال ابني ..
وهااا لا تاخذين بسمة حجة .. ولو صارت وان شاء الله ماتصير .. انتي مالج دخل ..
لان انتي مو امها نسيتي شني ؟؟

هزت ايدها وطلعت ورضاء تتنفس بسرعه.. استغفرت ربها وصبت الغدا وصاحت حكمت اخذ الصينية منها وهي اخذت الخضرة واللبن والخبز وراه ..
تلگتها بسمة ..
- ها عمة اشيل عنج عنج .. اخذت منها الخبز ..
وراحت وراها تمشي بسرعه ..
خلت الخبز وگعدت ..
باوعت للخواشيگ .. جبتيلي عمة خاشوگة خاشوگة ..
ابتسمت رضاء : اي جبتلج جا شلون ناكل بلياج .ضحكت بسمة : اعرفج ماتنسيني ماتنسيني عبن انتي تحبيني تحبيني ..

حكمت :
گعدنا ناكل اوووف يفاصولية امي اتحدى واحد يطبخها مثلها .. نفسها بالاكل مثل نفس عمتي حمدية ..
اي اني اصيحلها عمة لان تعودت وهي هم تحبها مني ..

بسمة جانت سوالفها تضحك وتنسي الهموم .. صدگ طيبة ومن اهل الله ..
بس امي ماعاجبتني ابد ماحجت بس مدنگة تاكل ..
ولااگدر اسألها خفت جدي ينتبه ومااريد احرجها .
كملنا غدا ولمينا الغراض وشلت الصينية  ..
شفت عمي هو وعائلته بالهول ياكلون سلمت ورحت للمطبخ..
ضجت من شفت عائلتنا تفككت ولگمتنا انعزلت ..
الله لاينطي الجان السبب ..
غسلت ورحت يم جدي .. اشرلي اجي يمة ..
گعدت بصفه ..
جان يسبح رفع راسه وسألني :
حكمت بوية لو طلبت منك شي تخذلني وترجع كلمتياتفاجأت من سؤاله !!
- جدي رگبتي الك آمر
- اريدك تحمي شخص واخليه امانة عندك ..
- منهو ؟
- بسمة
- بسمة شبيها شني بس لااجو يردوها مايدرون هي من لحمنا اذا همة اهلها بالاسم فهي بنتنا .. وانت يجدي لو عمي مهدي مارادها هو ومرته انت الك كلمة ولاتفرط بيها..

اتنهد : بوية عمك مابي رجا لاهو ولامرتة .. الهيج اريدك تعقد عليها وتحميها ..
بقيت صافن عليه ومااعرف شحجي صدمني بحجايه
سألت بصدمة :
- شني اعقد عليها ؟
- يعني تتزوجها وتصير مرتك وهيج انام واني مرتاح ومطمن عليها .. هالتشوفها طيبة ومن اهل الله وتحب رضوة وماتريد غيرها ..
اني يبعد ابوك…… مااتحملت اسمع اكثر ولأول مرة
خليته يحجي وعفته وگمت .. لأن ادري بروحي اذا بقيت اسمعه حجي واجرحه ..
گمت للغرفه مااعرف شسوي ..شفت امي مادة الفراش وبيدها قماش تخيطة مدري شتسوي بي ..
عيوني مااشوف بيهن

عاينت عليه انخطف لونها :
- شبيك يمة جدك شگالك ..
اتقربت منها ؟ يعني تعرفين ؟؟
الهيج حالج مخربط اليوم وخايفه ..

شمرت الي بيدها واشرتلي اگعد يمها ..
ماقبلت :
- يمة شتردين تحجين شلون تقبليها علية .. اني الي فتحت عيني على مسك ومااشوف بعيني غيرها تردين اخذ بسمة ؟ بسمة ؟ يمة
ضحكت بهستريا
هههههههه بسمة واشر على الباب .. يمة لاعبالج مستهين بعقلها لا ابد .. طيبة گلبها تكفي ..
بس بسمة طفلة طفله شلون اخذها يمة..

دنگت وردت : بگدها اني تزوجت وجبتك يمة ..
تعصبت اكثر : يمة ليش انتي شني شفتي بحياتج ..
انتي طفلة وحرموج من طفولتج ..
لاعبالج ساكت كلشي اعرف وافهم ..جنتي تلعبين وياي بألعابي .. ولمن جدي جابلي مكعبات اتذكر اخذتيهن مني وتلعبين بيهن انتي ..
ترديني اظلم بسمة مثل ماانظلمتي ..
اني مو مهدي مو مهدي يمة ..

بجت وشهگت : ولك يمة اني الي تعبت .. لااگدر اگلك اخذها واكسب ثواب بيها ..
ولااگدر اگلك اعصى جدك واكسر خاطره ..

صفنت عليها وحجيت : هيج صارت موووو
يعني بقيت بخيارين مالهن ثالث مووو ..

مديت فراشي وخليت المخدة نزعت ملابسي بقيت بالفانيلة والبجامة ونمت ..
او حاولت انام اريد انسى .. شگد اجيت فرحان ضيعوا فرحتي ..
ماردت ابقى گاعد واذي امي لو جدي بحجايه..
بقيت استغفر ربي واستغفر الى ان غفيت .

ماحسيت الا على واحد هزاني هز ..
گوم گوم اجت نسوان اجت نسوان .فزيت مخترع .. شكو شبيج ؟
ياخرعتك
زين حسيتي شتردين عطت بيها ..
انهظمت مني وردت :
لاتصيح عليه لاتصيح عمتي گالتلي گعديه نسوان تريد تخيط ..

هزيت ايدي واستغفرت ربي..  انت مسودنة شبيج هو هيج الي يگعد ..
ضاجت :
انت مسودن مسودن .. ساعه تضحك وساعه تصيح عليه ..

دارت وجهها وطلعت مهظومة كسرت گلبي..
اوووف يحكمت معقولة تطلع حرگتك بيها هي شذنبها

بدلت وطلعت .. غسلت برة ومناك طلعت للمحل ..
تذكرت جدي گاعد بي هسا ..
اخذتني رجلي السيد علي .. احب اگعد يمة واسولف كم وياه ..
جان يغسل بالحلال مالتة.. شافني ابتسم .. اشر الولد وياه يكمل واتقرب يمي ..
سلم عليه : شلونه الذيباتنهدت .. الحمد لله
رد عليه : حجايتك بيها حسرة .. شني الي مضيگ خلگك..
رديت : تعبان سيد محتاج احجي اريد اصرخ احس شي خانگني ..
اشرلي بحركة بإيده : انتظرني بس ابدل واجيك نگعد بمكان ونسولف ..
انتظرته بين مابدل وغسل واجة ..

طبطب على ظهري خلينا نروح للگهوة ..
وگفت : لا نروح على الجرف نگعد ..
رد : خوش حجي ..

طول مانمشي اني حاير شلون راح افتح الموضوع واحجي بس محتاج واحد يفهمني ..
گعدنا .. اتنهد
يلة احجيلي شني المضيگ خلگك ..
عاينت عليه : جدي يريد يزوجني ..
ابتسم : اي بالخير والله خوش خبر وانت بعد كملت سادس نصيحة مني خلي جهالك يكبرون وياك ..

- بس اني مامستعد وخاصه الي اخذها .. اوووف استغفر الله ماادري اذا عمتي وداد حجتلك عن بنت عمي مهدي الي مخليها عند خوالها ..

استغرب وعكف حاجبه : لا ماحجت شني بنت مهدي قصدك من مرتة الثانية

بقيت صافن مااعرف شأحجي معقوله صارلهن اشهر من طردهن جدي وهو مايدري ..
مالحيت على السالفه ودخلت بالموضوع گبل ..
- البنية عقلها مو شي وطفله مانتوالم اني وياها شلون اخذها سيد .. جدي يريد يأمن عليها بس شني ذنبي اني ليش لازم ارضخ واوافق ..
اني عندي دراسة ومستقبل شلون اعيش وياها ..

اخذ نفس وگال : شوف حكمت هذا مستقبلك وانت ادرى بس اتذكر هاي الاية ( عسا ان تكرهوا شيئا وهو خيرا لكم )
وخاصه بالقسمة اذا الله قاسملكياها تصير .. مثل اني وعمتك من اخذتها جنت راضي بقسمتي ومقتنع وفرحان هم وبعدها شفتها غير الي اتخيلتها ..
اني مااريد اعيب بيها بالعكس هي مرتي وام بناتي..
بس كـ مثل انطيك ..
يعني هي البنية الي تگول عقلها مو شي شمدريك ماهي تغير حياتك واخليك تحبها ..السيد يحجي واني اتذكر سوالفها من تگول اشتريلي بتوت يخرخشن ابتسمت..
عاين عليه السيد وضحك : ابتسامتك هاي هي الجواب
لابد بيها ميزة حلوة مستحيل الله يقسملك قسمة مو زينة ..
حتى المو زينة تنعدل بمرور الايام وتصير على مرامك ..

السيد طبعه مثل جدي .. صح ينصنحني بس مااگدر
اخذ لاحق ولاباطل منه .. رجعت واني الوم بالوكت والحظ صارت عربانه مفتح بيها مثل البسطية قراصات واكسسوارات .. عاينت على العربانه عيوني تدور على البتوت .. سألته طلعلي اشكال مااعرف قياسها اخذت هيج ورحت ..
ماادري شني الي خلاني اوگف واشتري صار حجي السيد براسي حكمت انت راح تمشي بضميرك مو بگلبك فأختار الي تقتنع بي وتشوفه صح ..

فركت وجهي وفوضت امري لله ودخلت للبيت جان مار  على المغرب هواي واني امشي وافكر ماادري بروحي رجعت للبيت تعبان راسي من التفكير ..
تلگتني امي بقلق تهمس :
- وين يمة لسا وجدك هم باله يمك ..
رحت للغرفه من غير مااحجي وحتى ماخليت عيني بعين واحد ..
اليوم جان احلى يم بحياتي وانگلب عليه هم وغم
دخلت للغرفه نزعت الدشداشة ..
سمعت شهگة وراي فزيت شفتها مغمضة عينها
- عيب عيب خليني اطلع ..

بقيت صافن عليها علي حركاتها وتصرفاتها على طولها برائتها صح مالها ذنب بس مااگدر مااگدر ..
صحت وراها وگفت ومغمضه عينها .. خليت ايدي بجيب الدشداشة ادور وهي واگفه بعدهي ومغمضة
- ها ماتحجي ماتحجي افتح عيوني بدلت بدلت

طلعتهن گامن يخرخشن ..
بسرعه فتحت عينها من سمعت الصوت وشهگت
شني جبتلي بتوت ..
مديت ايدي الها اخذتهن بأبتسامة ترست وجهها وشردت
دخلت امي : يله يمة خليت العشا جدك منتظرك
رديت بتعب : مااشتهي يمة اريد انام جاوبتني : شني تنام بعد وكت ..
اتقربت مني ولزمت جتفي دارتني عليها .. عيونها يحجن بتوسل :
يمة لاتكسر گلبي عليك مااريد اشوفك مهموم هسا امشي اني واحجي وي جدك واگله ماتريد هالزواجة شني مجبور لو مامجبور .. صح احب البنية واستخطيها بس انت عندي اهم ..

رديت عليها : لايمة انتي لاتحجين وياه اني احجي ..
بدلت وطلعت صار گبالي رزاق جان يضحك ويعاين عليه مااعرف شبي ..
رحت للديوانية بين ماامي اجت بالصينية تلگيتها اخذتها منها. 
جانت عيون جدي عليه :
هااا يحكمت اشوفك مدوهن يبعد ابوك .. لاتضوج استخار والي تشوفه وتريده يصير .. بس خليني گبال عينك ولاتكسرني لان اني ببالي شي ماتفهمة عبالك اني جاي اظلمك بس ابد ولايوم ظلمتك كل الي اسوي اريد بي مصلحة بيتي وعائلتي..
عائلتي الي ماصفالي بيها بس انتو ..
دخلت بسمة وهي تمشي سريع وبيدها معجانة الخبز. 

- عمة نسيتي الخبز الخبز .  خلته وهي تخرخش بيدها
شوفي عمة شوفي حكمت شجابلي صارت عندة فلوس فلوس ويشتريلي .
رفعت راسها الجدي ..
حجي حجي حكمت صار دكتور دكتور. .
ابتسم جدي وعاين عليه ..
الخير فيما يختاره الله ابني .. الخير فيما يختاره الله

تعشينا وكملنا جنت تعبان ومنهك توضيت وصليت استخارة ونمت ..
گمت اتگلب الى ان حلمت .. امشي بطريق ضيگ واظلم وكلما امشي يضيگ بالزايد ..
وبالاخير شفت باب حديد مشبك مثل باب السجون ..
بقيت اضرب بي واصيح اريد واحد يفتحلي ماكو احد
الى ان اجاني نور قوي اتقرب وشفت بسمة بس مو هذا شكلها .. جانت لابسة ابيض وحلوة كلش وبيدها طفلة ..
كلما تتقرب مني الطريق يضوي والباب ينفتح وبعد گدرت اطلع ..
فزيت من نومي مرعوب واحس روحي منگع بالعرگ من الحر وجانت طافية الكهرباء ..
اذن اذان الفجر استغفرت ربي وگمت اصلي سمعت صوت جدي .. سنين وهو مابطل يروح الفجرية للجامع يأذن ويصلي اكو واحد بمكانة بالنهار بس اذان الفجر ماتركه ابد ..

خليت السجادة صليت وكملت .. الكل نايم بالسطح لان حارة بس امي تفرش بالطارمة وبسمة يمها طلعت شفتهن جان نومها مبعثر .. غطيتها و ورجعت للغرفة فتحت الشباك بلكي تجيني نسمة هوى جانت الدنيا واگفه ومنا القلق والحلم ببالي ماگدرت انام ..

مر كم يوم واني كلما استخار تطلع من صالح بسمة مااعرف شني الي خلاني اروح الجدي ..
وارد الجواب رغم بداخلي مامقتنع وعقلي مامتقبل السالفه..

گعدت يم جدي وهو حس عليه طول ذيج الايام ماحاول يضغط عليه ..
بدون مقدمات حجيت : جدي اني موافق ..
جان عينه بعيني وهو يسألني : موافق على شنو يحكمت ..
- مو ردت تأمن على بسمة هاي جاي اگلك موافق ..
- يعني قصدك موافق تعقد عليها وتخليها مرة الك ..

هزيت راسي ودنگت ..

اتنهد : بيها الخير وليدي اني خليت على راحتك حتى تختار وتفكر لان اعرف ماراح تختار الا الصح ..

رديت عليه : بس عندي شرط
- گول بوية
- مااريد احد يتدخل بيها لامن ذولاك ولامن هنا .. يعني مو عمتي بتول تستقوي بحجة بنتها وتتدخل بيها وبحياتنا ..
بسمة اذا عقدت عليها بعد محد اله شغل بيها اني اصير ولي امرها واني بس الي اقرر بكلشي يخصها. .

جاوبني : الي تريدة يصير اني راح اجتمع بيهم واوصي وهاي گدامك بس يبدر اي خطأ منهم .. البيت ينقسم وهم الخسرانين ..

- لاجدي  مااريد توصل الامور الهيج بس اني اريد ارتاح وعندي دوام جاي وكليه واذا طلعتلي طبيه لازم اذب روحي كلش وادرس مااريد احير بمشاكلهن بالبيت وتدري بأمي انت فقيرة وماترد ..

- اعرف كلشي وليدي .. اني هم تعبت واريد ارتاح .
انت لاتشيل هم الكلشي اني راح اتكفل بكل المصاريف طلعت من جدي ورحت الامي گلتلها الخبر : صفنت بوجهي الثواني وردت
- جدك جبرك
- لاماجبرني
- جا شلون وافقت مو كتلت روحك وماردتها وقارنت بينها وبين مسك شغيرك هسا ..
- ماادري يمة بس هالمرة شي بداخلي خلاني اوافق ..
بس تكبر وتفتهم ساعتها احجي وي جدي وافسخ العقد
هي بس امانة حاليا بالنسبة الي ..

جاوبت امي بأستغراب : امانة شني هاي اول مرة اسمعها يمة لا تلعب بالبنية وهي فقيرة ومن اهل الله لو تاخذها ولا لا ..

رديت : لاتخافين يمة مااظلمها وشتدرين بگلبي اني هم الي اذوني ماظلمتهم دور اظلم هالطفلة ..

- يمة شني جا تريدها العمر كله بعينك تبقى طفلة لا جاهاهي ماشفت جهالك بعد ..

- وليش متوازية يمة بعدني صغير خليني اكمل دراسة والله كريم ..هزت ايدها : يمة اني شلون اصبر احنة مالنا احد وانت وحيد اريد الك سند يكبرون وياك ..

ضحكت : يمة الله سندنا الله مانريد سند بني ادم ..
حضنتها ردت بس اغير الحجي لان تعبت من التفكير

دخلت بسمة :
ضحكت علينا .. جنك طفل جنك طفل نايم بحضن امك

همستلها امي : كم مرة گلتلج من تدخلين الغرفه تدگين الباب مايصير .. وبعدين هو مو طفل بس متعود ينام بحضني..

- اني اني ماتنيمني بحضنها بحضنها تگلي عيب كبرتي كبرتي .. عود شيصير لو الواحد ينام بحضن امه ..

ضحكت على سوالفها .. گمت من شفتها تعاين علينا وضايجة .. اشرت الامي طالع ..

رضاء شافت صار الوقت الي لازم تحجي بي وي بسمة
اشرتلها تجي يمها وگعدتها وذيج عينها طافرة على كل شغله تشوفها تسأل ..

صفنت على قماش حلو مال فساتين وبي ورد ناعم ..
لزمتة بيدها تتلمس الورد ..
- عمة هذا حلو حلو ماتخيطيلي منه ..

ضحكت رضاء وردت :
- اخيطلج منه من تعرسين ..
عكفت وجهها بسمة
- شني اعرس
- يعني تصيرين عروس

شهگت بسمة : صگد اصير عروس عروس والبس بدلة
مثل اللعابات بس شعري صغير صغير شلون اسويه

جاوبتها رضاء : انتي معليج اني اخلي وحدة تسويليجياه يخبل وراح اخيطلج ثوب بيدي يخبل ..

ضحكت بسمة وفرحت : وتسولي حفله حفله
هزت راسها رضاء : اي جا شلون نسويلكم حفله انتي وحكمت وجدج راح يجيبلكم غرفه حلوة

صفنت عليها : جا حكمت هم يصير عروس عروس هو ولد مايصير مايصير ..

ابتسمت رضاء وردت عليها : شوفي بسومة يمة العروس مايصير تعرس الا وياها عريس ..
وانتي حكمت هو عريسج يعني رجلج .. راح تصيرون بغرفه وحدكم وتنامين يمة ويحضنج ويصير ابوج وامج…

طفرت بسمة من مكانها : لا مااريد مااريد اصير عروسه بطلت بطلت..
عافتها وطلعت ..
اتنهدت رضاء وهزت ايدها بلة هاي شسويلها وشلون افهمها .. سودة عليه يمة حتى من ردت افرح بيك مثل الشباب واشوف ولدك ماگدرت ..

گامت من مكانها خابرت العمتها حمدية الي جانت حايرة برجلها مااتهنت بي من يوم الرجع لسا هاي صار سنة واكثر على رجعته ماصدگت شويه تغيرت نفسيته دور المرض مايفارگه والكحة تزيد ..

جانت حمدية تشكي الرضاء همها ورضاء حايرة شلون تفتح الموضوع وي عمتها ..
بس حمدية فهمتها وسألتها :- اي يرضوة شلونه ابوي وكلهم شلونهم صدگ گرت عينج على حكمت سمعت ناجح يوم الي تشوفيه دكتور وعريس وذريته تترس حضنج ..

اتنهدت رضاء وردت :
- جا مادريتي عمة جدي راح يزوج حكمت
شهگت حمدية من فرحتها :
- اي بيها الخير صرت اني اخر من يعلم .. بس مو گلتيلي مسك ابوها رفض بعد شني ردوا وافقوا ؟؟

- لاعمة جدي راح يعقدلة على بسمة

صفنت حمدية شوية وبعدها صاحت :
- يابسمة .. بسمة الخبلة بنت مهدي .. يبوي يبوي ولج شنهي هذا الخبر ..

بجت رضاء : ياعمة لاتزوديها عليه البية مكفيني كلما اريد اواسي روحي واگول البنية فقيرة ويكسب بيها ثواب بس مااگدر مااگدر ..

ردت حمدية : ياثواب هو سبيل .. هذا عمر تعرفين شني عمر اني مااعرفها ولاشايفتها بس كم مرة .. مهرفلة وجنها مسودنة وتعيد الحجي مرتين ..هاي تصير الحكمت العاقل الرزن والدكتور ان شاء الله ولج من جنت اعاين عليه اگول هنيال التاخذة ومن سمعت رايد مسك گلت اي والله يستاهلها ..
بس تالي تصدميني هالصدمة يرضوة ..

- " عمة حكمت وافق بعد مااگدر احجي شنهي الي خلاه يوافق ماادري بس يگول اخليها مثل الامانة عندي واني اريد اشوف جهاله شني يخليها امانة "

صاحت بيه " والله يرضوه اشوف هالبسمة سودنتج گد ماتگعد وياج ولج يافروخ وهي خبله شيجون وهمة عندهم وراثة "

من گالت حمدية هيج تخبلت رضوة وبقت تواسي حالها بأن كلشي بيد الله تالي طلبت من عمتها يجن ويرحن للسوگ يجهزن بسمة ويجيبن قماش يخيطنه فستان مال عقد ..

وافقت حمدية رغم وضع زوجها واتفقن باجر تمرلها ..
حكمت شرط على جده مايريد هوسة ورنة كلشي يصير بيناتهم وهو عقد هو زواج ..
لان راح يبدي التقديم ومايريد شي يشغله عن دراسته
الحجي خضير جان موافق الكل شروط حكمت ..حتى عاند مهدي وبتول واخوها الي يهددهم بكشف سرهم وسر حكمت ..
بس حجي خضير مانهز ولااهتم التهديده وگالهم حاضرها وغايبها قرآن خاف يجي يوم يطمعون بالمهر ويطلگوها ولان يعرف حكمت ماراح يظلمها بالمستقبل ..

بدأت حمدية ورضاء بالتجهيز وبتول كل شويه مخليه روحها وحمدية تطردها وتعيرها
" مو شمرتيها الاخوج بعد شكو تدخلين روحج هي مو بنتج الام مو الي تجيب الي تربي "

كلما تحط روحها هي ولميعه حمدية جانت واگفتلهم مثل العظم بالزردوم .. ماتنطيهن مجال ..
اما بسمة جانت بعالم ثاني وهي لابسة الثوب وتقيسة وفرحانة ..

عكست فرحتها الرضاء الي جانت ضايجة بس فرحانة الفرح بسمة .. وصارت تقلد حمدية كلما تتدخل بتول لو وحدة منهن ..
تردهن وتگلهن " انتن مالجن شغل مالجن شغل "

جانت ماتحب بتول والسبب مبهم بالنسبة للجميع لكن بسمة جانت تعرف وسمعت انه بتول امها وذبتها من صغرها و دايما جانت تشوفها تجيهم للبيت بس ابد ماتهتم بيها الهيج حست بنفور منها ..

صار يوم الحقد وحكمت ماقبل يسوي اي شي بس السيد علي اخذه الحمام السوگ بالگوة وطبطب على ظهره ..
" لاتضوج يالذيب عود انطيك بنين مرة الك گبع واخذ لو عندك ثلاث نسوان "

حكمت جان يضحك وكل ظنه السيد يتشاقة وياه بس بالحقيقة السيد جان يتمنى حكمت من صغره البنته ..

سبحوا وكملوا وراحوا اختار بنطرون وسترة وقميص
بدل وكمل ورجع للبيت تلگته امه بالهلاهل والجكليت وجدة ذبح خروف وسوة عشا بينهم ..
للعصر اجة الشيخ وعقدلهم ..
جانت بسمة عينها على الثوب وبالها مو يم احد اصلا
الى ان لقنتها رضوة ورددت مثل ماگالت ..

رجعنها للهول وجانن العلويات موجودات ووداد وبناتها وسداد الي جانت تباوع البسمة وتهز ايدها ..
" هالطفله عرست واني لسا " رغم مابقى شي الزواجها براكان

كمل العشا وزفوا حكمت الغرفته الي اختارها بنفسة غرفة اخشاب لونها ابيض هذا جان حلم بسمة وحققه الها يوم سألها :
- شتحبين لون غرفتج

ضحكت : يا جا اني منيلي غرفه غرفة
ابتسم : اني اشتريلج
فرحت وبقت تفكر تالي جاوبته : اريدها بيضة بيضه

اخذها بيضه ورضاء زينت الغرفه بجراجف وستارة مطرزات بيدها ومشتغلتهن من زمان الهيج يوم ..

جان كل الي يجي يشوفها يتخبل على ترتيبها واكو من يضحك ويگول
- الخبلة گعد حظها وهاي غرفتها ..

يعتبروها خبلة لكن هي بنظر حكمت جانت اعقل منهم تفكر بكلشي والشغلة الي تحس مامقتنعه بيها ماتسويها والاهم جانت تسمع كلام امة وتاخذ بنصايحها ..
قبل العقد رجعت وسن للبيت وجانت حامل هم وهالشي ضوج بتول وعكر مزاجها طول الحفله ..

حكمت :
صعدت الغرفتي شفتها گاعدة على جرباية وتتلمس بثوبها ..
شافتني گامت .. شوفه شلون حلو حلو ..
هزيت راسي اي لان انتي حلوة ..
اتقربت للمرايا وتعاين الروحها صگد اني حلوة حلوة

ضحكت اي بس لو تغسلين وجهج مااحب تخلين مكياج وجهج حلو لاتخربيه ..

صفنت على روحها بالمرايا وردت
" ليش حلو مثل اللعابات "

سحب كلنس من الجرباية وصار يمسح بوجهه وهي ضاجت
" ليش تمسحة ليش "
" لان مو حلو انتي بلا مكياج حلوة "

ردت عليه " جا اروح اغسل واجي "
لزمتها " لا اوگفي مو هسا خلينا نتعشا ونصلي وبعدين تطلعين تغسلين "صفنت عليه " بس اني مااعرف اصلي اصلي "
ابتسمت " اعلمج اني "
ضحكت " يلة گوم هسا هسا "

اندگت الباب فتحتها شفت اني ابتسمت وبعينها نظرة حزن اعرفها ..
" هذا عشاكم يمة ومااوصيك "
همست " شتوصيني يمة شتفقنا ماتشوفيها طفله شتفتهم "

جن ماعجبها الحجي انطتني الصينية وطلعت ..
خليت الصينية بالگاع ونزعت السترة ..
رحت للزاوية اخذت الدشداشة وشفت بصفه سيت نوم ابيض ستن ضحكت ..
" والله عليج سوالف يمة "

درت وجهي " بسمة يلة بدلي حتى نتعشا "
سألت " شألبس ؟ "

ماردتها تلبس سيت .. فتحت الكنتور وطلعتلها دشاديش امي مخيطتلها ربع ردن واكو گصيرات بس اهون من السيت ..گلتلها " البسي هاي الدشداشة بس ذني تلبسيهن بس بالغرفه من تنزلين جوة تلبسين دشداشة طويله
هزت راسها واخذت الدشداشة مني ..
" اطلع خلي ابدل عمتي ماتقبل ابدل يم واحد "

ضحكت " بس اني صرت زوجج عادي تبدلين يمي "
صفنت " وانت هم تلبس يمي "
هزيت راسي..
مااقتنعت  " لا دور وجهك وجهك "

درت وجهي للمرايه وبديت افتح قميصي اريد ابدل صارت عيني لااراديا على المرايا شفتها نزعت مااعرف ليش بقيت اعاين جسمها مو مال عمرها كلشي بيها ينگط انوثة اول مرة اشوف بنية بهيج منظر مااعرف شني الي تحرك بيه بعدها استغفرت ربي وذكرت هاي بسمة بسمة الطفله والي عقلها طفولي ..

بدلت وكملت گعدت هي كملت واجت يمي ..
تربعت هاي شني لحم جوعانة جوعانة راح اكل ..
هزيت راسي اي اكلي ..
صارت عيني عليها وهي هادية وشعرها البني النازل على وجهها وايدها جانت تاكل بيهن ماتگدر ترفعه رفعت گذلتها عنها عاينت وتبتسم الي ..
دور متربعه وگاعدة وجسمها ابيض ودشداشتها قصيرة حسيت بشي اتجاهها ..
بعدها كرهت روحي واني افكر بيها برغبة مو حب ..
يعني ماافرق عن عمي مهدي…
تعصبت من روحي واني اتذكر امي شلون جانت تعاني منه ..
" مستحيل اصير مثلة مستحيل .. راح ادللها وانطيها الحنان بس ابد ماراح المسها برغبة حيوانية مستحيل"

تعشينا وكملنا طلعنا غسلنا وعلمتها شلون تتوضئ بالحنفية الي بالسطح ..
وبعدها دخلت .. سألتها انتي حافظة ايات
هزت راسها " عمتي رضوة علمتني الحمد وقلهو "
ضحكت..  اسمهن " سورة الفاتحة والاخلاص "

هزت راسها ..
وگفت وفرشتلها السجادة وراي .. بعد مالبستها شي طويل ولفيت راسها بحجاب ..
وگلتلها " شحجي تحجين وراي "
وصارت تسوي مثلي ..

كملنا عاينت علية گالت نعست انام ؟هزيت راسي " روحي نامي بين مااترس المبردة "
طلعت للسطح خليت الصوندة على المبردة واذا انگطعت معناها اكلنا البگ ..

رجعت للغرفه طفيت الاضوية .. شفتها فاطمة بالنوم شبسرعه ماادري ..
نزعت الدشداشة ورحت نمت بصفها .. فتحت عينها بثگل شافت الغرفه ظلمة اتقربت عليه وحضنتني اخاف اخاف من الظلمة الظلمة ..
دحست وجهها برگبتي وحاضنتيني وانفاسها تدغدغ رگبتي ..
ابتسمت واتنهدت " خبلة وراح تخبليني وياج "

#بقلمي_الكاتبة_شمس

يتبع .…

لاتنسون التصويت ..
ارآكم بالبارت ؟؟ اريد توقعاتكم