البارت لعيون هالعسل @hnoodh45
سارة : طيب بسرعه عشان يمديك تخلص قاعد تقابلني وش تسوي ضحك وهو يقوم ل سيارته براحة ابسط الايمان انه حرر نفسه من ذنبها امس وكلامه لها اليوم بيضغط على نفسه وبيتحمل قربها لانها يومين وبتصير ذكرى عابرة ، خطوة من حياته وتعداها كلها يومين بالكثير وترجع حياته زي اول بدون هم يتجسد باسم " سارة " ابتسم على خياله اللي بث فيه الراحة العميقة وهو يتامل حياته بدون سارة .
'
'
بعد ساعة .
وقفت تتأمل الغرفة وهي تلبس عبايتها كلها يومين وينتهي كابوسها مع صقر ، يومين وتنام بحضن امها يومين ويتربى ولدها ب بيت خواله راح تنام وتصحى مرتاحة وبأمان بدون خوف من مستقبل او ندم على ماضي ، صحاها من سرحانها صوت جوالها شافت المتصل صقر ، لبست نقابها ونزلت له تحت .
ركبت السيارة : السلام عليكم
صقر : وعليكم السلام ، ايوا وين بيتكم
سارة بغباء : مدري وينه فيه
صقر لف عليها بصدمة وهو يوقف : تستهبلين فيه احد مايعرف بيتهم ؟
ضغطت بيدها على راسها ، تستنجد ذاكرتها تسعفها لكن كانت ذاكرتها في صف ضدها تتلذذ بعذاب ساره وصراعها معها ، اسعفتها ب موقف قعدت سارة 5 سنين تتناساه ، ذكرى تجمعها ب اخوها الكبير فرحة امها وابوها الاولى ، قبل 6 سنين :
( طالعة من ثانويتها تحجب بكفها عن رأسها من وراء العباية السوداء اللي كانت تستر بدنها ، ركبت سيارة مساعد البيضاء وهي تسكر الباب بقوة : بدري اخ مساعد ؟
مساعد بعصبية وخوف ع سيارته : شوي شوي ع الباب لو ابيعك ماجبتلي قيمته
سارة بحماس تتربع : ماعلمتك شصار اليوم ؟ التمست مدرستنا وسوينا اخلاء وطول الحصص جالسين تحت
مساعد : ياليتك ميته ولا سكرتي الباب كذا " بجدية " صدق لو صار شي لا سمح الله تدلين البيت ؟
سارة : لا والله
مساعد بصدمة وهو يضربها على راسها : حمارة انتي ؟ 3 سنين اوديك واجيبك من نفس الطريق وتقولين مادل ؟ )
هزت راسها يمين وشمال تطرد الأفكار وتطرد ضحكة وصوت اخوها موقفها مايسمح لها تسترد حنينها ، بعجز : ماعرف من هنا ، روح ل مدرستي يمكن اعرف اكثر
صقر بطولة بال وهو يفتح قوقل ماب : شسم مدرستك ؟
علمته ومشى لين وقف قدامها : هذي هي يالله دليني
سارة غمضت عيونها وهي تحاول : روح قدام " همست " بقالتنا " ذكرت لما كانت تنزل عندها الظهر وتجيب اندومي لها ولسعود يتغدون عليه وتعصب عليهم امهم لانها مسوية الغداء " اترك البقالة يمين وادخل اول حارة بتلقى مسجد اتركه يسار وادخل الحارة الخامسة " تذكرت لما تبدئ سيارة مساعد تهدئ لانهم قربوا وتنزل تركض عشان تسبقه " بس وقف هنا
صقر يتلفت يمين ويسار : اي واحد ؟ " بنفسه " الحي مو غريب علي نفس حي سعود
سارة وهي تتأمل البيوت ولا واحد فيهم بيتهم !
سارة وهي تتأمل البيوت ولا واحد فيهم بيتهم ! حتى سيارات اخوانها مو هنا خنقتها عبرتها : ولا واحد اساسا هذي مو هي الحارة " شهقت ببكاء " انا غبية ماعرف وين بيتنا فيه حتى ماذكر ولا شي واليوم نسيت اللي جمعني فيهم وبكره بنساهم " رمت راسها على اللي قدامها بضعف " ما أبي انساهم اخاف اشوف أمي بكرة وما عرفها اخاف " صرخت " اخاف
صرخت قهر وهي تسحب طرحتها وجهها مزرق أنكتمت مع الصراخ والبكاء
فز خوف ويضربها على صدرها يبيها تتنفس مو ناقص تموت بسيارته سحبت نفس بعد معاناة ، رمت نفسها على المرتبة تعب وهي تحس ب مشاعر تربط هنا تشم ريحة الحي والله نفسها نفس الريحة اللي كانت تشمها بطفولتها كل شيء هنا تحسه ينتمي لها بس مو قادرة تتعرف عليه مسحت دموعها وهي تعدل طرحتها .
مشى صقر وهو يناظرها ب شفقة عايشة بدون أهل ، ب طفل حرام ، زوج يكرهها ، بلا شهادة ، ناس تجهل فيهم كل شي ومع ذلك صابرة وتضحك ! حس بالنعمة العظيمة اللي هو عايش فيها ولا مقدرها .
مشت سيارة صقر من هنا ، وخرج ابو مساعد من هنا وسعود يساعده
ابو مساعد وهو يتأمل ديكور بيتهم الجديد : والله خوش شغل عرفت تختار ناس سنعة
ضحك سعود : افا عليك وانا ولد بو مساعد اعجبك اجل كل الحارة يكشخون ويغيرون بيبانهم واحنا لا ؟
ضحك وهم يمشون ل المسجد ل صلاة المغرب .
'
'
مساعد يبتسم لها وهو ينزل معلقته : اذا خلصتي بنصعد عندي لك مُفاجاءة فوق
عايشة بحماس : ايش مساعد تكفى علمني ؟
مساعد يهز كتوفه : مدري اذا صعدتي تشوفين
عايشة تمسح فمها بمنديلها : خلصت يالله
ضحك مساعد : وش فيك كانك بزر اذا قالوا بنوديك البقالة شبعي اول المفاجاءة ماتطير
عايشة بتافف : مساعد تكفى يالله
ابتسم وهو يقوم اول مره تطلبه مايبي يكسر بخاطرها : طيب يالله
صعدوا ل جناحهم ، غمض عيونها بيدينه وفتح الباب ابتسم : هاه اشيل يدي ؟
عايشة بحماس : اي يالله
فتح يده وانصدمت وهي تشوف بوكسين مغلفة بتغليفة وردية وبلونات هليوم شفاف وابيض ، قربت وفتحتها البوكس الاول كان ساعة من روليكس والثاني كان ايفون 6s روز
شهقت : ليش كلفت على نفسك ؟ جوالي كويس والساعات ماحب البس
مساعد : تستاهلين اكثر بعدين كل البنات كذا ساعات ماركة وجوالات اخر موديل بعدين شايفة جوالك نوكيا N72 حتى سواقنا متطور معه ايفون
'
'
بعد مرور اسبوعين .
في جناح سارة & صقر .
كانت جالسة على السرير ب هم ، طفشت من حالها لها اسبوعين من جوا من اهلها وهي كذا ! لا تاكل ولا تشرب وتفكيرها مشغول .
البكاء والتفكير والحزن ؟ ماراح يجيب لها اهلها لو فكرت بمنطقية يكفي ماضاع من عمرها خمس سنين وهي حزينة ، قامت ل دولابها فتحتها وهي تتأمل فساتينها اليوم كل الرجال اليوم كل الرجال طالعين ل استراحة مافيه الا البنات بتاخذ راحتها ، طلعت فستان ليموني عليها نقش سكري مطرز بسوار فيسكي واكمامه جمب صدرها ومن فوق مافيه شي فوق ركبتها بشوي ومفتوح من وراء تحت سبعة وكعب بُني فكت شعرها وفيرت اطرافه وميك اب خفيف ابتسمت وهي ترش عطرها فيرزاتشي كرستيال نوار البنفسجي عجزت تغيره من سنين ابتسمت وذاكرياتها تحاربها رجعتها لقبل خمس سنين : ( دخلت بفستانها المخصر يوصل لنص فخذها وشعرها ذيل حصان وريحة عطرها تسبقها ، دخلت تتسحب بكعبها جلست على مكتبه وهي تشوفه معطيها ظهره بالكرسي ويراجع اوراقه !
بدر بابتسامة وهو معطيها ظهره : هلا بنور عيني
سارة شهقت وهي تضرب برجلها الارض : باي حق تعرف اني هنا وانا داخلة استحب ؟
لف بكرسيه عليها وضحكاته تتعالى وهو يسحبها بحضنه ويلعب بشعرها : مجنون ماميز عطرك ؟ " غمض عيونه وهو يعض اذنها " بذمتك ماهو قهر عاقل ويلعب بي عطر
ابتسمت وهي تحط رجل على رجل وتسند نفسها بحضنه وتسحب الاوراق منه وترميها على المكتب ، عض بدر شفته السفليه وهو يشوفها انتبهت له ضحكت من قلب وهي تغطي وجها بشعرها بحياء من نظراته لها ، نزل شعرها من على وجهه وهو يبوس يدها : شعرك الطويل لو تفلينه ينتشر عطره ويربك شراييني ناظريني ووجهك لا تغطينه خلي الحسن يذبحني ويحييني ، وش سويتي فيني ؟
سارة وهي تبوس خده بنعومة : والله كيفي زوجي وحلالي ! )
خانتها دموعها اللي طاحت من ذكراها زوجها اللي لو تلف الدنيا ماتلقى بطيبة قلبه وحبه لها نزلت تحت وهي تردد بقلبها الله يرحمك ، الله يرحمك .
'
'
دخل وهو يسكر من مكالمته بسرعه وبإستعجال : رسيل لاب توبك وينه ؟ حقي بالشركة مابي اطق مشوار
رسيل : بغرفتي على التسريحة
ركض على الدرج وهو يفتح جواله يشوف كم باسورد حساب الشركة ، سحب لاب توبها ودخل جناحه جلس على السرير وهو يطلع الاوراق ويراجع الحسابات متجاهل اللي كانت توها داخلة عليه من المطبخ ب كوب كابتشيو .
شافته لابس نظاراته وفاتح اللابتوب وناشر اوراقه والقلم ورا اذنه وجواله في حضنه
تنهد صقر : الله يهديك ياسعود حست علي الدعوة احد مايعرف يضبط تواريخ الحسابات ؟
سارة وهي تشرب : كاني اسمع حسابات الدعوة فيها رياضيات ؟
صقر هز براسه بايجابية وهو شوي ويبكي من الحوسة اللي صايرة اجبرته يجي من الاستراحة عشانها
حطت كوبها على قاعدة الاوراق : عطني افهم بالرياضيات كثير
صقر وهو يعدل نظارته : خذيني اللي تبين
قربت بعفوية من حضنه وهي تتفحص الاوراق ، انتشر ريحة عطرها وشعرها اللي كان حول انفه غمض عيونه وعطرها يلعب فيه لعب يبي يبعدها يروح بس ريحتها تجبره جذابة ! دخل يده بخصلة من شعرها الاسود الممزوج بالبني من الله الكثيف .
لأول مرة يدقق بشعرها كان يوصل نهاية ظهرها كثيف وناعم وكيرلي خفيف بنفس الوقت انفتن فيه بإختصار ، نسى اللابتوب
والشغل والحسابات اللي لخبطت عليه تعاونهم مع الشركات المُعلنة ريحة عطرها وشعرها ماخلو به عقل .
نست نفسها وهي تشوف الأوراق ممكن تكون اكثر انسانة بهالدنيا تعشق الرياضيات كان متربع وهي جت ثنت رجولها وجلست جمبه لما جت بتشوف الاوراق مالت بجزء جسمها العلوي على رجلين صقر عشان تاخذها وبكذا كانت رجولها على السرير وبطنها على رجوله وصدرها على السرير وقدامها الاوراق : مره سهلة مالها وقت ممكن تكون لخبطتك بالتواريخ " قامت بجسمها شوي ولفت وجهها له شد على خصرها بحضنه وهو يتأمل عيونها كان الكحل زايد حلاها كانت شبه مبطنة ورموشها خفيفه وحواجبها عادية ماكانت قمة بالجمال لكن جذبته وجرت على وجهه بعد ، اما سارة كانت اول مرة تكون منه ب هالقرب الفضيع اول مره تتامل بعيونه لمساته قشعرت بجسمها تبي تتحرك تبعد ماقدرت كانت اشبهه بالجثة وهي بحضنه قرب وهو عاض شفته السفلية ويحرك بانفه ببطئ ع رقبتها ريحتها خدرته : اعتقيني ل وجهه الله والله ماراح امنع نفسي عنك " همس " ماقوى
كلماته نفضتها مايمنع نفسه عنها ؟ يعني يقرب منها ؟ رجال غير بدر يلمس جسدها ومو اي شخص بعد صقر ! مستحيل سحبت الاوراق وهي تلهي نفسها وبتوتر طلعت ل الصالة وهي تسحب نفس عميق حمدت الله اللي فكاه من يده ، جلست تشوف الاوراق وتلهي نفسها فيها .
اما هو رمى نفسه على السرير وهو يتنهد ابدا ماكان ناقص الا هي عشان يكمل الناقص ! جمع حوسته وقفل الابتوب ودخل يتسبح لعلى ينسى ويسلى عن اللي صار .
بعد ساعتين .
كانت منسدحة بالصالة وهي تعدل اخر تاريخ نقزت بفرحة اخيرا ! شافت الساعة مرت الساعات بدون ماتحس ياليت فيه شي يلهيها كل يوم زي كذا ، غفلت عن فستانها اللي انحاس من جهه الصدر من التسدح والنطنطة
دخل صقر وعيونه بجواله : ابي اوراقي
سارة وهي تحاول تتنسى اللي صار : خلصتها ترا عدلت التواريخ من هجري الى ميلادي " رفع صقر عيونه لها وهو رافع حاجبه " وحسبت الضريبة وعمولة الموزعين والسعر الاجمالي
كانت تحكي بحماس عن انجازها بالاوراق وهو عيونه على صدرها اللي بان شتت انتباهه يبي يسمع هي وش تقول مايقدر تفكيره بعيد غصب عنه بيناظر هي اقصر منه وعشان يشوف وش تحكي عنه بيناظر تحت وكل شي باين ، نزل يده بجراءة ورفع فستانها بحيث غطى صدرها : عشان اقدر اركز ، ايوا ؟
رجفت يد سارة من يده اللي لامست جسدها رمت الاوراق بوجهه بخوف وهي تركض الغرفة قفلت الباب كذا قفلة فصخت الفستان بعنف وهي تمسح الروج بيدها بعنف ودموعها بعينها : اكرهكم كلكم اكرهكم .
ركب السيارة وعلى الشركة وهو يتحسب على سعود دخل وهو ينثر الاوراق بوجهه : حسبي الله عليك من ولد كانت البلوة وحدة والحين بلوتين
سعود : اح ياحلو حد الحين معصب ؟
صقر بغبنة : القاها منك ومن البيت ؟ " بقهر " قدامي بنت 24 ساعة ويبون اجلس عاقل ماقدر ماقدر افهموا انا رجال ومخليني قدامي بنت بكامل انوثتها ويبون اقاومها
سعود يدخل المعلومات ل الكومبيتر ضحك :لا هو سهلة بس عشانك صقر وبو عين زايغة ماتقدر " بجدية " تراها حلالك وحق من حقوقك انك تلمساها باي حق تبعد عنها وتهجرها وباي دين وشريعة تحرم على نفسك ما احل الله لك ؟
صقر بغصة : ماقدر ماحبها الحُب مو غصب حتى ماقدر اطالع بوجهها شي بداخلي يشمئز منها " ماعلم سعود انها حامل بالحرام "
سعود تنهد : الله يهديك بس وش بتسوي يعني ؟
صقر بهدوء : مالها الا حل واحد تقتنع فيه بالطيب او بالغصب هي خذت مني حياتي وغصب عنها تردها
'
'
يوم جديد ، بعد المغرب في بيت الجد .
سارة : عيب رسيلوه اضربي الباب قبل
رسيل ضربت الباب ، فتحتها لها ناظرتهم برعب من هذولي ؟ اول مرة تشوفهم هي لها اسبوعين بالغرفة ماتشوف الا الجدة والخدامة .
رسيل بدفاشة : يمه ياحلوس شلعتي قلبي انا رسيل حفيدة الحرمة اللي كل شوي عندك وهذي مرت اخوي
تنهدت براحة على الاقل اصحاب البيت هم ابتسمت بمجاملة ماتدري وش المفروض تسوي ماتفهم شي ، سارة تداركت الموقف : نجلس بالصالة نسولف ؟
سحبتها رسيل ل الصالة الجانبية : وش اسمك ؟
البنت بحرج : مالي اسم
سارة ابتسمت بنعومة : احس يناسبك اسم في
البنت : خلاص كيفكم نادوني في
رسيل وهي ترد على جوالها : نعم خير ؟
فهد : وينكم يالحقيرات البيت فاضي طلعتوا وغدرتوا فيني هذا واحنا طالعين من نفس البطن والله لا ادعي عليكم ونتقابل قدام العزيز الجبار
رسيل : بس بس احنا عند البنت الحلوة
فهد بوناسة : احلفي ؟ ربطيها لين اجي " وسكر ، جلست رسيل تتحمد الله على اخوها المهبول "
في وهي تحاول تفتح معهم حوار : والرجاجيل اللي شفتهم اول يوم ابوانكم ؟
رسيل : اي اللي طوله متوسط وشعره فيه شوي شيب وكان لابس قميص سماوي وجينز هذا ابوي
صرخ فهد بحماس : عو
سارة بطنازة : يمه خفت شوي شوي لا اسقط
فهد : هاي مرت اخوي " لف ع في " هاي يالحلوة
ابتسمت له ولفت على سارة : وانتي ؟
سارة : انا مرت صقر
قاطعها فهد : اطول واحد فيهم اللي واصل السقف هذي زوجته
ضحكت من قلب على تشبيه فهد : اي ذكرته كان طوله مميز
سارة بطنازة : اي طول ياحظي ناطحة سحاب
رسيل وهي تصفق خدودها : امي تقول وينس قسم بالله بتصلون علي لو درت اني طالعة من البيت وعندي بكرة اختبار خلونا نرجع تكفون .
قاموا وهم يسلمون على في وطلعوا ل البيت .
طلعوا ل البيت رسيل راحت لامها وسارة لجناحها ، دخلت وهي تفصخ عبايتها شهقت وهي تشوف صقر منسدح على السرير عدل جلسته لما شافها : شايفة جني ؟ " تنهد وهو يشوفها مترددة " قربي بكلمك بموضوع
سارة قربت بس من بعيد ، ابتسم بضحكة : ماراح اسوي شي قربي
سارة ببراءة : قل والله
صقر ابتسم : والله " لما شافها قربت تنهد " سارة ماكذب عليك انا رجال ماقاوم بنت قدامي وعيني طويلة كيف عاد بوحدة حلالي و24 ساعة قدامي وانتي ماتدانيني بعيشة الله كيف بتصبرين علي ؟ مالنا الا حل واحد " ناظرته سارة بمعنى ايش ؟ ، تنهد " تسقطين اللي ببطنك ولا سقطتي بلعب ع الكل انك ذبحتي ولدي باهمالك ونفسي عافتك واطلقك والكل بيقتنع غصب وابوي بقوله ماقدر اعيش مع وحدة ماحافظت على طفل كيف بتحافظ على عيالي بعدين
كان يتكلم ببرود وكأنه مايدري ان اللي قدامه ام تحمل 9 شهور تحس فيه يتحرك جواها تحبه قبل تشوفه لما يكون ببطنها يكون قريب من احشائها ولما يطلع ع الدنيا يكون قريب من قلبها تبيع الدنيا كلها ولا يمرض او تكسر بخاطره ويجيها ببراءة يقول " سقطيه " ولا اي عاقل او مجنون بالدنيا يفرط بابن له الا من بلاه الله
سارة بصدمة وهي تحس رجولها خارت قواها هذا صاحي او مجنون يبيها تذبح قطعة منها حتى لو بالحرام هي ام تموت بدون ولدها ب الطقاق العالم كله الا ولدها مايصيبه شي ثقل لسانها من حرقة قلبها من كلامه : اذنك تسمع وش ينطق لسانك ؟
صقر : افهميني عشان ترتاحين مني وارتاح انا بعد
سارة ودموعها على خدها : ترتاح وانا اموت بحسرتي ؟ تعرف وش يعني فقد الظنى " صرخت " يعني تعيش بدون روح مايمر يوم وتنساه لا طول مانت عايش بتحس بحرة على فقدانه
صقر بقساوة : والله عاد العلم وصلك بتسقطينه بالطيب وكل واحد يروح بطريقه " بتهديد " بيطيح بطريقتي تراني مجنون بايع الدنيا " وطلع "
صرخت بقهر : ولدي يامجنون ولدي وشلون تذبحه شلون
طاحت على الارض وهي تبكي بحرة اللي جرب حرة الفقد مستحيل يتخيل انه يعيش آلمها مره ثانية هي تضحك ويحسبونها سعيدة لكن هي مكسورة ميته من جوا ! ضاقت عليها الدنيا تعودت من طولها شبر ونص وتربية امها اللي مازالت مغروسة فيها تلجئ ل ربها ولا اي بني آدم بيحل مشكلتها ، توضت وصلت ركعتين تترجى فيها رب السماوات والارض يسخر لها ويرزقها الصواب .
'
'
في بيت أبو ماجد .
كان بالشارع يكلم : والله اني راتبي كله لك وش بيدي اكثر من كذا ؟ اكرف واكرف عشان اسد ديني منك ، خلاص بحاول واشوف " تنهد وهو يسكر " مشكلة اللي يتسلف من احد اكثر من حاجته
صوت من وراه : استاذ بتال
لف وهو يشوف احد الطلاب المشاغبين عنده بالمدرسة : هلا علي وشخبارك
علي وهو يحك راسه : الحمدالله تبي مساعدة استاذ ؟
بتال بسخرية : عندك سلف ؟
علي ضحك : مطفر مامعي الحين الا 31 الف تكفيك
بتال بشك : صادق
علي بصدق : والله العظيم يالله عن اذنك " ومشى "
بتال : انا 5 الالاف بالشهر واحسني انافس وليد بن طلال وذا 31 ويقول مطفر " تنهد " اي كلن نصيبه على الله .
نقز عليه فهد : وش تسوي هنا اعترف طلع بضاعتك
بتال بسخرية : للاسف ماعندي بنات
فهد تغير وجهه : ادع لي بالثبات تركتهم " يحاول يغير الجو " اي شفيك ؟
بتال علمه السالفة ، فهد : ول عليه انا مكافأتي 1000 وماعلم احد اخاف من العين وذا 31 وزعلان ؟
'
'
بالحديقة الخلفية ، كانت جالسة بالملحق وهي تسولف معه .
رسيل : مدري حست فيه شوي بس ماعليه يعني يدفني احس
سلطان : خلي الزحف ينفعك اقولك ذاكري ومسوية آنشتاين تقول الاختبار لعبتي
رسيل : من ذا آنشتاين ؟ مطعم ؟
سلطان بسخرية : لا ناجحة ابشرك
صرخت رسيل بخوف والم وهي تحس باللي يضربها من ورا ، لفت بخوف من اللي سمع مكالمتها وانصدمت وهي تشوف !
'
'
فصخت جلالها وهي تستغفر بنية الله يفرج همها انحنت وهي ترفع السجادة ! لحظة هذا ايش قربت وهي تاخذه من تحت الكمُدينة كان تحتها نصفه برا ونصفه جوا حاولت تميزه بس شكله غريب شوي مشت وهي بترميه ب الزبالة وانتم بكرامة لكن لحظة لحظة تذكرت اخر فلم شافته ايوا نفسه بس وش جايبه غرفتها مالها حل الا حل واحد طلعت تدور رسيل محد راح ينفعها الا هي لان كل ارقام العائلة عندها .
دورتها بغرفتها مالقتها نزلت تحت شافتها صاعدة وهي تسب
سارة بهدوء : ابي جوالك بدور جوالي ضايع
رسيل تمده لها وهي تفرك كتفها بالم : خذيه وترا جدتي تحت محطتني بالعصاة لين قالت امين عشان داخلة قسمها " ودخلت غرفتها تكمد كتفها
ابتسمت لها بتسليك ، راقبتها لين دخلت دورات المياه وانتم بكرامة وخذت رقم ماجد بسرعة وحطت الجوال على الطاولة ودخلت غرفتها واتصلت من جوالها .
'
'
ب مركز الشرطي .
جالس على مكتبه يشوف اخر شكوى عنده ويشرب كوب شاهي يصحح به ، قاطع تفكيره رنين جواله الخاص استغرب من بيدق عليه وهو بالشغل ؟ اكيد شي ضروري رفعه واستغرب من الرقم الغريب اكيد غلطان حطه على جمب ولكن الرقم مستمر يتصل اكثر من مرة اكيد يعرفه رفعه ورد بعجلة : ياهلا ؟
سارة بهدوء : السلام عليكم ابو بدر انا سارة ابيك بموضوع اذا ماعليك امر
ارتخت عظامه وهو يسمع صوتها جددت حنينه لذكريات امريكا غمض عيونه بألم : عيوني لك ؟ انتي وصية الغالي
سارة وهي تغض شفتها وترفع راسها ماتبي تسمح ل دموعها تنزل : لقيت بغرفتي عند مكاني غلاف رصاصة تقدر تعلمني لترجع ل اي مسدس وعياره وهالأمور وماني متطمنة ابدا .
ماجد بصدمة : وش جايبه غرفتك " بجدية " حطيه باي مكان البيت وارسلي لي المكان برسالة وانا جايكم وباخذها اعرضها ل الفحص
سارة بهمس : ان شاء الله ، مشكور ماجد
ماجد بتنهيدة : العفو ماسويت شي انتي وصية بدر لي من جيتوا امريكا بدر ماكان مجرد صديق كان نصفي الثاني واخوي اللي ماجابته امي وحلفت ان جاني ولد بسميه بدر والكل صار يناديني ب ابو بدر وعلى فكرة ماني غبي زيهم اصدق انك ذبحتيه انتي اللي كنتي تعشقين بدر اكثر من امه كيف بتذبحينه
سارة تصرف : عن اذنك برسلك المكان الحين
ماجد : لحظة سارة " سكتت شوي " كيف تطلعين من السجن من هنا وتتزوجين صقر من هنا ؟ ليش انتي متزوجة وبالسعودية واهلك يقولون ل الكل انها من بعد وفاة زوجها استقرت هناك ومشت على الكل الا علي بحثت وحست وسألت الجيران وعلموني انك بالسجن
سارة : لي اسبابي الخاصة
ماجد : اذا كنتي تحبين صقر الله يوفقك معاه ولكن صح صقر ولد عمي وبدر صديقي لكن والله ان صقر مايستاهلك كثر بدر ولد عمي واعرفه انتي كثيرة عليه
سارة بسخرية : حظي الردي جمعني فيه واشقاني
ماجد : كنت متوقع انك مو راضية " بقهر " عمري ماشفت احد يحب شخص كثر حبك لبدر كيف بتبعينه بهالسهولة عشان واحد مثل صقر " سكتت شوي " اذا احتجتي اي شي تراني بالخدمة رقبتي سدادة من اول ماجيتوا امريكا وبدر يوصي عليك وكانه حاس ان ربي بياخذ امانته
سارة بهمس ودموعها غطت وجهها من ذكراه : الله يرحمه
سكرت وهي تشهق بألم تذكرت بدر تحبه والله الى الحين احلامها تهوجس به وتغلط بأسمه وتذكره بكل شي حتى ريحة الرياض تذكرها فيه مسحت دموعها وهي تنزل حطته جمب لمبة الحديقة اللي كانت بالأرض وارسلت الرسالة ل ماجد وصعدت جناحها وقفلت عليها الباب عشان مايدخل عليها صقر .
'
'
الجدة وهي تنسدح على سريرها بعد ماجلدت رسيل بالعصا : نعنبوها من بنت 24 ساعة تقرقر بهالتليفون
دخلت ام صقر وهي تهلي وترحب فيها وباست راسها وحطت القهوة : العذر والسموحة والله مادريت والله كان استقبلتك عند الباب
ابتسمت الجدة : مير ماتقصرين يام صقر اقدعي اقدعي
دخلت الخدامة : ماما كبير هذا ماجد برا يبي يسلم على انتي ممكن ؟
لبست ام صقر جلالها ، الجدة : قلطيه هنا الله يحيه
طلعت الخدامة تدور ماجد اللي فتحت له الباب وصرفها بانها تستأذن من جدته خذ غلاف الرصاصة وطلع مستعجل عشان يمدي الفحص يخلص قبل منتصف الليل بواسطته لانه ضابط .
'
'
الساعة 2 بالليل .
صقر وهو يطفي اللابتوب : عيوني احولت من الظهر مقابله
سعود اللي كان نايم على الاريكة بتعب والايباد قدامه ، وملاك كانت تراجع الخطة الاسبوعية تثاوب وهي تنزل كوب القهوة : هذا عاشر مره اشرب قهوة ابي اصحصح عجزت
ضحك صقر وهو يلعب بجواله : شفيكم كانك عجز ماتعودتوا على السهر تسدحتوا على طول
تخصرت ملاك : بالله ياحبيبي ؟ من 8 الصبح واحنا نكرف نكرف كويسين جالسين الى الحين انا وانت مصحصحين
صقر طلع بطانية خفيفة اللي تقدر تنتقل فيها بكل مكان من الدرج السفلي وغطى فيه سعود وعدل له المخدة سكر الستائر عشان مايضايقه نور الشمس بالصبح ورفع على برودة المكيف وخذ اغراضه : يالله تعالي اوصلك لا تركبين مع السواق لحالك بهالليل
ضحكت ملاك بسخرية : ياحليلك على اساس السواق حد الحين صاحي ينتظرني نايم من 10
سحبها مع شعرها بمزح : قدامي اقول يالله على السيارة .
ابتسمت وهي تركب السيارة ، ركب صقر وهو يشغلها
ملاك وهي تحاول تفتح سالفة : بترجع البيت ؟
صقر تذكر ضرب بكفه راسه : يوه " تنهد وهو يوقف السيارة يمين رمى راسه على الدركسون وبهمس " مابي ارجع البيت
ملاك باهتمام : ليه ؟
صقر لف راسه على اليمين وهو يناظرها ومسند راسه على الدركسون وبغصة : مابي اشوف احد " كان يقصد سارة "
ملاك بحنان : شقتي فاضية انا بغرفتي وانت بجناح الضيوف يفداك بيتي باللي فيه
ابتسم بمجاملة وهو يشغل السيارة ، سحب سيجارة من الباكيت وهو يولعها ويفكر بحال ملاك عايشة بالرياض لحالها امها وابوها وخواتها بدبي وغالبا يجلسون بجدة كانت تقدر تكمل حياتها معهم وبشركة افضل ولكن ملاك اصرت انها تعيش بالرياض عشانهم وعشان شركتهم حركاتها نص كم وماتعجبه شوي لكن مايقدر يستغني عنها كانت تبذل قصار جهدها على الشركة اللي كانت حلمه من سنين .
وصلوا ل الشقة سبقته ملاك وهي تفتحها بمفتاحها دخلت وهي تشغل تكييف الجناح وتعدل المخاد : اذا بغيت شي نادني انا ماراح انام الحين بتسبح
انسدح بتعب وهو يطلع اغراضه من جيبه : بس بنام
ابتسمت وطلعت ل حمامها تتسبح بعد مانهلكت اليوم من الكرف وهو راح بسابع نومة .
'
'
صباح يوم جديد على سُكان اهل الرياض .
كانوا يجتمعون على سفرة الفطور يترأسهم الجدة وابو صقر على يمينها وام صقر من يسارها وابو صقر جمبه ضاري وفهد مثل رسيل بعدين سارة بعدين شدن وقدامهم سجى بعدين اميرة بحيث ياخذون سارة وشدن راحتهم بالأكل .
دخل وشماغه وطاقيته على كتفه وعقاله وجواله بيده ووجهه مفقع من النوم : السلام عليكم
رد الكل عليه السلام ، ابو صقر بحدة : توك تجي من امس ؟
صقر وهو يجلس جمب امه سند راسه على كتفها غمض عيونه وهو فيه النوم : اي
ابو صقر بنفس الحدة : وين كنت نايمه فيه ؟
صقر بكذب : بالشركة " تعدل بخوف وهو يشوف نظرات ابوه اللي تغيرت لانه عرف ان صقر يكذب عليه " يعني مو شركة شركة لا اقصد عند اصحاب الشركة
ابو صقر : ايوا ومن اصحاب الشركة هذي ؟
صقر بتصريفة : يبه وانا بزر ابو 18 تحاسبني ؟
ابو صقر وهو يخبط بالطاولة : لو انك ابو 80 سنة بحاسبك لو تنطق بكلمة قصيت لسانك
صقر بتنهيدة وهو يعرف ان مافيه مفر من ابوه : كنت نايم بشقة ملاك
نزلت ملعقها بصحنها بهدوء وهي تشد على جلالها بقهر عضت شفتها حتى لو ماتحبه حتى لو تكرهه حتى لو ايش هي انثى وسالفة انه رجُل هي بذمته مو معبرها يتركها بالايام بالغرفة مايدري عنها ولا ينام عندها الا نص يوم بالشهر يقولها بكل جراءة نايم عند وحدة غيرها وقدام اهله وكانه مالها اعتبار حتى لو قدامهم شي يقهر بشكل فضيع
فهد بضحكة : زاد ريحة عطرها فايحة
صقر وهو يهدده بالشوكة : انت انطم مالك شغل
ابو صقر بعصبية ناوي يربي صقر من جديد وبنفس الوقت وده ياخذ حق سارة اللي اهانه صقر بكل سهولة قدامهم لكن قاطعته امه
الجدة : هاو من ذا اللي اسمه ملاك ؟ وراه ياكافي مسمينه اهله باسم بنت قلة الاسماء
صقر بطفش : جدتي بنت هي بنت
شهقت الجدة : يارب لا تطيح السماء علينا وش حنا يهود ؟ ولا كفار بني نظير ؟ تنام عند وحدة بتالي الليول ياولي ياولي على تربيتك ياخالد " تفلت على ابو صقر " انشهد انك منت برجال كان هالتربية طلعت منك " ولفت على صقر بعصبية وهي تخبطه بالعصاة بصدره " الله لا يوفقك كانك بتنشر الفساد بين المسلمين وتشوه سمعتنا وتغضب الله
شرق فهد بالعصير وده يضحك بس يخاف ينقلب الموضوع عليه وقام ع طول ل الحديقة يضحك براحته انسحبت وراه رسيل وحالها اردى من حاله وهي تشوف جدتها كيف تعامل ابوها ولا ذمة ولا ضمير تسدحوا من الضحك
وسارة طلعت جناحها مقهورة مو لم تصرف الجدة خذت جوالها اللي ينبهها بوصول رسالة كانت من ماجد " اذا فاضية بيكون بينا اتصال عشان غلاف الرصاصة " اتصلت عليه : بشر وش صار ؟
ماجد بهدوء مايدري كيف يصارحها بالموضوع غلط يكذب عليها وبنفس الوقت غلط يخبي عنها : عرفنا المسدس يرجع لمين
سارة بلهفة : لمين ؟
ماجد غمض عيونه : المسدس مرخص باسم سعود بن عبدالعزيز الـ . .
سارة وهي تضحك على تفكيرها من كثر ماتهوجس باهلها صارت تسمع اسمهم : اسفة مانتبهت وش الاسم ؟
ماجد : اخوك ياسارة
لو كان احد غير ماجد كانت سفلت فيه وقالت كذاب اخوي مايسويها ولكن البلاء انه ماجد اللي بعمره ماكذب عليها بشيء ! اخوي يبي يذبحني اخوي ناوي علي اخوي عرف مكاني بيذبحوني لاجل ياخذون حق بدر مني !
تذكرت هذاك اليوم لما طلعت مع فهد ورجعت ولقت الكيسان مكسرة والفيمتو على السرير سالت صقر بعدها من اللي سوا كذا قال دخلت لقيته كذا يعني سعود كان هنا مالقاني وراح
حست بدوخة جلست على السرير تبكي ؟ تصرخ ؟ وش اللي بيفيد معها وش اللي بيبرد خاطرها وقلبها !
ودها تنكر تقول اخوي مايسويها لكن اخر موقف لها معه كان عكس كذا
( قبل خمس سنين ، في سجون امريكا
كلبشوا يد سارة وهم ياخذونها من غرفة التحقيق ، راسها بالارض واهلها يناظرونها من وراء القزاز ولكن صرخة سعود سمعتها صرخة طلعت من حر مافيه ! كان جالس على راسها ثلاث ساعات يترجاها تنطق بكلمة وتقول لهم عكس اللي شهدوه وشهدته الشرطة لكن سارة من دخلت وهي ع لسانها كلمة وحدة " انا قتلته "
صرخ سعود بقهر وهو يشوف اخته راسها بالارض وتروح بعيد عنهم بتروح بدون موعد بتروح وبيحرمهم منها ابوهم : والله اذا شفتك ياسارة لا اذبحك والله ! )
غضت شفتها ودموعها على خدها عضت بقهر والم يعتصر قلبها اعز الناس على قلبك اهلك اللي كبرت وربيت معهم وبينهم يعرفونك اكثر من نفسك يبذبحونك ويرتاحون من سيرتك ، كانت مأمنة انها بتسال ماجد عن اهلها وبتروح وماراح يردونها بياخذونها هي ولدها لكن اللي تعنى ودخل محد انتبه له وكان بيذبحني كيف بياخذني بولد حرام وخريجة سجون ؟ حطت يدها على بطنها بخوف تموت ب الطقاق هي بس مايجي ولدها شي خافت سعود يتاخر بقتلها ويطلع ولدها على الدنيا ويذوق المر بدونها .
قطع تفكيرها دخلت صقر وهو يسب ويلعن حظه اللي خلاها يفكر ينام عند ملاك من ابوه وجدته اللي كرهوه عيشته من كلامهم ، بنفس الوقت رن جوالها بتنبية بوصول رسالة فتحتها ، كانت من ماجد ومحتواها : ( ماسمحتي لي اكمل كلامي ، بنفس تاريخ طلعتك من السجن مشت طيارة من الرياض لوس انجلوس تحمل سعود معهم وبعد شهر لما تزوجتي صقر بتاريخ الزواج رجع سعود السعودية ، تبين ارفع قضية تتطمنين اكثر ؟ ).
من اللي قرته قطعت الشك باليقين كل شي واضح وضوح الشمس ، سارة بغصة : صقر
صرخ بقهر وكانه لقاها يبرد حرته فيها : انتي انطمي بسببك مارجعت البيت بسببك كل اللي فيني بسببك الله ياخذك
سارة وكانها ماتسمع كلامه الالم اللي تحس فيه مايساوي شي من اللي قاله غمضت عيونها بألم : بسقطه
صقر بنفس الصراخ والعصبية : ب لعنة وش دخلني " استوعب كلامها " نعم ؟ وين اللي تبكبك قبل يومين بغت تخنقني والحين ماتبينه ؟
سارة : مو هذا اللي تبيه ؟ مو تبي ترتاح مني ؟ تم يالله
صقر بفرحة وهو يشوف بصيص الامل : بذمتك صادقة ؟
سارة ودموعها على خدها : اي والله اهم شي محد يأذيها '
'
جالس بطفش بعد ماخلص شرحه وهو يتامل طلاب المرحلة الثانوية ! اللي كانوا يسولفون ويضحكون واللي ياكل واللي يدور ب الفصل واللي ع جواله ومتغاضي عنه
واللي كانوا يخططون على نحشة الحصة الجاية كـ شلة " علي " تذكر موقفه معه مايدري وش اللي شده له وناداه ، قرب علي وهو يتربع على الكرسي : هلا استاذ ؟
بتال : كيف جبت الـ 31 ؟
علي : شف كلام رجال ومايطلع من بينا ؟
بتال وهو يطق الصدر : وعد
علي : انا باليوم ادخل من 10 الالاف الى 14 الف على حسب وايام الويكند ترتفع الى 20 الف الى 23 الف باليوم وايام الاختبارات طبيعي جدا ادخل باليوم 150 الف
طارت عيون بتال : احلف ؟
علي بصدق : والله العظيم ، الـ 31 الف كسب يومين هالايام السوق ضعيف " بخبث " يبي لي تسويق جديدة
بتال بأهتمام : طيب الشغل ذا وشو ؟
علي قام وهو يبتسم : ودي افيدك لكن للاسف ل الشغل خصوصية ماتطلع برا '
'
قام وهو يتمغط ويتثاوب ، ركز بالمكان اللي نايم فيه ! هذا مجلس جده يعني هو من امس عقب الدوام نايم حد الحين قايم يركض لدورات المياه غسل وجهه وتوضى عشان يصلي اللي فاته شاف نفسهه بلبس الدوام والشمس ساطعة مستحيل يكون العصر اكيد انه الصبح وتاخر عن دوامه ، طلع صلى بالمجلس خذ اغراضه وقف وهو يتحسس بطنه اللي صفر من الجوع !
مشى ل المطبخ حشى له صامولي بالجبن وشاهي تنهد : اي يالدنيا هذا حال العزابية طلع وهو يشرب
حس بالنار اللي تحرقهه بظهره وصرخ من قلب وطاح الكاس من يده !
'
'
دخل بعد ماستأذن من المكتب ، جاء ياخذ باقي اغراضه ، شافها ماسكة الجوال بحماس بدت حبة حبة تتعود عليه وتتفتح شوي شوي !
انصدم وهو يسمع صوت الرجال اللي يتردد بجناحه قرب من وراها ابتسم وهو يشوفها فاتحة السناب شات وراميه الجوال بعيد ومغطية وجهها بالجلال : وش فيك ؟
عايشة اشرت على الجوال : الرجال يناظرني
ماتت من الضحك مافيه حيل بس شكلها غصب فطسه : لا مايشوفك هو بعدين من حطه لك ؟
عايشة ببراءة : بنات خالاتي
ابتسم وهو يحذفه ؛ ماراح ينفعك ، اضيفي البنات بس .
'
'
لف بالم وهو يشوفها واقفة برعب وكاس الموية المغلية بيدها وترجف بخوف هدت انفاسها وهي تشوفه !
عبدالاله صرخ من حر مافيه من الالم : جيتي وبلشتيني فيك وبذنبك برقبتي صرت اخاف اركب سيارتي والقاك تحت رجولي والحين تحرقيني بعد ؟ انتي وشو ماتحسين ؟ باي حق تحرقيني الله يحرقك بجهنم
في وهي تبكي : والله خفت يكون حرامي ، امكم " تقصد الجدة " راحت ومالقيتها ومامعي احد بالبيت انا خايفة
عبدالاله : وانا وش ذنبي حسبي الله عليك وش ذنبي ؟ " يقاوم دموعه لا تنزل من الالم ، تخيل موية مغلية تنسكب على ظهرك فسخ اللبس بشويش بحيث لو كان الجلد محترق ماينشب بالجاكيت بقى عاري من فوق وهو يشوف بالمرآيا ظهره كان الوان والاطراف مقشعه فرك وجهه بالم وهو يضغط على شفته بالم لين حس بطعم الدم ب لسانه طلع جواله واتصل ب فهد .
فهد : مبروك صحيت بعد نومة اهل الكهف امس متعشين انا والشباب على ظهرك ماحسيت ؟
عبدالاله مافيه حيل يتكلم اكثر ولا يمزح : تعال بيت جدي ظهري احترق .
'
'
وصلوا ملحق بيت جده بعد مارجعوا من المستشفى .
دخله وهو يشوف الشباب كلهم فيه بعد مابلغهم بقروب الواتساب " تحمعوا ب بيت جدي توني راجع ب عبدالاله من المستشفى محروق "
ضاري : افا افا عسى ماشر بشر ؟
جلس عبدالاله بشويش وهو ينتبه ظهره لا يلمس الكنب : والله الحمدالله حروق من الدرجة الثانية مرت بسلام
ماجد : من المجرم اللي مسوي فيك كذا ؟
عبدالاله بعصبية : الكلبة اللي لقيتها بسيارتي
فهد بابتسامة واسعة : قصده في الحلوة
بتال : من اللي سماها في ؟
فهد بفخر : انا
صقر وهو يخزه : وين اللي يقول تبت ؟
بتال بضحكة وهو يشوف عبدالاله عاري من فوق بطلب من المستشفى مايلمسه شي من فوق بياثر على حرقه ويألمه ويقرب منه : عادي اضمك ؟ احسني ناقص حنان ودي احس ب شعور زوجتي وهي تضمني قبل اتزوج
عبدالاله بخوف وهو يدفه : انقلع اعوذ بالله منك يالشاذ '
'
'
مسكت التليفون كعادتها وهي تدق على بيت ولدها ابو عبدالاله وقبالها مرت ولدها ام صقر بقهوتها .
ردت عليها ميعاد : هلا والله
ابتسمت الجدة : هذا انتي ؟ شخبارك وشخبار اهلك ؟
ميعاد بحب لجدتها : الحمدالله بس امي يالله يالله نقدر نقول بخير مضيقة صدري تعبانة وتتسدح ووجهها اصفر
الجدة : بعذرها يابنتي الحمل ماهوب سهل خصوصا بالشهر التاسع وامك ماهيب صغيره تتحمل يالله الله يقر عيونكم بشوفتها ويجي لكم ولد غير عبدالاله
ميعاد : اللي يجي من الله حياه الله مايهم بنت او ولد اهم شي امي تقوم بالسلامة
ابتسمت الجدة : الله يكملك بعقلك ويرزقك الوظيفة اجل يقبلون لمى مايقبلونك ؟
ميعاد ابتسمت برضا : ارزاق ، واكيد شرٍ انصرف عني والله من فرحتي ل لمى كانها حاصلة لي صح تضايقت بس يالله خيرة
الجدة : يالله اجل قلت اتطمن على امك مع السلامة " وسكرت ".
دخل حديقة البيت بعذ ماستأذن من عيال عمه وهو يدخل مفاتيحه ب جيبه ابتسم وهو يشم ريحة البخور اللي تضج بالمكان ولمبات الملحق مشغلة دخل وهو يبوس راسه امه جدته : الله وش هاللمة الحلوة ؟
ابتسمت ام صقر : حياك ياعيون امك تقهوى
الجدة بزعل : ابعد عني يالداشر لا تقابلني
ضحك صقر : افا حلوة اللبن زعلانة علي ؟
صقر وهو يدور بعيونه اخوانه ماكان فيه احد
ام صقر : اكيد انك تدور زوجتك
صقر بوهقة " والله ناسي ان عندي زوجة " بكذب : كانك حاسة فيني
دخلت اميرة ب حلى وبيدها بنتها : ب صالة الرياضة من العصر وهي هناك
ام صقر بإستغراب : وش تتمرن وهي حامل ؟
الجدة خبطت على صدرها : ماهيب صاحية تبي حفيدي يطيح مهبولةٍ ذي ؟ صقير ياوجهه الفقمة اسحبها لي بشوشتها امزع رقبتها وامحص شراينها بعصاتي
ضحك على كلام جدته ، وطلع لصالة الرياضة اللي كانت خلف البيت .
اللي برا يشوفون اللي جوا ومن داخل نادي مُتكامل ! كانت تقفز من قلب وهي تلعب كورة سلة وشوي تركض وتشيل اثقال ومن جهاز لجهاز تسند على الباب وهو يراقب حركاتها كانت لابسة ليقنز لتحت ركبتها اسود وتيشيرت كت رياضي لونه فسفوري فاقع وجزمة ايدادس " وانتوا بكرامة " اسود وابيض ! كانت تتمرن بعنف لاحظه صقر وبنفس الوقت لاحظ صقر دموعها اللي كانت ماخذه مجراها باريحية حس ان وراه موافقتها الغريبة موضوع لكن مايهمه دامه بيرتاح منها قرب بهدوء : خلاص يكفي
سارة وهي تشيل الاثقال بسخرية : مو من صالحك اذا وقفت " بهمس " مو من صالحك
سحب منها الثقل وهو يرميه : قلت سقطيه ماقلت موتي معه
سارة وهي تنتفس بقوة : اموت ؟ الله اريح واريح لك
صقر يرفع حاجبها وهو يناظرها حالتها مو طبيعية تتكلم وعيونها ذبلانه وجها اصفر حركاتها غريبة مو حركات انسانه طبيعية لابعد الحدود مو اللي تعود عليها قرب لين مافصل بينهم الا شبر دنق لها وهو يحط عيونه بعيونها : وش فيك ؟
سارة تناظره بضياع : بيذبحونه
صقر : مين ؟
سارة بنفس النظرات : كلكم ، شذنبه ياخذ بذنبي ؟ اذبحوني انا قبل اشوفه واتعلق فيه بس لا تخلون القصة تنعاد مافيني اصبر اكثر بموت " زادت دموعها بغزارة بدون صوت "
صقر بخوف على حالها كان شكلها يخوف عيونها كلامها اللي مافهم منه شي : اي قصة سارة ؟ تعبانه انتي فيك شي ؟
سارة هزت براسها " لا " مشت وهي تردد لا لا ، اختل توازنها من التعب وقفها بقوة لا تطيح ضربها كف يصيحها وقفت ووجههت نظراتها له تعبت خلاص ! رمت نفسها بحضنه وهي تشهق ببكاء بصوت عالي ، رحمها غصب شكلها يكسر الصخر لمها بيده وهو يمسح على شعرها بهدوء ، شدت على ثوبه بقهر : ليش يصير فيني كذا بفهم ليش من كل العالم انا اللي تجرعت كل هالُمر ؟
مايدري وش يقولها مشاها معه لين جناجها سدحها على السرير وجاب لها كاس موية باردة : خذي
شربته دفعة وحدة من التعب ، شافته متوجهه ل الدولاب يطلع له ليقنز رياضي رمادي وتيشيرت اسود ، بخوف لا يجيها سعود : لا تخليني لحالي طلبتك .
صقر ابتسم : كنت بروح الشركة بس تعرفيني شهم محد يقول طلبتك الا عطيته
سارة وهي تتغطى : ياشينك
صقر : ترا اروح ؟
سارة تعدلت : لا خلاص اسفة .
'
'
صباح يوم جديد .
نزلت وهي تشوف رسيل تترجى فهد : تكفى ودني وانت معي بعشيك وبغديك
فهد بلعانة : قلت لا كيفي ياختي السيارة سيارتي
سارة تجلس وهي تمسك رجولها بتعب بعد امس : شفيك رسولة ؟
رسيل : ابي اروح السوق صقر سحب علي وضاري بحضيرته وريحته مخيسة ماقدر اطلب منه وذا يذلني
شدن ابتسمت : عشاني فهد
فهد : عشاني احب مرت اخوي الكبير واحترمها بوافق بس بشرط شدن وسارة يروحون معك