بلاي ياسعود حبيت خريجة سجون

بارت 6

رسيل وهي تركض تجيب عبايتها : مو على كيفهم غصبًا عنهم
لفت شدن بحماس لسارة : نروح ؟
سارة بمجاملة وهي تحس يالله تقدر تمشي من الم رجولها من فترة ماتدربت فجاءة تتدرب بعنف صدمة ل العضلات والاوتار بس ماحبت تكسر بخاطر شدن اللي ماتحتك فيها نهائيًا : عشانك بس " تنهدت بتعب وهي تشوف رسيل تنزل من الدرج " تكفين جيبي عبايتي من جناحي شوفيني معلقتها ومع جوالي
رسيل وهي ترجع تصعد : بس بصعد اجيبها لانك حامل ومقدرة ظروفك لكن خلك تولدين وتقول نفس الكلام يمين بالله اخلي اخوي يعرس عليك يالرفلة
وقفت سارة على حيلها وهي تاخذ الاغراض منها بعد مانزلت ، وقفت متردده وهي تربط نقابها تتصل على صقر تتسأذن منه ولا تمشي الموضوع طبيعي لانها طالعة مع اخوانه ؟ حست من الادب انه تستاذن لو برسالة زي ماكنت تسوي مع بدر كان يقولها استانس لما تحطين لي احترام وقدر عندك ، تنهدت وهي تكتب الرسالة : " صقر ابي اطلع مع اهلك السوق ، اذا ماعندك مانع ❤؟ "
مامداها ارسلت الا جاها الرد : " لا ابدا ، استودعتك الله "
استغربت من الرد ؟ صقر ابسط الايمان يقول " طيب او اي " لكن استودعتك الله وهو يبي موتي ؟ قوية شوي يمكن ربي سخره لي مايندرى '
'
صقر وهو يشوف سعود اللي يضحك وهو ماسك جوال صقر : وش تسوي بجوالي انت ؟
سعود يحاول يكتم ضحكته : تكفى اقولك بس ماتعصب علي ؟
صقر يقرب وهو يخنقه ويحاول يسحب الجوال منه : وش هببت حسبي عليك !
سعود وهو يضحك من قلب : ردت على زوجتك برد مُودب زي ردها ، ياخي حرام عليك والله باين محترمة ومودبة اقل الايمان عبرتك واحترمك وانت منت بكفؤ احد يحط لك اعتبار
صقر يطير عيونه فيه : نعم ؟ انا موب كفؤ ؟
ابتسم سعود بغباء : اي " بجدية " والله اتكلم صادق ترا الرجال مايبي غير الاحترام ولا الحب تجيبه الايام وكلام مسلسلات اللي حب قبل الزواج
صقر سحب الجوال منه وهو يقرأ الرسالة ابتسم غصب شعور حلو احد يحط لك اعتبار بحياته حتى لو ماعطيته حقه هو ماعطاها ولكن هي عطته هي قابلت السيئة بالحسنة ، احترمت كونه رجل بحياتها وله تقديره مهما كان قام وهو يحس بالنقص زي ماهي عطته لازم هو يعطيها يكون بينهم ذكرى حلوة قبل ينتهي طريقهم مع بعض .
'
'
جلست بتعب على كرسي من كراسي الكوڤي : كملوا وانا بنتظر هنا .
رسل تخصرت : بفهم كيف اخوي متحملك ؟ عجوز انتي ؟
سارة ضحكت : يابنتي روحي والله رجليني تألمني ماتحمل امشي اكثر
رسيل تحط اغراضها عندها : لو انك مو حامل سحبتك بكشتك بس عشانك حامل وخوفا من الله اني اتسبب بضرر ل ولد اخوي بتحمل وابلع موس واسكت
سارة وهي تدفها عشان تروح : ياحبك ل الدراما .
فهد : انا باخذ لي غرضيين وبنتظركم بالسيارة .
بعد المغرب .
دخل البيت بتعب طالع من الشركة من العصر لكن راح يدور شالية مناسب يطلع اهله وخصوصا " سارة " تغير جو لاحظ نفسيتها التعبانة هو طلع يدور لانه مالقى يسوي لها شي افضل من انها تطلع مكان ثاني تاخذ راحتها فيها وبنفس الوقت تستانس حب يرد معروفها ب طلعة لطيفة ، كان ممكن يكون استذائنها شغل روتيني وشي بسيط لكن بكلام سعود غير تفكير صقر اللي حسسه بعظم الحركة لين شافه معروف يحتاج ينرد له معروف بنفس جماله وزي مايقولون الصاحب غالب حتى بالتفكير ورؤية زاوية الامور .
شافهم متجمعين بتعب بعد السوق وابوه وجدته وامه يتقهون ، شاف ابوه لما شافه صد عنه بزعل ، تنهد وقرب وباس راسه : السلام عليكم يبة
ابو صقر بزعل : ابعد عني
صقر يجلس جمبه : العذر والسموحة يابو صقر وحقك علي من فوق وماهو قصدي اعصي ربي واخيب تربيتك لكن كنت تعبان مافيني حيل اوصل البيت
ابو صقر بسخرية : اللي وصلك من الشركة ل بيتها وراه ماوصلك بيتنا ؟ لا تكذب اكثر ياصقر معد فيني اتحمل كذبك سودت وجهي ومخيب ظني فيك جاني هالشهرين همٍ منك والله اني مانام بالليل
صقر بصدمة : مني يبه ؟ وش فيك وش شايل بقلبك عسى ماشر ؟
ابو صقر خزه ولف على امه ، تنهد صقر بضيقة
حس فهد الجو متوتر وبنفس الوقت يحسه هو الوقت المناسب يمكن ب هالطريقة يدخل السرور على قلب اخوه اذا شاف مفاجاءته .
طلع يركض برا ل سيارته وهو يصارخ : لحد يتحرك بجيب مفاجاءة واجي
رسيل وهي تبتسم ب حلم وتناظر السقف : تتوقعون بيفأجني بسفرة ل لندن زي مانا احب واتمنى دائما ؟
فهد بحماس يطل برأسه من الباب : كلكم فيه ؟
ابو صقر : اخلص علينا وش فيك مجمعنا
دخل فهد يركض وبيده حول 21 كيس مليان ، جلس بحماس على الارض قدام سارة وصقر وبدى يطلع ملابس اطفال مواليد .
فهد بحماس : هذا اذا حضر ولي العهد ولد اخوي وصار حلو زي عمه فهد بلبسه هذي وبنحضر مباراة الهلال سوا وبنحضر بالمنصة عشانه
" طلع بلاستيشن 4 " وهذا بنلعب فيه انا وياه وهذي بجامة شريتي لي نفسها اذا جينا ننام نطقم انا وياه
واستمر يعرض كل اللي شراه
رسيل : كل هذا امداك ب العشر دقائق اللي صرفنا سارة عنك بالكوڤي ؟
فهد : اي ياعمري ولد اخوي يستاهل اكثر " بحماس " سارة انتي بالشهر الثالث بتولدين بعد عيد الاضحى ياحظنا بيصير العيد عيدين " سحبها جلسها جمبه "
سارة قاطعته بصدمة : فهد كثير كل هذا وبعدين احنا مانعرف بنت او ولد وانت ضاف كل شي
فهد : عادي فدوة ل ولد اخوي واي صح نسيت شريت له سرير بينام معي بغرفتي ياحبيبتي حركات تاخذينه من عندي مافيه " صرخ " نسيت وراح يركض غرفته بسرعة ونزل : شوفي هذي قائمة اسماء تناسب ولي العهد اللي بيشرفنا وبكرة بعد العصر لازم تكونين جاهزة
سارة وهي ماودها تتكلم عشان لا يبين صوتها انها تبكي وهي متغطية بجلالها اشرت بيدها ليه ؟
فهد بحماس وهو يفكر بتأمل : بنروح ل دكتورة نساء وولادة بناخذ صور ل الجنين وبنسمع نبضه انا ورسيل بنكون ورا الستارة عشان نسمع " صرخ بفرحة حقيقية " الله سارة شعور حلو متى يجي بكرة
ناظرت سارة صقر اللي كان يتأمل الملابس ببرود وبدون اي ملامح ويرجع نظره بجواله ناظرته ب غصة ! ودموعها تحرق خدها ، حمدت ربها ان جلالها ساترة ولا فضحتها دموعها
اميرة تضحك : بعرف الحين من ابو الولد انت ولا صقر ؟
فهد : صقور مايستاهل يصير ابو " ضرب صدره " بس ولا يهمك بكرة يموت ان شاء الله وانا اربي ولده واتزوج سارة " انسدح بإبتسامة ويده ورا رقبته ورجل فوق رجل " والله يابعيشهم ب جنة " عدل جلسته بعصبية " كله منك ياصقير منكد علي عيشتي حتى لما لقيت فارسة احلامي تزوجتها ولما حبيت طفل لاول مرة بحياتي صار ولدك وتقولون ليه اكرهه
سحب صقر بعصبية فازة من على الطاولة ورماها على الارض بقوة وصوته واصل سابع بيت بالحارة من حدته وقوته بالصراخ : ترا اللي تتكلم عنها زوجتي ! " سحبه مع ياقته " عدل لسانك لا اثم فيك خلها بحالها قلت معازلجي وطبعه لكن تتمدى اذبحك واشرب من دمك وينا فيه بالمكسيك ؟ اشوفك مع زوجتي واسكت " دفه بقوة على الجدار وهو يتنفس بقوة " تخسي
فهد صرخ بقهر : مريض انت ؟ باي عقلية تتكلم يامتخلف ؟ تحسب انك صايع وانا مثلك بصايعتك ؟ تخسي وتبطي انا مابيع شرف اهلي يالزانـ ..
ماكمل كلمته الا وصقر فوقه يدبج فيه بكل مكان تطيح يده عليه وفهد يردها اقوى ، ضاري وابو صقر يفكون بينهم ماقدروا عليهم كل وحدة يقول القوة عندي ! سحبت اميرة سارة لجناحها لا يجيها شي وهي حامل ماصدقت دخلت جناحها الا بدت تصرخ وهي تبكي : وش تجهز له وش تجهز له واخوك بيذبحه وش تجهز " طاحت على الارض تبكي بنحيب " لا تحرق قلبي باغراضه وهو ماراح يشوف الشمس دام اخوك واهلي ع هالدنيا لا تحرقني يافهد لا تحرقني .
اما تحت ؟ كانت الطامة الكبرى .
الصالة مقلوبة فوق تحت ، وقف فهد وهو يتنفس بقوة وعيونه ماليها الحقد وهو يمسح الدم من انفه : لا صرت رجال قل زوجتي اما انك مهيتها من الليل ل النهار حتى نوم ماتنام هنا وتقوم زوجتي ؟ وين اصرفها لك ؟
صقر بقهر وهو يصرخ بحدة : مالك دخل بحياتي ولا زوجتي تفهم !
فهد بسخرية وهو ناوي شر : لا مو ع كيفك سارة وولد اخوي احق منهم فيك
صقر صرخ بقهر : حمار انت ؟ احنا مو مكفولين ب عيال الحرا
حده من تكملة كلمته صرخة ابو صقر : صصققرر
فهد بغبنة : تدري الشرهه علي ماهو ب عليك ولا انت ماتستاهل واحد يفرحك جمعت مصروفي وحرمت نفسي عشان اسعدك بولدك " صرخ وهو يضرب صدره بقهر " وانت شف وش سويت فيني كسرتني
ابو صقر : بس انت وياه الظاهر اني سكت لك انت واخوك تتهاوشون قدامي والدم وصل الركب مافيه احترام ولا حشيمة يوم كل واحد صار يمشي على زنده التيس صرتوا تقووني تدوسون على ظهري واحترامي قدامكم " صرخ بوجهه فهد " وكف شرك عن مرت اخوك وتأدب تراني مانيب غافل عن حركاتك ولا هي معجبتني حركاتك على بنات الشوارع ماتدخلها بيتي واسمع وحطها حلق باذنك قبل يصير لسانك على لسان مرت اخوك ترا الحمو الموت الموت تفهم ؟ " ولف على صقر بنفس الصراخ " وانت اتق الله في عرض المحصنة تقذفها جعل لسانك ينقص شلون بقابل الله فيك ؟ صدق اني ماحسنت تربيتك ياليتني ذبحتك بالمهد ولا ذوقتني مرك ياصقير نعنبوك شايب وش كبرك ابو 28 سنة ماذوقتني بحياتك فرحةٍ منك
رفع عيونه بصدمة لابوه يتمنى له الموت يتمنى انه ذبحه ابوه مايبيه وكله بسبب سواياه طول هالسنين ماقد اسعد قلب ابوه بشيء ! باختصار " عاق "
ابو صقر لف ع ضاري : وانت انقلع معهم لحد يقابلني
صعد فهد ع طول فهد كانه ماصدق ع الله احد اذن له وصقر تحت تاثير الصدمة ماستوعب اللي يصير قدامه كان يتأمل الصالة اغلب التحف مكسرة والباقي على الارض الكنب تغير مكانه شماغه بجهه وعقاله بجهه ودم خشم فهد على السيراميك والصالة فاضية الا منهم !
ضاري بصدمة : يبه وش دخلني انا ؟ قسم بالله ماسويت شي
ابو صقر : قلت انقلع لا اقلعك
ضاري بخوف : ابشر .
مشى ل الدرج وجاء بيلحقه صقر يصعد ل جناحهه
ابو صقر بعصبية : الا انت يامسود الوجهه انقلع برا البيت لعد اشوفك اليوم تفهم ؟
لف وهو يتأفف بقهر وطلع ، ضاري : يبه الله يهديك وين يروح وهو معصب لو جاهه شي ؟
ابو صقر بعصبية : باللي مايحفظه ، يطلع حرته بنفسه ولا يطلعها بالمسكينة اللي فوق وهي وش ذنبها بعد ؟ ذنبها ان عيالي دشير واحد صايع يتلصق بها والثاني عصبي مايتفاهم ؟
تنهد ضاري ع حالهم وصعد ، شاف رسيل تهاوش اميرة : كله منها كرهت اخواني ب بعض
اميرة ب طفش من حنة رسيل : لو انه اول مرة اشوف فهد وصقر يتطاقون قلت يمكن بس من يوم عرفتهم واهم كذا ع اتفه الاسباب نطلب لهم الاسعاف يشيلهم من كثر ماضربوا بعض
ضاري بسخرية : بالضبط ! وخصوصا صقر صار له فترة وضعه مو طبيعي وسمعتوا كلام ابوي قبل شوي " دخل جناحه ".
'
'
في جناح ابطالي .
وقفت بتعب من كثر البكي لما شافت الدنيا هدت وصقر ماجاء ! توجههت لغرفة الملابس وقفت قدام المرايا طويلة فسخت تيشيرتها ورمت باهمال على جمب وقفت تتأمل بطنها اليوم دخلت الشهر الثالث تأملت بطنها وهي تتحسسه بيدها بدا يبرز بروز خفيف ، صعدت يدها شوي شوي ع الآثار اللي ب بطنها الآثار اللي تتطمن عليها كل يوم خوفا من انها تفقدها رغم انها حافظتها اكثر من اسمها ولكن قلبها مايطاوعها انها تسمح لها بالآختفاء ، تأملت الاثار الموجودة اللي كل ماجاءت تختفي وتمحي مع الزمن ترجع باي آلة حادة تعيد عليها عشان مايختفي تتحمل الالم والدم واحيانا صديد لما كانت بالسجن من الآلة المجرثمة لكن ل اجل عين تكرم مدينة .
ابتسمت وهي تبكي بصمت وهي تتهجئ الكلمة بالحروف الاسبانية " غران فيا " غمضت عيونها وهي تحط يدها على العنوان : استودعتك الله اللذي لا تضيع ودائعه ، والله لا اترك العالم واجيك بس اضمن حياتنا وعد مني لا صقر ولا اهلي ولا طوايفهم يحرمني منك .
مشت بتعب وببرود قفلت اللمبات ورفعت ع التكيف اعلى شي وتوجهت ل سريرها دخلت وهي تغطي نفسها ومخدتها تشهد على دموع ذرفتها بكل يوم لسبب " بينكشف لكم بالآيام القادمة " ضحكت ع نفسها : لا تبكين بتنامين وتصحين وبتنسين ، لا تبكين كلها يومين ويذبحونك لا تبكين من ظلم الايام وجورها لك اهلك يبون شوفتك لاجل يدفنونك حية " وقعدت تردد الكلام على نفسها لين غفت من التعب ".
'
'
دخلت غرفتها بقهر من سارة ! تكرهه تشوف اخوانها يتهاوشون تكرهه تشوف التشتت ينتشر بينهم ويتعبون ابوهم معهم وقلب امهم عليهم وحياتنا تنتثر معهم .
دور الاخوان في بيت اهم سلسلة في التربية اذا سقطت حلقة تساقطت الحلقات وتفرقوا كلهم .
مافيه احد بيسمعها الحين ولا بيواسيها مهما كان الامر تافهه هي " انثى " تحتاج احد يسمعها وتفضفض له لو كان جرح بسيط بيدها " فطرة " من رب العالمين وتكوين فطري لشخصيتها تروح لصحباتها ؟ للاسف اغلب الصحبات صارت علاقتهم تقتصر على علاقة بالداوم ومن ينتهي الدوام محد يعرف بعض مالها الا هو تحبهه ماتنكر لكن ماعمرها صارحته ، حتى طريقة تعبيرها بالحب " غبية " تتهاوش معه وتسبه وتطقطق عليه عشان تطول ساعات محادثتهم وتتهنى بصوته اكثر ، بلا شعور اتصلت عليه هو الوحيد اللي تبيه يضمها لا ضاقت بها الدنيا رد عليها باستغراب : واو رسيل داقة هالوقت وش صاير بالدنيا ؟
رسيل وهي تحاول ماتبين صوتها انها متضايقة : قلت انكد عليك عندك اعتراض ؟
ضحك سلطان من قلب : وافق شأنن طبقه انتي واخوك نكد علي بحياتي اروح الشركة ينكد علي اخوك اجي بستانس تنكدين علي انتي " تنفس بعد ماضحك " اه يارسيل احب لما اكلمك كاني اكلم واحد من الشباب تضحكيني ونتهاوش مو زي هالبنات المايعات تحوم كبدي بغيرتها وزعلها وسواليفها
رسيل عضت شفتها بقهر وعيونها تدمع مهما كانت عربجية وتستهبل وتضحك وتبين انه مايهمها نهايتها انثى حساسة خصوصا لا صار الكلام من " رجل " ياثر فيها كثير كيف لا صارت تحبه ويشبها بأصدقاءه ؟ : طيب
سلطان باستغراب وهو يقوم ويطلع برا : هيه فيك شي ؟
رسيل سكتت ماردت لو حكت بكت ، جت من وراه بنت لما شافته طلع : سلطان وينك ؟ مشتاقين لك وتتركنا وتكلم
سلطان اشر لها تروح وهو بيلحقها : رسيل انا اكلمك !
رسيل صرخت بقهر وبكت : ماتحس انت ياخي ؟ اوكي كلم من اليوم لبكرة بس بدون ماسمعهم وانحرق عليك كانك تستاهل عاد
سلطان : وش فيك منفسة علي انتي ؟ عشان بنت ؟ مسويه تغارين يعني اخر شخص بالدنيا يغار انتي ترا واخر شخص افكر اهتم بمشاعره انتي وتدرين الشرهه علي مو عليك اللي مخلي وناستك عشانك ولا انتي مو كفؤ
رسيل بقهر : انطم مابي اسمع صوتك ولا صوتها
سلطان بصراخ : خوش والله اللي يسمعك يقولك ابكي اترجاك ابيك ترا حالك حالهم ساعتين اتسلى معك وبعدها ادعي الله مايبلاني ب بنات زي صياعتكم انا مدري ابوك وش ذنبه عشان يصيرون عياله دشير وحدة مطلقة وحدة مشبكتني وواحد مابقى فاحشة ماسواها والثاني عقيم والثالث مابقى بنت ماكلمته
سكرت بوجهه وهي ترجف ودموعها غطت وجهها ! اهانها واهان اهلها وتربيتها هي سمحت لنفسها يتمادى معها هي الغلطانة هي " صرخت وهي تخبط بجوالها الجدار " عصت ربها وخانت ثقة اهلها وش تترقع منه الاحترام ؟ الادب ؟ لا طبعا حتى هو بصريح العبارة قال انتي صايعة : بس والله ماخليك والله لا اطلع حقي من عيونك ماني من اللي تغلط عليهم ويسكتون لك انا غلطانة بدفع ثمن غلطتي وبتدفع ثمن كلامك '
'
كانوا بالسيارة ، اليوم بيوصلها بيت اهلها متجمعين بنات خالاتها ، صار يكرهه يوديها وهم فيه يحسها ترجع مو عايشة اللي يعرفها ! وزاد الطين بله من الجوال من اهداها اياه وهي مشغولة عنه كليًا صح عليها حركات زي قبل بس تغيرت عن اول مو هذا اللي يبيه ؟ ليش متضايق الحين عاد .
لف وشافها مشغولة بجوالها وصوت قروبات الواتساب ماتسكت تنهد سحب الجوال ورماه قدامهه : احكي من زمان عن صوتك
عائشة : ماتحب سواليفي ولا تعجبك ، بايش تبيني اسولف معك ؟
مساعد : اي شي لو تقولين شخبارك عادي راضي
عائشة بطنازة : شخبارك ؟
مساعد : الحمدالله
عايشة : هذا انت بخير حلو " سحبت جوالها ورجعت جلست عليه ".
'
'
صرخ بقهر وهو يخبط بالكرسي الجدار ، سعود مصدوم من حركاته : صقر اهدئ انفعالك مايجيب نتيجة
صقر وهو يخبط صدره : ابسط الايمان ابرد حرتي احترق من جوا احترق ولا انا قادر اطفي ناري
سعود مشى ل الثلاجة الصغيرة اللي كانت ب الزواية خذ موية باردة ورماها عليه وطلع ل القهوجي وطلب منه قهوة عربية ل صقر يمكن يروق لو انه متاكد انه ب بيكبها ع وجهه رجع له دخل وقفل الباب تنهد وهو يتخصر وهو يشوف صقر جالس ع الكرسي ويده ع ركبه ويدخن بشراهه
سعود : انت متى بتقطع هالسم ؟
صقر طنشهه لان ماله خلق ابدًا ، سعود : انت مامنك فايدة انا ابي ارجع بيتنا انام مواصل من امس ومابي اخليك لحالك امش انقلع بيتكم
صقر وهو يولع زقارة بسخرية : ابوي طاردني عشان مكفخ فهد
سعود وهو يتسند ع الجدار : ابوك طاردك عشانك مكفخ فهد ؟ قوية بصراحة لا تكذب قول بغيت اذبح فهد لاني ماتوقع منك بس ضرب
صقر ابتسم غصب ع سعود اللي يفهمه : بالضبط " دخل باكيته ب جيبه " امش برجع بيتنا ماعلي من احد بدخل جناحي
سعود ناظره شوي وضحك : لهدرجة انت يعني حمار ماتفهم ؟ كل هالطرد والكلام اللي من ابوك ومافهمت ؟
صقر : لا فاهم كل هذا المسلسل عشان ماحط حرتي فيها كانه يدري اني لو رقيت ذبحتها هي ، انت وابوي اكثر ناس فاهمني بالدنيا
'
'
دخل جناحهه وهو يتسحب بهدوء لا ينتبه له ابوه ، دخل وهو يشوف الدنيا ظلام ؟ معقولة نايمة هالوقت دخل غرفته انصعق من قوة البرد : حشى القطب الشمالي " مشى وهو يتحسس وين الابجورة الكبيرة ، شغلها وهو يتفحص بنظراته السرير شافها نايمة بسلام وكتوفها عارية والمكيف يضرب فيها " : ذي ماتحس ؟ والله لو يحس ب هالبرد يهودي اسلم
سحب الريموت وقصر ع التكييف لبس بنطلون بجامته مسك التيشيرت بيده تامله حس ماله داعي رماه ع السرير ، لكن برد الغرفة جمدة سحب جاكيت خفيف لبسه وخلاه مفتوح
جلس جمبها ع السرير سحب الباكييت وبدا يدخن وسماعاته بأذنهه ، جلس ع وضعه ممكن ربع ساعة !
حس بازعاج لكن توقع انهه يتوهم بسبب السماعات ، صرخ وهو يحس بضربة ع ظهره رمى زقارته وفسخ السماعات ولف بسرعة شافها تناظرها بعصبية
صقر بخوف : خير بسم الله روعتيني
سارة بعصبية : كتمتني كتمتني بغيت اموت " كحت " بس يرحم امك خلاص
صقر : كل هالازعاج عشانك انكتمي ؟ " رجع يدخن بلعانة " يالله خذي زيادة اوكسجين ملوث يمكن تفطسين وارتاح
قامت من السرير واستوعبت انها بدون تيشيرت سحبت تيشيرته من السرير ولبسته ، قامت له بعصبية سحبت الباكييت : عناد بزران هو ؟ " شافت لبسه مالبس تيشيرته ولابس جاكيت وماسكره " بعدين وش ستايل الهنود ذا ؟
صقر نفث دخان الزقارة بوجهها لعانة ، كحت 3 مرات ممتالية من الكتمة وهي تخبط ع صدرها تبي اوكسجين الغرفة ماكان فيها هواء نظيف تستنشقه
سارة بقهر وهي ترمي باكت الدخان على صدره : الرجولة مو بكثرة البنات ولا بالزقاير ياولد ابوك الرجولة اذا نادئ المؤذن حيا على الصلاة فز قلبك وقلت الله اكبر
سكت وهو يسمع كلامها مايقدر يكابر فز غصب ! حس نفسه يهودي من متى ل متى يصلي الصلاة بوقتها او يحافظ عليها يوه من زمان مادخل مسجد وحضر صلاة الجماعة بوقتها كله متأخر ويصليها بالبيت كانه حرمة كانت الشركة تفضى مع الاذان مايبقى الا البنات بمصلى الحريم الا هو يكون يدخن او مطنش لان ماله خلق
تركته يغرق بتفكيره ومشت تفتح الشبابيك وفتحت الباب وطلعت تبي تنتفس .
'
'
جلس عبدالاله بشويش وبتعب وهو يحاول مايلامس ظهره الكنب ، صار يكرهه الجلسة من حرقه .
والنوم ينام ع بطنه وهو ماتعود وجالس ب بيت جده كئيب مافيه احد الا جده وفي وجده 24 بديوانية الشياب وفي بغرفتها .
رن جواله ورفعه ابتسم وهو يشوف الاسم " امي " رد : هلا والله هلا
ام عبدالاله : هلا فيك ماعندك نية نشوفك ؟
عبدالاله : ليش ولدتي ؟
ام عبدالاله ضحكت : الله يهون علي لا بس مشتاقة لك
عبدالاله ابتسم : اسف بس زعلان عليكم مابيكم ابي بيت جدي
ام عبدالاله تنهدت : والله قلبي ناغزني احس فيك شي
عبدالاله بكذب : لو فيني شي انتي اول وحدة بتدرين بس ابي بيت جدي عشان الشباب
دخلت عليه في ووقفت تناظره وهو يكلم امه ، سكر وجلس يناظرها رفع حاجبه : نعم ؟
في : ليش امك ماتدري انك محروق ؟
عبدالاله بسخرية : ليه تبين اقولها انك حرقتيني " بجدية " والله انا مابي اقولها وتقلق علي وهي تعبانه من الحمل وتجلس تشيل فيني وتحط فيني وهي يالله تمشي واجي ازيدها ؟ خليني ساكت افضل
تنهدت في ب هم : تتوقع عندي امك زيك ؟ ممكن تكون خايفة علي وتبكي بعد
عبدالاله هز كتوفه بحيرة : الحين معقولة ماتذكرين ؟
في : والله العظيم ماذكر
عبدالاله جلس بحماس ع الارض : امشي بخليك تسولفين بشوف لهجتك يمكن اعرف انتي من وين مع اني احس فيك عرق قصيمي
في جلست بخوف : اوكي بس شلون ؟
'
'
يوم جديد | الساعة 9 العشاء .
دخلت الغرفة بعد ماتسبحت ولبست ، خذت جلالها من الشماعة وهي تتمغط ب نُعاس من حملت وهي زيادة رغبتها بالنوم والتسدح والتبطح كثير ، لفت عليه وهو نايم بالسرير من جاء من دوامه نام لهالوقت شافته يتقلب لثواني بعدها رفع المفرش عنه ودخل دورات المياه لبست جلالها وجت بتطلع .
صقر طلع بتردد من الحمام بهدوء : شكرا على كلامك امس لو انه قليل ادب بطريقة اسلوبك معي
سارة بسخرية : ماتحسفت ع فعل الجميل اعتبرها بالردي مثل الزكاة
صقر ناظرها بحدة : ماتتوبين انتي ؟
سارة ببراءة : ودي بس لساني يحكني ماقدر
صقر بعصبية : ابو طبيع مايجوز عن طبعه
سارة بضحكة : شف من يتكلم عاد " ونزلت تحت ماتتبي تتأخر عليهم وهم ينتظرونهم ع العشاء ".
تسبح ع السريع ولبس ثوبهه ولحقها عشان يمديه ع الشركة ، دخل وهو يسلم ورد الكل عليه السلام .
جلس جمب سارة وبدا ياكل بهدوء ، سارة بهمس : تمون ترا وش مجلسك جمبي ؟
صقر بنفس الهمس وبسخرية : ذابحني الشوق وش اسوي
ابتسمت سارة مع انها عارفة انه كذاب وهي ترفع حواجبها له : ياعُمري والله
صقر ضحك عليها غصب اول مرة تقوله كذا يدري انها تكذب عليه هي بعد بس مايدري ليش استلطفه منها : تراني اكذب لا تصدقين
سارة وهي تميل فمها : ادري حتى انا اكذب عيب تكذب لحالك
مدت يدها ل العصير وشربت بنفس الوقت قبصها صقر بفخذها ع كلامها ، شرقت بالعصير بألم وبدت تكح اكثر من مرة بشكل متتالي لفت عليه بعصبية وبهمس : خير ؟
ضحك من قلب لفوا كلهم له نزل عيونه ل صحنه وبدا يلعب بالملعقة وهو كاتم ضحكته
فهد وهو يوجهه الكلام لسارة وعيونه بصحنه : صحة
رمى صقر الملعقة بعصبية ع السفرة : لا حول ولا قوة الا بالله
فهد : ماقلت شي الا من باب الذوق البنت شرقت بغت تموت
ابو صقر رفع عيونه لهم بحدة قاطعه : ماخلصنا ؟
صقر وهو شاد ع اسنانه : قول له ماله شغل بزوجتي لو تموت قدامه ماله شغل
سارة بصدمة : خير بسم الله علي
صقر : المهم تراني حاجز شاليه بكرة لنا كلنا نطلع نغير جو " لف ع سارة وهو يرفع حاجبه ينغزها "
ابتسمت له من ورا جلالها ، ام صقر بفرحة : زين ماسويت لكن ورا ماشورتنا ؟
صقر يهز كتوفه : عادي ماعندكم شي ولا احد غريب بيروح معكم عشان تشيليون هم
ضاري : اجل احنا يالرجال نجيكم بعد المغرب خذوا راحتكم قبلها وشدن عندها غداء اهلها بكرة
الجدة : وخير ياطير ؟ ابد تخلص من عزيمة اهلها وانت جاي المغرب جبها معك لا ينقصنا احد
ابتسمت شدن : من عيوني
'
'
دخل الصالة بسروال وفنيلة وكان صغيرة عليه وجواله بيده ب الشاحن المُتنقل شاف خواتها يتقهون ويسولفون ، وامهه نايمه وابوه طالع واخوانه طالعين .
انسدح ع الكنب وهو يشوت راس لمى بالخدادية : صبي لي قهوة معكم
لمى : عمى ان شاء الله خير بغيت تشلع رقبتي
بتال وهو يجلس جمب ديما : ياليت ، وش ذا الحلى ؟ من مسويه
ديما : انا
بتال : عشان كذا طعمهه مو حلو
لمى : يافله نعمة الله بعدين ماتعرف تلبس بجايم زي الاتراك ؟
بتال يطلع لسانه : شفيهه لبسي يهبل حتى شوفي " مد رجله " شوفي منشق عند الركبة والفنيلة مطلعة سري عشانها صغيرة والسروال قصير والحمدالله اموري ماشية
ديما : من متى ذي عندك ؟
بتال : من يومي بثاني متوسط والحين عمري 26
قطع كلامه رنين جواله رفعه واستغرب الرقم المجهول : اخاف انها يابنات معجبة سرية " رد وهو يستهبل ينعم صوته " هلا والله