صقر بلعانة سحب رشاش الموية الباردة ورش سارة فيه ، شهقت بخوف وجمدت من البرد وهي تدعي على صقر ضحك عليها وسكت لا تشوف ضحكته وهو مبرد قلبه وكبر وصلى بعد دقائق سلم ولف لقاها مبدلة ملابسها وجالسة بهدوء ناظرها بسخرية : هذا هدوء ماقبل العاصفة ؟
سارة : صقر اجلس بكلمك شوي
صقر يحط يده على بطنه : وش ذا المقدمات ؟ قولي وبس ماحبها يمغصني بطني
سارة تناظره بطرف عين : من كثر المصايب والله ، امم انا ابي اهلي
صقر ناظرها بمعنى طيب وش اسوي لك ؟
سارة وهي خانقتها العبرة : اكتشفت انا ماقدر اتأقلم عليكم انا لحالي ماقوى واللي فيني مكفيني انت وحياتي واهلي واللي في بطني وتبيني اتعود على مجتمع جديد بعد
صقر : طيب وش بيدي اسوي ؟ تأكدي ابي ننفصل اكثر منك
سارة : طلقني ورجعني ل أهلي
صقر صرخ بفرح : انتظر هاليوم بس " تكلم بعصبية " صاحية انتي ؟ على اساس اهلك بياخذونك بالآحضان بعدين ابوي ماراح يرضى اقولها لك على بلاطة
سارة : ماعليك مني بس طلقني ماراح يكسروني ب ظهري اخواني وامي مايقوون والله
ناظرها صقر ب نظرة عجزت تفسرها وطلع بدون مايرد . '
'
'
في البقالة .
عبدالملك وهو يتصل على ابو صقر : الله يعافيك ودي برقم سارة ضروري
ابو صقر باستغراب : ليه ؟
عبدالملك بآحراج : والله بيني وبينها موضوع ضروري ووعدتني فيه واختفت .
ابو صقر : ابشر ثواني وارسله لك " وسكر "
عبدالملك بتنهيدة راحة وهو يناظر ريم وآخته : الحمدالله الحين بيرسله
ريم ببكاء : والله خايفة احسها ماراح تنقذني منه
عبدالملك : قبل تتوكلين على سارة توكلي على الله هذا جزاة اللي ينسى دينه ويتبع شهواته
اخته بعصبية : كانها ناقصة محاظرات
عبدالملك بعصبية : وكانه نفع فيها عاد وعقلت شوفي بتضيع نفسها وانتي تدافعين عن نفسيتها
رن جواله ناظر جواله بإستغراب من الرقم الغريب رد : اهلين ؟
سارة بابتسامة : ملوك وحشتني
عبدالملك بفرحة : سويرة شخبارك وين الناس
سارة تنهدت : خلها على ربك ، عمي قال انك تبيني ضروري شسالفة خوفتني ؟
عبدالملك يحك شعره مايدري كيف يفاتحها : تذكرين ريم ؟
سارة : لا يكون قرب موعدها معه
عبدالملك تنهد بحزن : اليوم
عضت شفتها بقهر ماتدري وش تسوي ؟ فكرت بسرعة : خذ ريم واختك ل بيتكم وخلكم معهم ريم ضعيفة ممكن تنهزم وتضعف وتروح ل فهد انا بدبر وضعهم وانت خلي جوالها معك وبعلمك وش تقول ل فهد
عبدالملك وهو يطبق وش تقول : تمام
سارة : الحين ارسل اللي بقولك .
'
'
في غرفة من غرف البيت اللي يضم سارة .
كان جالس يلعب بلاستيشن بحماس قطع حبل حماسه رنين جواله ينبهه بوصول رسالة سحبه من الشاحن وهو يشوف الرسالة من ريم استغرب : شعندها صايرة خفيفة ذا الرخيصة .
فتحها وكان نص الرسالة : لا تنسى موعدنا بعد المغرب .
فهد ضرب جبينه : ناسيها قسم بالله " قام لغرفة تبديل الملابس " نستانس قبل تعرس .
'
'
نزل يركض وهو يدخل مفاتيحه بجيبه ، شاف امه تكلم خالته نزلت السماعة : وين رايح ؟
صقر : مساعد ينتظرني برا بنطلع ل الشركة
ام صقر : زين اذا رجعت مر علي بكلمك
صقر اشر لها على عيونه وطلع شافه واقف ب سيارته قدام بيت ابو صقر يتأفف وهو يناظر الباب : وينه هالبثر ؟
ركب صقر وهو يضحك : اسف والله تأخرت عليك
سعود يحرك بعصبية : سنة ملنطع تحت وينك ؟
صقر ببراءة متصنعة : كنت اتسبح يابني
ضحك مساعد غصب : هذا اللي خايف منه تتزوج وتتغير
صفقه صقر ب علبة المناديل : انت عارف زواجي مو ب رضاي .
سعود بتنهيدة : الله يكون ب العون وانا اخوك
'
'
رسيل : طيب أنشري سنابي عندك ياخي ابشتهر زيكم
اميرة تتأفف : اللي عندي ماجو يدورون وناسة ، انا لي مجال ب المجال النفسي اعطيهم نصائح بس
رسيل تكش عليها : مالت عليك انت وصقور ومدري من الحمار اللي يتابعكم
دخلت سارة مبتسمة : شفيها الحلوة معصبة ؟
رسيل : ياخي طفشانة ابي اشتهر تخيلي عندي اثنين من اهلي مشاهير وانا لا
سارة باستغراب : مين المشهور ؟
رسيل : أميرة بالسناب وصقو بكل مكان ماشاء الله مايوفر
سارة بطنازة : صقر على ايش مشهور ياحظي ؟
رسيل : صقر عنده شركة اعلام جديدة وهو يشتغل مخرج ومذيع بنفس الوقت وذي نفسانية الحمدالله والشكر بعدين انتي ماتدرين عن زوجك وش يشتغل ؟ ياخبلة البنت حوله نمل
سارة بعدم اهتمام : وي عليهم بالعافية هم الخسرانين
'
'
" هالبارت توضيح ل اللي يقولون صقر مغتصب سارة ".
جلس ب المكتب يراجع برنامجه الجديد اللي راح يكون اقل مايقال عنه عفوي ، جلسة مصارحه مع الجمهور واعطاء كل ذي حق حقه .
دخل عليه صاحبه بعد ماضرب الباب : حركات صقور سمعنا ان فيه برنامج جديد ؟
سفهه صقر وهو كارهه ، سلطان : ياهوه روقنا ترا ماصارت زعلان حد الحين ؟ بعدين انا ضربتك وقلت رح ل بنت الناس
صقر بعصبية وهو يرص اسنانه : صح انا اشرب معكم وادخن بس ماتوصل العب ب القمار ولا انام مع وحدة من بنات الپار وانتم تشوفوني وعادي
سلطان : طيب ابلشتنا توب وخلاص وبعدين ترا البنت راضية يعني جاكسون مابقى احد مانامت معه " يشب زقارة " بعدين من يلومك ؟ عليها جسم يسدح 10 رجاجيل
صقر بصراخ : انقلعي لا تذكرني الله ياخذك انقلع
سلطان طير الاوراق بوجهه بعصبية : لا تحط الذنب علينا انت بنفسك كنت سبب اللي احنا فيه الحين جيت معنا وسفرتنا ودخلتنا وشربتنا وعلمتنا العابك والحين ومحد اهرب له من برا ويخبيها بشقته الا انت لا تستشرف على راسي يكون بعلمك بس ترا ذنبنا كلنا برقبتك " وطلع "
صقر : رح الله لا يعيد اليوم اللي عرفتكم فيه " ضغط على راسه بقوة " ماتدرون ماتدرون ! " خذته الذكريات قبل شهرين ، ب الپار "
قرب من جاكسون وهو يلعب بشعرها : مرحبا يارائعة
ضحكت بغنج ويدها على صدره : مستر صقر بجانبي ياللروعة
صقر : صقر وعيون صقر وجميع مايملك صقر فِدا ل هذا الوجهه الجميل
جاكسون ضحكت بوناسة وهي تمسك يده : ياه انت ثمل جدًا " لفت برأسها وهي تشوف اصدقاءه اللي كانوا " سلطان + محمد + هيثم " حتى اصدقاءك حالهم ليش جيد هل شربتم كثيرا ؟
صقر وهو يشرب كاس ويضحك ب بلاهه : جدا فالآن تطير الفراشات في معدتي والحياة تغني لي مرحا
وقفت بصدمة وهي تشوف رجال حبيبها " مكين " ياخذون صقر ويضربونه ويرمونه عند باب الپار مع اصدقاءه !
وقف صقر قدام البار وهو يسبهم كان شبهه صاحي وحاله احسن من اصحابه اللي كلهم تسدحوا جمب البار الا سلطان اللي كان يمشي خلف صقر ، صقعت رجله ب بنت وسلطان نام عند الشجرة وصار اللي صار ! "
صقر وهو يضغط على راسه : كذبت عليهم كلهم باني زاني مع بنت بالبار عشان ماطيح من عيونهم وربي عاقبني بوحدة مغتصبة زي ماسويت ب بنت الناس حتى اصحابي مايذكرون وش صار ، اخر شي يذكرونه لما رحت ل جاكسون
( يعني صقر هو اللي اغتصب سارة )
دق على سعود " تعال ابيك " سكر جواله ورماه على الكنب
دخل سعود وهو بيده نص الاعلان ل منتج بيصورنها حاليا ونظارته فوق راسه والقلم فوق اذنه وداخل جو بالتفكير : وش تبي ؟
صقر وهو يناظر صورة ابوه اللي على مكتبه : ابي مسدس عيار 22
طاحت الاوراق من سعود وصرخ : نعم عيوني ؟ قول يمكن صابني صمخ من الازعاج اللي تو برا
صقر ببرود : ابي مسدس عيار 22 ولا تكذب تقول ماعندي الا عندك وانا كنت معك لما شريناه ومعك ترخيص يعني مالك عذر
سعود : مسدسي عيار 9 ملم ماينفع لك بس وش تبي ب 22 ؟
صقر : موضوع يخصني ، ابي هاليومين تدبر لي مسدس نفس مواصفاتي
خذ اغراضه ورجع ل بيته يحس الجو يكتمه مايتحمل .
'
'
دخل وصعد غرفة امه شافها جالسة على جوالها ، باس راسها وجلس جمبها : امريني يمه طلبتيني ؟
سكرت جوالها : شخبارك مع سارة ؟
تنهد صقر وحط راسه على رجلها : مدري يمه لا توجعين قلبي ، احسني ظلمت نفسي وظلمتها لما وافقت بس شسوي انتي تعرفين وش كثر احب ابوي ؟ والله لو يقول اذبح نفسك قلت من عيني ذي قبل ذي كيف وهو زعلان علي ؟ والله اني مانام كاني بزر ابو 7 سنين من البكاء ابي رضاء ابوي علي ولما احصل رضاه اصده ؟ مستحيل بس ماقدر اتحمل اشوفها اساسا كبدي تقلب ودي اذبحها وارتاح
ام صقر : ياوليدي تراك مسوؤل عنها يوم القيامة ، اسمها ارتبط ب اسمك " مسحت على شعره " تذكر ماكنت تبي وحدة تخاف الله ؟
ام صقر مسحت على شعره : تذكر ماكنت تبي وحدة تخاف الله ؟ بكل مواصفاتها لقيناها ب سارة ماتدري يمكن ربي ارسلها لك وانت مو منتبه " سكتت شوي " وماجد ؟ تكلمتوا عنه ؟
صقر : لا ولا ابي اعرف وشلون يعرفون بعض مابي اعرف اي شي عنها ولا يربطني فيها لو اقدر انهي ماجد من حياتي معها يكون خير .
كرهه كل شي غفى من غير مايحس على رجل امه يبي يتذكر لما كان طفل يجي ينام بحضنه مافي بباله اي هم او غم ياليته بقى طفل ياليته مات ولا شاف هالحياة ، للاسف كان صقر عديم الرضا ب قضاء الله وقدره .
'
'
سارة وهي تكلم عبدالملك : اسمع هو الحين يقول وصل خلها تقول اخوي يبي شاهي بقول ناقص سكر وبتطلع تجيبه من البقالة وهو يكون وراء البقالة وهي تروح له
عبدالملك ينقل ريم الكلام : حلو تم صار يالله سلام .
سارك وهي تدق على رجل الهيئة : هلا اخوي نفذت زي ماقلت لي بس انتم تفرقوا اخاف يحس بوجودكم واشكالكم غريبة على الحارة ، اي الاماكن المحاوطة ب البقالة اعرفها دورات مياه المسجد ومحل ثياب وبيت يسكنه شباب يبيعون قدامه خضار ، انتظر منكم خبر .
وسكرت وهي تمشي وتدعي ربها الأمر يتم ويمحي هالفئة من هالوطن اللي مشوهين سمعة الاسلام .
'
'
نزل من السيارة وهو يسمع عذرها تأفف : لا تطولين يالله !
وقف قدام كبوت السيارة وهو يلعب بجواله ، دخله بجيبه بطفش صار له 10 دقائق ينتظر ، شاف ريم تطلع من البقالة متوجهه له رجع سيارته وشغلها عشان تركب معه ولكن قبل يركب حس بيدين ثقيلة تسحبها حاول يفك نفسه بقوة ولكن صدمه هو ويشوف الرجال " طويل وجبر ولحيته طويلة وبشماغه " : امش ياوليدي الله يهديك ويستر عليك
كبرت عيونه على وسعها وهو يشوفهم يقربون جمس الهيئة ويركبونه غصب ، يبي يبعدهم يدافع عن نفسه ومن قبضتهم المؤلمة بس نظرات الشارع اللي كالهم تجمعوا يناظرونه بإستحقار واللي يصوروه ويسرد قصة من مخيلته تواكب الحدث ونظرات العار ب عيون رجال الهيئة وهم يشوفون ذئب بشري من براعم وطنهم اللي حاطين امل هالدولة ودينهم عليهم !
ركب الجمس وهو راسه ب الارض ماله وجهه يحط عيونه بعيونهم يحس ب العار من راسه ل رجوله توه يحس ب دناءة اللي يسويه
'
'
سارة وافقة بصدمة قدام المرآيا وهي تسمع اخر مكالمة " كانت من مركز الهيئة " يبون احد يكفل فهد ! فهد اللي كان مع ريم هو نفسه اخو زوجها ! حتى لو فهد غلط هو ترك اهله كلهم والتجئ لها مستحيل تكسر بظهره بس من بتحكي له ؟ صقر ؟ مستحيل ؟ وابوه ؟ مستحيل 10 مرات !
مافيه الا ضاري حتى لو كان ماقد احتكت فيه بس " سيمائهم في وجوههم " ، لبست جلالها وتوجهت ل جناح ضاري ضربت الباب ضربت الباب وهي تردد بنفسها " اللهم اكتب لي الخيرة ويسر امري " .
فتح ضاري الباب وهو شايل البالطو وشماغه بيده انصدم وهو يشوفها عرفها على طول لان مافيه احد يتغطى عنه بالبيت غير سارة ، صد عنها باحترام : هلا مرت اخوي صقر
سارة : هلا فيك ، بكلمك بموضوع ضروري تكفى بس مايطلع والله لو ثقتي فيك وانك قدها وقدود ماتركت زوجي وخالي وجيتك
ضاري بفخر انه اختارته من بينهم : لك ماطلبتي يامرت الغالي " اشر على خشمه " على هالخشم امري ؟
سارة بهدوء : ابيك تروح مركز الهيئة
لف ضاري غصب بصدمة : نعم ؟
سارة بكذب : اتصلوا علي وقالوا نبي احد يكون له معرفة ب فهد مدري ليه ويبونك ضروري الآن
ضاري حس الموضوع فيه " إن " : متاكدة ؟
سارة : هذا اللي سمعته ، بعطيك رقم الشيخ اللي كلمني تواصل معه يعلمك بالموقع
ضاري وهو يطلع : مايحتاج ادله .
'
'
دخل سعود غرفته بهدوء وهو يفتح درجه الثالث شاف مسدسه المُرخص ب عيار 22 ! زي ماطلب صقر
تنهد يعطيه ؟ بس رفض يعلمه بايش يبغاه ، قلبه ينغزنه مايقدر يسلمه صقر يحس بيطعنه بظهره
لكن وش يسوي يرد صديقه ؟ مسح وجهه بهم صار يختف من صقر هالآيام ماهو صاحبه اللي يعرفه تغير كثير كثير .
'
'
دخل ضاري القسم باستغراب ، دخل الغرفة اللي دلوه عليها سلم عليهم وقلبه ناغزه
ضاري يحاول يخفي توتره : عسى ماشر ؟
الشيخ يبتسم : لا ابد تطمن ، نبي نسالك عن اخوك فهد اطباعه شخصيته وش يحب وش يكرهه ؟
ضاري بخوف : ليش شمسوي ؟
الشيخ : ابد بس مقدم ع وظيفة عندنا ومانوظف اي احد نبي ناخذ معلومات عنه اكثر
ضاري بسخرية : فهد ؟ فهد اخوي ماغيره يشتغل هنا لا معليش اخوي غلطانين
الشيخ بأسف : حتى انت عارف ان اخوك مافيه رجاء ؟ مسكنا اليوم اخوك بقضية ابتزاز ومانقدر نخليه هنا اكثر لان مسكناه وهو بريئ مامسكناه وهو يبتزها خذينا بلاغ ومن حسن حظه مامسكناه بالمجرم المشهود ولا راح فيها ، نبي منك كفالة " مد الاوراق يوقعها "
كانت الكلمات عليه الخناجر صدمة اخوه يسوي هالسواة ؟ ليه ؟ وعشان ايش ؟ وقع وهو يحس بالخجل من اخوه او ان هالاسم ينتمي لهم لا هذي التصرفات منهم ولا من عاداتهم تصرفات ابناء الشوارع صارت تكسو اخوهم ياحسرة بس !
'
'
في بيت اول مرة نزوره ، واقفة بسخرية : لي ثلاث شهور ماشفتك توك تجي ؟
ماله وجهه يناظرها وهو يحس بتأنيب الضمير : اسف
ضحكت : معد تهمني صدقني ! وباخذ حقي منك بالغصب زي ماحرمتني منه بالطيب والحين تفضل صديقاتي عندي
صعدت وانسدحت على السرير الطبي وهي تسمي بالله اليوم بتخطؤ اول خطوة ماتدرين بتطلع سليمة منها او لا ؟ لكن عشان تكسب نسبها مستعده تسوي المستحيل كرهت العيشة بالظلام ، شدت على يد الرجال اللي ماسك الابرة ينتظرها وبرجاء : لا تخلوني لحالي انتبهوا لي تكفى !
ابتسم لها : كل شي بيكون زي ماتبين
سمت بالله وبدت تعد بالعد التنازلي وهي تحس بالابرة اللي انغرزت ب كفها ل تُفقدها ذاكرتها ، ياه هالابرة لفت العالم ووهقت نفسها وسافرت ونفقت كل ماتملك عشان تحصل عليها ، لو ذاكرتها بتضل معها بالمرحلة الاولى ماراح تتم ابدًا هي محتاجة تبدا من الصفر ، غفت عيونها وذاكرتها راحت بعيد ورجعت بذاكرة جديدة تخلو حتى من اسمها .
الرجال وهو يعقم مكان الابرة وبهدوء : ننتظر تمر 23 ساعة ونكمل الخطوة الثانية " وطلع ".
'
صباح يوم جديد .
صرخت بفرحة وهي تشوف رسالة من الموقع المقدم عليه بان تم تعيينها ب وظيفة " معلمة " لكن نقصت فرحتها وهي تشوف المنطقة " الخرج " هي بالرياض وش يوديها الخرج ؟ تنهدت وهي تتصل على لمى اللي مقدمين سوا وتتمنى انها تبشرها بوظيفتها وبنفس منطقتها .
ردت ميعاد بحسرة : شفتي ماعينوني احس ودي اصيح ليه ؟
لمى : وانا عييننوا وانتي لا خير ليه
ميعاد بفرحة لبنت عمها واختها : ماشاء الله مبروك " تنهدت " خيره ياختي ماتدرين ، وين ؟
لمى بضيق : بالخرج تخيلي عاد وش يوديني وش يجيبني
ميعاد : انتي ورهف صديقتنا وكذا وحدة اعرفها بالخرج حلو مع بعض ياحظكم احمدي ربك بالخرج ولا بقلعة وادرين زي الباقيين
لمى : اي والله الحمدالله .
'
'
ام صقر بتوتر على طاولة الطعام وهي تكلم ضاري : بعرف اخوك شفيه ؟ امس طلع مافيه الا العافية كاشخ ومتعطر ترجعه لي وجهه اسود ومن اصبحنا وهو منسدح بسريره لا يكلمني ولا ياكل وعليه حرارة وولدي مايطيح بالسرير الا اذا كان ضايق صدره
ضاري ببرود : دلع بزران
سارة بهدوء : خالتي وين غداه ؟ انا بصعد اشوفه
ام صقر بترجي : اي بنتي تكفين طالبتك شوفيه والله حاله مايسر عدو
ابتسمت لها وخذت الصينية ودخلت غرفة فهد : صباح الخير
فهد وهو يغطي دموعه لا تشوفها : سارة تكفين اطلعي اخر شخص اتمنى اشوفهه الحين انتي " سكتت سارة ، قام بعصبية " وشتبين مني ؟ ليش جالسة ؟ شلون تأمنين نفسك عند واحد حقير
سارة بكذب : ماعرف انت وش سويت ولا ايش كنت ! بس يهمني الحين انت مين ؟ من بتكون ؟ " ابتسمت بأمل " ابي اشوف رجال يستاهل يكون عم ولدي ابي واحد اخلاقه تضرب فيها المثل لا جو يخطبون سجى بنت اميرة يكون خالها من احسن الرجاجيل ابي رجال قدامي افخر به لا سالؤني عنه " حطت الصينية " ابي رجال يتغير عشاني مابي رجال راعي كلمة يومين ويرجع اردى من اول .
وقفت بتطلع ، فهد بهدوء : لحظة بطلع اتغدى معك " يحاول يرفه عن نفسه شوي " بتقولين لولد اخوي عمك نفسية يتغدى بغرفته ؟
ضحكت سارة على فهد اللي يتأثر فيها بسرعة ، فتحت له الباب : تفضل ميسو فهد
طلع وهو مبتسم ضربت على وتره الحساس ونقطة ضعفه .
جالس على طاولة الطعام وهو حس بالخجل والإحراج من نظرات ضاري له اللي ممكن انه علم أبوك بعد لكن لو هو يدري ابوه مستحيل لين الحين عايش
صقر : وين اللي كان بيموت علينا ؟
ضاري وهو يحرك عصيره : مظاهر وانا اخوك
طنشهم فهد لان فعلا ماله خلقهم اللي فيه مكفيه
'
'
سكر الشنطة من مفتاح الاسپير اللي سرقه بطريقته الخاصة ، لزق الورقة على اللوحة ومشى بهدوء وهو مبتسم تمت الخطوة الثانية عشرة على عشرة جاء الوقت اللي ينرد الاعتبار وتوضع النُقط على الحروف .
جلس بمكان قريب ينتظر عبدالاله يطلع من دوامه ، طلع عبدالاله بعد ربع ساعة ب لبس دوامه العسكري وقبعته ب يده ركب سيارته وهو مايدري وش المصيبة اللي تحملها حط اغراضه وحرك ، وضحكات الشخص تتعالى وهو يتخيل شكله لا شافها
ابتسم وركب سيارته وهو يستودعها الله .
'
'
قام من السفرة اللي جلس عليها متأخر بسبب دوامه وهو يمسح بفمه بالمناديل : عايشة جيبي الشاهي
ام مساعد : خلها تريح الغداء عليها والمواعين تسويه الشغالة
مساعد : من متى وانا اشرب من يدين الخدامات ؟ " شد على اسنانه " فزي سوي الشاهي ولا تنتظرني اعيد الكلمة مرتين
عايشة تقوم تركض : ابشر الحين بس تكفى لا تعصب
فسخ نظارته بعصبية وهو يتعوذ من ابليس ، ام مساعد بحنية على حال عائشة : ياولدي شفيك عليها لكم سنتين من تزوجتوا ماشفتكم طالعين مرة مع بعض ماخذها تتعشون ولا تتمشون او تسافرون ولا تقولها كلمة حلوة ليش يابوك ؟
مساعد بتنهيدة : يمه عايشة ماتهمها كل ذولي كل اللي يهمها وش الغداء وش تنظف وش تطبخ وش تسوي لي
ام مساعد بفرح : هذي الحرمة السنعة وش تبي اجل وليدي ؟
مساعد : ماراح تفهموني ياناس ماراح تفهموني كرهتوني بالزواج بكبره
دخل عليهم سعود اللي توه صاحي من النوم : شفيهم الحلوين كارهين الزواج ؟
ام مساعد : هذا اخوك مايقدر النعمة اللي عنده
سعود : يمه عايشة من طينة جدتي وجدتك اللي كل همها زوجها وناسية نفسها ، يمه مساعد يبي وحدة مشغولة بنفسها عندها اهتمامات غيره دراسة اي شي بعيد عنه وحدة فاهمة مو كل اولويتها وحياتها " زوجها " مو كل شي هو بيختنق الرجال ( تراه كلام صحيح )
مساعد يصفق : اخيرا لقيت احد فاهمني
ابتسم سعود وهو يطلع جواله ويتصل على صقر ويصعد غرفته ، رد صقر وهو يغسل يدينه : هلا بابو صقر
سعود : تخسي اسمي ولدي عليك " وهو يدخل المسدس الكيسة " المهم امانتك جاهزة متى تبي اجيبها لك ؟
صقر بفرحة : ب هالسرعة حصلته
سعود : لا لقيت واحد عندي نفس ماتبغى
صقر : خلاص انا جايك الحين نطلع ل الشركة واخذه دقايق وانا عندك
سكر سعود وهو يبدل ملابسه ويدعي الله ان يكف عن صقر شر المسدس ، ونسى يدعي لنفسه ان يكفيه شر هالمسدس
نزلت سارة من جناحها وهي توها تصحى من النوم شافت البيت هادي مافيه الا رسيل وسجى اللي كانت جالسة عند التلفزيون بأيبادها جلست جمبها وهي تاخذ الايباد تكره العالم الافتراضي اللي غزى الدنيا خصوصا الاطفال ، ابتسمت لها وهي تحاول توصل لمغزاها : انتي تحبين الحيوانات ؟
سجى هزت راسها بإيجابية ، سارة : طيب تحبين حيوانات بحضيرة خالك ضاري ؟
سجى : اي احب حيوان حلو بس مادري شسمه صعب
سارة بفرح : طيب اوديك تشوفينها
سجى وهي تركض بحماس : يالله الحضيرة قريبة مره
سارة ابتسمت لفت على رسيل اللي كانت تذاكر : تجين معنا مابي اروح لحالي
رسيل : لو اني شبعانة من شوفة الحيوانات يكفي الجامعة بس ابشري اهم شي ابعد عن الكتاب .
'
'
كان اليوم الجمعة ، ومن طبعهم كل جمعة الرجاجيل يتغدون في بيت الجد كانوا كلهم موجودين باستثناء فهد وضاري
دخل عليهم عبدالاله اللي توه يوصل من الزحمة : السلام عليكم
صقر ب طفش : تكفى عبدالاله جب الكيرم من سيارتك خلنا نلعب
عبدالاله يضحك ويرمي المفاتيح على بتال : انقز جبها من شنطتي بكسر راس ابو عبدالعزيز
صقر ب هياط : تخسى وتعقب " راح ماجد يركض مع بتال بحماس "
العم ناصر يتسند : هاه متى الغداء ان شاء الله ؟
الجدة : الحين الخدامة تجهز السفرة
قطع كلامها صراخ حاد من جهه مواقف السيارات التابعة ل البيت ، قاموا يتراكضون الشباب بخوف من الصراخ اللي ماكان ابدًا طبيعي .
'
'
سارة وهي تهف على نفسها : وش هالحر اعوذ بالله ؟ رسيل نادي اخوك ماراح ادخل بالخياس اكثر
ضاري وهو يفسخ نظارة الوقاية الخاصة بالحيوانات بضحكة : وش جايبكم ؟ وانا قايل اساسا محد يتعدى هالخط ولا يقابل اي حيوان الا باذني وبعد الفحص
سارة : مو مشكلة " ناظرت رسيل اللي ودت سجى تتفرج على الحيوانات " بس الحين فهد
ضاري بهدوء : وش جاب طاريهه الحين ؟
سارة : اوكي غلط لكن ازعل بطريقة تفيده مو كذا تقهره زيادة ترا نادم كثير ، وموضوعه لو سمحت خلوه علي وانا مستعدة اتكفل فيه مستحيل ارضى يضيع اكثر من كذا
ضاري : انا موجود ماله داعي الله يعافيك
سارة بسخرية : لا معليش لا نكذب على بعض في بيتكم كل واحد لاهي بنفسه ماضيع فهد الا عدم المراقبة والحرص انا بكون فاضية ماعندي شي " بنفسها : لا زوج ولا اهل ياحسرتي "
'
'
وقفوا بصدمة قدام شنطة السيارة وهم يشوفون بنت ملفوف جسمها ب قماش ابيض لين اقدامها وشعرها لين كتفها وجهها ازرق وفي اصبع رجلها الصغيرة ورقة وكانت تناظرهم ببلاه !
بتال اللي كان وجهه اصفر وانخفض ضغطه وابوه ماسكه ومجلسه على الارض ويشربه مويه من الروعة ، وماجد من يوم شافها ركض ماوقفه الا الجدار اللي صك فيه .
شهق واحد منهم بنفسه وهو يشوفها الا والله هي نفسها وش جايبها ؟ معقولة قاصدتها
ابو صقر وهو يرجف بخوف : اذكروا الله اخاف انها من اهل الارض
الجد بعقلانية : وش الورقة مكتوب فيها ؟
عبدالاله بخوف : فيه ورقتين وحدة برجلها ووحدة بالسيارة كانت " امانة الـ < عائلتهم " ورجلها اسمي
البنت ببحة : مين انتم ؟
صقر بعصبية : انتي اللي مين ؟
البنت بكت : والله ماعرفكم انا مين وانتم مين ؟
'
'
نزل يتمخطر من الدرج وهو يتعطر ويشوف نفسه بكاميرا جواله ويدنن : ياحلو ياشيرة ياداخل قلبي بدون تأشيرة " صرخ وهو يشوف سارة ورسيل يدخلون " طالعين من دوني ؟
رسيل تسكر اذنها : اعوذ بالله عاد وين رايحين عند ضاري وجينا
فهد يتنفس براحة : اشوى حسبتكم رايحين تتغدون " شاف كتب رسيل شهق " ام قلبين قاعده تذاكر وانا نايم تبيني احمل المواد وانا على وجهه تخرج غيرانة مني عشاني بصير دكتورة نساء وولادة " يلعب بحواجبه "
'
'
كانت جالسة ولافه نفسها بالروب وبيدها حليب ساخن ، دخلتها الجدة وسبحتها بموية حارة وراحت تدور لها ملابس قدها من ملابس البنات اذا جاو ينامون عندها ، كانت تتأمل نفسها بالمرايا مو قادرة تتعرف على نفسها ولا اسمها ولا عمرها ولا اللي معها تحس بفراغ كبير من جوا تحس بضيقة من غير سبب ودها تبكي بس هي تحس نفسها جاهلة كل شي
جذبها الصراخ اللي برا قربت من الباب وهي تسمعهم :
العم ناصر بصراخ : بسيارتك وعليها اسمك وتقول ماعرف ؟ وين نعيش بافلام ؟
عبدالاله بعصبية : اقسم بالله ماعرفها
صقر : خلونا نبلغ الشرطة احسن لا تصير مصيبة وجت على روؤسنا ترانا مانعيش بمسلسل عشان يصير كل هذا
عبدالاله بصدمة : صاحي انت ؟ لو بلغتوا انا اللي بروح فيها وانا والله ماعرفها
ابو صقر يحك دقنه : هذي مو مصيبة هذي جاية متعمدة ممكن من نفسها او احد دازها لكن ليش وشلون ؟ " قاعد يناظرهم " واحد منكم يدري .
ابو عبدالاله : خلوا هذا على جمب الحين وش نسوي ؟
العم ناصر بعصبية ساخرة : يتزوجها ولدك المصون
صقر بعصبية : كل ماجتنا بلوة من برا رميتو ذنبهم علينا وقلتوا تزوجهن ليش ان شاء فاتحين بيتنا ل بنات الخراب ولا كل وحدة تغلط وتحمل تحطونها بذمتنا " ناظر ابوه " وحدة مانعرف لها شي ماندري وش بلاها تقولون تزوجها ياعبدالاله مستحيل ارضى ب هالزواجه على ولد عمي
العم ناصر : صاحي انت ؟ اطنز عليه ماهوب قصدي
رجعت جلست على السرير هم مايعرفونها ولا هي تعرفهم كيف وصلت هنا وبهالطريقة بعد ؟ انسدحت بتعب من الم راسها كان صُداع فضيع ودخلت ب سابع نومة من تأثير الابرة .
'
'
الساعة 9 ونص في بيت ابو صقر .
صرخ فهد بحماس : ياربيه كل اسبوع اروح ويوم ماحضرت هالاسبوع صار اكشن .
صقر ينسدح : يرحم امك اي اكشن الا بلاء وهم الله يفكنا منها
فهد جلس عنده وهو مبتسم ابتسامة عريضة : حلوة ؟
حط يده على راسه وهو يتذكرها ابتسم وعض شفته : اي والله حلوة
سوا نفسه يشق ثوبه ويصيح : يارب ليش مارحت ياربيه ليه ؟
صقر يتذكرها وهو على حاله : مع اني ماشفتها زين بس حتى جسمها مع انه ملفوف بس باين عذاب .
ابو صقر : لا حول ولا قوة الا بالله اتق الله ياصقير
صقر يغمض عيونه : شدخلني يبه انا قايل صيري حلوة
سارة تتثأوب : عن اذنكم بنام .
غمزت رسيل لـ فهد وفهمها ، ام صقر : انتظرني جايتك فوق
سارة وهي تصعد : ان شاء الله .
فهد : يبه خلها تعيش عندنا
صقر بضحكة : اذا بتجي احب اقولكم جناحي وسيع يكفيها
مات فهد من الضحك ، صقر يغمز لها وهو يطلع برا الحديقة : نحب نكفل الحلوين
وفهد لحق امه المطبخ وهو يشوفها تاخذ العصير ضحك على نفسه
اما صقر مشى ل وراء البيت ، كان ملحق جدته دخل بهدوء وهو يرفع الفرشة شاف مسدسه سحب وخباه تحت تيشيرته ومشى ل داخل البيت .
'
'
فتحت الباب وهي تنشف شعرها ، شافت خالتها شايلة كاس عصير
البنجر أم صقر بحنان : يابنتي وجهس ناشف مافيه دم وناحفة خذيه يزود دمك ويفديك
ساره حامت كبدها وهي تشم ريحته ماتحبه ابتسمت مجاملة ل خاتها اللي تعنت لها : تسلمين
ابتسمت لها ومشت ، لمحت فهد ياشر لها من ورا بحركة يده " بدلته " ضحكت عرفت ان فهد مبدله زي عادته ب الفيمتو عشانهم نفس اللون .
واشرت له ب أوكي ، على دخول صقر اللي جاي من تحت ناظرها باستغراب : مريضة انتي من تكلمين ؟
سارة بصدمة : وش جايبك بسم الله ؟
صقر يحك شعره : وين اللي بتنام ؟
سارة دخلت بفراشها وهي تتغطى كامل : الحين ان شاء الله .
صقر براحة : تمام ، نزل يلف بسيارته ساعتين لين تغط بنومها ويرجع .
'
'
في جناح ضاري & شدن .
كان يناظر التلفزيون وهو يتعشى ، جلست شدن بجمبه بهدوء : حبيبي فاضي بكرة ؟
ضاري بتفكير : بكرة ايش ؟ السبت ؟ اي ليش
شدن بابتسامة باهتة : نروح نفحص بالمستشفى ؟
ضاري لف باهتمام : ليه فيك شي ؟
شدن بخوف وهي تناظر ملامحه : لا نجرب نحلل وش سبب تاخير الحمل ؟
تغيرت ملامح وجه ضاري ل بدون تعابير : كم مرة قلت لك انا راضي بعيشتي معك باطفال ولا بدون اطفال مايهمني اذا في بينا طفل او لا ؟ المهم انتي بخير وقدام عيوني
شدن ببكاء : بس انا ابي طفل
ضاري : اوكي فحصنا وطلع العيب منك وش بتسوين
زاد بكاء شدن ، ضاري صرخ بحسرة : فهمتي ليه مابي نروح فهمتي ؟ لاني عارف حياتنا وش بتصير يكفي الوضع اللي احنا فيه يكفي ياشدن طالبك يكفي خلينا نعيش شوي بدون موضوع الاطفال .
طلع برا جناحه متوجهه ل المسجد وهو يتعوذ من ابليس ويدعي الله يفرج همه .
شاف ضاري فهد جالس بالحديقة ورسيل جمبه بعبايتها ، ناظرهم باستغراب وهو يناظر الساعة ومتجاهل فهد ويكلم رسيل : الساعة 11 وين بتروحون في ذا الوقت ؟
عدل فهد جلسته : بندور مطعم قريب نتعشى ونرجع
ضاري بهدوء : كنت اكلم رسيل ، لا تطولون " وطلع ".
فهد بعصبية يلف على رسيل : وش عند اخوانك النفسيات ؟
رسيل : قصر صوتك لا تطب علينا الحين أميرة وتفضحنا وتشهر فينا بكل مكان
فهد بوناسة وهو يتخيل وش بيسوون بعد شوي ويناظر باب البيت الداخلي : يالله تاخرنا .
بعد طلعتهم بـ 10 دقائق وقفت سيارة صقر بالمواقف ونزل دخل وشاف البيت هدوء حمد ربه ودخل بهدوء ل جناحه كان كل شي طافي نوره وهادي ، فتح باب غرفة نومه بهدوء فتح نور شاشة جواله الهادية وحطها على السرير كانت سارة نفس ماتركها بفراشها ونايمة متغطية كامل من برودة المكيف غمض عيونه وهو ياخذ نفس عميق وبداخله : يارب لك الحمد من عادتها تتغطى بالمفرش وهي نايمة ولا كان ماطاوعني قلبي عليها اذبحها وانا اناظرها .
طلع مسدسه من جيبه وهو يتأكد من كاتم صوت المسدس اللي حطه لما طلع برا البيت ! كل شي تمام يالله صقر وش تنتظر ؟
جلس على كتفه وهو يثبت تصويب المسدس غمض وهو يعد بهمس : واحد اثنين ثالث " وضغط على الزناد "
طاح المسدس من يده وهو يرجف فتح عيونه وهو يشوف الرصاصة اخترقت المفرش وفتح عيونه على وسعها وهو يشوف الدم بكل مكان !
طاح على ركبه من الدم اللي غطى المفرش وصل السقف من الرصاصة اللي غرزت جسدها وتطايرت دمها بكل مكان مستحيل تعيش ، ماكان وده كذا لكن يبي يرتاح منها ومن همها يبي يعيش طبيعي يبي ابوه يغير نظرته عنه مايبي يرتبط فيها اكثر صعب تعيش معه كل يوم انثى بنومه وقيامه ويصبر مهما كان هو رجال ؟ يصبر بس مايقوى كثير وهو مايبيها ، طاحت عينه على الساعة صارت 2 بالليل وهو داخل 11 كل هالوقت كان يحاول يستوعطب الصدمة خاف احد من اهله يحس فيه مابي يقضي باقي عمره بالسجون خبأ المسدس بشماغه بالدولاب وركض على الحمام وهو ياخذ المناشف ويملأها موية ركض يمسح الارضية والسقف شاف القزاز المكسور بالارض : وش ذا بعد ؟ لا يكون حتى الرصاصة كسرت اللي على الكمدينة
تنهد مو وقته هذا يترقع لكن وقف بحيرة قدام المفرش لازم يغسله بس كيف بيتحمل يشيل جثتها او يشوفها بس ! حط يده على المفرش بشويش وهو يغمض عيونه لكن وقف قلبه وهو يسمع صوت باب جناحه ينفتح !!
'
'
صحت وهي تتمغط كانت على نفس مانامت بروب الحمام ، قامت بخوف وهو تناظر الغرفة بدت تسترجع ذكرياتها انها كانت بالسيارة ومكان غريب عليها وهي غريبه عليهم .
لمحت العجوز اللي سبحتها وكانت معها نايمة عندها على الكنب بعصاتها ابتسمت على لطفها معها .
وهي تشوفها حاطة البجامة على السرير وصينة عشاء .
قامت وهي تستنشق ريحة مكرونة الباشميل جلست بمعدة مفتوحة وهي تتلذذ بمنظرها والجبن يسيل منها ، رجعت الشوكة مكانها وهي تتذكر هي بدون ذاكرة كيف بتعرف وش كانت تحب تأكل ؟ من اهلها ؟ يمكن متزوجة ولها عيال وخايفين بدونها الحين هي الان بعد بدون اسم تنهدت بضيق وتركت الاكل وقامت تلبس بالحمام بجامتها .
'
'
انفتح الباب دخلت ب ببجامتها النوم ودبدوبها : عمو صقر وين ماما ؟
صقر بعصبية : الله ياخذك انقلعي شدراني انا ؟
طلعها وقفل الباب براحة مشى وصقع بالسرير صرخ بعصبية وتوتر : ياهوه وش فيني مطفي الملبات يعني ؟ اذا شغلتها بتعيش مثلا ؟
شغلها وحط يده على خصره بتنهيدة غمض عيونه شوي وفتحها حس بالندم قد شعر وراسه واذا يكرهها يذبحها ؟ وش ذنبها هي تموت والارهابي هو يعيش ؟ مشى حس فيه شي غبي ناظر السقف والارضية هو مسح الارض لكن وش هذا ؟ باقي اثر
خذ المنشفة ورجع يفرك لكن ماراح ؟ ناظر القزاز المكسور فتح عيونه على كبرها ومشى ل المفرش وهو يمسح باصابعه الدم وحطه عند خشمه يشمه صرخ بقهر : فيمتو !
رفع المفرش بقوة شاف المخدات مرتبة بعشوائية ! لف ل الكمدينة وهو يشوف كاس انكسر وكاس باقي انكسر الجزء اللي فوق وباقي الجزء السفلي تذكر لما غمض عيونه ماناظر وين اتجاهه الرصاصة
يضحك ؟ يبكي ؟ يشكر الله ؟ وش يسوي ؟
سمع احد يضرب الشباك لف بخوف شاف شخص لابس اسود صرخ بخوف
فتحت الشباك : اوش انا سارة
صرخ وهو يفتح لها الشباك كامل : وانا وش بلاني بحياتي غير انك سارة ؟
سارة بغباء وهو تناظره : هاي انا شفت الباب مقفول رحت الصالة وطلعت مع الشباك وصعدت على الديكور ودخلت هنا
تأملها ب لحظة كانت بتروح بلحظة غباء منه وطيش وتفكير طفل اقل مايقال عنه ارهابي ! ضحك غصب مايدري ليه لاول مره حس ان الله يحبه وعطاه فرصة يجرب وماتصيب ويفكر زي الاودام سحبها وضمها من قلب وهو يشكر الله يخاف انه بحلم ويصحى
سارة وهي تبعده : ياصقر كتمتني احترم طولك وطولي واصله ركبتك وتضمني ؟
صقر بعدها باستغراب : وين كنتي ؟
سارة : مع فهد ورسيل " بكذب " جبنا عشاء وجينا
صقر : وانا وش بالله جدار ؟ مو رجال ماتعلميني انك بتطلعين ؟
سارة بسخرية : لا شفت انك رجال بحياتي ذاك الوقت من عيوني استأذن منك
صقر عكف يدها وهو يحط عيونه بعيونها : عيدها وتندمين " فكها ومشى ".
'
'
رسيل وهي تفصخ عبايتها : ياربيه وناسه ياليت كل يوم نروح نفحط
فهد : لا صارخي بعد ؟ خلي ابوي وصقر يدرون اني مفحط بسارة وهي حامل بعد لا صارخي
رسيل تكشر وهي تصعد : نايمين مادروا عنك
اميرة وهي تنزل : لحظة لحظة انت وياها وين كنتوا ؟
رسيل : جبنا عشاء وجينا .
اميرة : وين العشاء ماشوفه ؟
فهد بتصريفة : كلناه بالسيارة
اميرة بسخرية : اساسا لو تقول ان باقي اكل شكيت انكم اخواني
'
'
دخل بهدوء وهو توه راجع من المسجد بعد صلاة الفجر ، من الليل طلع ومعد رجع خلها تفكر وتراجع نفسها وحياتهم قرب بهدوء شافها نايمة بسريرها انسدح وراها حط يدها على خصرها وراسه على كتفها : اصحي تكذبين علي مانمتي
شدن ببحة : طيب ابعد بنام
ضاري ببراءة مُصطنعة : اذا نمتي وشلون انام انا ؟
شدن عطته نظرة ، سحبها لحضنه وباس راسها : انسي كلامنا اليوم خلاص كل مرة بنعيد فيه ونزيد اذا ربي كتب لنا نصيب بالاطفال والله لا انا ولا انتي نقدر نرده لكن ربي ما ارد والخيرة فيما كتبه الله
شدن بكت : انا عادي بس " وزاد بُكاءها "
ضاري : اعرف عشان سارة حامل وانتي متزوجة قبلها ماحملتي " مسك وجهها وحطهه قبالها " شعلينا منهم ؟ اذا احنا سعيدين خلاص الله يهنيهم انا مابي اطفال انتي بنتي " باس جبينها بهمس " انا ربعي موصيهم يسموني ابو شدن .
'
'
الساعة 2 الظهر .
صحى من النوم على صوت جواله رد بتعب : امم
ملاك : مو من جدك صقر حد الحين نايم ؟
صقر بتعب وهو فيه النوم : وش تبين ؟
ملاك : يالله فز تسبح والبس وتعال عندنا تصوير ياحضرة المخرج " وسكرت "
قام يتسحب مانام الا 9 الصبح من حرته بعد سارة صح فرح بس الغبنة اللي جواه مايدري شسببهها منها او من نفسه ، طلع مالقاها بالغرفة لبس ثوبه وخذ جواله وطلع لقاها بالصالة تلعب سجى !
اكتملت البثرة سجى اللي طيحت قلبه امس وسارة اللي لعبت فيه وبحياته لعب ، شافها تسوي نفسها تخنقها وسجى ميتة من الضحك
صرخ باعلى صوته : تكسر يدينك يالمُتخلفة ! هذا جزاة اللي يضف خريجة سجون بتكلمين سجل جرائمك على عيالنا اتركيها لعد اشوفك مقربه منها اقسم بالله تندمين
سارة بهدوء ويدها ترجف من القهر : نلعب
صقر بعصبية : مابقى الا امثالك نصدقها عاد " سحب سجى " وانتي عند امك لعد تصعدين عندي
وطلع مايدري ليش حس براحة يوم فرغ غضبه فيها من امس وهو مقهور منها يبي يمسك عليها شي عشان يبرد خاطره عقب اللي صار .
'
'
دخل البيت مبتسم وهو يشوفها تركض بتبوس كتفه زي عادتها !
جلس : يالله البسي
عائشة صرخت بخوف : ليش بتوديني بيت اهلي ؟ ليش انا شسويت والله احبك عشان الغداء تراه جاهز والله
ضحك مساعد : وش بيت اهلك انتي بعد ؟ بنطلع نتغدى سوا
عايشة : والغداء اللي سويته ؟
مساعد : نتعشى عليه عادي
عائشة راحت تلبس وهي خايفة من هالضحكة اللي ماشافتها من مساعد من زمان .
مسح مساعد وجهه بيده وهو يتنهد : والله ارحمها بس شسوي لا هي فاهمتني ولا انا فاهمها .
دخل الشركة مستعجل ، اتجهه ل موقع التصوير شافهم طالعين برا يصورون تحت الشمس !
لبس نظاراته الشمسية وهو يناظرهم : موفقين ياشباب
تفاوتت ردودهم : امين - تسلم - شرايك ؟ - منور يابو عبدالعزيز
قربت ملاك بعبايتها البيضاء ومنقوشة بشكل عكسي ب الكُحلي والبيج وطرحتها البيج على نص شعرها الاشقر وناثرته على كتوفها ولابس نظاراتها : صبح صبح ياجميل
ضحك صقر : هلا والله
ملاك تتأملهم : هذا جزء من المقدمة الموسيقية ل البرنامج بس نرتبه ونعدل عليه بوريك اياه " غمزت له " انا ملاك مو حيا الله
ضحك من قلب على ثقتها ، سكت فجاءة ومسك راسه بتعب مانام كويس مافيه حيل يبذل اي مجهود وقاعد قدام الشمس بيموت جلس على اقرب كرسي
قربت ملاك بخوف : شفيك ؟
سحب يدها وحطها على راسه وبهمس : يعورني
بدت تدلك له راسه وتقرأ عليه ، سعود يهمس باذن هتون : عاشوا يعنني ام حنونة
ضحكت هتون وهي تعدل لثمتها : الله يصلحها يارب
ابتسم سعود ومشى ل اللوكشين يدور مديرة الانتاج وهو يفكر بهتون اطيب واطهر وحدة هنا ماتشبه البنات اللي هنا الا بـ " حب الاعلام " واللي جمعهم كلهم بهالمكان ماقد شاف طرف اصبعها او خذت وعطت معه بالكلام كلها كلمة ورد غطاها وملاك ؟ الوضع واضح مايبي يحكي فيها يخاف الله يبليه شكل طيبة وماشاف منها الا كل خير بس حركاتها ماتعجبه ولا تمت ل فتاة عربية خليجية متربية تربية سليمة زي هتون .
'
'
عائشة بانبهار بالمكان : واو مساعد يجنن !
ابتسم مساعد وهو يشوف الجناح الملكي اللي حجزه ب الريتز كارلتون لهم : اهم شي عجبك
عائشة ببراءة : ليش تدفع كل هذا كان خدينا غداء ورجعنا
مساعد جلس على السرير : طيب واللي يقولك ابي اجلس يومين مع زوجتي لحالنا كل وقتنا لبعض يضرك ؟
ابتسمت له عائشة بلطف : الله يعطيك العافية
مساعد بفهاوة : عايشة ترا من خذيتك ماقد ضميتيني
صرخت عايشة وهي تغطي وجهها بالطرحة وننطن بمكانها وركضت ل الجدار : عيب لا لا يارب ماتطيح السماء علينا
قام مساعد بخوف وهو يلحقها : وشو وش صار وش قلت ؟
عايشة : وش هالكلام ؟ عيب مايصلح احد يقوله
مساعد تنهد : ياماما زوجك بالحلال شفيك
عايشة نزلت الطرحة : جدتي تقول مايصلح
مساعد تنهد : طيب غسلي وخلينا ننزل نتغدى تحت
دخلت عايشة تغسل وجلس مساعد يفكر ب عائشة ام الواحد وعشرين سنة ! امها مطلقة وتركتها من عمرها سنتين عند جدتها ترتبت على علوم جدتها وجدها كبرت وتفكيرها ظل هناك الدنيا تغيرت وهي باقي هناك تنهد وهو يشوفها طالعة تنشف يدها لبس شماغه ونزلوا لصالة الغداء .
'
'
الساعة 4 العصر
صقر : ماقصرتوا ، اطلعوا بريك ساعتين من الصبح وانتم ب هالشمس تعبناكم " دخل مكتبه "
دخلت بعده ملاك : كيفك الحين ؟
صقر يفصل جواله من الشاحن وياخذ مفاتيحه : الحمدالله ، انا طالع البيت تبين شي ؟
ملاك تلعب بشعرها باستغراب : من متى وانت تطلع بالبريك ؟ غريبة ، لا سلامتك بس لا تطول تراني انتظرك ماراح اروح بجلس اعدل بالفوتوشوب مع مهند
صقر لبس نظارته الشمسية وبنفسه : بلاك ماتدرين قاعد احس بجمرة داخلي تغلي من الندم " تكلم " تمام .
دخل سعود وبيده اللابتوب ، وقف وهو يشوف صقر بيطلع ابتسم وهو يغمز بخبث : وين بتروح ؟
صقر فهمه وقرب وهو يقرصه وهمس : قل لا احد اني متزوج وبقص لسانك
تعالت ضحكات سعود وهو يشوف وجهه صقر اللي قلب .
طلع صقر متوجهه ل بيتهم ونزل وهو يقفل سيارته دخل لقى اهله بالصالة الاولى والصالة الثانية اللي جمبها رسيل واميرة وسارة اللي كانت معهم عشان ضاري ياخذ راحته مع اهله ، باس راس امه وابوه ومشى ل عند خواته وساره انسدح على رجول سارة وهو يناظرها مطنشته ولا كانه قدامها وتناظر التلفزيون
خذ يدها وهو يحطها على صدره ويدها الثانية على عيونه كان يحركها على كيفه كأنها دمية ، كان يحركها بجراءة لانه مطنشته ولا فكرت تعترض ولانه واثق ماراح تسوي شي قدام اهله ، تكلم وهو متعمد بصوت عالي شوي : سارة
ناظرته سارة بمعنى خير ؟
صقر بابتسامة غبية : قربي بقولك سر مابي رسيل تسمعه
رسيل من بعيد تصارخ : عاد كلش اخ صقر ميته على اسرارك
صقر ضحك وهو يأشر ع رسيل : شفتي ؟ قربي
قربت سارة بضجر لانهم انتبهوا لها همس باذنها : زعلانة مني ؟ " شافها ماتغيرت تعابيرها ولا كانها تسمعه " والله اسف ينقص لساني ان شاء الله
سارة من قلب : ان شاء الله يارب والله لا اخذ لسانك واحنطه عندي واقهرك
صقر بصدمة وهو يبعد يدها عن عيونه : اعوذ بالله يالحسودة " ابتسم وهو يرجع يدها على خده " طيب وش يرضيك ؟
سارة تسحب يدينها وهي تذكر كلامه تحس كانه خناجر ويرن بأذنها ممكن يكون عادي وهي حساسة ! لكن فعلا هي حساسة الدنيا خبطت فيها يمين يسار مابقى فيها حيل تتحمل شي اكثر : تطس عني وتفكين شرك والله فرقاك عيد " لفت بوجهها ل اليسار بقهر وتحس دموعها تحرقها تبي تقوم وتخاف يشوفها ويضايقها بها ".
سكت صقر وهو محترم ردة فعلها شي طبيعي ، همس : مو قلتي تبين تتطلقين ؟
لفت سارة بسرعة له ! ابتسم لها صقر : تبين نروح بيت اهلك ؟ تشوفين امك واخوانك مو تقولين مايكسرون فيك ؟ واللي فهمته ان ابوك زعلان بعني لين يقنعون ابوك فيك اكون اخلص اجراءات الطلاق
سارة بأمل : والله ؟
صقر : اي والله بروح الشركة ساعة وارجع لك على ماتلبسين وتجهزين
سارة وقفت وهي مافيها تنتظر اكثر : لا تكفى بروح معك بنتظر بالسيارة
صقر : ماقدر اخليك بالمواقف لحالك الشركة كلها رجال ماراح اطول صدقيني .