Senda's P.O.V.
"Ama namin sumasalangit Ka--"
May biglang sumitsit. Napamulat ako nang hindi oras. Nasa kalagitnaan ako ng pagro-rosaryo; nakaluhod paharap sa krus na nakasabit sa ulunan ng papag na tinutulugan ko. Nakaugalian ko na ito bago matulog.
"S-sambahin ang ngalan Mo--" pagpapatuloy ko.
May sumitsit na namang muli. Unti-unti nang bumilis ang pagtibok ng puso ko. Napatingin ako sa bubungan ng kubong aking tinitirahan. Tila doon kasi nagmumula ang sitsit.
"M-mapasaamin ang kahari--"
Muli na namang may sumitsit. Lalo akong kinabahan.
"--k-aharian M-mo, sundin ang kalooban Mo, d-dito sa lupa pati na--"
Muli na namang may sumitsit. Ngunit sa pagkakataong ito'y nangilabot ako sa magkasabay na pag-alulong ng asong ulol, ang pagaspas ng tila malalaking mga pakpak at ng mga kaluskos na tila may mga naglalakad at gumagapang sa palibot ng aking dingding at bubungang yari lang sa sawali't dahon ng niyog.
"--p-pati na rin sa l-langit." Nakikiramdam ako at patuloy kong iniikot ang tingin sa bandang itaas. "Bigyan m-mo kami ngayon ng--"
May biglang lumagabog sa bubungan. Sinundan ito ng napakihinang bulungan ng tila mga kalalakihang nag-uusap na nagmumula rin sa itaas. Natatakot man, pilit ko itong pinakinggan habang kunwari'y patuloy akong nagdarasal.
"Ba't ba ang gulo n'yo? Anong ginagawa n'yo rito. Umalis nga kayo rito, alis!"
"Panginoon. Nais lang naman namin masigurong ligtas kayo sa babaeng sinisilip mo."
"Ano? Eh ano naman sa palagay n'yo ang maaaring gawin sa 'kin ng babaeng 'to?"
"May nakapagsabi po sa amin na mula po 'yan sa lahi ng mga lambana."
"Alam ko. O, eh ano ngayon?"
"Nag-aalala lang po kami baka magahasa kayo. Balita ko po, babae raw po ang mahilig manggahasa sa lahing 'yun!"
Napakunot-noo ako sa mga naririnig ko. Kinakabahan man ako dahil mas nakasisiguro na ako ngayon na may mga tao nga sa aking bubungan, naiinis naman ako sa mga narinig ko. Saan naman kaya napulot ng nagsalitang 'yun na nanggagahasa ang mga babaeng lambana?
"Tanga! Pangit ka na nga tanga ka pa!" Biglang bulyaw ng isa sa mga nasa itaas. Bagama't halata rito na pinipilit pa rin nitong pahinain ang boses nito. "Maghasa hindi manggahasa! Magaling maghasa ng kanilang kakayanan ang mga babaeng lambana! Panginoon!" Tila bumaling ito sa ibang kausap, "Ayoko naman talagang sundan ka, mapilit lang talaga ang usiserong Aswang na 'yan kaya sinundan ko rito bago pa makaisip ng kung ano-anong kabobohan!"
"Kung pangit ako mas pangit ka! Mukha kang kabayo!"
"Tamo 'tong Aswang na 'to. Napakatanga talaga! Natural, mukha akong kabayo, Tikbalang ako eh!"
"Ang sabihin mo, sinundan mo ako rito, dahil gusto mo ring magmiron!"
"Aba't--"
"Tumigil na nga kayo! Tatagpasin ko na ang mga ulo n'yo eh!" Pagsuway ng isa sa mga ito, "Tingnan n'yo! Nabubulabog n'yo na si Senda. Nakatingin na rito sa banda natin! Umalis na nga kayo!"
Napayuko ako, sa pangambang ikapahamak ko pa kapag nalaman nilang naririnig ko sila.
"Pero panginoo--"
Nakarinig ako ng malakas na tunog ng sinuntok. Muli akong napakunot nang sinundan ito ng mga hagikhikan sa palibot.
"Tanginamo, 'yan ang napapala mong Aswang ka! Mabuti nga sa 'yo. Kulang pa nga sa 'yo 'yan. Dapat talaga sa 'yo iginigisa sa bawang hanggang matunaw! Ang kulit kasi. Tayo na nga! Pabayaan mo na kasi ang panginoon d'yan!"
"Eh..."
"Ay oh, panginoon, ayaw sumama sa 'min!"
"Alis sabi!"
Sinundan ito ng tunog ng malakas na pagsipa. Muli itong sinundan ng mga hagikhikan sa palibot.
"Sabog na ang bunganga mong Aswang ka, gusto mo pang madagdagan?"
"Oo na, sasama na nga ako. Pero dumaan muna tayo sa pistahan sa kabilang nayon."
"Bakit?!"
"Balita ko, marami raw bisita ro'ng mga taga Maynila. Tamang-tama. Tsibog! Nagugutom na ako eh!"
"Ayoko ro'n maingay!'Tong mga Tik-tik ang isama mo! Tutal, pare-pareho naman kayong mga Aswang at pare-pareho rin kayong matatakaw, kayo na lang ang pumunta ro'n. And besides, I'm vegetarian."
Muling may naghagikhikan sa palibot.
"Tadong Tikbalang 'to, pasusyal pa." humalakhak ito, "May pa-ingles-ingles pa...'And besides, I'm vegeterian!'" tila may halong pangungutya ang huling tinuran nito.
"Inggit ka lang! Basta ako, uuwi na ako sa kampo."
"Ikaw rin. Maraming magagandang dalaga ro'n na may mabibilog na pwet at hita!"
"Siyanga?"
"Oo, kaya halika na! Malay mo, maiuwi mo ang isa."
"Hmp. Sige na nga! Pero saglit lang tayo ro'n ha?! Ayoko ng maraming ilaw eh. Ayoko rin sa mga paputok at mga kuwitis! Ewan ko ba naman kasi sa mga tao. Walang paki kahit mabawasan ang mga daliri makapagpaputok lang ng labintador!"
"Hmp. Bahala ka na nga! Lumakad ka na nga lang mag-isa mo! Dami mong ayaw! Kayo na yatang mga Tikbalang ang pinakamaaarte sa lahat ng uri ng maligno!"
Sinundan ito ng pinaghalong mga yabag ng mga bumababa mula sa bubungan, at tunog ng papalayong pagliliparan ng mga ibon o paniking tila may malalaking pakpak. Muling umalulong ang asong ulol kaya muli ring nagsitindigan ang mga balahibo ko; gayun din ang mga hibla ng mga buhok ko sa anit.
Copyright ⓒ DyslexicParanoia (Angela Atienza), 2019, All rights reserved.
Tumahimik na ang paligid at nakabibingi ito. Ngunit hindi pa rin mawala-wala ang kaba sa aking dibdib dahil sa lakas ng aking pakiramdam na may nakamasid pa rin sa akin mula sa itaas. Dahil sa sumisidhing takot, hindi ko na naipagpatuloy pa ang pagro-rosaryo. Nagmadali na akong gumapang sa ibabaw ng papag, pinatay ang gasera sa gilid at saka nanginginig na nagtalukbong ng kumot.
Ilang minuto lang ang lumipas, nakakuha ako ng lakas ng loob na ibaba ang kumot upang silipin ang bubungan. Lalong nanlamig ang buo kong katawan nang sa kabila ng kadiliman'y may naaninag akong isang pares ng mga matang nakisilip sa isang makipot na siwang ng bubong na sawali. Nakatitig ito sa akin; kumukurap din ito paminsan-minsan. Muli akong nagtalukbong, ngunit muli ko rin namang sinilip ito pagkaraan ng mahigit pa sa limang minuto. Wala na mga mata sa pagsilip ko, bagama't hindi naman nawala ang pangamba sa aking diwa...
Sino kaya 'yun?
'Yun din kaya 'yung naniniktik sa akin sa kakahuyan?
Paano kaya ito nakakatambay sa mahuna kong bubungan nang hindi man lang ito nasisira o bumibigay?
Inisa-isa ko ang mga salitang naulinigan kong tawag ng mga nag-usap sa isa't isa: Aswang...Tikbalang...
Aswang at Tikbalang...ngiii...totoo nga kayang dumarami na sa baryo namin ang nabibiktima ng mga Aswang at dinudukot ng mga Tikbalang?
At sino kaya ang tinatawag nilang Panginoon?
Isang Aswang din kaya ito?
Ito kaya ang nasa bubungan ko?
Kung s'ya nga ang nasa bubungan ko, ano naman kayang kailangan nito sa akin? Hindi naman ako buntis...pero kunsabagay, may mga atay at balunbalunan ako. Hindi kaya ang mga atay at balunbalunan ko ang pinupuntirya nito?
Naku...kailangan ko na yatang dagdagan ang mga bawang at asin dito sa munting kubo ko. Ang kaso...baka pati naman mga kapatid ko sa ama na sina Hera, Thea at Dalia'y hindi na makapasok sa bahay ko.
Ano bang dapat kong gawin para hindi na tambayan ng masasamang elemento ang bubungan at palibot ng kubo ko?
Hmmm...
Aha!
Alam ko na!
[ITUTULOY]