အနက်ရောင် အရောင်အသွေးရှိတဲ့ ကားတွေဟာ အခုလိုမျိုး ဂုဏ်သိက္ခာကြီးမားတဲ့ ခံစားချက်ကို ဖော်ထုတ်ပြသနိုင်တယ် ။ ကားမောင်းသမားဟာ သူတို့ နှစ်ဦးစလုံးအတွက် ကားတံခါးကို ဖွင့်ပေးတယ် ။ ဒါပေမယ် Charles ဟာ အထဲကို မဝင်သေးဘူး ။ Tang Fang ကို အရင်ဦးဆုံး ထိုင်စေပြီး ၊ နောက်မှ လိုက်ဝင်ထိုင်တယ် ။
" ကျွန်တော့်ကို ဒီနေ့ ဘာတွေ လုပ်ခိုင်းမလို့လဲ ? "
Tang Fang ကားနောက်ခုံမှာ ငြိမ်ငြိမ်လေးထိုင်ပြီး စဉ်းစားနေမိတယ် ။ Charles ဟာ တဏှာရာဂကြီးတဲ့ ကစားပွဲမျိုးကို စိတ်ဝင်စားတဲ့ လူမျိုးတော့ မဟုတ်လောက်ဘူး ။ ဒါပေမယ့် ဘယ်သူက သေချာသိနိုင်မှာလဲ ? ရုံးခန်းထဲကို ဆွဲခေါ်ပြီး ပေါက်ကရတွေ လုပ်ချင်လည်း လုပ်နိုင်တယ်လေ ။ Tang Fang ဟာ အခုချိန်ကတည်းက အဲ့ဒီလို အခြေနေမျိုးနဲ့ ကြုံဆုံလာရင် ငြင်းဆန်နိုင်ဖို့ စိတ်ကို အသင့်ပြင်ထားတယ် ။
" ငါ့ဘေးမှာ ဒီတိုင်းပဲ နေနေပေး ။ "
Charles ဟာ နူးညံ့စွာပြုံးပြီး သူ့လက်ဖဝါးကို အသာအယာ ကိုင်ထားတယ် ။ အဲ့ဒါထပ် ဘာမှ ပိုမလုပ်ဘူး ။
" Mr.Charles က ဘယ်လို လုပ်ငန်းမျိုးနဲ့ အသက်မွေးဝမ်းကြောင်း လုပ်လဲဆိုတာ ကျွန်တော် သိခွင့်ရမလား ? "
" စီးပွားရေးနဲ့ ဆိုင်တဲ့ အလုပ်မျိုးတွေပါပဲ ။ အများစုက အိမ်ခြံမြေနဲ့ ဘဏ္ဍာရေး အလုပ်မျိုးတွေ ။ လုပ်ငန်းအများစုက Europe ဘက်မှာ ရှိတယ် ။ အခုက တရုတ်ပြည်မှာ ရုပ်ရှင်လုပ်ငန်းထဲ ရင်းနှီးမြုတ်နှံဖို့ ပြင်ဆင်နေတယ် ။ "
Tang Fang အတိတ်မေ့နေတဲ့ အဖြစ်ကို သတိရလို့ Charles က ဆက်ပြောတယ် ။
" Lu Tain Chen နဲ့ ငါနဲ့က ကျောင်းနေဘက် သူငယ်ချင်းတွေ ။ ဒီမှာ လုပ်ငန်းတွေ လုပ်ဖြစ်တာလည်း သူ့ကြောင့်ပဲ ။ အခုလည်း သူနဲ့တွဲပြီး အလုပ်တစ်ချို့ လုပ်နေတယ် ။ "
" မင်း သူ့ကို လုံးဝ မမှတ်မိဘူးလား ? "
Charles ဟာ တကယ်ဟုတ်မဟုတ် သိချင်လို့ သေချာ မေးကြည့်တယ် ။
" မမှတ်မိဘူး ။ ဒါပေမယ် ဆေးရုံတက်နေတဲ့ အချိန်တုန်းကတော့ သူနဲ့ ကျွန်တော်ရဲ့ ကြားထဲမှာ အခြေအနေတစ်ခု ရှိနေတယ်လို့တော့ ပြောသံ ကြားဖူးတယ် ။
Charles ရဲ့ အကြည့်တွေကနေ တဆင့် ဒီခန္ဓာကိုယ်ရဲ့ ပိုင်ရှင်ဟာ Lu Tain Chen ကို တစ်ဖက်သတ် ကြိုက်နေတဲ့ အကြောင်း ၊ Charles သိနေတယ်ဆိုတာကို Tang Fang ရိပ်စားမိတယ် ။ ကံကောင်းသွားတာက Charles ဟာ ဒီအကြောင်းကို ကြားဖူးယုံသာ ကြားဖူးပြီး ကြားမှာဖြစ်ပျက်ထားတဲ့ ကိစ္စတွေကို မသိသေးတာကိုပဲ ။
Tang Fang လည်း စဉ်းစားရလွန်းလို့ ခေါင်းတွေကိုက်ချင်လာပြီ ။ အတိတ်မေ့နေတာပါ ဆိုတဲ့ အကြောင်းပြချက် တစ်ခုတည်းနဲ့ Lu Tain Chen ကို အမြဲလှည့်စားနေလို့လည်း အဆင်မပြေလောက်ဘူး ။ ဒါပေမယ့် တစ်ဖက်က ပြန်စဉ်းစားလိုက်တော့ အဲ့ဒီလောက်အထိ တွေးပူနေစရာ မလိုဘူး ။ ဟုတ်တယ်မလား ? Lu Tain Chen တကယ်တန်း ကြိုက်နေတာက Ge Chan ၊ သူ့ကိုက မုန်းနေတာ ။ ဒါကြောင့် သူတို့ တစ်ယောက်နဲ့တစ်ယောက် ပုဂ္ဂိုလ်ရေး ကိစ္စနဲ့ ဆုံဖို့ အကြောင်းက မဖြစ်နိုင်ဘူး ။ အလုပ်နဲ့ ကြည့်မယ်ဆိုရင်လည်း ကုမ္ပဏီရဲ့ CEO က ကုမ္ပဏီပိုင် အနုပညာရှင်နဲ့ နေ့တိုင်းအမြဲ တွေ့နေ့ဖို့က မလိုအပ်ဘူးလေ ။
ကားစီးနေရင်း စကားစမြည်ပြောကြတာ တဖြည်းဖြည်းနဲ့ အကြောင်းအရာက အားကစားဘက် ရောက်သွားကြတယ် ။ အရင်ဘဝမှာတုန်းက သူ့ခန္ဓာကိုယ်ဟာ ပင်ပန်းတဲ့ အားကစားမျိုးကို လက်မခံနိုင်တဲ့အတွက်မို့ Tang Fang ဟာ ဘိလိယက်ကိုပဲ စွဲစွဲမြဲမြဲ ကစားဖြစ်ခဲ့တယ် ။ တိုက်ဆိုင်မူအနေနဲ့ Charles ကလည်း အဲ့ဒီကစားနည်းမှာ ထူးချွန်သူ တစ်ယောက် ဖြစ်နေလေတယ် ။ ဒါနဲ့ပဲ Charles ဟာ သူတို့နှစ်ယောက် နေ့လည်မှာ လက်ရည်စမ်းဖို့ ချိန်းလိုက်တယ် ။ Tang Fang ကလည်း ကျေနပ်စွာ လက်ခံလိုက်တယ် ။
ကားဟာ မြို့လယ်မှာရှိတဲ့ မိုးမျှော်တိုက် တစ်ခုရဲ့ အရှေ့မှာ ရပ်တန့်လိုက်တယ် ။ တိုက်ရဲ့ အရှေ့မှာတော့ ကြီးမားလှတဲ့ မာဘယ်လ်ကျောက်ပြား တစ်ချပ် ရှိနေပြီး ၊ ကျောက်ပြားထက်မှာတော့ " The Tain Chen Group " ဆိုတဲ့ စာလုံးတွေကို လှပစွာ ရေးထိုးထားတာကို မြင်ရတယ် ။
Tang Fang ဟာ Lu Tain Chen ရဲ့ အကြောင်းတချို့ကို ဆေးရုံတက်နေစဉ်မှာ magazine အချို့နဲ့ သူနာပြုဆရာမလေးတွေရဲ့ ပြောစကားတွေ မှတစ်ဆင့် သိခဲ့ရတယ် ။ Lu Tain Chen ဟာ Tain Chen Group ရဲ့ တည်ထောင်သူကော ၊ CEO ကောဖြစ်တယ် ။ ငယ်ရွယ်စဉ်ကတည်းက မိသားစုလုပ်ငန်းတွေကို ဦးဆောင်ခဲ့ပြီး ၊ ကိုယ်ပိုင်လုပ်ငန်းသစ်များကိုလည်း လုပ်ကိုင် အောင်မြင်နိုင်ခဲ့တယ် ။ လက်ရှိ ကုမ္ပဏီဟာ လုပ်ငန်း နယ်ပယ်များစွာကို ပိုင်ဆိုင်ထားတယ် ။ မော်တော်ကား ထုတ်လုပ်ခြင်းမှသည် ဘဏ္ဍာရေး လုပ်ငန်းများအထိ ၊ အခုဆို ရုပ်ရှင်လုပ်ငန်းများထိပါ အောင်မြင်စွာ ဦးဆောင်နိုင်ခဲ့တယ် ။ လုပ်ငန်းတစ်ခုဟာ အကျိုးအမြတ် တစ်စုံတစ်ရာ ရမည်ဆိုတာနှင့် ထိုလုပ်ငန်းမှာ Lu Tain Chen ပါဝင်ပြီးသား ဖြစ်နေတယ် ။ ဒီမြို့တော်မှာတော့ Lu Tain Chen ဟာ အထင်ကရ ပုဂ္ဂိုလ် တစ်ဦးဆို မမှားဘူး ။
Tain Chen Group က ပြောရမယ်ဆိုရင် Lu Tain Chen ရဲ့ အမာခံ ခံတပ်တစ်ခု သဖွယ်ပဲ ။
Charles ဟာ Tang Fang နဲ့ Lu Tain Chen အကြားမှာရှိနေတဲ့ အမုန်းတရားကို ကောင်းကောင်းကြီး သိနေတယ် ။ Tang Fang ကတော့ ဘာကိုမှ မမှတ်မိဘူး ။ ဒါကိုတောင် ဒီလိုနေရာအထိ အတူခေါ်လာတယ်ဆိုတော့ Charles ရဲ့ အတွင်းစိတ်ထဲ ဘာတွေရှိမှန်း ဘယ်သူမှ မသိနိုင်ဘူး ။
Tang Fang ဟာ မိမိရှေ့မှာ လူကြီးလူကောင်းဆန်တဲ့ အပြုံးနဲ့ မတ်တပ်ရပ်နေတဲ့ Charles ကို သံသယမျက်ဝန်းနှင့် ကြည့်နေတယ် ။
" ငါ မင်းကို ပြောပြဖို့ မေ့နေတာ ။ တရုတ်ပြည်မှာ နေနေတဲ့ အတောအတွင်း ငါ ဒီနေရာမှာ အလုပ်လုပ်တယ် ။ မင်းက ဘာကိုမှ မမှတ်မိဘူးဆိုတော့ Lu Tain Chen နဲ့ ဆုံခဲ့ရင်တောင် ဘာပြသနာမှ တက်မယ်မထင်ဘူး ။ မင်းကလည်း ခုချိန်ထိ သူ့လက်အောက်က လူဆိုတော့ ဘာပြသနာမှ မတက်တော့တာ အကောင်းဆုံးပဲ ။ "
Charles ပြောပုံက မသိရင် သူကပဲ ကြားဝင်စေ့စပ်ရေး လုပ်ပေးတဲ့ သံတမန်လိုလို ၊ ဘာလိုလိုနဲ့....။
" ကျေးဇူးပါဗျာ "
တကယ်လိုများ Charles လည်း Lu Tain Chen နဲ့အတူ မြေမြုတ်ပစ်လို့သာရရင် သူပိုတောင် ပျော်နေမိဦးမှာ ။
.............................................