....
بقلمي
زينب
....
تصويت
تعليق
...
وكفت بمكاني متفاجاه بجيت عربيد بهل وقت وياه بنيامين غميت كصتي شلون ما اجاوب على مكالمته الكلتلي عليها اصيل
ياربي ع القهر مسحت دموعي وانا اشوفهم يرجعون من الشارع الركضو بي ورا افنان وعربيد بس يخزر عيونه طلعت من محجرها
صاح بيه وهو يلهث
_دخلي جوا
دخلت للبيت ميته من القهر على افنان وخايفه من عربيد الي ركض ورا بنيامين من شاف افنان شوي ودخلت امي للغرفه تحاجيني
_خولة عربيد خابرني يريدج وياه ترحين الامه ب المستشفى خطيه وحدها محد وياها
_روحي انتي يمه
_بنيتي شروح انا وهو طلبج انتي وامه ب المستشفى قابل نخليهم وحدهم بهيج موقف
_هسه وينه
_هسه وصل يجوز طلعي شوفي
لبست فوك ملابسي وطلعت لكيته هو وبنيامين ب السياره صعدت ورا افرك ايدي بقلق اليوم شيفكني منهم
حرك السياره وهو يحجي
_وين راحت افنان
_مادري
ضرب الستيرن وهو يصيح
_وييين راااحت افنااان هاي المادري انسيها
_مادري عربيد هيه اجت محتاجه فلوس انطيتها فلوس شكد لحيت عليها تدخل لو ترجع الخوانها بس ماقبلت جاي احاجيها وانتم اجيتو
سكت يهز براسه تاكدت ورا هاي هزت الراس مصيبه
انتظرت الصياح والخوف المنتظرني
وصلنه للبيت وطول الطريق ماضلت سورة ماقريتها اريد بس اهدء مثل الرايحه للاعدام وهيه تدري ماكو امل مصيرها محتوم
دخلو للبيت دخلت وراهم اندعي من ربي امه هنا تنقذني منه على الاقل جنت متاكده هنا ومو ب المستشفى بس لكاها حجه علمود اطلع من البيت
مجرد دخلت للهول صاح بيه
_شسوين طالعه بهل ظهر ماتعرفين تركدين ب البيت
باوعت بعيونه مدمعات عيوني دنكت راسي دموعي تطيح ماكدر اجاوبه احس كل كلامي خطأ وياه ويوديني ورا الشمس ماعرف احجي بدون ما اجفص
_مووو احجييي
بعد مافززني حاجاني بنيامين بصوته المبحوح مبين بي التعب من صوته
_خولة ياريت تساعدينه انا مو ضدها افنان انا وياها
شلون احجيلهم هيه شارده منهم وماعرف السبب اكيد ماذيها لهل درجه حته شارده منه
_زين شلون جانت زينه مامتاذيه
هزيت راسي بلا احاجيه
_ايديها محتركات وجها متاذي ماعرف ليش عيونها مورمات كوة تشوف بيهن وزرك يخوف صاير شكلها ومبين شكد تعبانه ب النهايه هيه ايام مو بالبيت ب الشوارع
_وين جانت هل فتره
_مالحكت احاجيها
لمحت بعيونه خيط الدموع وهو يمسح وجهه ويستغفر
_خولة كليلي وينها والله ماتقربلها بس اباوعلها من بعيد اطمن عليها ماريد قربي الها الي ياذيها خولة صدكيني هل مره
زدت بدموعي وانا احط ايدي على وجهي شلون اكدر ما اضعف كدام توسله وهو سنين يراقبها ويرجع هسه يراقبها وخر ايدي من وجهي عربيد يحجي بهدوء
_اذا ماتثقين بيه ثقي بيه انا ماخليه يتقرب الها
هزيت راسي امسح بدموعي
_عربيد هيه وثقت بيه
_انتي ثقي بيه هل مره
باوعت لبنيامين اشوف الحيره بيه يلوب على طول الهول وهو يردد
_ماحاجيها خولة بس اشوفها من بعيد خليها مرتاحه من فائق خلي تاخذ نفس براحه
جريت نفس اباوع العربيد يفرك ايدي الترجف بثنين ايدينه
تقربت على اذنه احاجيه بهدوء
_اخاف اكسر ثقه افنان بيه
_خولة اخوي راح يتخبل انتي ماتعرفين الجاي يعيشه
_بنيامين
التفت علي بلهفه وهو يكعد يمي انا وعربيد
_افنان راحت الخطوة الامام علي ع وكلتلي اكل الخالد يروحلها تريد يساعدها بشنو ماعرف ماحجتلي بس امانه بنيامين لاتروحلها ماكدر اكسرها هاي المره وهيه حجتلي افنان زعلها ثكيل لو زعلت علي وستهضمت
_وين صارلها هل ايام
_بكربلا
فتح عيونه متفاجا مثلي من تفاجاة من حجتلي
_اكيد بكربلا شلون اااخ افنان بلاويج اكبر منج
_لاتروح بنيامين كام من مكانه وانا احاجي عربيد
_عفيه عربيد كله لايروح
طلع بنيامين بدون مايحاجيه عربيد شي كعدت مباله مفرفحه روحي احجي بحركه كلب
_مو اكلك كله لايروحله عربيد انته وعدتني عفيه عربيد كوم خلي يضل هنا عربيد عفيه
احاجيه واجر بي من ايديه اريده يكوم ودموع تنزل بهدوء
جان لايبالي الي والتوسلاتي كاعد ساند روحه ع الحايط وطابك رجليه سحبني من ايدي البين رجليه جرني على صدره وانا ابجي وهو يحجي بهدوء
_مايروح شبيج
_راح عربيد مو كتلك وكفه هسه شتكول علي افنان
_مايروح كتلج يعني ماتصدكيني
اريد اوخر من ايده حاضني على صدره بين رجليه وايده محاوطه الكدامي
_رجعني للبيت
_ليش طلعتي
_شفتها برا وطلعت
_انوب من تشوفيها تكعدين وتنجبين
_عربيد انا ماغالطه عليك ليش هيج تحاجيني
_غلطي وشوفي
_يعني انته اذا تشوف بنيامين الي ايام ماشايفه وماتعرف هو وين هم ماتطلعله
_اي ما اطلعله
_انته كلبك حجر انا مو هيج
_انتي كلج رجيجه مثلا لو رجيج جا ماحنيتي علي
كالها وهو ينفس من ركبتي كزبر كل جسمي وتشنجت حته ماكدرت اتحرك علمود ابعد عنه استشعر حرارة انفاسه من ورا الحجاب وهو يحجي بهدوء
_هو كلمن يبجي يصير حلو
اجيت اكله صرت تك عين وماتشوف بس لزمت لساني
ميخت دموعي كتله
_يعني اكيد بنيامين مايروح وراها
_يجوز يروح مايخليها تشوفه بنيامين واعرفه تطمني
حاجيته اكسر حاجز خوفي منه وانا اتذكر كلام مياسين بعد ماشفت لو شي بسيط من عربيد الثاني صح صيح ورعبد علي بس هنا عرفته هو مايكدر يتحكم باعصابه عكس بنيامين الي حاجاني بهدوء عربيد من شاف وضع بنيامين سكت هو
_عربيد مو عيب تجذب على امي
_وانتي مو عيب تجذبين علي وتكليلي ماحجت شي افنان هاي اول واخر مره تسويها
وخرت وجهي القريب من وجهه وانا احط راسي على ركبت رجله الجانت طاويها
_خطيه افنان حقها ماتثق باحد جانت حيل متاذيه شايف ايديها كلهن حروق وعليهن دم جاف وتراب ماتعرف شصاير بيهن وجهه تعبان كلش ماعرفتها من شفتها لو ماعرف هيأتها مستحيل اعرف وجهه خصوصا ايديها كلش تعبانات
كلتها وانا اشر على باطن ايدي واتخيل اعيش العاشته افنان يجوز لو يصير بيه موقف من مواقفها انكسر ومستحيل اكوم على حيلي بس عجيب صبرها بعدهي تحارب وضعها ومامستسمله
لزم ايدي عربيد وهو يبوس باطن ايدي تفاجاة من تصرفه
_عربيد خل نرجع اريد احاجي خالد
_هسه
ضليت على وضعي راسي على ركبته مغمضه عيوني التحركني من البجي فزيت على صوت ام عربيد وهيه تكول
_يا هلا بخولة جا غير تكلي عربيد خولة هنا
فزيت اكوم من يم عربيد خجلانه من موقفي كدامها ابستمتلها مجامله ابوسها
_هلا خالة
_شوكت اجيتو
_توا مصار هواي
_عربيد من امس كلي باجر نطلع انا وخولة بس مادري بيج تجين هنا
واضح جانت نايمه لان عيونها كوة مفتحتهن
_ضلي تغدي يمي ونسيني خايبه محد مكابلني بس هل حيطان حته هل مصيوب جرثومه طلع
_لا يمه ترجع للبيت
_ياا عربيد خلي البت خل اشوفها
_يييمه
مجرد كالها بصوت سكتت وهيه تروح للمطبخ
طلع عربيد وانا طلعت وراه بعد ماسلمت عليها
ضلت حجايته على امه تحوص بكلبي ماكدرت ما افجرها قبل لانوصل
_عربيد خطيه خالة هيج تحاجيها
توقعته راح ينفجر بوجهي بس جرحسرة وسكت حسيت روحي فشلت نفسي بسؤالي هذا وهو ساكت عنه بس جاوبني ورا شوي
_خولة انتي ماتعرفين شي لاتبررين الاحد بعدين مو كل الناس خطيهمو كلها مثلج كلبها ابيض
سكتت ماجاوبت يعني معقولة اكو شي بينه وبين امه شي جبير بس شدخلني مدوخه روحي
قبل لا انزل كال
_اذا سألتج الوالده كليلها صارت زينه امي ومرضها كليلها قلب وطاحت
هزيت راسي وانا انزل من هسه بديت تلقني ب الجذب
....
دموعي تنزل بهدوء متناغم وانا اسمع القصيده الي مشغلها ابو التكسي لباسم الكربلائي والحنيه الي بصوته
يطير الصاف عافوني وانا الياويل يبرالي
اصد للبيت بعيوني واشوف البيت ظل خالي
عساه الموت يلفيني يطير الصاف واتمنى
ولا دنياي اقضيها ب الاهات والونه
التفتت اشوف السيارات والوراي ماريد اشوف بنيامين يلحكني بعد ماخليته يصيح باسمي وصعدت تكسي كلي ثقه خوله مراح تحجي شي الهم دنكت راسي اشهك بجيتي
كسر ضوضاء افكاري ابو التكسي يكول ط
_عمو وين ترحين
_لخطوة الامام علي ع
ضل يسوق وانا اباوع غمضت عيوني تعبانه لدرجه مابيه حيل اباوع واراقب الطريق اذا انا رايحه ب الطريق الصح لو لا لان مستحيل اثق باصحاب التكسي
اخاف اروح للخطوة والكه بنيامين هناك خاف يضغطون على خولة وتسولف ماعندي حل غير اروح هناك ماعندي مكان يستقبلني حسبت الفلوس البيدي بيهن مية الف منين احصلي تلفون باقل من هيج سعر علمود اخابر منه الخالد وخولة
وصلني للمكان نزلت وانا احاجيه من الجامه
_عمو شكد الاجره
_عشره الف
باوعت لفلوسي بس خمسه وعشرينات وخولة نطتني خمسين نصمت مابيهن خرده شافني محتاره كال
_ماعندج صرف
_تنتظرني اصرف من هذا المحل الكبالنه
_انطيني عندي خرده
اخذ مني الخمسه وعشرين وحرك السياره طار بيها
ضليت مصفصفه بمكاني لهل درجه وصل الحقد والخبث يعني هو يشوف حالتي ويشوف وضعي لاحكني على الفلوس ومستحيل هل نفسيات شكد مريضه رجال جبير بالعمر الي بكدك شبعو ماي ورد وبخور بكبرهم وانته تسرقني باوعت للفلوس الضلن بيدي انا شكد فاهيه شلون احطيهن بيدي وكدامه وايظي الثاني ماتعيني الزم بيها شي كلها حروق وتاذيتي
تمشيت افوت غسلت وجهي اباوع الروحي ب المرايه وجهي يخوف شلون الناس تباوعلي نزعت حذائي وانا اغسل رجلي توضيت وفتت لفحتني نسمه بروده صليت صلاة الظهر وسندت راسي على الحايط وانا اسبح مغمضه بلعت ريكي بخوف من فكره بنيامين يندلني وارجع اعيش العشته مره ثانيه
تمددت جهه وجهي ع الحايط اريد انام ندستني مره وهيه تكول
_مايصير تنامين هنا لان رياجيل يفوتون يزورون
باوعلتها ورجعت غضمت متجاهلتها مابيه حيل احجي لو افكر بحجيها اصلا
على اثر هوسة النسوان والاطفال سهلمت وانا انام ماعرف يمته فزيت بس فزيت مفزوعه كبل كمت اباوع داير ماداياري بلعت ريكي وانا اطلع برا دنيا مغرب وصوت القران من الحسينيه القريبه
لبست حذائي وانا افتر داير ماديار المكان جانو ناس قليلة
باوعت للسيارات وحده وحده
تنفست بهدوء وانا اشوف سياره مثل سياره خالو احسان اليطلع بيها خالد ابتسمت بامل بعد ماوكفت يمها وشفت داخلها المداليه المعكلها خالد داخلها تاكدت هيه
ضليت واكفه يمها بعد ايام حسيت رجعلي امل بسيط باوعت للمتسوله الي شفتها المره الفاتت من شفتها ويه بنيامين وخليتها تحجي عليه دمعت عيوني وانا اشوفها تتوسل ب الناس يشترون منها من الكتب التبيعهن علمود تاخذ فلوس لو توكف يم ابو المحل يبيع لفات وتتوسل بي علمود ينطيها لفه وهو ينحشها حالها حال الحيوان منظر شكد اثر بيه وقهرني فوك ما انا مقهورة مشيت اليمها دنكت عليها احاجيها
_حبيبتي جوعانه
نترت ايدي الي على ايدها
_وخري
_تذكرتيني
هزت راسها بلا اكيد ماتتذكرني يوميه تقابل مئات من الناس
اخذتها من ايدها الابو المحل
اشتريتلها لفه وعصير وكعدت تاكل صرفت عنده الفلوس ودفعتلها حطيت بيدها خمسه وانا احاجيها
_وين اهلج ليش لهسه برا مو المفروض ترجعين
_انتي هم متسوله مثلي بس انتي عندج فلوس انا ماعندي
ابتسمت على كلامها وانا اعوفها فعلا منظري مو منظر شخص طبيعي وهيه لسانها طويل تنطيها ب الوجه
رجعت اليم سياره خالد انتظره وين راح لحد ماشفته من بعيد وهو يطلع من داخل
اجه يمشي اليمي بس مايباوعلي جان يخابر سد تلفونه رفع راسه يريد يفتح السياره وشافني انصدم من وضعي وهو يكول بهدوء مركز على عيوني
_دورتج مالكتيج خولة كالت خاف مراح تروح للخطوة لان تخاف
درت عيوني منه احاجيه
_هسه خلي نصعد خالد
صعد ب السياره وانا صعدت التفتت احاجيه بلهفه
_باع خالد اخذني اي مكان اجرلي بيت تعبت من الشوارع
_وحده وحده انتي ليش ماترجعين وياي للبيت
_انته تعرف انا وين جنت
_سولفتلي عنج خولة
جر نفس ورجع كمل
_انا عرفت قبل خولة من يوم نخطفتي والي كمل خوفي عليج الحريق الصار ماردت احجي الاي احد علمود اصيل راح تخاف عليج ايست بعد مادورت عليج هواي دورنه ماضلت مستشفى مركز شارع بكل مكان بس مالكيتج فص ملح وذاب وهسه خصم الحجي ترجعين وراسج فوك رجلج
_خالد لاتخربط مستحيل ارجع الخالو واحط عيني بعينه انته ماتعرفه قبل لا اطلع من عندكم كعد وياي وحاجاني وفهمني هو راح يرجع خواني وانا عارضته وطلعت بدون علمه اكيد مايردني بعد ولا انا مستعده ارجع واشوف كسرته علي
_افنان بعدج على فلسفتج عوفي هذا الراح مات احنه ولد اليوم قابل ابوي من يشوفج يطردج
نزلت دموعي بقهر ماكدر اتحمل الحاح خالد ماعندي طاقه تحمل طلعت بكلامه صفح وانا اسولفله كلشي من اول ما نخطفت من تركت الاطفال والفلوس البكتهن وروحتي الكربلا الى هذا اللحظه وهو صافن على كلامي حجيت بكل هدوء
_هذا كله ومارجعت الكم تريد هسه ارجع مستحيل خالد
_وين اخذج خولة ادري انتي ماينخاف عليج وسباعيه بس وين حته مكان خاص بيه تكعدين بي ماعندي قابل اكعدج بفندق ما امن عليج مستحيل
_اجرلي بيت بس هاي الفتره اريد ادرولي شغل واشتغل واجيب خواني يمي
_مستحيل افنان لاتخربطين
صيحت عليج بقلت صبر لان فاض صبري وانا اقنع بي
_كتلك اريد اروح منا ماريدد اشووف احد ماريدد ارجع للضيم شبيك انته
ساق سيارته وهو يكول
_هسه اخذج البيت مره اعرفها ضلي يمها فتره علما اشوفلج حل
رجعت راسي ع الكشن وهو يكول
_لاتشيلين ذنب الاطفال ماخذهم عربيد الكرايبهم
_انته وين تعرف عربيد وخوانه
_زوج المصون خولة بعد وين اعرفه العفو خطيبها اااخ ياخولة
_بعد الموضوع صار مابيدك شي يجوز الله يكتبلها حياة حلوة وياه
_شريد انا ماريد العاشت بجال ابوي ودلاله تنذل لو تتاذه
قطع كلامه وهو ينزل يم صيدليه ويكول
_نزلي وياي علمود نشوف حل الايدج وجهج
_خالد مالي خلك عفيه اصعد مو وكتها
_دنزلي طلعتي نخله براسي من كد ماتلحين
نزلت وياه مابيه حيل حته احجي
دخلت للصيدليه وهو يسلم ورا شوي لزم ايدي المحروكه وهو يراويها الابو الصيدليه
_شنو العلاج لهيج حرك
_المفروض اول مامتحركه تروح مستشفى وين جنتو عنها
_بعد ماكدرنه وهم عيونه شنو العلاج للتورم
عقد وجهه باستفهام ابو الصيدليه وهو يكول
_هذا صارله شكد هل ورم
باوعلي خالد ينتظر جوابي
_ب الاربعه ايام
_والنظر طبيعي
_اي اشوف
_خوية هاي لازم تراجع بيها اخصائي احتمال صاير احتباس سؤال بكل وجهه لان الورم بوقت قصير يختفي مو هيج يضل بس انطيك علاج استمر عليه اسبوع واذا مافاد ضروري تراجع اخصائي
انطا العلاج وهو يكلي الاستخدام بالي مو يمه
صعدت للسياره قبل خالد وهو يكلي
_باعي ايديج شلون متجرحه فوك الحرك والضيم هم عليهن تراب ودم ومو نظيفات شلون تركتيهن هيج افنان استعفرالله ياربي
جان يحجي بقلة صبر رجع كمل كلامه يكول
_نزلي اخذيلج كم قطعه ملابس من هذة المحل
_ماريد خالد عفيه اخذني وين ماتريد تاخذني مو بحال ملابس
_افنان نزلي فدوة اروحلج سطرتيني
نزلت بملل للمحل وهو ضل يم ابو المحل الي كاعد ع الحساب
اخذتلي دشداشتين بدون ما اباوعلهن بس اريد اشتري واطلع اخذتهن اله وانا اسئل ابو المحل
_خويه شوفهن بشكد يصيرن
شالهن خالد وهو ينطيهن الام المحل الجانت تفتر وتصور بل الملابس مبينه تنزل بيهن ع النت ماسمعته شنو حجه وياها لان يحجي بصوت ناصي ورجع كلي
_صعدي للسياره هسه اجي
عفته وصعدت شوي وطلع بيده علاليك ملابس
صعد بدون مايحجي وهو يسوق غمضت عيوني بتعب انتظر شوكت نوصل وكف وهو يكول
_يلا نزلي
_خالد منين تعرف هاي المره
_هسه نزلي
نزلت وراه وهو يدك الباب شوي وطلعت مره جبيره ب العمر حيل سمينه كوة تمشي وهيه ترحب ودخلتنه
دخلت البيتها البسيط واحنه نكعد ب الهول وهيه تحجي ويه خالد باوعتلي تكله
_منين هل بنيه وليدي
_خاله هاي افنان بنت عمتي صارتلها ظروف وماعندي مكان امن بي غيرج ماكدر اخذها وياي لبيتنه تدرين تصير مشاكل عائليه وحزازيات اريدها تضل يمج فتره بس علما تطيب انوب اشوف وضعها
ضربت باطن ايدها بظهر ايدها الثانيه
_يايمه سوده علي ومنو هيج ماذيها
_صارت مشاكل ويه زوجها وابوها واذوها خالة ماريدج تخليها تطلع اهتمي بيها الخاطري
كالها وعينه تفتر ع البيت
_بعيوني وليدي لاتوصيني
_خالة وين سحر
_نايمه سحر
هز راسه وهو يكوم كامت وراه المره وهمه يطلعون ورا شوي دخل بيده علاليك وعلاكه العلاج
_كومي افنان
_وين
_هسه كومي
رحت وراه للمغسله وانا بعدني مافاهمه هاي المره شتقربله اخذ ايدي المحتركه وهو يحطها ع المغسله فتح مغذي وهو يغسل ايدي كزيت اسناني بوجع
ماحسيت بوجع الحرك اله هسه ماجان بالي يمه اصلا باوعت الايدي فقاعات بيضه بس اكو من الفقاعات مفقوعات وبيهن دم ومعصم ايدي الجلد احمر مورم وايدي الثانيه اهون
وخرت ايدي من خالد بوجع تنزل دموعي شاغت روحي من الوجع حسيت تيزاب يحرك بيه
حط عليها كريم من عصار ولف ايدي التفتت على صوت بنيه وهيه تكول
_خالد ماكلت راح اجي
مسحت دموعي وخالد جر ايدي من وجهي وهو يحاجيها
_هلا سحر صارت جيتي فجاة بعدين احاجيج هسه راح اروح وانتي افنان لاتلزمين عيونج مايصير تتاذه اكثر باعي هذا الكريم قبل لاتنامين تحطين العينج وهاي القطره قبل لا تنامين ومن تكعدين وهاي الكريم مال الحروق استعمال يومي ماشي
كالها ولم العلاج بعلاكه وهو ينطي لسحر
_خلي يمج بالج عليها سحر بعدين افهمج ماشي
جانت تباوع باستغراب بنيه بعمري او ازغر ماعرف منين خالد يعرفها
طلع بدون مايحجي شي باوعت للبنيه اكلها
_اريد مكان انام بي
_اي حبيبتي تفضلي
كالتها ومشيت كدامها لغرفه فرشتلي فراش وهيه تكول
_ماتاكلين شي او تسبحين
هزيت راسي بنفي روحي تعبانه اريد بس انام واهدأ
حطيت راسي المخده بس صوت الساعه والضوا الخافت اليدخل من الشباك كمت فتحت ضوا الغرفه وانا ارجع المكاني
اخاف من الظلمه اخاف من اليالي العشتهن وانا اباوع من جوا الباب على اثر ضوا من المخزن النحبست بي مابي اي ضوا غمضت عيوني اراجع براسي كلشي صار مامستوعبه روحي انا اسوي كل هذا اشرد واسرق واترك اطفال وين انسانيتي ولو هو البذر عليمن يطلع اكيد انا بنت فائق عليمن اطلع مثلا
التفتت وانا انام على ظهري اباوع للسكف احجي بصوت واهن ودموعي نتزل على الجوانب
_مستحيل اكول كسرتني بنيامين لان بعدني ماطحت ونحنى ظهري لو مهما تسوي بيه بس محد كسرني كد جواهر رحتلها على عمى عيوني اساعدها الكاها ناصبلتي مكيده
....
تصويت
توقعاتكم
...