بقلمي زينب
تفاعلكم
.....
الرهبه الصارت بيه مو طبيعه صوت صراخ مياسين
بنتها الي اختفت جوا الماي لزمت مياسين المفرفحه روحها
جانت مثل المخبلة تصرخ بكل صوتها لزمتها من ايدها اصرخ وياها
على صراخنه اجو ولد ماعرفهم وبنيه تكلهم الطفلة طاحت ب الشط
مياسين تريد تفلت من ايدي تريد تشمر روحها ورا بتها عضتني بيدي حيل شوغت روحي احسها اخذت لحمه من ايدي بس ماعفتها نزلو ولد يسبحون ويدورون عليها
اجه عبدالله هو يركض من بعيد
اباوع الواحد من الولد بيده رفل طلع من الشط وهيه بيده مثل النايمه نهد حيلي من شفتها اجه بالي ضحكتها ولهفتها ع الشط قبل لاتنزل
حطها ع الكاع وهو يحاول يطلع الماي البلعته من حلكها اسمع واحد خابر الاسعاف جانت بعدهي عايشه
دقايق واجت الاسعاف اخذوها جان عبدالله يركض بيها مثل المخبل مايعرف دربه مياسين بس تلوم بروحها ودموعها ماسكتن
رادت تروح وياهم بس عبدالله ماقبل
باوعتلي وهيه تكول
_عايشه شفتيها اصيل عايشه رفل ماتعوف امها
كسرت كلبي بحجيها وكسرتها بصوتها
كال واحد من الواكفين
_خيتي عبدالله يكول نرجعكم للبيت
راحت وحده من البنات جابت عباية مياسين ودره وخالتها سمية تبجي على بجي مياسين حضنتها وهيه تبجي
اخذت درة من ايدها وانا لازمه ايد مياسين امشيها
صعدنه ب السيارة طول الطريق هيه حاضنه درة وتبوس بيها تبجي بشهكه
كال الي يسوق
_شلون طاحت
_تريد تنزل تغسل نزلنه وراها بس هيه دنكت وطاحت لان راحت بعيد عن امها تمشي ع الجرف
سكت بدون مايحجي شي
وصلنه للبيت لكينه امل ام مياسين واكفه ب الباب تنتظرنه بعدني ماداخله ورن تلفون مياسين جانت جنطتها بيدي
فتحت الجنطه اباوع للمكالمه جنت متلهفه على مكالمه تسمعنه اخبار رفل
فتحت مكالمه عبدالله قبل لايسمع صوتي كال
_ماتت رفل اخذت حيلي وراحت
بلعت غصتي وانا اباوع المياسين حاضنه امها وثنينهن يبجن بحركه بجيت على بجيهن ودموعي غوشت عيوني
_مياسين
التفتت علي والتلفون بيدي
هزت راسها وهيه تكول
_زينه
حجيت بشهكه وانا احضنها
_ماتت
صرخت بكل صوتها وهيه تكعد ب الكاع تدك على روحها
سديت باب الكراج وانا اخذ درة من ايدها حطيتها ب الكاع
لزمت ايدين مياسين الجانت تضرب بوجهه بوحشيه وحركت كلب لو مهما اكلها من كلمات مراح اخفف لو شويه عنها كلماتها كسرني وهيه تكول
_جبتهن بتعب عمري لاتكلولي ماتت عليج الله كليلي حلم انا جاي احلم مابيها شي رفل هسه تطلع من الغرفه نايمه هيه هسه تطلع ولج يمه جاي اموت يمه من الموت خذاني وخلاهن موش براحه ربيتجن بعد امجن موش براحه
حضنتها حيل اريدها تسكت بس هدأت بحضني بعدت عنها اباوعلها نغمى عليها بيدي نومتها ب الكاع وانا اضرب على وجهه وامل تذب ماي على وجهه طلع صادق ابن خالو احمد
وطلعن امه واخته شالها وهو يحطها ب السيارة راحت وياه امه وهمه ياخذونها للمستشفى رفعت درة من الكاع من الكاع وانا حاضنتها وابجي
دخلت بيها للبيت اريدها تسكت
حسيت طفه النور الجان ب البيت
رحت لغرفه مياسين وانا ابجي بقهر سويت البنتها ممه وانا ارضعها
بس رضعت نامت
اباوعلها صافنه بوجهه جنت اكل المياسين شلون من تشوفيهن تنسين ضوجتج وكلشي هسه شلون راح تخلص ايامها بدون رفل
دخلت امها واكفه ب الباب وهيه تحاجيني سولفتلها الصار وهيه تدك على خدودها
_كتلها لاترحين بس ماتسمع الحجي
_خالة هيه رفل جانت متحمسه للروحه بس تريد تروح راحت تركض للشط حته من منعتها مياسين
سمعت صوت نسوان برا عافتني وراحت دخلت خولة وهيه لابسه اسود لان توفه خالها وجانت بثوابه
حضنتني وهيه تبجي
_زغيره مياسين على هيج حياة
هزيت راسي ساكته باوعت الدرة النايمه وهيه تكول
_شلون اتحمل بعد ماشوف رفل يوميه وماتجي لبيتنه وتخبصنه ومياسين ماتعاركني علمودها يعني راحت بعد مشاوفها مجاي استوعب شي
مجرد تخيلت التحجي خولة نهاريت ب البجي حسيتني دخت من كد مابجيت
كل ماغمص جفن عيني يتخيلي رفل من تضحك وتركض وفرحانه طول اليوم هيه تحضنه من حضن الحضن غير عن الايام مو رفل الاعرفها كانو راحت لموتها وهيه فرحانه
نمت على رجل خولة وهيه تلعب بشعري
جنت اسولفلها كلشي صار وانا ابجي دموعي تطيح على ملابسها تمسح دموعي وهيه تحجي
اسمع اصوات خوات مياسين واخوانها برا صوت بجي ونحيب صوت نعى
رفعت عيوني الخولة اباوعلها
_اول مرا احضر عزا ماميت عندي احد يجوز لان جنت ماعرف لا خوال ولا قرابه بس ب النهايه فقدت اهلي كلهم جاي احس مثل الشعور من تفقد واحد من اهلك سبحان الله جان عبالك شعوره من يموت من راحت افنان حسيت روحي تنقبض وهسه هم
مسحت عيوني وهيه تكول
_اهم شي عايشين يجي يوم وتسمعين صوتها وتحضنيها على الاقل اكو امل تشوفيهم
سمعت صوت مياسين وهيه تبجي برا
طلعنه للهول لكيتها كاعده بوسط الهول واختها حاضنتها ويبجن سوا
بعدت عن اختها وعيونها وارمه من البجي وهيه تكول
_عبدالله ماخلاني اشوفها ولج يمي ب المستشفى وماتشتم الهوى الاشتمه
التفتت على امها وهيه تكول
_كليله خل اشوفها بس هل مره يمه عفيه كليله
حضنتها امها تهدي بيها حجت بصوت مكسور مسموع
_بعدهي ترفه تنام جوا التراب شلون لو نمردت روحها جوا الحر شلون لو صاحتني ومالكتني يمها شلون لو فزت خايفه تريد امها بعدهي زغيره والله زغيره بعدني ماشبعت من ريحتها بعدني ماحطيت بيدها كتب ودرستها بعدني ماشبعت من لفظ اسمها شلون اكول يم اسمها الله يرحمها
قبل ساعات هيه بحضني تلعب وتضحك وتعاندني قبل شوي هيه يمي هسه تردون تاخذونها من حضني يمه حني عليه وخليني اشوفها
جانت تحجي وتربط مواضيع وهيه فاقده بالحجي والدموع
جان عبدالله واكف ب الباب يباوعلها هو واخو عزيز بس ماشافته منزل راسه وهو يمسح بوجهه
كعد وراها وهو يحضنها بس شافته شهكت وهيه تكله
_وينها عبد وين رفل شفتها من اخذتها للمستشفى ماسألت علي مافتحت عيونها ماصارت زينه
هز راسه بلا وهو حاضنها همس باذنها حجي خلاها تنهد ب البجي كام ورفعها من الكاع لف حجابها على راسها وبعيونه لمعه دموعه لبسها عباتها وهو يمشيهه وياه
اخذها وطلعو هو وخوانه وخالد وماجد
امها كالت راحو يدفنوها
دخلت لغرفتها لكيت درة تبجي وماتقبل تسكت مهما حاولت وياها
طلعت شال من امها وحطيته يمها يلا هدأت ورجعت نامت نمت يمها وكل شوي افز كل مايصير صوت بجي ب البيت
جانت دنيا ليل وطول ما انا نايمه افكر بمياسين افكر بيها شلون راح تعيش باقي ايامها
طلعت اغسل الدرة غسلتها ولبستها وهيه تناغي واسمع ام مياسين تحاجي بناتها مانعه احد يفوت للغرفه ويلعب بغراض مياسين حته جهال بناتها
لنص الليل وانا ماكدرت اغفه حركه بعيوني ونعاس بس انتظر مياسين
طلعت ليبرا باوعت للساعه ب الوحده ومحد رجع
رجعت لغرفه مياسين نعسانه حطيت راسي يم راس درة توني غافيه
وحسيت احد فتح الباب وكعد وراي و ايد تلعب بتراجيي فزيت مرعوبه وانا اتنفس سريع شفت عبدالله كدامي حجه بصوت مبحوح
_عذريني كعدتج
حاجيته بلهفه اسئل على مياسين
_وين مياسين رجعت
ابتسم ابتسامه حزينه وهو يكول
_واخو مياسين مايهمج
بلعت غصتي ماريد ابجي وانا اشوف وضعه مبين شكد تعبان ملابسه مخربطه وبيهن تراب وعيونه حمر
لزم تراجيي وهو صافن عليهن حاجيته
_جانت خايفه لاتضيع التراجي تالي ضاعت بنتها
دنك عليه وهو يبوس التراجي من الاذنين كزبر جسمي من قربه حجه بذاني
_لاتنزعيهن ابقي بيهن بيج جزء من براءتها وبياضها ونقائها ابقي ذكريني بيها
جاي يحجي وحسيت بدمعه طاحت على جتفي
بعدت عنه اباوعله اول مره بحياتي اشوف عبدالله هيج منكسر مسح دموعه وهو مدنك راسه
_ديري بالج على درة
_ومياسين
_ضلت يم بتها
كالها وطلع مافهمت شنو يعني ضلت يم بنتها طلعت وراه لكيته واكف يم المغسله ويمه خالد
_بايته هنا
_اي يم درة
_مياسين يمته ترجع
جان متجاهلني يغسل راسه جوا الماي
_ضل يمها عزيز ماقبلت تعوف رفل الله يصبرها بس
رجعت للغرفه على اثر بجي درة
رضعتها اريدها ترجع تنام بس جانت كاعده وتلعب ضلت كاعده وانا صافنه عليها
شويه ورجع دخل عبدالله مغير ملابسه والبيت صنطه بس درة تناغي
رفع درة من سريرها ونام على سرير مياسين ودرة على صدرة شمها وهو يحاجيها
_ياحيل خالها
حطت ايدها بعيونه وهيه تضحك نومها يمه وهو حاضنها لحد ماغفت باوعتله مغمض عيونه ردت افتح الباب بس مقفول يمته قفله ليش ما انتبهت عليه
حجه وهو ساد عيونه
_وين ترحين
_زحمه بنص الليل وحدنه بغرفه شتكول علينه خاله امل
اشرلي بيده بمعنى تعاي
_تنطيني الفتاح
_تعاي اخذي درة لسريرها
رحت اخذت درة النايمه على صدرة لمكانها غطيتها وانا اطفي الضوا
_تعاي
_اريد اروح انطيني المفتاح
_هذا المفتاح بجيبي من اغفى اخذي وروحي
جنت دايخه ونعسانه حته مابيه احاجي كعدت يم الباب انتظره يغفه
باوعلي وهو عاقد حواحبه
_شبيج شاردة
_اتتظرك تنام والله عليك سوالف انطيني المفتاح اروح
_برا الولد محد نايم ماتطلعين لحد ما اغفه ولا تطلعين من البيت روحي يم امي نامي
حسيته جاي يخنكني بحجيه
_خوش نام يلا
غمض عيونه مكتف ايده وهو ناطي ظهره للحايط وصاير وجهه على جهتي
سندت راسي ع الحايط مغمضه عيوني كل شوي وطاح راسي من اغفه اباوعله يثاوب ومغمض بس مانايم ماعرف شلون نمت وانا كاعده بس فزيت على ايد وهيه تشيلني باوعتله عبدالله وخرت ايده من ظهري احاجي
_شبيك عبدالله وخر
حطني ع السرير وهو يغطيني وكاعد يمي رفعت الغطه غطيت وجهي والتفتت ع الجهه الثانيه حسيت بي تمدد بصفي وانا ماضلت ايه قرانيه ماقريتها من الخوف ولازكه روحي ب الحايط شحجي وياه بهاي اللحظه وانا ادري لومهما حجيت مايسمعني
رفعت الغطه من عيوني اباوعله غافي بطرف السرير مديت ايدي على كيف اخذ المفتاح من جيب بنطرونه اخذته وانا اكوم على كيف
غطيته وانا اباوع الملامحه نسخه من ملامح مياسين عبالك تؤام هو وياها نفس الرموش الطوال نفس الشعر الاسود بسواد الليل حته مياسين رغم بنيه بس ضخمه باوعت للمحبس البيده شذرة بيضه مستحيل ينزعه حته خالد لابس نفسه بس ماعرف شنو قصته
فتحت الباب وانا اخذ درة واطلع يم ام مياسين لكيتها تخابر بغرفتها ويمها ميسون بنتها من شافتني سوتلي مجال يم اطفالها وهيه تكول
_تعالي نامي هنا ردت اروحلج بس امي ماقبلت سكتت يمج درة
_اي سكتت بس اجه عبدالله يريد ينام بغرفه مياسين وطلعت
_ها زين سويتي تعاي نوميها هنا
حطيتها بصف اطفالها ونمت يمهم اسمع خالة امل تحجي ب التلفون
_يمه لاتخليها راح تموت ورا بتها للفجر ورجعها ولك مو زين عليها نومت الكبور يم بنتها
شوي وسدت الخط سألتها ميسون
_شبيها مياسين
_ماتقبل ترجع يكول عزيز نايمه يم الكبر مثل المسودنه
نمت على اثر حجيهن ماعرف شكد مر وقت بس كعدت محد يمي ولا درة والضوا طالع طلعت برا لكيت غرفه مياسين مفتوحه وبيها خواتها دخلت عليها لكيت مياسين نايمه على رجل عبدالله ولازمه بايده حيل ومغطيه راسها ببطنه
همست يم خوله الي توزعلهم جاي
_شبيها مياسين
_ماتقبل تشيل راسها من حضن عبدالله مدري ليش
جانو كلهم ساكتين انتبهت المرت خالو محمد كاعده ب الهول وانا جنت واكفه يم باب غرفه مياسين تباوعلي من فوك ليجوا بنظرات كانو معاجبتها
اشر عبدالله الاخواته يطلعن من الغرفه وطلعن ردت اطلع وصاحني
_اصيل سويلها ريوك
رحت للمطبخ لكيتهن مسويات ريوك حطيتلها بصينيه وصبيت جاي واخذته الهم ب الغرفه حطيت الاكل يمها وعبدالله يحاجيها
_كومي اكلي لخاطرها لو انتي بمكانها تقبلين هيه تسوي بروحها هيج
رفعت راسه تباوعله وهيه تحجي بصوت مبحوح تعبان من الصريخ
_اخذني الها
_اكلي واخذج والله اخذج بس صبريلي كم يوم
كامت من رجله وهيه تكعد يمه دنيت الصينيه يمها وابد مارفعت راسها عبدالله رفع الشعر من وجهه وهو يشده بقراصتها
اباوع العبدالله واباوعلها شكد بي حنيه عليها لو مهما يسويلها يحس نفسه مقصر باوعتلي قبل لا تاكل وهيه تركز على التراجي نزلت عيونها ع الصينيه تاكل
جان عبدالله يسويلها لفات ويشربها جاي جبت درة من سريرها توا كاعده
مدلي عبدالله لفه بيها جبن
_ما اشتهي
_اكلي
اخذتها منه وانا اكل
اشرتلي مياسين على درة
حطيتها بحضنها وهيه تشم بيها مغمضه عيونها وتكول
_جم عزيز اليحلى بعيوني فكدته
ذكرتني بقصيده باسم الكربلائي جانت حيل تحبها هاي القصيده كملتها وهيه تكول
_والاريده يازمن مني اخذته
خلت درة بحضنها وهيه صافنه عليها وتبجي
_ضلت روح ابوجن بيجن لحد ماخذها مني الموت
باوعت العبدالله وهيه تكول
_من وراي ماتت انا ما انتبهتلها زين ضاعت من ايدي بلمح البصر
مسح دموعها عبدالله يحاجيها
_صبري بس صبري ادري خسارتج مالها عوض بس انتي عاقله ادري بيج مؤمنه بقضاء الله
ضلت دموعها تصب جر نفس وهو يكول اشرلي اكوم ورا طلع من الغرفه باوع للهول كلها كاعده صعد الغرفته انتظرت شوي وصعدت فوك لكيته ينتظرني بغرفته
بس دخلت حجه
_باعي اصيل ماتعوفين مياسين الوحدها ولاتخلين اي وحده من خواتي تحجي عليهه انا يمها وبكل صلافه يلومنها ليش هملت بنتها اي وحده من الجايات والراح يجن ماريد يسمعنها حجايه وكتها احاسبج انتي
_لا ماخليها وحدها
_جيبي تلفونج وفعلي برامج احاجيج عليهن لبسي حجابج ولبسي اسود ماحاجه اعلمج
_ماشي هسه اروح عبدالله شعجب زوج مياسين لهسه ماكو اله حس
صفن بوجهي واردف
_ليش تسألين
_مادري يعني فضول مو اكثر التوفت بنته وهو ماكو
جاوبني وجان جوابه صدمه ثانيه ب النسبه الي
.....