تصويت
تعليق بين الفقرات
....
ضيقت عيوني باستفهام اباوعلهم
منين هذول الوياه اجه كدامي بنيامين وهو يكول
_تكدرين تساعديني بشغله
اخذت الطفل من ايده احاجيه
_شلون تشيله وجرحك بعده اخضر استغفرالله ياربي ماضن يجي يوم وافتك منك
_ماتفتكين ارتاحي
_نشوف استاذ بنيامين
ركزت نظري ع البنيه الوراه رفعلي حاجبه بحركه استفزتني حيل حسيت فائق واكف كبالي درت وجهي منه استغفر
_تمكيجيها مكياج عروس وتسوين شعرها
باوعتله بصوت ناصي اكله
_احد كلك اشتغل عندك بعدين منو كلك اعرف انا
_جنت اشوفج وانتي تطلعين من الصالون بعد ماترجعين من الجامعه
فتحت عيوني مصدومه من حجيه
_سدي عيونج ستري علينه
تذكرت خالد من اخزره وهيج يكول يخليني اضحك
_هيه هاي اخلاقك شتوقع منك مثلا
_المهم تسويها وجبتلج هاي الجنطه بيها الغراض
_تعبانه مالي خلك
_مو انا الدازها فائق دازها ومحاجه اكلج شيسوي
_هيه شتصير الفائق منو هاي البنيه الجابيها الي يوم عيد الناس كاعده وساكته اكو احد يعرس اليوم
_مرت ابوج المستقبليه
نزلت الطفل ب الكاع من صدمتي
دخل للغرفه دخلت وراه طكيت على خدودي احاجي بحركه
_صخام صخم فائق ولك شيتزوج منها هاي اصغر اطفاله يمه كزبر جسمي عيع شلون تقبل امشي اطردها ماريدها هنا
_ماحاجه اكلج شيسوي بيج
صيحت بكل صوتي
_جايبلي الك***وتكلي تعاي سويها مو ميري الخلفوكم انا عشت عمري انظف بوجوه النسوان وبشغلي وكرامتي وتالي تجيني هاي *** اسوي وجها المعنفص
عفته وطلعت اصيح عليها
_امشي طلعي برا بيتنه مايستقبل امثالج
ابتسمت ساكته بينه ماهتمت اصلا مارفلها جفن وانا ارجف واحجي
_هسه انتي شخسرانه افنان سويها وسكتي
_والله ماسويها ختطلع منا
بعد صوتي العالي حجيت هاي حجايتي بصوت ناصي مستهضمه
دنك المستواي يحجي وياي
_مو جنتي تشتغلين بصالون ويجنج بنات تسويهن هم جنتي تعرفين الزين ومو الزين ماتعرفين اكيد تشتغلين ينطنج اجرتج ويرحن هاي هيج سوي افنان لخاطري ماضل شي صاحي بجسمي راح يضربج فائق واضطر ادافلج مالي خلكه يضل يهذي فوك راسي
طاحت دموعي باسى اباوع بين عيونه
_خيكتلني بلكي بطكه من طكاته اموت بيها لاتدخل نفسك خليك بعيد عني
_تتوقعين خوانج يسكتولج لو كتلج راح يطكج وهمه
مايقبلون وتالي تنكتلين انتي وياهم
_انا مو حيوانه انا بشر ليش انكتل ليش الي ب العراق ينكتلون وتعرضون العنف عادي لو بغير دوله جا لكيتني هيج
ابسط شي اكدر اروح للمركز اشوفهم اثر الضرب ويسجنونه بس ياقانون عدنه يمشي عليه هيج اذا تدخل للمركز وتشكي للضابط يضل يضحك عليك يكلك عدنه طلايب الدنيا مافارغيلك
سكت عن كلامي انوب كال
_لخاطري اعتبريها معروف لان ماخليتج تتاذين الصبح
مسحت دموعي وانا اكله
_ترا انته ماعندك يمي خاطر وماشتهي اشوفك مو انوب لخاطرك بس حسويها لخاطر خواني ماريد يجيهم فائق يصول ويجول انشالله يشوون على ذانه بصل بنار جهنم كول امين
كال امين مبتسم صحتلها من ورا خشمي
_تعاي للغرفه
دخلت وراي وبيدها الجنطه وطفلها يمشي وراها
جانت لابسه بنطرون وقميص حيل ضيكات والشعر مفتوح شعرها كلش طويل
بديت اسوي بوجهه وانا ماشتهي اباوعلها شتوقع من وحده تقبل بفائق وخيسته
ردت احط الضلال بس ماعرف يالون تلبس سألتها عود عساني ماسألتها
_يالون راح تلبسين
_يعني العروس شتلبس
كالتها باستهزاء اجيت امرعد وجهه البيدي جاوبتها بنفس استهزاءها
_مادري العواهر بعرسهن يلبسن ابيض لو شيلبسن
توقعت حكتوم تعاركني على ردي
بس جانت ب العكس تنعوص بصوتها
_عيني هسه اجي وبعدين كملي شغلج الليله ليلتي ماريد يخرب مزاجي
كلتلي هيج لو شعوطتني بس مابينت الها
طلعت ب الهول تخابر كلت هاي هيه كلت الفائق يعني اليوم اروح بيها
دقايق ودخلت كعدت ع الكرسي كبال المرايه ودخل وراها بنيامين بس يخزر اشرلي براسه عليها بمعنى كمليها وهو مكتف ايديه وساند نفسه ع الحايط سكتت لان ضل موجود
ضليت اسوي بوجهها الا ان وصلت لشعرها رادت اكصها الها من الاطراف جبت المكص وانا ناويه ابتره الها جان شعرها جوا وركها حطيت المكص ليم كتفها وانا اكص بشعرها وهيه تحاجي ابنها مندمجه الى ان التفتت ع المرايه بعدني اكص بي وصرخت
_يممممه شعري شسويتي بي شعري وين راح
من عصبيتها حته وجهه صار احمر
حاجيتها بهدوء
_انتي ردتي اكصه
ضرب على كصته بنيامين وهو يصيح
_والعباس تستحقين اموتج هسه
كوه كاتمه ضحكتي ااخ واخيرا كسرت شوكتها جانت شايفحه روحها علي
لمت جنطه مكياجها وطلعت مدري المن خابرت يجي ياخذها وطلعت تحجي علي ومحتركه على شعرها
ضل المكص بيدي افتح بي واسده بس طلعت طكيتها بضحكه من كل كلبي وانا اتذكر شكلها جانت تتامر سويلي
هيج تسريحه وهيج
صاح علي بنيامين يريد اسكت
_انتي رعنه ثوله شلون هيج تسوين
_اول شي خل تتستر بنت الفكر انوب تجيني على ابو انا اشتعل بصالون تتامر علي خوش توبتها الليله فائق يطلكها لان كصيت شعرها الحلو
كلتها ورجعت اضحك كل ماتذكر شكلها اشبع ضحك اجه مهدي يضحك على ضحكتي ويريد يسكتني مايعرف شلون
اخر شي ضليت احمحم كوة سكتت مدري ليش اجتني نوبه بجي وطاحت دموعي بالنهايه ضليت ابجي بكد الضحك الضحكته حضني مهدي وهو يكول
_انتي صدك شخطتي
_هو الي يكابلكم مايشخط
كال بنيامين الي جنت متجاهله وجوده
_هسه شيفكنه بلا
مسحت دموعي واحاجي
_على حورها قلت نسوان هسه لاتخاف فائق يضيعله وحده يلكه الف
باوع مهدي ع المكص وكال
_اصيل بعدهي تبجي اذا كصيتي شعرج
_كل مانتعارك اكص شعري علمود ابجيها
_بعدهي من تطلع للشارع تعارك ويه الجهال وانتي تعاركين ب الجيران علمودها
كعدت ع الكرسي واخذت ايديه حطيتهن على جتافي خليته يدلكلي جتافي طلع بنيامين وانا احاجي مهدي
_اصيل بسنه كبرت هواي تدري هناك بيت خالو احسان ماجنه نطلع عندهم محد يطلع حته للمحل فقط اماكن عامه اله احد يطلعنه او سوك او طلعه كرايب اصيل تحجبت من شافت صار هواي يلوموها ويحجون على امي صح حياتنه بيت خالو جانت رفاهيه ومريحه بس خنكه تصدك هسه من شفتكم احسني صدك عايشه حته الخنكه راحت مني
_شكد مشتاق الاصيل
_عود صدك فائق ليش ماجابها هنا
_يكول هاي مو بنتي
_هاي شله بيها
_اندري من حاجاه مهيمن كله ماتجيبهن يكله اجيب افنان غصب عنكم وهاي اصيل خليها يم امها بلكي تمل منها وتنطيها الابوها
_منو ابوها غير فائق
_اصيل هذا فائق يمسلت يكللنه هاي مو اختكم هاي امكم مدري منين خلفتها وجابتها تكلي بتك وهيه بت حرام
وكفت كباله متفاجاه من كلامه لهل درجه واصل بي الموضوع يتبلى على بنته
_وانت صدكته
_شصدك منه هل مكبسل تلكينه طاك البيرا وجاي يهذي
صابتني لحظه صمت من كلامه وصدمتي من كعدت لهسه صدمه ورا صدمه احس عقلي ياذيني من التفكير
مرت ايام واحنه بس نحسب عددها مثل يوميه ناكل وننام بعد لا شفنه ابوي ولا شفنه بنيامين مرت ايامنه بصعوبه حيل يوميه انا اتمنى اطلع منا بدون خساير اكثر اتمنى اطلع بدون ماخلي ابوي ورانه يسرح ويمرح
ورا اذان الفجر جنت اصلي بدون تربه لان من اجيت لهسه لاتربه ولا قرأن ب البيت
خلصت صلاتي وانا اكعد مهيمن الي ضليت احاجي هواي حتطيب وتتعالج ترجع طبيعي بس اتحمل شوي جان شوفت اليأس بعيونه تهد حيلي
طلعتله ملابس وهو يسبح خلص وينتظر بنيامين يجي بس بنيامين صار الصبح وهو ماكو جنه كاعدين
فزينه على طبكت الباب قوي طلعت من الهول صار بوجهي بنيامين دخلني للهول وسد باب الهول قفله واخذ المفتاح وكف كوة ياخذ النفس
_شبيك بنيامين
_لحد يطلع حته من باي الغرفه لاتطلعون واذا لكيتوني مو يمكم وصار شي ضمو نفسكم
خوفني حيل من كلامه
_ترا جاي تخوفنه شصاير
راح للمطبخ وهو ينكث بملابسه ومهيمن راح للغرفه يم مهدي وهو يكول
_بنيامين مايرتاح اذا مايموت
دخلت وراه احاجيه
_منو راكض وراك حته هيج خايف
باوعلي بنص عين ساكت تجاهلت نظراته اكله
_مراح تاخذ مهيمن للمستشفى
_ماكدر اليوم
_بس شلون اليوم لازم علاجه
طك ايد بايد وهو يكول
_والله ياست الحسن ماعندي ولا فلس احمر اله هيج اكلج ضال ادور شغل منا ومنا رحمالله والديك شغلني
_ااايباخ من يمته ماعندك شغل وشغل فائق ليش مالازمه انته
زفر نفس وهو يكعد ويسند راسه ع الكاونتر
_تعيت تعبت فوك ماتتصورين جان محل حداده اشتغل ويه صديقي ومات صاحبي بعد مالي واهس ب المحل هسه وين اولي اجيبلكم اكل حرام لو اعالج اخوج بعلاج من فلوس حرام
تذكرت الفلوس الي نطتنياهن امي قبل لا تسافر عفته بالمطبخ ورحت جبتهن مدري شجنت افكر من سويت هيج مافكرت بشي غير علاج مهيمن مافكرت هاي الفلوس ممكن مستقبلا احتاجها
رجعت بللمطبخ بيدي الفلوس مديتهن اله اكله
_اخذهن
_رجعيهن احد كلج محتاج انا
_لا خطيه ماحتاج منو دك اليتميه توا ترا عادي هو اخوي فخذهن
_دمشي ولي من خلقتي اذا كلج ماكو شغل وماكو فلوس مو يعني نطيني يعني صبريلي ادبرلي شغل هل يومين واكدر اصرف منه
قبل لا اجاوبه طلع تلفون يتصل وهو يكول
_جرثومه دير بالك من ميمون يحوم علينه هليام
سكت ورجع كال
_جاي اكلك مايقبل بشي لو اخذ روحكم لو الله ياخذ روحي وتخلصون مني
_ماكدر اطلع اليوم
_غير من يومين سياره تراقبني ومن اجيت لكيت سياره كبال البيت
_خيولي هذا داهيه الكلب صدك داهيه محد ورطني غيره هل حيوان بس بسيطه اعبرها اله عبالك
سكت ورجع سد التلفون رجعت مديت الفلوس انطيه
_اخذهن لمهيمن مو الك
_كتلج روحي من خلقتي
_مو بكيفك تاخذهن غصبا عليك
_شوفي احترمتج هواي روحي طالعه فروحي منا احسلج
_طلعنه منا بنيامين عفيه
سكت ماعنده كلام يجاوبني بي بعد ماقاطعت كلامه بهيج حجي رجع بنفس هدوئي يحجي
_وين ترحون
_مكان بعيد منا محد يندلنه بي
ابتسم بطرف شفته يحجي
_طفل وماعرف شي وكعت بيد فائق عبالي يحبني سنيني خلصت بهل قذاره وماتنلامين من تكليلي القذر لان انا فعلا هيج حاولت وحاولت اطلع بس مردودي هنا جان تردين هسه تطلعين هاج المفتاح اخذي خوانج وروحي وابوك الله يرحمه لا اعرفكم ولا تعرفيني بس تعرفين البرا شنو منتظرينكم احر من الجمر تمدون راسكم من الباب عبالهم فائق ميت عليكم وضامكم عنهم مايدرون عنده انتم والماكو سوا مراح اكلج ابوج ويحبكم ويموت عليكم وغريزنه طاغيه عليه وتحملوه وراح يتغير ب العكس اكولها بوجهج قائق بشع فوك ماتتصورين والي سووا ب الناس كله راح يرجع عليكم كلها كارهته وانا بوسط دوامه جبيره على اي يوم اخسر نفسي واذا اجه هذا اليوم اريدج تعوفين الثول العندج وتتصرفين مثل البشر
يحجي وانا صافنه علي كباله طابكه رجلي على بطني ولافه ايدي عليهن شكد نقهرت منه وعليه
_شلون اتصرف
_لاتصدكين باحد لو حطلج الكمر بيد والنجم بيد شايفه امج شكد تحبكم بس هيه نجبرت تسافر مو حبا ب السفر مو لان امنيتها تطلع من العراق بس فائق دمرها يتهديداته رغم مناوي يسوي شي بس يلعب باعصابها وقرر يلعب باعصابج مثلها ويجرجرج ويزوجج ويبهذلج ماكول كل هذا علمود اكبر بعينج لان جبتج هنا بس انتم مثلي نحطينه بحياة مو النه موقعنه غلط هنا واذا نرجع ع السبب نلكه اهلنه السبب
ماعرف ليش جان يحاجيني كل هذا وبجمود كانو كلشي سهل عليه
_شراح تسوي هسه
_نتنظر الله ياخذ امانته
_واحنه
_شبيكم انتم
_اذا رحت انته احنه وين نروح انته الجبتني هنا وانته تطلعني منا
هز راسه ساكت وانا القهر ياكل بينه
_بنيامين مامعقوله ماعندك احد تعرفه يساعدك
جان ساكت ميجاوبني باي شي
_بنيامين جابني ليش حاجيتني وسكتت
_لا عبالج انا زين واكدر اساعدكم وتحطين ثقتج بين ابقي حاولي ب الي اجيتي بي حاولي تتخلصين من فائق انا مو كد الثقه
_انته جاي تكول هيج علمود ما اعتمد عليك بشي مو جاوبني بنيامين مو
هز راسه باي وسكت
حطيت راسي على رجليه ودموعي تصب وحدها باي ذنب يصير بينه كل هذا
_ليش احسك تعرف اشياء عنه احنه مانعرفها ليش احنه عايشين بجهل عن كلشي مستحيل اي لحظه احاجيك وما انصدم من كلامك
جنت ارجف واحجي بين دموعي وهو ساكت سكوته وهدوءه خلاني اصيح من كل كلبي وانا اكوم من يمه
_انته شنو من بشر احاجيك ساكت منين تكدر تجيب هل هدوء وبرا الله اليعلم منو ينتظرك علمود يخلص منك وبكل ثقه حاطنه بيتك عود مامن علينه اخذني نعيش يم ابوي بنيامين جزاك الله الف خير ماقصرت هسه نكدر نروح احجي مو احاجيك
جنت مفرفحه ب البجي واصيح عليه اريد بس ينطق بشي يهدء روحي
اخذت المفتاح الحاطه ع الكاونتر وانا اطلع لبست جبتي واحاجي مهيمن ومهدي الي توا كاعد من النوم
_اذا تردون تضلون يمه ضلو انا رايحه
_انتي مسودنه ترحين هو بنيامين مايكدر يفلت بنفسه منهم تردين ترحين
_اخذت تلفوني ضميته بصدري وحطيت الفلوس الهم ع الميز واخذتلي كم فلس وطلعت
جانو يباعولي بدون مايحجون شي ودموعي تصب محد بيهم كلي ضلي محد بيهم منعني كانو عارفين انا نهايتي هنا
تصويت