بقلمي
زينب
....
تصويت تعليق بين الفقرات
ليش ماكو تفاعل حته مالي خلك اكتب شي
....
التفت علي وهو يهمس بوجع
_شسويتي
طلع السجينه من جتفها ولزم معصم ايدي وهو يحط السجينه بيدي
_روحي منا
ضليت مصكوره بمكاني وهو حط ايده على مكان السجينه وبايده الثانيه فتح تلفونه وهو يخابر
_داهيه تعال للبيت
_اخذ ابن فائق اله يريده
_مادري وين خابر فائق ويدليك المكان
سد الخط وانا اشمر السجينه ابجي واحاجي
_انته ماتفهم اكلك ماريده يروح ليش ماتفهم
_بيج خير طلعي خبالاتج على ابوج مو شايفتني ساكت الج
_سليمه تطمك انشالله ياعار هو لو بيك حظ جا ماطلعت بطريقي
تجاهل كلامي وهو يمشي للمغلسه نزع تشيرته وهو يلفه ويحطه على مكان الضربه وكفت مقابيله احجي صرت بينه وبين المغلسه
_بنيامين قنع قائق حاجي خلي يعوفنه هسه انتم شمستفادين من عدنه
صاح بيه بصوت نززني
_وخري من وجهي فوك سواتيج جايه تلطين
بعدت عنه واسمع صوت ب الهول يصيح
_لكم وينكم
قبل ليجاوبه بنيامين كلي
_روحي منا اذا شافج داهيه الي تصرف ثاني وياج
مسحت دموعي وانا اكله
_انعل ابوكم يابو داهيه وياكم
اريد اطلع صار بوجهي داهيه
عبرته بدون ماهتمله وانا اروح للغرفه لكيت مهدي واكف يم الباب ينتظرهم
دخلت على مهيمن الي صافن وبعده على وضعه
نمت يمه وانا اغطي راسي وابجي جوا البطانيه
رفع الغطا يكلي
_مايفيد البجي خيروح
_راحت روح فائق انشالله ماداخل للبيت ومصايبه فوك راسنه
اختفه صوتهم وكال مهيمن
_جوعان اريد اكل بس خاف اتقيا
_لازم عندك علاج مال لعبان نفس
_اي عندي
_جا اكوم اسويلك عشه
طلعت من الغرفه لكيت بوجهي بنيامين وبعدهي ايده ع الجرح
ردت اروح للمطبخ وكفني يكول
_سويتي سوايتج ودرتي وجهج كلفي روحج تضدميني
_اضمدلك سم احطه فوك الجرح بلكي تموت واخلص منكم
ضحك بصوت وهو يكول
_خوانج شافوني وحبوني حته انا حبيتهم حسيتهم مثل اولادي بس الخلل بيج اذا مامتقبلتني مو بيه واكبر دليل عيونج وارمه من البجي انتي تردين تفوزين على فائق بس ماتعرفين شلون
جان كاعد ب الهول وكفت وراه وانا الزم جرحه انو اشوف جرح بهيج عمق واشوف دم مو جديده علي لان هذا شغلي وتدربت هواي بمستشفى وعيادات ماره علي هيج حالات
حطيت ايدي ع الجرح اضغط علي واحاجيه
_روح للمستشفى هذا مايفيدها ضماد لازم خياط
رفع راسه وهو يباوعلي
_شيسمونها هاي مال دجيني بسجين وترجعين تباعين بوجهي ليش هيج عينج كويه
كعدت كباله مركزه بملامحه الي مبين التعب عليه
_من اجيت لهنا وانا ماعرف نفسي كلشي مستعده اسوي الحقد والخبث طاغي علي
_جربي تلعبين بذيلج لاتشوفيني ساكتلج ترا كلشي بمزاجي
اريد احاجي وندفع الباب دخل داهيه يركض باتجاهه
_كوم بسرعه اخذك للمستشفى
_روح داهيه المن رجعتلي كتلك كلشي مابيه
كالها ورجع باوعلي ياشر براسه اروح
ضليت على كعدتي وحته مالتفتت
_كوم حبوبي مابيه حيل اتوسل
كمت من كدامه وانااخذ تشيرته من ايده وامسح مكان الجرح بدون ماحاجيه رحت ادور على كطن واسمع داهيه يحاجيه
_هذا فائق وين ضام هل حسن عنه
_وين ضامها ماتشوفه حطها بنص بيت متروس شباب مامتهم ما كانو بشر من لحمه ودمه
استوقفني كلام بنيامين انا بنص بيت بي ناس ماعرفها شباب تدخل وتطلع ماعرف منين همه وشنو موقعي بينهم وهيج عندي الموضوع عادي وبكل ثقه كاعده بنصهم مجاي اعرف روحي
عفت افكاري وانا اكص وصله من دشداشتي الي جبتها وياي
التفتت على مهيمن الرجع نام طلعت غسلتها ورحت مسحت جرحه لكيت داهيه مكباله وكاعد
باوعت للجرح مو عميق سطحي بس يصب هواي دم
_دبرولي خيط جراحه
_هيه ايدج علاج بعد المن خيط
رفسه بنيامين يصيح عليه متوجع
_روح جيب التريده ماتشوفني ميت وجع
كام داهيه طلع بدون مايحجي نترني بنيامين من ايدي يقربني اله يحجي
_ترحين تقفلين الباب من يجي المسودن تاخذينهن منه وترجعين تقفلينه ماتدخلينه فاهمه
جاي يحاجيني نزل الحجاب على صدري ورجع نتر ايدي يبعدني عنه
ضغطت على جرحه الي لازمته حيل صاح متوجع كتله
_مو اشتغل عد الخلفوك تنتر وتتامر ترا اكتلك وامشي بجنازتك
دفعني عنه متوجع يحجي
_صلفه وبحقارتج ماشايف اعرف البنيه رقيقه تخاف من الدم من هيج جرح تخنس لو احد حاجاها بس مصيبتي تكتلني وتمشي بجنازتي شكد ماره علي مصايب مثل هاي المصيبه ماشايف
_وراح ابقه مصيبتك طول حياتك اذا ماطلعتني منا انته جبتها الروحك
_امشي امشي من جهرتي
كالها وشمرلي المفتاح
اخذت المفتاح انتظر داهيه
دك الباب فتحته وانا امد ايدي انتظر ينطي العلاكه مد راسه من الباب مبتسم ويحجي
_وتاهت عيوني في بحور عيونها
واختار قلبي ان يغوص فيغرق
اواه من رمش احاط بعينها
سهم توغل في الوريد فتمزق
قاطعته اصيح علي
_هييي نكلع منا ماناقصينك انطيني الغراض صخام قباني
_والعباس انتي مو بشر اكو بنيه ينكالها هيج شعر وتصيح
اخذت العلاكه من ايديه وانا اسد الباب بوجهه
ذكرني بعبدالله ومياسين من يحلفون كله والعباس
طلعت الغراض الجايبهن وانا اكعد كبال بنيامين
طبعت المعقم والمكص والخيط
مسحت ظهره ب المعقم رفع راسه قلقان
_تعرفين تخيطين
_اي
_بس انتي ماتدرسين هيج شي شلون تعرفين
_وانت وين تعرفني شدرس
سكت وانا امسح بظهره كل ماوخر الدم كل ماتبرز جروح قديمه بلعت ريكي من خوفي من منظر ظهره جرح على طول العمود الفقري وبكتفه الثاني مثل الحفره
حاجيته بهمس
_لاتحني ظهرك اسنده علمود ماتتاذه ب الخياط
جانت ايدي ترجف وانا اخيطله الجرح صارن تلث خياطات
وهو ماسمعتله صوت تعجبت عليه شلون ساكت ومتحمل هذا الوجع
كعدت كباله رفع راسه يباوعلي والعرك يصب من كصته ويم ذاناته
_شوف روح للصيدليه جيبلك علاج اي شي علمود لايلتهب الجرح
_اكدر اعتبر هاي عيديه الي
_انته ماتروح لبيتك
_هنا بيتي
_تالي ليل بيت ناس ماتعرفهم وتكول هذا بيتي
ابتسم وهو يتمدد صفح
_ماريد تكولين للولد بس انا اشتريت هذا البيت من فائق من سنين رغم حتى مايسوا اذب عليه فلس لان تعبان بس احب هل منطقه
صدمتي جبيره ب حجيه يعني هسه احنه ماكاعدين بيت ابوي كتله من حركت كلبي
_فلوس كلها فلوس حرام الله يعلم البيت وسيارتك ولبسك منين فلوسهن
حط ايده جوا راسه يحجي
_ماصارف ولا فلس حرام كله بتعبي اجيبه
كمت من يمه متنرفزه حيل من كلامه بتعبه يا تعب هذا ماتحملت اضل دقيقه بيت واحد ماعرفه شنو موقعي هنا انا ليش مايعوفنه على اي اساس جابنه البيته
طلعت تلفوني او ب الاخص تلفون خالد الي اخذته بعدما تاكدت اكو رصيد ضليت ادور على رقم اصيل جان رقمين باسم اصيل الثاني مكتوب يمه اصيل ٢
اتصلت عليها اكثر من مره وماكو جانت ايدي ترجف وعين ع التلفون وعين ع الباب
لحد ماجاوبت ماصدكت حطيت التلفون على اذني
بس هيه ساكته
_اصيل باعيلي تندلين بيتنه القديم مو
سكتت انتظر جوابها وماجاوبت لحد ماصحت بيها بصوت ناصي
_ردي علي راح اموت واندفن هنا وانتي بعدج ساكته ساعديني اصيل عفيه اريد اطلع منا
_سويتيها ورحتي افنان
جان صوت الامي الي جاوبت كالت كلمتها وسدت التلفون
شلون امي هو مو تلفون اصيل مو امي سافرت
اجيت اتصل على عبدالله بس متردده ضغطت اتصال وسديته بسرعه وضميته
مامجبورين يساعدوني وانا الي ختاريت اعوفهم مامستعده اخسر واحد بيهم بسببي واعيش سنيني ب اللوم
غفيت بصف مهيمن بين افكاري
فزيت على طبكه قويه ب الباب مال الهول
باوعت المكان مهيمن لكيته فارغ
فزيت مرعوبه ادور عليه سمعت صوت طكطه ب المطبخ
باوعت على مهدي الي حاط راسه على بطن بنيامين
بنيامين نايم ع الكاع بدون فراش ع الكاشي
رحت جبتلهم فراش غطيت مهدي وحطيت مخده جوا راس بنيامين مجرد رفعت راسه من الكاع فتح عيونه بوسعهن اخذ نفس بهدوء وشال المخده من جوا وشمرها
هزيت ايدي اكله
_جابولها رجل وكالت اعور ضل ع الكاشي
رحت للمطبخ كل ظني الكه مهيمن بس الي سمعته صوت احد ياخذ نفس نركيله ودخان يطلع من المطبخ ركضت للمطبخ عبالي مهيمن يدخن
بس الصدمه لكيت فائق وهو لابس بنطرونه وبفانيلته الداخليه
كاعد على كرسي وحاط رجل على رجل يدخن
ايد يدخن بيها وايد يكلب ب التلفون
شافني وطفه تلفونه يحاجيني
_وانتي بالف خير بنت ابوها شنو البارحه انجازاتج اهنيج عليها
عضيت شفتي بقهر هذا منين عرف بس لابنيامين شكاني اله
_ماسويت شي
التفتت على بنيامين بصدره العاري اخذ تشيرت ابوي الشامره ع الكاونتر وهو يلبسه بصعوبه ويحجي
_فائق ماكو شي من هل حجي هاي منو كلك
ابوي نكلب ميه وثمانين درجه بحيث دفر النركيله طكت ب الحايط وتكسرت وهو يصيح
_سنين ربيتك على ايدي مامجذب علي بحجايه هسه تحط عينك بعيني بكل وقاحه وتجذب علي ولك انا فائق احد كلك الكدامك قشمر
_هذا ماكو غير داهيه راح حط السالفه بذانك هاي لان طردته امس هيج سوا بس صدك فائق ماكو شي صار ب البيت تعاركت ويه ابو الدلفري ب الشارع ودجني
عتني فائق من شعري يحجي بفحيح
_طلعتي مثل امج عينج كويه رادلج من يفكس عينج
سحبني وراه لاتجاه الجرار وهو يطلع سجين
باوعت البنيامين استنجد بي
نزلت دموعي بخوف وانا افلت من ايده واركض لورا ظهر بنيامين
اجه مهيمن ومهدي ع الصياح وهو مصدومين من ابوي الي لازم سجينه شمرها ليم رجلي واخذ الملقط شال بي الفحمه الجانت ع النركيله جريت ملابس بنيامين بخوف احاجي
_راح يحركني بنيامين
باوعت المهدي ومهيمن وانا احاجيهم
_طلعو منا
رجعت احاجي بنيامين بدموع
_خليهم يطلعون منا لايشوفونه ياذيني عفيه بنيامين
استنجد بي وهو ساكت اخر شي كال
_مو هيج فائق بس افهمك والله مو هيج
جان ابوي بس يريد يلوحني من ورا ظهر بنيامين جرني من وراه بقوة راد يحط الفحمه على ظهري بس بنيامين مد ايده لزمها بجف ايده وهو يصيح بشوغه
طاح الملقط من ايد فائق طلع وهو يحجي بدون مايعير اهتمام البنيامين
_كلاب ماتصيرلكم جاره تضلون كلاب
ضليت واكفه بمكاني مانطيت اي ردت فعل غير ابجي واباوعله مهيمن الي لازم ايده ومهدي ضل حاضنه مجلب بركبته
عجيب حب خواني اله معقوله بديت احس مثلهم بديت احسه امان من خوف فائق معقوله هذا السبب المخليهم يحبونه
اخذت ايده من ايد مهيمن اباوع للجرح
_اجيبلك دوا
ابتسم بحزن وهو يهز راسه بلا بعد مهدي من حضنه يكله
_انته مو كلت راح نطلع منا وبعد مانشوفه يمته بنيامين
_مو هسه
كانو يتجاهل حجيهم عبر الكزاز وكعد ع الكرسي ساكت
ادري جاي تاذي وتحركه جوا الجلد
_خنجيبلك علاج من الصيدليه اندل هنا صيدليه قريبه علينه والله ماشرد وماسوي شي بس اجيب العلاج
_تعرفين ياعلاج تجيبين
_اسئل ابو الصيدليه وهو ينطيني
كام بدون مايحجي وطلع
شكد زاد حقدي على فائق بهاي اللحظه
ضل مهيمن يسئلني ع الصار جنت اجاوبهم بصريح العباره وماجذب عليهم انو ماضربته لان جان عندي سبب مقنع زعلو مني وعفسو وجهم
عفتهم وكمت سويت ريوك نظفت المطبخ وغسلته ونظفت البيت غسلت فراش النوم وشريته اكو غرفه من اجيت لهسه مقفوله حاولت افتحها ماتنفتح سألت مهيمن على مفتاحه كال مادري بيها ماجه على بالنه نفتحها بس ضل بالي يمها
سويت غده ورحت اصيحلهم يتغدون كعدو بدون ميحاجوني ع الصينيه
_قبل منو جان يسويلكم اكل
_بنيامين يجيبلنه اكل مال بيت مادري منو طابخه ومرات داهيه يطبخ من يجي هنا
_مهدي وين رحت البارحه
رفع عيونه عاقد حواجبه باستفهام
_مهدي احاجيك البارحه وين جنت
_ويه ابوج ب ملهى وين يعني
بلعت غصتي ونزلت عيني ع الاكل احاجيهم
_انتم ضايجين مني لان طكيت بنيامين لخاطركم سويت هيج ماريد تتاذون
كال مهيمن بهدوء
_انتي كله امس اجيتي ماتعرفين شي افنان صح الله حطنه بهذا الطريق ونجبرتي تجين علمود علاجي بس صدكي الله حط بنيامين مثل النور بطريقنه بدون سبب دوم يساعدنه حته مرات اشوفه خايف من يضربنه ابوي خايف علينه يجوز لو تخيريني اروح لخوالي التحجين عليهم لو اضل هنا يم بنيامين راح اضل يمه
نصدمت من حجيه عفت الاكل من ايدي احاجيه متفاجأه
_مهيمن لاتخبلني انا اجيت هنا علمودكم علمود تصيرلي فرصه اخذكم واطلع منا برايكم الي عايشينها انتم عيشه هاا راحت عليكم سنه كامله مادرستو بيها لو انته مهدي لهسه جسمك مورم ورجلك مجبره من اثار الضرب وبعدكم تكولون نضل هنا شنو شفتو منهم شي حلو وتردون تضلون هنا محبوسين حالنه حال السجين بعد يوم يجيكم فائق سكلكم حته الهوى ماتشمونه
ضلو ساكتين ماجاوبوني ستهضمت حيل حسيتني غريبه بوسطهم
عفتهم وكمت للحمام اغسل وجهي وابجي مخنوكه حيل
رجعت للغرفه انام ماعرف شكد مر وقت وكعدني مهدي وهو يكول
_كعدي بنيامين يريدج
لبست حجابي وطلعت وراه لكيت بنيامين ي الهول وشايل بيده طفل ويمه مره