مجلد للقصص القصيرة

حنين وما اخوف☺️

#المغتصبة
#الكاتبةورودالخالدي
الجزء السادس والاخير

متطلك؟!!

اي ما اطلك.. لان ما اريد اخسر!!!!

شتخسر مو كتلك ما اريد شي لا غراض ولا فلوس، مؤخر ولا شي حتى حلقتي انطتكياها

ما اقصد خسارة الفلوس..

لعد شنو!!

ما اريد اخسرج.. انتي!!

اني؟؟

اي انتي رزان.. انتي عند اهلج صار شهر واني خلال هالشهر اكلت خرة.. حرفيا.. اثنين يتصارعون بداخلي.. عقلي، وكلبي.. كلبي يكولي.. ماعدها زله.. ولا غلطة بيها هالبنيه شلون تخسرها.. انت اكبر زمال اذا خسرت هيج جوهره.. صافيه لك سنتين تراقبها قبل الزواج واربع شهور ونص يمك بنفس الغرفة تكعد تلكاها لازمه القرآن رب العالمين على لسانها.. بكل دقيقة بنيه هالكد قريبه من الله سبحانه وتعالى شلون تصدك هيه مو تمام.. وعقلي يكولي،.. قصتها متتصدك وين اكو فلم طفله مغتصبه ومحد يدري بيها.. قصتهاخياليه وميصدكها طفل..

صفنت.. على كلامة

لتصفنين.. كتلج اثنين يتصارعون بداخلي، عقلي وكلبي واليوم جنت على آخري من جيت الج.. من سمعت من امي.. واحد جاي، خاطبج.. حسيت الدنيا ضاكت بعيني.. ما اتحمل احد ياخذج مني بالنهايه كلبي انتصر،.. على عقلي وقررت ما اخسرج.. وهاي، فكرة الطلاك انسيها رزان ما اطلكج.. بعد

وجر ايدي لبسني الحلقه الجان ضامها براحة ايده طول الطريق من بيتنا لبيتهم

وهاي،.. الحلقه ممنوع تطلع من ايدج افتهمتي!!

صافنه على كلامه وتصرفاته هو يحجي وياي بصوت ثابت بس حيل عرگان وحالته حاله رغم الدنيا موت برد.. نهايه شهر ١٢ احنا..

بس.. بس كريم اهلك.. يعني حتى استحي، منهم من موقف.. ماما.. وو.. حتى ماما شلون هسه من تجي، وتلكاني ماكو بالبيت وراجعة وياك غير تتخبل وتكلب الدنيا

معليج باهلي اصلا امي.. يوميه تفوت لغرفتي وتحجي براسي لما تمل وتكولي... شبيك.ويه البنيه شلون كلبك انطاك تاخذها لهلها شمسويه هي.. وابويه فات لغرفتي.. اول يوم اخذتج لاهلج ومتصدكين اذا اكولج شكد حجه عليه وكلي هاي الدنيا كلها لو ادورها شبر، شبر ماتلكة مثل رزان.. واذا طلكتها لا ابني ولا اعرفك اهلي.. يحبوج رزان.. امي، وابويه والبيت كوله صار كآبه وچنه خرابه.. من رحتي لليوم.. تعبت.... تعبت.. كل زوايه بالبيت تسألني، عنج اغمض، عيني، واكعد واتخيلج نايمة بفراشج لو دتصلين.. ادمرت وانتي بعيدة.. هذا ياطلاك التحجين عليه

بس... بس ماما شلون شاكولها

معليج بامج.. ابويه يحلها وياها..

شفته راد يطلع كتله:

شنو راح تطلع؟؟ انت متغدي، لولا!!؟؟

لا والله ممتغدي بس هذا العامل العندي، بعده... جاهل ويتيم وهو معيش اهله.. ومن خابرتني امي وسمعت حجيها من حركة كلبي طردته وقفلت المحلات وجيت عليج.. متاكد هسه اروح الكاه بعد كاعد اباب المحلات يبجي.. خطيه طفل وكوه لكه شغل يمي،.. وحتى اذا مالكيته اروح لهله اجيبه واراضي..

اي زين تسوي، ربي يرزقك.. اجبر بخاطره ورجعه

وطلع من يمي.. من بقيت وحدي، بغرفتي، حسيت براحة عظيمه بصراحة مشتاقه لغرفتي، وللركن الي اصلي بيه.. كولشي بغرفتي، مشتاقتله.. نزعت الحرام وبدلت طلعت لكيت خاله بالمطبخ فتت كتلها:

خاله.. ماما حيل زودتها وياكم واني مستحيه منج والله

ابتسمت

فوك ما ابني ماذيج مستحيه مني، لا احنا المستحين وحقج علينه بس.. انتي، عاقلة وفاهمه وتعرفين كريم عصبي.. بس والله لو تشوفيه من رحتي، خطيه.. حالته حاله بعدكم بنيتي، باول زواجكم اكيد تصير مشاكل وهاي سالفة الطلاك عيب تجيبوها على لسانكم وبالنسبه لامج ماالومها بنيتها اجتها باللليل مشحوته ومطرودة حقها تحجي، حقها كولشي تسوي..

بعدها تحجي،.. دك موبايلها شالته

اول كلمه كالتها

اي رزان عدنه

وانطتني جهازها

اول محجيت ويه ماما

منطتني مجال صوتها عالي ترزل بيه وتكولي، شلون رجعتي، لرجلج بدون علمي ماخليتي لنفسج كرامه ولاحشيمه وهسه رجلج والعيال يركبوج على ابو رجعت مثل الچلبة وحدها وتضلين مدمغة للرايح وللجاي، وحتى من كلت الها اني، مرجعت وحدي كريم اجه عليه واخذني، كالت طبعا عينه قويه لايتسحي، ولايخجل ومامخلي احترام لعمته ومخليج لعبة بيده بكيفه يجيبج وبكيفة يردج لوعنده ذرع احترام واصول جان انتظرني، وواعتذر مني شامرج عليه شهر لاسأل ولا كال غافلني، واجه اخذج.. واحد تايه وتافه لايعرف تقدير ولا اصول بس العتب مو عليه العتب على اخويه الماعلمه الاصول وما رباه على احترام عماته

وضلت تحجي، عليه وعليه متنطي، مجال وبس سكتت شويه كتلها

يوم بس يجي،.. اخلي يجيبني، الج ونكعد ونحجي، وياج كافي تصيحين وتحركين بدمج والله مو زين على صحتح هالصياح

انجبي ولج خايفة عليه خايفة على صحتي،.. لا.. ما اريدج تجيني ولا توصلين الي، خلي، بيت خالج ورجلج يفيدوج لا اعرفج بعد ولا تعرفيني

وسدته بوجهي،.. راسا بجيت خاله انقهرت عليه

لتبجين رزونه.. امج صح عصبيه وصوتها عالي، بس، هيج والله ع الفاشوش، حماتي، واعرفها حس عالي، وكلب خالي هسه هيه عصبيه ونار كبره بس والله من تبرد تتندم على كل كلمه تحجيها وانت لاتضلين تبجين وتاكلين بروحج.. خليها تهدا كم يوم اني، وخالج وناخذ، ويانه خالاتج سهيلة وسلوى وليلى ونروح نصالحها ونعزمها ونجيبها يمنه..

خاله اخاف بعد متحجي وياي

ياااا تكول متحجي وياي.. ليش شعدها غيرج وعليمن محروك كلبها غير على مودج معليج انتي، سكتي، وهسه تشوفين شلون متتحمل يومين تلاثة وهي، تخابرج

تليفوني ضل هناك

تخابرج من جهازي مثل هسه شلون خابرتج

صدوك خاله

اي والله لاتفكرين ولا شي يله تعالي خلي نتغدة

وصاحت على طيبه ومرت علاء هم سلمن عليه وباسني وكالن مشتاقيلج وحشتج شكبرها بالبيت.. وكعدنا ناكل ونسولف.. وره ساعتين رجع كريم للبيت.. رغم هو من فات ساكت بس نظرات بيناتنا بس احس عيونه مرتاحة.. وبيها لمحة سعادة ممفهومه خطيه تغدة وهو واكف وفات سبح كال مستعجل لان بضاعة عدد جايه من الشمال للمحل وحتى من طلع شعره مبلل ولابس بس بلوزة وحده والدنيا موت برد..

اجه بالليل يكح.. بصوت عالي ويكول ميت من البرد تمرض بس مو مرضة عاديه بقه ٤ ايام الليل كوله مينام من الكحة والصخونه وجماله هو يدخن صدرة تملخ من الكحة صح هو نايم ع الجرباية واني، بالكاع ومابيدي شي بس انطي العلاج وارجع لمكاني بس، كلبي يمه خطية اتمنى بسرعة يطيب.. باليوم الرابع خابرتني، ماما من تليفون خاله.. وتعاتب بيه تكولي:

كيفتي من كتلج.. لا اعرفج ولاتعرفيني،

وكامت تبجي، لان ماخابرتها بعد فكتلها:

يوم لا كيفت ولا شي تره كريم كولش، مريض.. الله يشهد وموبايلي يمج واستحي اخابر.. من تليفون خاله

هااا مريض شبيه مريض بلابوش ميصيبه واذا صدوك مريض طبه بعد مرض فوك مرض، فوك مرض هذه حرگة كلبي، وحوبتي طلعن بيه رب العالمين ميشمر بحجار يعرف شلون يطلع حوبتي، من عساه بالموت والصوت

لا يوم.. اسم الله عليه فدوة لا تدعين عليه ادعيله يطيب خطية الليل كوله مينام من الكحه

ولج انتي شكد فطيرة وعاطفيه.. ضربج وشمرج يمي شهر وهسه اسم الله عليه..

اي،.. ماما كريم حباب،.. وميستاهل تدعين عليه

شو ولي.. ميفيد الحجي، وياج.. تضلين عوبه ومدمغه

وسدته بوجهي، وره ٣ ايام الحمد لله كريم تحسن وطلع للشغل بس بالي يمه ومن يطلع محضرتله القمصله.. وجواريب ثخان لان اخاف ليتمرض مرة ثانيه وهو بالكوة تحسن واحنا بعز الشته بالليل خاله ام كريم وخالو وكم وحده من خالاتي راحن على ماما ومن راحن صدفه جتي خاله كريم.. الي، هي، ام مرت علاء لان علاء متزوج بت خالته جتي، عدنا ووياها بتها الزغيرة عمرها ١٠ سنوات تقريبا بس واضح فلونزا قويه بالجو والطفله مريضة ومصخنه لان اول مدخلت نامت وامها غطتها المهم رجعن خالاتي وخالو وياهن ماما فرحت بشوفتها كولش وبوستها واعتذرت منها لان طلعت بدون علمها كوة رضت عليه ، وخاله ومرت علاءالتهن يسون عشه لان كولهن خالاتي وماما وام راح يتعشن عدنا وفعلا تعشن يمنه وكعدن يشربن جاي بالصاله.. بهالاثناء اجه كريم وعلاء وخالو خاله كالت اصب عشه خالو وعلاءطلعو متعشين يم بيت خالو سلمان بس كريم ممتعشي فكمت اني اصبله عشه ولان كلهن بالصاله هو كعدع الكرسي بصف الطاولة بالمطبخ صبيت اله عشه وكعد ياكل والتهيت اغسل مواعين.. لان هنه سون العشه وتعبن كلت اني اغسل المواعين ولان الصاله بصف المطبخ صوتهن يمنا نسمعهن شنو يسولفن.. واسمع خاله سلوى تحجي ويه ام مرت علاء:

شبيها بنيتج من اجينه لهسه نايمه ومدثرة بس لامريضة

اي والله مصخنه من العصر وهسه زادت بالزايد

وليش اطلعين بيها يا ام ضرغام جان خليتيها بالبيت الدنيا باردة هالايام

ليش هي، تقبل تضل غير، وين ما اروح مجلبه وياي بعد الزغيرة والمدلله ولازكه بيه.. حتى حايرة باجر شلون بيه اخت عجوز بتي نرجس، اليوم توفت وباجر ثاني يوم الفاتحة مدري شلون راح اخذها وياي وهي، مريضة

ماما بسرعة كالت:

على بختج ام ضرغام ديري بالج تاخذيها للفاتحة وهي مريضة لاتغلطين غلطتي،.. شبعت ضيم من وره هالسالفه تتذكرين.. سهيلة بفاتحة المرحوم مهند.. شصار بيه

اي اتذكر.. اتذكر

ام ضرغام كالت:

يا شصار شوخوفتيتي دادة!!

تجيج السالفة.. بتي رزان هم مثل بتج اجتني من المدرسه يمكن جانت بالسادس.. اي بالسادس عمرها بحدود ال١٢ سنه اجتني من المدرسة مصخنه وتنفض.. هم هيج انطيتها علاج ودثرتها بس بنفس اليوم اجانه خبر الحادث مال ابن سلوى الله يرحمه ولان ما اكدر اعوفها بالبيت اخذتها وياي للفاتحة عاد بتي من يوم الفاتحة ماسلمت.. انتكست عليه وصارت بيها مثل الحاله النفسيه تختنك ويضيع عليها الهوى متريد احد بس اني وابوها الليل كله حاضنينها وهي تفزفز مخروعة وتكعد تفرفح وتبجي..

يااا واخذتيها عاد لطبيب..لسيد؟؟

ماخليت والله اخذتها حتى لدكتوره نفسية وللسادة وللعلويات شبعت ضيم اني وابوها.. الدكتورة تكول متعرضة لصدمة والسادة يكولون تابعة والعلويات يكولن.. دوسه ميت.. ماعرفنه علتها شنو

وتالي شلون طابت

يا.ااا شفنه نجوم الظهر يله صارت شويع زينه ولهسه ما اخليها تنام وحدها منا لما زوجتها حتى خالها ومرت خالها يدرون

طبعا هي تحجي كريم يسمع واني هم اسمع بس، محد منتبه عليه جنت واكفه اغسل مواعين ومن سولفت الذكريات المرة كلها انعادت كدامي وهم اختنكت بالضبط مثل ماجنت اختك كبل ردت اوكع بالكاع بس كريم دفر الطبله ولحك لزمني

شبيج رزان شبيج.. عيني

كريم اختنكت.. اختنكت طلعني.. طلعني بره اريد هوى.. هوى

عاد هو شالني ركض بيه بره خالاتي.. كولهن طلعن هو مخليني بحضنه

يمه.. مي،.. كلاص مي جيبيلها

عزززااا يمه بنيتي لو ادري ممسولفه سمعتني، واختنكت مثل قبل سودة بوجهي.

وحسيت كولهن التمن داير مدايري

وسمعت صوت كريم

شالسالفة.. شويه.. مجال تره هي، مختنكة.. راح اخذها للمستشفى.. شالني راد يفتح باب السيارة كتله:

مبي.. مبيه شي كريم نزلني، اني امشي اروح لغرفتنا

لا.. لا اخذج للمستشفى

لا.. لا والله مبيه شي

متاكدة.. زين نفسج شلونه..

احسن.. بس، خلي، اروح لغرفتي

بس منزلني، اخذني، للغرفة كعدني على طرف الجرباية خاله شربتي مي، كتلهم

مبيه شي لتنخبصون مبيه شي اني اختنك مرات..

رزان خلي، اخذج

كتلك والله مبيه شي

ماما كالت

هسه اني شبيه لساني، فالت ليش اسولف كدامها..

كريم كلها بصوت حاد

عمه اذا تعرفين الموضوع ياذيها وهي دتسمع ليش تعيديه كدامها

ما ادري، دتسمعني.. شمدريني،

ماكو شي كريم لتضل، تلوم ماما والله مابيه شي..

خاله كالت:

خلي نطلع عنها خطيه خلي، تتمدد وترتاح

طلعن كولهن بقيت بس، اني، وكريم كلي.

شلون صرتي

زينه والله

تمددي، ع االجرباية

لا بالكاع انام بفراشي متعودةانام هناك

ماشي

كام هو فرش فراشي واخذني من ايدي، نيمني بفراشي، وغطاني. وكل شويه.. يخلي ايده علي كصتي.. يتاكد ممصخنه نمت وكعدت لكيته مكابلني وكاعد.. كتله:

باوعت ساعة ٨وونص الصبح حيل هالكد نمت اني كتله

شو مرحت للمحلات

ما اكدر اروح بالي، يمج..

لا روح مبيه شي اني احسن خالو خطية ميكدر يضل وحدة بالمحلات

متأكدة انتي زينه

اي، والله

ادنه يمي كلي،

رزان اني اسف..

ومكمل كلامة بسرعة طلع

شبيه كريم وع شنو يكولي اسف

بقيت محتاره بكلمة اسف هذه رغم اني كعدت زينه.. وكمت لكيت خالاتي، رايحات وام ضرغام هم رايحة بس ماما منتظرتني اطلع من غرفتي حتى تطمن عليه

ومن طلعت وشافتني زينه.. بقت يمي، شويه وبالعشره تقريبا راحت

الظهر اجه كريم اول مفات حسيت ملامحه ارتاحت من شافني، زينه ودا اثرم زلاطة واحظر بالغدة ويه خاله

وتغدينا كولنا بالصاله بعدين فتنا لغرفتنا اول مدخلنا لزم ايدي، كعدني كباله ع الجرباية

شلونج هسه

زينه والله لاتقلق

رزان اني..

وسكت طلع جكارة ورثها.. ومكمل كلامة كتله:
شبيك كريم.. شو الصبح تكولي اسف وطلعت وهسه احسك تريد تحجي،.. ع شنو اسف وشنو تريد تكولي

لزم.. جف ايدي حيل وكلي:

اسف والله على كل لحظة ما صدكتج بيها وعلى كل كلمة جارحة كلتها الج وعلى كل دمعة وكعت من عيونج بسببي.. اسف لان مصدكتج وظلمتج فوك عذابج الجنتي، عايشته.... لج اني زمال والله زمال المفروض احتويج واحتوي، جروحج كلهاكلبي.. جان يكلي.. انتي صادقة ومظلومة وبريئه وعقلي، عقل الزمايل مجان مصدك..

وفهمت انه هو من خلال كلام ماما ومن خلال حالتي، البارحة تأكد انه كلامي، جان.. كوله صح وصدكني

يعني.. يعني انت هسه صدكتني

مو كتلج زمال المفروض من اول يوم سولفتيلي بيه اصدكج عذبتج وشبعتج اهانات انتي ماتستاهليها وعذبت نفسي وعشت ايام بس الله يدري شكد عانيت وتألمت بيها.. حرمت نفسي من السعادة ويه بنيه مثلج اصفى حتى من الذهب بس، صدكيني، جان كلبي، حاس، والله.. واوعدج اعوضج عن كل هالعذاب العشتي، وياي،..

جرني، راد يحضني وبس صرت بحضنه وحسيت باديه داير مدايري، مدري شبيه خفت منه وكلبي، ضل يدوك حيل متحملت حضنته بسرعة دفعته وكتله:

لا.. لا.. وخر اديك عني..

شافني خايفة منه شال اديه بسرعة كلي:

اهدي.. اهدي.. هاي ايديه مو يمج اهدي، رزان

ادنيت من يمه بسرعة

حقج والله حقج متقبلين امد ايدي، عليج واني، هم تسرعت بعده كلبج شايل عليه.. ميخالف اصبر..

كمت كتله راخ اروح يم خاله

طلعت من يمه كلبي يدوك حيل هيج يركض ركض.. شبيه يربي المفروض افرح لان الحقيقة بينت وصدكني، خطيه مسوالي شي بس راد يحضني على كيفه ليش هالكد خفت منه ودفعته

ومن يومها كريم تغيير مو ذاك كريم الكالب، وجهه عليه اول ميفوت للبيت ويشوفني يتبسم رغم هو مو من النوع الي، يتبسم هوايه بس، الي، صار.. يبتسم وبين يوم ويوم يكولي، خلي، نطلع نفتر بالسيارة نتعشه برة.. نشتري اشياء

جنت فرحانه بهالتغيير كمنا نطلع هوايه مرات نتعشه ومرات نشتري اشياء النا... ومرات معدنا شي بس، نكعد بمكان عام حسيت نفسيتي، حيل ارتاحت وتغيرت وحسيت حياتي، بدت تصير حلوة.. واستغربت هو ويه الناس، كلامة محدود ويايه بده يحب يسولف ويفتح مواضيع والشي الممتوقعته انه هو حافظ كومة نكات.. تموت من الضحك.. مرات يسولفلي، نكته واحنا بالسيارة هو ميضحك عليها.. بس اني اخرب من الضحك واكوله كافي، الله عليك كلبي، كام يوجعني، من الضحك

وتغيرت حياتنا... للافضل طبعا.. بس بعدنا هو ينام ع الجرباية واني انام بالكاع وابد مفكر يلح عليه يمكن منتظر، مني، اني ابادر بهمسه لو بكلمة لان حس من راد يحضني خفت منه ودفعته

ومره جنت اني وطيبه نرتب بالسنادين الي، بره وما اعرف شلون انجكيت بالوردة يمكن لان دنكت زايد واني اشيل بالسنادين وانظف من جواهن صارت الجكة جوه عيني، وكامت تحركني، وبالليل من اجه انتبه اكو خدش جوة عيني بسرعة كلي

شبيها عينج

لا هيج ماكو شي، انچكيت بالوردات الي، بالسنادين

تعالي، خلي، اشوفها

كعدت كباله مد اصبعة يم عيني

غير تنتبهين لو صاير بعينج

اي والله الحمد لله مدخلت بعيني

بقه هيج لحظات صافن بعيوني وحسيت اصابعة تحركت على خدي، وعلى شفتي بعديني خلاهن على ركبتي، ع كيفة دناني، راد يبوسني وبس حسيت بشفته على شفتي هم خفت منه جفلت وبسرعة ادنيت حسيته حيل ضاج وصار بخاطرة بس، مبينلي كله:

يله.. لتخافين.. اهدي،.. اهدي.. بطلت عمي، ما ابوس..

من هدني، كمت من يمه شلون بيه يربي اخاف منه اخاف من اي، مبادرة بعلاقة يمكن الماضي.. والي صار بيه قبل خلاني اخاف من اي لمسه تخص، هالشي بس شسوي اول وتالي اني مرته واحس هو شكد جاي على نفسه وميريد يضغط عليه وبنفس الوقت احسه يحبني.. كل نظره من عيونه احسه يحبني بيها هوايه اصلا قبل متصير هالتطورات بحياتنا جنت حاسه هو رغم عذابه والامه نفس، نظرة الحب هاي بعيونه والله اعرف من زمان يحبني، خطية بس شسوي ما اكدر ما ادبرها وياه بس يمد ايده عليه اجفل واخاف منه

ومر الموقف هذا بس اكيد مراح تخلص المواقف الي تجمعنا وره ٣ ايام ماما جتي تعشت يمنه واحنا كولنا كاعدين نتعشه هي كالت:

الخميس اروح.. للزيارة واريد اخذ رزان وياي.. مدري رجلها راح يقبل لو هم يسويلنا جان جرس، وربابه.. ويكول راحت وكسرت كلامي ويشمرها عليه شهر

حيل ضاج من كلامها بحيث عاف العشه وكام.. فات للغرفة ميريد يرد عليها بس اني هم حيل ضوجني حجيها مال اله داعي، موضوع راح وخلص واذا تريد تاخذني وياها للزيارة المفروض يكون كلامه يخص الروحة وبس، ماكو داعي لهلزيادات الجارحه

كلت خلي تروح ماما واروح اخذله عشه واحجي وياه خطية عاف العشه وكام.. وانتظرت شويه الى ان راحت ماما صبيت اكل واخذته للغرفة لكيته كاعد على طرف الجرباية كتله:

متعشيت جبتلك اكل

جان مغثوث من كلي:

ما اريد زقنبوت..

وكام.. طلع.. من طلع جان لابس بس تي شيرت.. رحت فتحت الكنتوراخذ ت عبايته الشتويه ورحت وراه ومن وصلت اله جان واصل لنص الممر الي بالحديقة حس بيه وراه كلي:

شكو جايه ورايه اريد اطلع وحدي

بس.. بس الدنيا حيل باردة انت لابس خفيف البس هايه العبايه

ما اريدها مبردان

لا.. الله يخليك البسها الدنيا حيل باردة وانت بسرعة تتمرض وتضل تكح الليل كوله وبالكوة اطيب

اخذها مني، لبسها وعافني واكفه.. مهان عليه يطلع هيج مغثوث كتله:

انت وين راح تروح

التفتلي

رزان شنو السالفة طالع دقايق اشم هوه وارجع

مشيت كم خطوة الى ان وصلت يمه.. كتله

وين راح تكعد بالسيارة لو بره.. فدوة لتكعد بمكان مكشوف الجو ثلج

رغم.. ضايج بس حسيت ابتسامه جوه عيونه

وج شنو اني، طفل وتوصيني

مو اخاف لتتمرض

دروحي، فوتي جوة انتي الى راح تتمرضين بهاي هدومج الخفيفة

انت.. انت انغثيت من كلام ماما اني اعرف انغثيت.. منها بس، هي، هاي ماما.. شسويلها دائما تحب تعيد المواضيع

عادي لتهتمين

بس انت جوعان.. متعشيت.. وطالع بالبرد يعني راح تصير بردان وجوعان

ههههه خررب يومج وج بطلت ما اطلع

ابتسمت

اي احسن تعال فوت جوه

امري لله

رجعنا سوه فتنا للغرفة.. من انطاني موبايله وباكيته ايده لمست ايدي رجع اخذهن مني، وبقه لازم ايدي وكال

تحجي، ع البرد وهي اديها قالب مال ثلج جرني حضني، هيج لفني بالعباية مالته هم خفت ردت ادفعه بس حضنته جانت قويه من شافني خفت واريد اخلص همس باذني

رزان احبج.. وانتي تدرين.. لشوكت تضلين تجفلين ووتتهزمين مني

حجه هالشكل ورخة ايده طلعت راسي من حضنه وادنيت شويه كتله:

اعرف.. انت تحبني بس!

بس شنو اذا محابتني،.. وممتقبلتني كولي، حتى ابطل ارسم احلام

لا.. لا مو هالشكل ولا بهالمعنى بس.. اني!!

انتي شنو كولي.. كل الي بالج كولي الي واوعدج اتفهم كل الي، تكوليه

كريم.. اني،.. اني مو بيدي، اخاف.. والله... ويمكن ما ادبرها وياك.. اعرف هذا حقك.. ولتكول ممتقبلتني.. مو شغله تقبل بس مدري ليش هيج كلبي يكوم يدوك حيل واخاف من هالفكرة

ولشوكت تضلين خايفة مني،.. اريدج بحضني.. تعبت والله من هالبعد انتي، بالكاع واني، وحدي، ع الجرباية شوكت تصيرين الي.. ونشيل هالمسافة الي بيناتنا

ما ادري.. ما ادري

وبجيت واني بين اديه

افه.. جبانه تبجين من الحب.. لج اني حنين وما اخوف.. والله مره وحدة لو تنطيني، مجال.. بعد متفاركين حضني، لحظة

ردت احجي.. كلي

خلي نحاول شكو بيها اذا كدرتي.. خير على خير واذا مكدرتي اسمنا حاولنا.. مرة ومرتين وتلاثه ماكو شي ميرهم كولشي يرهم

وبقه يسولف ويايه.. ويهمس، باذني.. وحاولت اكون شجاعة.. خليته يبوسني.. ومن باسني، اكثر من مره صح بالبداية خفت بس بالتدريج خف مني، احساس الخوف لان هو كولش لطيف وهاديء ومقدر خوفي منه.. وباول محاوله صرت اله.. وطبعا.. تالمت الم موطبيعي،.. وصرخت باللحظة الحرجة ومن وخر من يمي، كلي،

هاي شنو رزان مو تكولين انتي متعرضة لاغتصاب

ادنيت ليوره وشفت شويه دم ع جرجف الجربايه مو دم.. هوايه بس لطخة خفيفة لونها وردي العفو من الوصف بس هو هذا الي شفته وهو هم انتبه لهلشي ورجع كلي:

شو مابيج شي جنتي باكر وواضح هذه اول علاقة من كل انفعالاتج والمج وهذا الي ع الجرجف مو دليل عذريه لو شنو!!

ما ادري والله ما ادري

اخذني بحضنه وكلي ارتاحي اهدي.. مابيج شي يعمري والله مابيج شي مثل الورده الحمد لله..

صدوك اني مبيه شي

اي والله.. هذا الي مبين والي حسيته واني مو غشيم..

ضميت راسي، بحضنه وكتله

الحمد لله

خله ايديه داير مدايري وكلي مبيج شي وحتى لو مبين عندي اي نيشان والله ما اهتم.. انتي مرتي وحبيبتي وتاج راسي واشرف بنيه عرفتها بحياتي

ومن يومها عشت وياه احلى ايام.. وحاليا حامل بشهر الخامس ومرحت اشوف شنو نوع الجنين شيجي، من رب العالمين نعمه وخير.. والحمد لله رب العالمين فرحني، وفرحه لان يعرف شكد اني نظيفة وطاهرة ويعرف زوجي شكد تحمل حتى نبقى لبعضنا ونعيش بسعادة.. هذه قصتي انتهت.. طبعا صعبه عليه كل لحظة سولفت بيها ونقلتها للكاتبة بس حبيت الناس تعرف معاناتي، ومعاناة كل طفله تتعرض للاغتصاب وتخاف تحجي

وبالنهاية اشكر كل بنيه قرت قصتي وتفاعلت وياي، وحست شكد الشرف عزيز وشكد مهم كل بنيه متأمن لاحد حتى لو كان من اقاربها ومن اهلها وبأي عمر، جانت سواء طفلة لو بنيه جبيرة الدنيا مو امان ويمكن اني، ابن خالي الي، تزوجني جان الي سند.. لان يعرفني وواثق من اخلاقي بس وحده غيري يمكن يتزوجها شخص غريب ويصير بيها اسوء واسوء من الي مريت بيه.. ويمكن فوك ماهيه مغتصبه ومظلومة تنقتل وتروح ضحيه

وطبعاكل الشكر، والتقدير للكاتبه.. المتفهمة.. اللطيفة الست ورود الخالدي على صبرها ووقتها لان سمعتني، وكتبت كل التفاصيل بدقه.. ووصلت الكم قصتي، باحلى صورة

انتهت♥♥♥♥

احبتي الهدف من هذه القصة القصيرة واضح جدا وهو رسالة موجهة الى الاباء والامهات للانتباه جدا الى بناتهن الصغيرات وحتى الكبيرات لا مأمن في هذه الحياة لقريب او غريب.. فيما يتعلق بالبنت سواء، كانت صغيرة ام كبيرة فالوحوش، البشرية لا تفرق بين كبيرة وصغيرة

ورسالة اخري لكل فتاة وهي، ما ابينه في، معظم رواياتي ان الشرف غال جدا... فحافظي، على عفتك من الغريب والقريب وحذار ان تامني جانب احد مهما كانت صلتك به

اتمنى ان تكون سطور هذه القصه راقت لكم واستفدتم منها واستمتعتم بها شكرا لكل من يدعمني، بكومينت جميل واسفه اذا كتبت كلمة او عبارة عميقه. شعرتم انها غيرمناسبة...صدقوني اضطررت لذلك لان القصة تعالج موضوع حساس جدا

احبكم
الكاتبةورودالخالدي