سجى : صباح الخير
جلال : وين مبدله
سجى : لدوام
جلال : ماريدج تروحين لدوام عليمن رايحه
سجى : حتى احصل راتب
جلال : متحتاحين الراتب اني جاي اصرف للبيت واي شي تحتاجينه انطيج
سجى : شنو مشكله الدوام جلال ؟
جلال : سمعي الكلام سجى
سجى : اريد اروح لدوام .... عيب من يزن
جلال : هسه صار يزن خوش ادمي
سجى : شبيك جلال الرجال صاحب فضل علينا
جلال : يزن يحبج لو ميحبج مسوه كل هلامور
سجى : بغض النظر عن الدوافع اني مننونه اله
جلال : اي روحي تشكري بوسي ونامي بحضنه
سجى : احترم نفسك جلال ( عصب وكام من مكانه يباوعلي بغضب ...... تقرب عليه ..... تراجعت خطوتين بخوف ) لتستقوي عليه
جلال : احترم نفسي مو
سجى : ( نحصرت بينه وبين الجدار باوعتله بتوسل ) لتضربني
جلال : ( باوعت بعيونها شفت الخوف .... لا جلال مو هذا الردته انت ..... ردت اشوف بعينها الامان الفرح .... ردتها تعتبرني سند مو تخاف مني ....غمضت عيوني ) اذا تردين الزم اعصابي لزمي لسانج
سجى : شفت نفسك شجنت تحجي
جلال : دافهين ليزن هواي وهمج رضاه واني رجلج ولا تباوعيلي
سجى : شمسويتلك مو داسوي اكل وانظف واي شي تريده اسوي
جلال : سجى انتي ابسط حقوقي ممنطتني اياه
سجى : هذا كل همك
جلال : لا اله الا الله .... شبيج سجى
سجى : كلكم الزلم هذا كل همكم محد يباوع لمرته شتريد شمحتاجه
جلال : كل هذا وممباوعلج
سجى : لتمن عليه جلال مكتلك ادخل
جلال : ( بعصبيه ) بلي كلتيلي
سجى : وشتريد اصلخ حتى اردلك الدين ( فار دمه وضرب ايده بالجدار الوراي ضميت اديه لصدري خايفه )
جلال : حجايه زايده اهد السكف ع راسج ...فاهمه ( اخذت مفتاح الشقه وتلفونها ..... قفلت الشقه وطلعت فاير عصبيه ..... افتر بالشوارع ....صفنت بيني وبين نفسي ..... جاي تنعاد سالفه ود ..... بنيه بالها مو يمك شكو كاتل نفسك عليها .....مااكدر افرض نفسي عليها ..... اذكر حجايه ود ..... لو تحبني اتركني ..... غمضت عيوني واني اتذكر كلمات سجى ..... مراح تحبني .... لا اني ياسر ولا اني يزن ... باوعت لسما .... معركه خاسره ثانيه .... شكرا .... اخذت مفتاح سيارتي ورحت لبيت امي .... طكيت الباب بسرع فتحته فاطمه ..... بعصبيه ) ليش انتي تفتحي وين امي وزينب
فاطمه : جلال ليش رجعت
جلال : ( دخلت للبيت وهي مصدومه حضنتها وهي مثل لوح الخشب ) شنو مافرحانه برجعتي
ام جلال : شسوي هنا
جلال : يوم والله تعبان
ام جلال : تركتنا ودرت ظهرك طول السنتين جاي شسوي هسه
جلال : ماتركتكم دوم جنت اسال عنكم والفلوس الي يوصلها عبد الله جانت مني
ام جلال : لو ادري منك مااخذتها
جلال : ( طحت ع ايدها ) يوم تعبت اذا طرديني تكوليلي موت
ام جلال : ابني مات من سنتين
جلال : ( باوعتلها بنكسار ماردت عليه كومتني فاطمه تبجي نتبهت بايدها حلقه لزمت ايدها بصدمه ) شنو هاي
فاطمه : ها
جلال : ( صحت ) شنووو هاي
زينب : نصي صوتك جلال ..... البنيه نخطبت ليش معصب
جلال : شنو تنخطب واني محد يسالني طرطور هنا اني
ام جلال : ولا شي انت هنا ولا شي .... اطلع برا
جلال : هسه تروح وياي تفصخ الخطوبه ( دفعتني امي تطرد بيه هي وزينب وفاطمه تحاول تمنعهم ورقيه من بعيد واكفه تبجي وصيح باسمي لمن طلعني ةسدن الباب بوجهي ..... متت قهر اتصلت ع خواتي وحده وحده محد جاوبتني ..... كعدت ع عتبه بابنا ابجي .... ثاني كسره بحياتي ..... تمنيت ميت ومرتاح ..... اخذت افتر بلشوارع مكسور .... لمن اجى ليل رجعت للشقه فتحتها لكيت سجى سوي عشه من شافتني اجيت اجتي وكفت كبالي )
سجى : ارتاحيت هسه .... طالع تتونس واني محبوسه ..... شفرقك عن ياسر .... هم جبرني عليه .... وحبسني ..... تريد ترغمني ع حبك
جلال : شتردين ؟
سجى : اذا تريد نكمل سوا خليني براحتي
جلال : والنتيجه ؟
سجى : شنو قصدك
جلال : مراح تحبيني
سجى : تريد تقايض طلعتي ع ان اسلمك نفسي
جلال : ( باوعتلها بغضب ) روحي عني سجى
سجى : هذا كل ....
جلال : ( صحت بيها ) روووووحي عني سجججججى
سجى : ( فزيت من صوته ماشوف نفسي الا راكضه للمطبخ .... بصمت خليت عشه وما اكلت رحت نمت .... مكدرت انام ضليت احوس بالسرير لساعه ٣ كمت ..... قررت ادور ع تلفوني .... فتحت خزنته ملكيت جهازي ..... رحت لجلال لكيته نايم بلاستقبال ع القنفه والتلفون بسترته .... جان معلكها ع ايد القنفه .... تقربت بطى للستره ماده ايدي بيها .... طلعت جهازي .... باوعت لجلال .... شفت دموع نازله من عينه ..... تكرفست كاعده مقابيله ..... معقوله هلدموع بسببي ..... مانكر جلال يحبني بس متوقعت يبجي عليه ..... نكسر كلبي عليه ..... ليش اني غالقه كلبي كلش ..... حتى مجربت مره اساله .... تحب هلانسان لو لا..... يمكن هو الخوف ..... ماريد اوكع بنفس الغلطه ..... جلال نفس ياسر ..... حبسني ويريد يفرض نفسه عليه ..... صفنت ..... لا مو نفسه .... جلال صدكني بدون دليل .... ترك كلشي وراح وياي ..... ضحى بنفسه علمودي ..... هواي تاذه ع مودي .... غمضت عيوني واني اتذكر مواقفه وياي صبره عليه ..... فتحت عيوني .... واشوف وجهه نايم كدامي ودموع نازله منه ..... مررت ايدي ماسحه دموعه ..... اول مره اشوف عيونه بهلشكل .... كبار عيونه ..... لحيته خفيفه .... عنده طبره بحاجبه ..... صعدت ايدي ع شعره .... شعره كثيف يرفعه ليفوك .... حسيت عطره يتغلغل بيه ممنتبه لنفسي صرت قريبه منه .... جان حاط ايده جوه خده ونايم .... ابتعدت عنه ساحبه الغطه مغطيته حسيته فز بضعف باوعلي )
جلال : شسوين هنا
سجى : اخذ تلفوني
جلال : اخذي .... واخذي المفتاح .... اخذي التاخذي .... اكثر من قلبي .... اخذتي و دمرتيني
سجى : مسويتلك شي ( دار عني لجهه الثانيه وغطى عيونه بذراعه ..... عود نايم ) اذيتك ..... شنو سويت كولي ..... تريدني اسلمك نفسي
جلال : ماريد منج شي
سجى : اذا هذا كل لتريده كوم ..... حقك هذا
جلال : ( باوعتلها ) ماريد منج شي روحي نامي
سجى : لعد ليش جنت تبجي ؟
جلال : ( باوعتلها بصدمه ) مابجيت
سجى : ماتكدر تضم عليه شي ..... شفت دموعك بليل
جلال : روحي نامي سجى باجر وراج دوام
سجى : مو جنت ماتريدني اداوم
جلال : سوي الي سويه مافرض عليج شي بعد ..... جنت معتبرج زوجه
سجى : وهسه اني شنو ؟
جلال : ( درت وجهي مغطي عيوني ) صبحين على خير
سجى : ( لبرهه حسيت راح يتركني ..... راح ارجع وحيده بدون سند .... وكعت دمعاتي واني افكر .... تكرفست يمه لازمه ايده ) اسوي اي شيبس لا تتركني
جلال : ( نزلت ايدي عن عيوني شفتها تبجي فزيت من مكاني كاعد كبالها ) شترديني اسوي ...... لا احنا مزوجين ولا احنا تاركين بعض
سجى : شتريد اسوي ... تريدنا نوثق زواجنا .... هياتني كدامك مااعترض والله .... بس لتتركني ماريد ارجع وحدي
جلال : حتى لو نفصلنا مراح اتركج
سجى : مراح تعيش وياي هنا
جلال : شسوين بيه هنا
سجى : مادري الله يخليك لتروح
جلال : ليش هلبجي
سجى : ماريد اصير وحيده
جلال : يزن موجود ( سكتت وفلت ايدي مسحت دموعها وراحت لغرفتها )
سجى : وانت من اهل الخير
جلال : ( رجعت كملت نومي .... كعدت الصبح لكيتها تسوي ريوك لابسه حجاب .... ضحكت باسى .... تريكنا وطلعت لدوام رجعت للمحل فتحته للظهر خابرتني )
سجى : شلونك
جلال : زين وانتي
سجى : زينه ( سكتنا ثنينا ) مو كلت تريد ننفصل ( سكت ) اقصد اني بلبيت اذا تريد اني جاهزه
جلال : تمام جاي ( ضحكت ع نفسي ..... باوعت لسما ..... شكد متريد دمرني دمرني ..... تسوي فضل لو تاخذ روحي ..... اريد اعرف المن خالقني .... نزلت راسي محاول ادارك غضبي .... رحت لسيد اعرفه كتلك عندي قضيه طلاق كالي تعال ..... رحت لسجى اخذتها جانت دنيا بيها بروده خفيفه .... نفس بروده كلبها ..... لابسه كوت رصاصي غامق طويل جواه اسود بدي وبطرون وحجاب اسود ..... كعدت بصفي بصمت باوعتلها ..... مباوعتلي مهتزت مشاعرها ولو لحظه ..... حركت السياره ) احجي شي
سجى : شنو اكول
جلال : حلو الاسود عليج
سجى : شكرا
جلال : يشبه كلبج
سجى : لتتوقع مني حجايه ..... نفسي عزيزه جلال
جلال : ممتوقع منج شي
سجى : افضل
جلال : شفتي يزن ردتيله معروفه
سجى : شفته وتشكرته ..... رجاءا انتبه لالفاظك
جلال : كلشي اتوقع منج مو انتي البارحه ردتي تقايضين شرفج في سبيل ابقى
سجى : جلال رجاءا خلينا محترمين بعض .... لهلثواني وراها ل نحجي ولا نشوف بعض
جلال : ( سكتت ..... من تضحي بكلشي عندك لاجل انسان مستخسر بيك الحجايه .... السكوت يكون افضل حل ..... وصلنا للفرع البيه بيت السيد جان الشارع ضيك فضطريت اصف سيارتي بعيد عن بيته ونزلنا نمشي قبل لندخل لزمت ايدي جانت ايدها ترجف وعيونها متلئله بالدموع )
سجى : اريدك تعرف مو اني النكرت مساعدتك .... بالعكس انت صاحب فضل عليه ( بجيت ) انت الوصلتنا لهنا مجنت ناويه انفصل عنك
جلال : ليش جاي ترجفين ..... اذا تردين نرجع ارجع
سجى : مجاي اتوسل بيك حتى تبقى
جلال : شتردين لعد
سجى : ( سحبت ايدي منه ومسحت دموعي ) ماريد شي
جلال : ( ضليت صافن بيها لمستها لايدي .... دموعها ..... رجفت ايدها وكفن عقلي ..... كان بداخلها شي عكس الي تظهره ..... كاني للحظه لامست قلبها ..... قطعت شرودي من طكت باب البيت ..... سمعت صوت احد يفتح الباب بهلاثناء حسيت شي اخترق جسمي ..... حسيت برود بدون الم ..... وراه بثواني سمعت صوت سلاح رمى ..... وي الصوت اجى الم فضيع وكعني للارض ..... كان جسمي خدر ودي ورجلي تربطن وي وكعتي حاولت سحى تلزمني بس مكدرت فوكعت للارض واني بحضنها ..... شفتها مدت ايدها لنص صدري ..... تلونت ايدها بلاحمر ..... كانت هلثواني تمر بطىء عندي ..... تمنيتها طول واني بحضنها .... باوعتلها تبجي وتصرخ بس ماسمعها ..... جانت تباوع كدام .... بضعف قبل لتنسد عيوني باوعت كدامي ..... شفت يزن وحراسه واسلحتهم علينا ..... رجعت عيوني لسما ..... شكرا لاستجابتك لدعائي ..... اقلها النهايه جانت سعيده ...... يتبع
اعتذر لان منشرت لبارحه بس جنت تعبانه .... احاول ليوم اعوضكم بارتين