بـخّيبۃ جـبل مـن ڪال:
"ابـآوع ؏َـلى الـنْار و هِـيه بـَداخلي"
#جَلمُود الجَبل
"جلمود"
من كتلة اريد توديني لجاسر طبك حاجبة وسألني بااستغراب:
_وين اوديج..؟
_لجاسر
_كتيلي جاسر مو؟!
احنا نبعدها منه وهية تريد تروحلة برجليها شبيج بوية!!
_جبل كتلك اريد اشوفة اريد اواجهة ليش ضامة نفسي منة صح اني كرهتة بعد الي سمعتة عنة ومااريد اشوفة ولا اريد يكون عندي اب مثله
_لعد شكو تريدين ترحيلة!! جلمود لا تخبليني
_اريد أسئلة على امي الي مشفتها اريد أسئلة ليش عافني بشارع وهسة يدور علية..
_مو هوة الي تركج كبال الباب وراح
_لعد منو..؟
_شمس الي هية امج اول معرفت منو يكون جاسر خافت على نفسها وعليج لهذا مجان عدها خيار ثاني غير انو تتركج وتروح
اباوعلة بقهر مااعرف شحس اهلي مااعرفهم ولا اعرف شنو مشاعري تجاهم الماضي عبارة عن لغز وجاي اكتشف كل شوي شي جديد
_زين هية وينها بعد ما تركتني..!!
_ماادري بس على الاغلب يكون جاسر كاتلها هوة اي شخص يعرف شغلة الاساسي يتخلص منه ف مااستغرب ابد اذا هوة الي كاتلها
_رح تاخذني آلة وبااقرب وقت هم
_لاتصرين مراح اخذج
_لا؛ تاخذني جبل اريد اقابلة بس مرة وحدة وبعدها مستحيل اشوف وجهة
مسح وجهة بقوة ورجع باوعلي وهوة ما مقتنع بكلامي بعد صفنة منة جاوبني:
_هاهية بس مو بسرعة تشوفي انتظري مدة واني اخذج تشوفين وين
_شنو قصدك..؟ يعني حاليا مراح تاخذني!
_لا رح تجين وياي لبيتي
_الي عايشين بي؟
_الي عايشين بي اهلي وثاني شغلة مراح تفوتين وياي على انو انتي بنت جاسر
رح تفوتين على اساس انتي خطيبتي
_شنو شنو؟ انت الظاهر متعود على التلفيق والجذب مستحيل اسوي هيج
_لعد انسي متشوفين جاسر
_لا والله..!!
انتظر هنا لحد ما يجي اليوم الي تاخذني والا اني اروح بنفسي
_عساس اني ابقيج هنا ياهانم
_عساس اني حسمع كلامك يافندم
_باعي جلمود كلامي مراح اعيدة باجر الصبح نرجع وتتعرفين على اهلي على انو انتي خطيبتي لحد ما اخلص مهمتي واخذج عليه هاذ اخر كلام عندي
_جبل مااكدر ادخل بين ناس وبنص بيتهم اكعد اجذب عليهم مااكدر مستحيل
_هسة جذبة متأثر بااحد واذا تريدين نخطب من صدك
حجة هيج وابتسم ابتسامة شيطانية هوة يحك لحيتة
_لاا دكول والله!!
المهم الجذبة انتة تجذبها اني معلية ولا كلمة اكولها
_خوش لعد حظري نفسج باجر نطلع
وحسابج على ما تعوفين البيت الصبح وخليتيني مااندل دربي بعدين نحاسبج بعدين
_لعد تريدني ابقى كاعدة بيتك وانتة كل هالفترة حاط عينك بعيني وكل كلامك خدعة لو أنتة بمكاني شنو راح اتسوي..؟
_بس مو تروحين بهل شكل بلا صارلج شي تعرفين اني ايام مداخل للبيت ومشايف النوم لحد ما عرفت انتي جاية عند عمتج
يعني ماخفتي تقطعين كل هالطريق وحدج بدون خوف انتي مجمرة كلبي وحاركتة
يحجي وفاتح عيونة عبالك جان يعبرلي عن الحرقة الي بداخلة الصارتلة بسببي عفتة بدون مااحجي حسيت عندة الحق
للصبح واني اتكلب لحد ما دخلتلي عمة ندى وكتلها على كلام جبل
_ندى: ردتج بعد تبقين صح جيتج وحدج مو صحيحة بس هالولد عندة حق بخوفة عليج يعني ياأمي تجين وحدج مناك لهنا بلا صارلج شي
_جلمود: عمة جنت مو بوعي مدري شلون اصلا اجيت وحدي كل البالي مااريد اشوفة شعور الخذلان صعب وكلش هم
_ندى: ادري يعمة انتي بشنو مريتي وحقج هم ما مكتوبلج الحظ بهل الدنيا بس اتمسكي بكلشي حلو بحياتج لاتخلينة يضيع بكبريائج
_جلمود: احاول..؛
هم حجيتي ويا بابا؟
_ندى: اي كل كم ساعة يتصل يسأل عليج ويدري بيج معصبة منة وجان يريد يسمع بس صوتج بس اخخ منج
كلشي معقد وتايه.. غضبي من بابا وجبل مو على شي تافه ولا دلال مني جان عندي حق بالغضب مسويني طفلة بعينهم ومكضيها خدع مثل ما يقشمرون الطفل هيح احس
بقت عمة ندى تسولف وياي وتنصحني اسامحهم وانسى وادير بالي على حياتي ومدري شنو لحد ما من فتحت جهازي لكيت جبل متصل علية هواي
عرفت من عمتي نايم بغرفة الضيوف رحت سبحت وحظرت اغراضي طلعنا نتريك برا بالحديقة مالتهم
بس جبل ماكو دورت علية بالبيت هم مختفي اخر شي اتصلت علية وكال تعالي بمزرعة جنار
اتعجبت من كالي هيج شودا هناك!!
رحت ولكيتة كاعد وياها يتريكون وضاربيها سوالف اول مشافتني جنار كالت:
_جنار: وهاي شرفت بەردەکەمان(صخرتنا)
تعالي شوفي هاذ الحليو والله حبيتو
_جلمود: شجابك جبل هنا؟
_جنار: اني شفتة قريب على بيت وعزمتة على فطور قروي بس والله سوالفة حلوة مو مثل ما كلتي حقنة
_جبل: والله يااختي هية الوحيدة الي تشوفني هيج والا اني شفتيني شلون حباب
_جنار: معليك فيها مغرورة اني حبيتك
_جلمود: شو جنكم اخذتوا على بعض بسرعة!!
_جنار: لاتغارين يا شيرين (حلوة) هههه
المهم هاد الحلو سألني على الوصفات الطبيعية الي نسويها للمعاقين وراد منها بس طبعا لازم تمارين يلا تتقدم هاي الأعشاب
_جلمود: معاقين؟ شتسوي بيها؟!
_جبل: بعدين اكلج المهم اريد من هاي الأعشاب واذا مفعولها مشة شنو تريدين اقدملج
_جنار: اكيد مفعولها يمشي هاي وصفات أجدادي وتعرف بزمان قبل
مااكو شي اسمو دكتور ومااعرف ايش فجانوا الناس يعتمدون على الوصفات العشبية لهذا كانو اقوياء..
استغربت ليش جبل يريد هاي الأعشاب يعني منو المعاق بعدة الغموض ملاحكة واحس بعدني مو كلشي اعرف عنة
شوية وجهازة رن اخذة وراح بعيد يحجي التفتت علية جنار وهية مبتسمة
_جنار: يا بنت مبين هالشب يحبج وهواي
_جلمود: شنو..؟ لا مااكو هيج حجي جنة بس أصدقاء
_جنار: هاذ الكلام روحي كولي لعمتج مو الي وحتى انتي باين تحبي والا ليش تغارين علية من هذيج البنت الي مدري شو اسمها
_جلمود: تؤؤ يتهيألج اصلا اني مااطيقة تريدين احبة نوب!!
_جنار: ههه قنعي نفسج ياحبيبتي مستهبلة نفسج انتي ومجاي تشوفين نظراتة الج عبالك جاي يشوف الجنة كبالة مو جلمود "بەرزترین شت" (المتعالية)
_جلمود: لاتحطين هالشي بالج رجاءاً
_جنار: هه ايه ليش لا
_جلمود: والله ينخاف منج
شوي واجة جبل مبين علية ضايج اشرلي اجي يمة واضح يريد يكولي شي رحت بااتجاهة
_خير شكو..؟
_رح نبقى هنا اليوم مراح نرجع
_ليش شصار!!
_جاسر بعدة ممسافر
_ايي خلي نروح قبل لا يسافر شمنتظرين
_ليش مجاي تفهمين علية مااريدج هسة تقابلي لعد ليش كتلج نروح لبيتي لحد مااخذج اله!! بس العار طلع بعدة يحل قضية ابنة
رح نبقى هنا لحد ميسافر ونرجع اخلص الي لازم اسوي من سنين واخذج وعد
ضليت اباوع بوجهة ماادري وين يريد يوصل وليش مو هسة نروح؟!!
وليش آلة يسافر يلا نرجع؟!!
كل هالسألة براسي وما سألتة بعد اي شي لان تعبت واني احاول اعرف شجاي يصير
راح هوة كال عندي شغلة اريد اخلصها واني رجعت لبيت عمتي لكيتها تبجي على فراك بنتها لان اليوم اول يوم يمر عليها بدونها
كعدت اواسيها واكللها نفس الكلام وحجيت الها على كلام جبل
_ندى: والله علوا تبقين بعد يمي بعدني مااكدر اتعود على غيبة ناز
_جلمود: اذا مراح تتعودين خليها تتطلك وتكعد يمج
_ندى: لا اسم الله اريد سعادتها اني بس ابقى ام تعبت هواي واخر شي تعيش بيت ثاني لو ما العادات جان جبتهم يعيشون يمي
_جلمود: عادي عمة تكدرين شوكت متردين ترحين يمها وهية تجيج حقج لان اول ايام بس بعدين رح تتعودين على غيابها وإنشاء الله تجيج هية واحفادج
_ندى: امين ويوم الي افرح بيج يبنت احمد وتجيني انتي والي تحبي واشوفج سعيدة طول العمر
_جلمود: أكدر اكون سعيدة بدون زواج اذا جان الي احبهم حوالية هاذ يكفيني
_ندى:تعالي احجي ويا ابوج شوية مكطوع كلبة عليج بس يسأل
اتنهدت حايرة كلش احس مشتاقتلة بس ضايجة منة ومن جبل.. راحت عمة ندى اتصلت علية حجت شوية ويا وانطتني الجهاز
اول ماجاني صوتة المتشوق والمنهك:
_ها ينظر عيني مراضية تسمعين صوت صديقج وابوج هوة ينتظر يوم يوم يجي يشوف وجهج المريح للنظر هيج ضايجة مني؟!!
اول محجة هيج نزلت دموعي كلامة شكد مؤثر علية ماكو كلمة توصف حالتي حالياً ومااكدر اضوج من اكثر انسان واكف وياي بهل الدنيا
_بابا
_يكلب بابا مشتاقلج بنيتي ليش تحرميني من صوتج واخبارج واني ولهان على شوفتج
_ليش هيج تسوي ليش تجذب علية هالكد مو عساس اني رفيقة روحك اشو كل فترة جاي اكتشف شي انتة ضامة علية
شنو مسوية اني وهيج استحق منك سالفة اني مو بنتك الحقيقية ليهسة ما متخطيتها
حتى اتخطى الي عرفتة
_حقج والله حقج بس اكيد لازم طلعيلي عذر على الي سويتة مو لحتى اذيج ضميت عليج حتى ما ينكسر كلبج وتتأذين
_بس هسة انكسر اكثر لو انتة مفهمني جان ماانكسر مثل هسة ولا اجاني هالشعور
_مابقى شي واجي للعراق المهم عندي هسة عرفت انتي بخير وبأمانة جبل
_كتلي جبل بابا..؟
جبل لو علي مهيب حسن!!
تعوفني باامانة واحد جذاب وكل هالفترة ضام كومة علية ويجذب وحاط عينة بعيني
_جلمود هاذ شغل مو لعب حتى تحجين هيج علية صح هويتة جانت خدعة بس هاذ شغلة مو بيدة حتى تلومينة اني ما ربيتج هيج تصيرين بلا تفاهم هيج
صحيح حقج ولازم انتي متكونين داخل الي ديصير بس مجبورين
رجاءأً حبيبتي لاتخليني اعصب عليج اتصرفي بتفاهم ماشي ..!
سديتة منة وشعور الخيبة بداخلي حتى بابا ديشوف الي صار طبيعي ساعة اكول كلام بابا صح وساعة اسمع كلام عقلي الي يكول الي صار مو قليل
من هذاك اليوم واني غريبة اكو تناقض بداخلي مو طبيعي تصرفاتي احسها مو متزنة ضايعة محتاجة احد يلزمني ويكلي هذاك طريقج مداعرف شنو الحقيقة وشنو الجذب
ما عدا سالفة جاسر الي ليسهة مو مقتنعة يكون واحد مجرم وصاحب منظمات إرهابية يكون ابوية الحقيقي كلشي ديصير مجاي استوعبة احس عقلي وكف ويكلي كافي بعد مااستحمل اكثر
بقيت كاعدة بالحديقة اراجع قراراتي وتصرفاتي لحد ما عمة ندى كالت تعالي ويانا رح ناخذ حلويات ونروح لبيت بنتها هيج عدهم عادة
مقبلت اروح لان مالي خلك راحت هية وجاراتها بقيت بالحديقة اقرا كتاب اجتني جنار كعدت يمي تسولف على أحوال القرية وسألتني على جبل
_صدك هالشب الحلو وينة!
_ماادري طلع كال عندي شغلة اكول جنار جبل مكال ليش يريد هاي الأعشاب..؟
_واللهي مااعرف بس مدري شلون عرف اني اسوي اعشاب سألني على مكوناتها والفائدة منها ضليت اشرحلة عليهم وهوة مركز وياي وكالي اريد تسويلي اخذ وياي وبس
_غريب المن يريدهم
_مدري يمكن عندو احد مريض لانو هالاعشاب بس للي مافي حركة عندهم يعني المصابين بجلطة مؤثرة انتي تعرفين من زمان كنت اسويها للناس
_اي ادري زين هية تجيب فائدة
_اكيد يابنتي هي أعشاب جدي وجدتي كانو يجون الناس من غير قرى بياخذوا منها لأنها تأثر على خلاية العقلية بتفتح الأوعية الدماغية حتى بيوصل الدم والاكسجين للدماغ ويبدي عضمة الإنسان تتحرك
_هممم سامعة بهيج شغلات بس اول مرة اعرف الأعشاب هيج تنفع
_انتي تعرفين هاي القرية شكد اثرية وقديمه وناسها متعودة على العلاج الطبيعي لهذا كل امراضهم يعالجوها بالوصفات الطبيعية لو شكد ما اطور الزمن والعلم والأطباء
_لو تعرفين شكد احب هالقرية
_اييه لكان اتزوجوا انتي وجبل وعيشوا هنا
_يبوه شلزكتي بجبل
_واللهي لايكين على بعض
كلبت عيوني مستهزئة بكلامها وهية تضحك مدري وين تريد توصل بتلميحاتها ضلت شوية كاعدة وراحت كالت عندي شغل خارج القرية
من جنت اجي لهنا ويا بابا نبقى كم اسبوع ونرجع جننت ازعل واضوج بس نرجع من كثر ماأحب هالمكان جانت جنار اكثر شخص احبها رغم كبر سنها والناس يكولولها العمة جنار
بس شكلها اصغر من عمرها بهواي رشيقة حيل وبياضها ناصع وأهم شي قوية وكد نفسها سنين هية وحيدة
ما عدها اي اهل بس كد نفسها تشتغل وتتعب ومتحس بتعبها رغم أنها وحيدة بهل دنيا بس تحسها صديقة نفسها وكأنو الوحدة ممأثرة بيها ابداً
جنت اكول يمكن متعودة على هالشي او يمكن الظاهر للانسان شي والي بداخلة شي ثاني لهذا من جنت صغيرة جنت اتمنى اصير مثلها هيج القرية كلها تحبها وتسمع كلمتها
وجنت معجبة مو بس بشخصيتها حتى بشكلها لان شعرها لونة بني محمر يعني مو صبغة لا هوة طبيعة لون شعرها وحواجبها هيج
كم مرة انتبهت نظرها على بابا شكيت بالموضوع بس بابا ميبادلها النظرة هاي طبيعتة جامد ويا النسوان وهاذ الي جان مريحني صح جنت اضوج من تباوعلة واغار
بس اني احبها وحسيتها تحبة حتى دائما تسألني علية يمكن هية مو منتبهة على نفسها لان دائما جانت تكولي اني والحب مثل الثلج والنار ما ننجمع سوة..
خلص النهار وجبل مختفي مدري ليش اختنكت وضل بالي وين راح وهوة ميعرف احد هنا
عمتي رجعت وهية تسولفلي على أوضاع بنتها بس بالي مو يمها
صار الليل والكل بدة ينام بقيت بغرفتي احوس مدري شريد حاولت انام ومكدرت ومدري ليش افكر بجبل كلت خل اتصل اشوف وين راح
وضليت امنع نفسي هاي شجاي يصير وياي اريد اعرف وين راح ومااريد اهتم ولا اعرف شي عنة
من خنكة الكلام الي يدرو بعقلي كمت اراقب من بلكونة الغرفة جان الضوة مو ضئيل حيل الروؤية بي متوسطة ضليت كاعدة لحد مااشفتة اجة بسيارة نزل منها والسيارة راحت
بدون تفكير طلعت اشوفة رحت بااتجاهة اول مشافتي مستغرب من كعدتي بهيج وقت سألني:
_شكو طالعة بهيج وقت..؟
_لا بربك!! اني الطالعة لو انتة؟ من الصبح لحد هسة رح يصير الفجر وانتة مختفي
_اهدي تعاي
لزمني من ايدي واخذني ناحية المزرعة كعدنا على المسطبة شوية ابعد من الحديقة مال البيت
_عوفني؛ انتة مو متعرف احد هنا اشو اجتي سيارة وصلتك
_شبيج انهديتي منين تنطفين هسة!!
جانت عندي شغلة خلصتها واجيت
_شنو هالشغلة..؟
ابتسم وضيك عيونة
_مو عساس ما متهمة لوضعي ومامهمتة لوجودي اشو هسة جاي اشوف حتموتين قلق عليه
انتبهت لنفسي شلون معصبة واحاسبة غمضت عيوني مستدركة الوضع الي اني بي رجعت كتلة:
_لاا مو هيج شعلية بيك اني بس اتسألت متعرف احد هنا وتأخرت بس هيج
_جنتي منتظرتني!
_اكيد لاا مااجاني نوم وطلعت
اتنهد وهوة يباوع بعيوني كال بتعب:
_جلمود مااردت ولو ذرة يصير كل هاذ ولا اجذب عليج واضم هلكد بس جنت مضطر هاذ هوة شغلي لازم اخفي بي هويتي وشغلي وكلشي يخصني..
مااردت تدخلين انتي بهاي السالفة لان ادري شراح يصير بيج بس صارت ودخلتي جان هدفي طول هاي الفترة شغلتين
المهمة الي اني بيها وانتي
يمكن لو تعرفين الي مريت بي وليش هالكد انجبرت اسوي كل هاذ جان عذرتيني
انجبرت اخلي عقل مراهق يصير بعقل رجال جبير
وانجبرت اعتمد على نفسي وابتعد عن حياتي واستبدلها بحيات كلها تخطيط وكره انجبرت اسوي هواي اشياء اني مااريدها ولا متعود عليها
اتخيلي اتغيرين نفسج بين يوم وليلة وتكتمين أسرار هواي اكبر منج!!
هيج عشت اني من يوم منحوس إلى هاذ اليوم اني مو علي الي الكل يعرفة صرت جبل مليان هموم وحقد وكره وسوء للي اكرهم
جنت اكول هاذ الجبل هم رح يستسلم بيوم!! ويعوف هاي السنين ضايعة بحياتة..؟!
وكل هاذ بسبب جاسر بسبب حقدة وكرهة وسوءة وبشاعتة يمشي ويأذي مثل الشيطان على هيئة ملاك
اخذ مني صديقي الي هوة ابوية وافلس اكبر شركة بكبرها خلة هواي ناس بيها بدون شغل والي جانو عايشين على هالوظيفة مافكر بيهم فكر بس بالسوء الي بداخلة
وحور اختي سلب منها روحها وصارت جثة بلا روح بيدي شلتها وهية عايشة على أنفاسها الأخيرة
وبعدة مستمر بكل شي بشع يخطر على بالج هوة ديمارسة بكل شي بي سوء.. سرقة قتل نهب
كلشي خطف ناس من الشارع حتى ياخذ اعضائهم والي يتاجر بيهم كل هاذ هوة مسؤول عنة جاسر
صافنة كل كلامة الي يحجي بحركة وبعيونة غضب احساسي بهل وقت مدري شنو..!
خيبة انو طلع عندي هيج اب لو قهر على الي مر بي جبل
_زين الي كلت عليها اختك شعليها شلون سلب روحها..؟
دنك راسة وابتسم بأسف
_اني هم سألت نفسي وكلت شعليها..؟
شابة بعمرها ليش هيج يصير بيها بس لانو كشفته على حقيقتة ورادت تفضحة بين كل الموجودين
ضربها ابره ممزوج بيها مادة تسبب الها تصلب بالشراين ومنطيها جرعة كلش قوية بحيث اقل من عشر دقايق مأثرة بيها وهسة هية جثة بلا روح خامدة ماكو غير عيونها مفتوحة
_شنو من بشاعة عندة يعني بسبب انو كشفت حقيقتة يحرمها من الحياة إلى أي مرحلة واصل
_الي يكتل اخو باايدة يكدر كلشي يسوي
_واكيد هوة الي كتل امي
_لحد هسة معرفت اذا عايشة او مكتولة اختفت عن الانظار بهذاك الوقت ومحد درة عنها
_مااكو انسان بحياتي جاي اقابلة اذا ميطلع أذية الي تعرف اني فسرت حلمي الي احلم بي دائما
عرفت الظلام هوة الماضي الي جاي اكتشفة كل يوم ودائما اوكع من جبل عالي عرفت هاذ الجبل انتة
انتة مو مرة كتلي مستحيل اخليج توكعين بس دااوكع دائما بكل مرة يطاردني هاذ الماضي دااوكع من هاذ الجبل
_مجرد كوابيس هاي
_ومرات الكوابيس تصير حقيقة
كمت وكفت وكتلة:
_مااريد نكبر هالسالفة اكثر من هيج رح نتعامل طبيعي بس اقابل جاسر وتخلص هالمهمة الي عندكم بعدها كل واحد بطريق ويخلص كلشي
عفتة دخلت وانظارة تمشي وياي كلام جبل بقة بعقلي ومكدرت اتخطى بهل ليلة
واني اسأل نفسي ليش طلع عندي اب بهل وحشية..؟
"أماني"
انظاري على شهاب الي شكلة هادئ الجملة الي طلعت مني خلت الوضع يصير كلة تساؤلات مااعرف اذا الي كلتة صح او لا
مااعرف انقذ نفسي لو اهلي والي احبهم..!!
دموعي تريد تنزل من الخوف الي دااعيشة
_حيدر: وين تريد توصل شهاب؟ هاي كدامك كالت كلامك مو صح..!!
_جاسر: شجاي يصير شهاب ليش هيج حجيت والبنية مجذبتك شصاير ؟
_ام جاسر: يمة أماني متأكدة من كلامج حيدر مغاصبج مثل مكال شهاب..؟
بعد تسألات على شهاب وحجي هواي وهوة بكامل هدوء يتفرج وعبالك كاعد بسينما حجة:
_شهاب: لا حجية ما متأكدة بس بيكم تسألون مجاي تباوعن رجفة ايدها صدكتوا كلامها ومشفتوا الخوف الي هية بي
طلع جهازة من جيبة فتحة وسمعنا كلام حيدر كلة من جان يحاجيني نفس التسجيل الي عندي بس اني ماانطيتة آلة شلون هوة عندة!
سمعوا كلام حيدر كلة الحجية تضرب على رجلها وتخزر بي وابو حيدر مدنك وعبالك كلشي يعرف وساكت خلص التسجيل رجع سدة وحجة:
_شهاب: انشاء الله سمعتوا زين واذا على أماني ليش جذبتني هسة.. لان الأخ يمنة دازلها رسالة ومهددة هم بااهلها ما مكفي خطف اخوها يريد يرجع على أهلها
كام حيدر بكل قوتة يريد يهجم على شهاب بس شهاب عندة مثل الورقة ودفعها رجع لزمة من ياختة وكلة:
_شهاب: اطلكها ومتتقرب الها افتهمتتت !!
واحد خازر الثاني لحد ما صاح عليهم ابو حيدر:
_جاسر: ككااافي شنو هالحترام هاذ كدامي وهيج واحد ياكل الثاني
ام جاسر: ايي شفت يمة ابنك شمسوي بنت العالم واني اكول ليش هيج البنية دومها ترجف عبالي هية هيج طلع هاذ العار ابنك مسوي سوايتة ومخلي بنت الناس لعبة عندة
ولك مااستحيت الناس كلها تعرفنا وتحجي بينة وانتة هيج مسوي لاحك هالفرخة والبنات تتراكض وراك من امداكك
ضلت الحجية ترزل بي وهوة مدنك والغضب واضح علية جان كلسع يباوعلي ويخزرني حيل وكأني كاتلة امة
ضليت ساكتة وخايفة يجي يتهجم علية كدامهم بسبب نظراتة الي
ضلوا يحجون وعمه وبيبيتة بس يزلون بي وخطية الحجية مبين ضغطها ارتفع ما سكتوا لحد ما صاح بيهم ابو حيدر
_جاسر: هاهية كافي الي صار صار ومحد يكدر يغير شي حيدر غلط واني وياكم والبنية يطلكها همزين ما عقدوا محكمة بس سيد
واني بذات نفسي اروح اعتذر من ابوها واخطبها لشهاب
جان يحجي ونظرة على شهاب حتى شهاب نظرتة الهم مدري شلونها خصوصا لعمة عبالك يكرهة صح هوة هادئ بس من يعصب يصير يخوف
جان كاعد ويستمع الهم وكال:
_شهاب: اي عمي خل يمر وقت واخطبها الي..
تعرف انتة بمقام ابوي الله يرحمة وماعندي غيرك
اباوع على ايدة ساد معصمة حيل وضاغط عليها وكأنة كاعد على اعصابة
_ام جاسر: اعذرينا بنيتي لو ادري بهاذ المتوحش هيج يسوي ولا اجي اخطبج اله بس شهاب انتي آلة ما طول تردي
_حيدر: هووب هووب اشو انتو اخذتوا راحتكم شنو شهاب ياخذها مرتي هاي ومستحيل اطلكك
_شهاب: لا يكلبي طلك وانتة الممنون
_حيدر: اشو انتة حاط عينك على مرتي ولكك بوية مااطلك ومتصير لغيري
_جاسر: حيدر موعد الطلاك باجر وكلشي ينتهي هاذ العندي
جان حيدر مصر ويصيح ويكول مااطلكها ورح اتزوجها خفت اكثر عبالي اهلة رح يوكفوا عند حدة بس طلع هاذ مالة رداد
بااثناء الهوسة اشرلي شهاب حتى اطلع طلعت ويا واني الرجفة بعدها بية احس ريكي نشف واني محاجية شي صعدت ويا وبالي مهموم
_عاشت ايدج ست أماني كمتي بالواجب وكفتي وياي ونفذتي كلشي كلتة الج
_شهاب لا تلومني صرت بدوامة خوف مو طبيعية جان تهديدة مثل الصاعقة وكعت على راسي
وهوة مو بس تهديد اكيد جنت سويت هيج وشكلة الي سوينا مجاب فايدة ومراح يعوفني
_رح يعوفج
_شيعوفني ما سمعتة يصيح ويكول مااطلكها
_رح يطلكج جاسر كال رح يطلكج يعني هاهية اعتبري هالشي خلص
_زين التسجيل منيلك؟ من السماعة الي حطيتها اني..؟
_ لا مثل ما توقعت شك بيج ولكة السماعة
_لعد شلون التسجيل عندك؟
_تتوقعين اني اعتمد عليج! حاط اني وحدة من زمان
_شنوو وخليتني اروح واحطها ويكشفني هاي عود صدوك تحجي
_اي صدوك عيني
_شهاب ليش هيج تنرفزني
_خلص كلشي اسوي ورا شي؛ لا عبالج اني فاهي مثلج المهم باعي
من ترجعين تكولين لاهلج انتو رح تنفصلون ودير بالج تكوليلهم اي شي عن حيدر وعن الي سوا طلعيلج اي حجة كولي مصار بيناتنة تفاهم اي شي
_زين ليش؟!
_رجعنا لأمونة السائولة
بابا سوي الي كتلج علية بس وها رح يجي جاسر بعد كم يوم ويخطبج الي من ابوج
_شنوو مو عساس كلامية وبسس؟
_لعد هسة فعلية رح يخطبج الي ويروح يسافر هوة وابنة عندهم شي يسونة عار مثلهم
_شنو؟!
_ماكو شي وبطلي فهاوة انتي خطيبتي لحد ما يولي حيدر سمعتي
_ماشي زين هسة تتوقع حيدر رح يعوفني
_منا لمن يسافر مااتوقع بس لاتخافين احنا سوينا خطة الخطوبة الكلامية بس حتى اعرف اربي حيدر
مدري ليش آمنت على كلامة لان لو ما هوة بسبب غبائي جان هسة كدر حيدر يثبت كلام شهاب مو صح بس شهاب طلع من صدك ذكي وحاسب حسابة
واني اكول ليش هالكد هادئ لان مخايف من شي وعبالك يعرف هاي المسرحية الي كدامة رح يصير بيها كل هاذ
لهذا قررت امشي على كلامة و اثق بي لحد ما يروح حيدر ويعوفني للأبد
وصلني للبيت جنت حايرة شلون افتح الموضوع ويا بابا
ضليت اصفط بالحجي لحد مااجة من الشغل
متوترة والكلام كوة حافظتة
رحت سويت جاي واخذتة آلة بصالة جان كاعد وحدة يتابع برنامج
كعدت يمة يسألني على دراستي لحد ما حس علية وكال:
_احجي بوية جنج عندج سالفة
_احم اي بابا بصراحة اريد افتح وياك موضوع يخص حيدر
_شبي خوما مأذيج؟
_لا بس اني من كتلك خلي نعوف فترة مدتها سنة للخطوبة حتى اعرف اذا مناسب الي او لا
_اي
_بصراحة اني مااشوف حيدر مناسب الي واحس تسرعت بقراري مااكو تفاهم بيناتنا لهذا قررنا ننفصل
_بوية اني وياج بكل قرار تاخذي والدليل وافقت عليه علمودج واني مجنت مقتنع بس اريد دكوليلي بس هاذ السبب الي يخليج تنفصلين عنة لو اكو شي ثاني ..!
اتوترت لان ادري بابا شلون يعرف كل حالاتي وحس علية حاولت اهدي نفسي واحاجي بهدوء
_لا بابا صدكني مااكو شي بس سامع الي يكول الإنسان يكبر كل يوم
اني فكرت بدراستي اهم من الزواج وعلى كولتك بعدني صغيرة والعمر كدامي
لهذا اني قبل ماانفصل عن حيدر اجيت اخذ رايك لان ادري مااكو احسن منك استشيرة
ابتسم على كلامي وباس راسي وكال:
_احبج لان فاهمة ولسانج حكيم اي بوية هاهية يجري الي تردي وخلي بعلمج هاذ يكون درس الج حتى علمود تعرفين تختارين ومااكو تسرع بحياتج
فرحت على كلام بابا احس مااكو كلمة توصفة ولا فعل بكلامة مخليني احجيلة كلشي بدون خوف ولا توتر جان دائما يكلي اريدج بوقت السوالف تصيرين صديقتي مو بنتي
صعدت لغرفتي واني فرحانة بس بنفس الوقت اكو خوف تجاه حيدر خاف ما يتركني بهل سهولة واني اعرف حظي
ورا شوية صعدت ماما وكعدت تسألني على اسباب انفصالنا وضلت تنصح وتحجي اخر شي كالت ابو حيدر خابر ابوج وكالة بأجر يطلكها عند السيد
وصدك رحنا اني وبابا لكيتة موجود بس يخنزر وعبالك حاقد عليه جنت منزلة عيوني ومااريد اشوفة خلص طلكني ويا شهود اثنين وانتهة كلشي
رجعت ويا بابا واني لو ما مااريد يحس علية جان كضيتها واني مبتسمة بس سويت نفسي طبيعية اجة بالي كلت معقولة ينفذ تهديده وصدك يأذيني!!
ضل بابا طول الطريق ينطيني نصايح ومدري شنو رجعت للبيت كبل خابرت ملك حجيتلها كلشي
_يااي وااخييراا خلصتي منة
_اي ولج الحمدلله بس ملك بعدني خايفة منة لج هاذ مصيبة والله حاسة مراح يعوفني بحالي
_باعي مأطول شهاب وياج وسوة الخطة مال الخطبة هاهية لعد لاتخافين ترة هاذ حيدر محد يعرفلة غير شهاب صكارة والة شلون طلكج هيج
_ماادري ملك اريدة يسافر بأسرع وقت وميرجع
_انشاء الله لاتخافين يمعودة
ثاني يوم كعدت حتى اداوم جنت اقنع بنفسي كوة على الدوام وانو ماكو شي ومراح يكدر يسوي شي
طلعت عبالي الخط اجة جان اشوف شهاب بوجهي هوة يأشرلي اصعد بسيارتة اشرتلة باايدي بمعنى شتريد!!
رحت اتقدمت على سيارتة جان كاعد بيها وكتلة:
_ليش تأشرلي؟
_صبحج الله بنور تعالي الخط مراح يجي اني كتلة
_ شمعرفك بخطي؟ وليش كتلة ميجي؟
_اشتغلت نقطة أمونة السائولة
_يعني تريد تكلي ماخليت خطج يجي وتعالي اني اوصلج واني اكلك اي تدلل هسة اجي
_احنا يمكن نعرف استاذ حيدر وافعالة واذا معاجبج هسة اتصل بالخط مالتج اكلة يجيج اني شعلية مخلفج وناسيج ردت اخذج بطريقي
_اووفف هم صدك انتظر اجيب اغراضي
_لاتنفخين
عفتة رحت جبت جنطتي وملازمي وصعدت ويا بقيت عيوني على الملزمة لان عندي امتحان وماحضرت زين وصلني وكال:
_لا طلعين قبل مااتصل
_زين شنو لشوكت تضل توصلني اذا بابا شافني مراح يفوتها الي
_روحي هسة ومعليج
_اشو انتة تتصرف وتخطط من كيفك ليش متحجيلي شي
_اعصابك جبار باجر جاسر رح يجي على ابوج ويخطبج
_زين اني شكول لأهلي واني كولت لبابا مااريد استعجل اكيد هالمرة مراح يصدكني
_لا دكولين لا ولا اي كولي افكر وخلص وهيج بعين حيدر اني خطبتج
_شديصير شهاب
_سلامتج بس نلعب توكي شوية ونطب
كلبت عيوني علية نزلت خلص الدوام عادي قبل لااتصل لكيتة هستوة واصل اتعجبت جنة جني بسرعة يظهر
احس ضجت من وصلني يعني اني بشنو اقربلة وياخذني ويوديني على راحتة!!
ذولي الي وياي مراح يسألون منو هاذ او واحد من المنطقة وهمة معروفين اتمنيت تخلص هالسالفة لان انتهيتت
جنت خايفة على دخلة تدخل امي وتكلي شهاب طلب ايدج خايفة من ردة فعل اهلي اكيد رح يحسون اكو شي مو طبيعي
عبالك صرت انسانة موزينة واني جاي اضم كل هالشي عليهم واني مامتعودة اضم هيج اشياء جبيرة ضجت حيل مدري شلون حتخلص
ومثل ما جنت متوقعة اجتني ماما وهية متفاجئة وتكول هستوج فصختي شبيهم هذول
معرف شجاوبها وحقها كالت جاي جاسر لبابا ومعتذرلة وكايلة مااكو احسن من شهاب الها واحنا منريد البنية تضيع من ايدينا ومن هالحجي
_والله هالناس غريبين لج هستوج مصارلج يومين من فستختي حتى الناس شتكول كلسع واحد من أحفاد بيت حجي حسن طالبين ايدها
_ماادري ماما خليها هسة لاتنطوهم خبر غلسوا
_احجي عدل ولج شنو نغلس هية لو اي لو لا شنو لعبة هية خوما لعبة
_ماما اني كتلج حيدر مجرد جان درس الية حتى مااقرر بسرعة وهسة لاتنطوهم خبر هم عيب شراح يكولون كلمرة اول شي يرفضون وبعدين يوافقون عيب
_هم صدك مو بسرعة نرفض ولو هوة الوليد ما ينرفض اسم الله عليه يخبل بس توبة عيني مااخليج توافقين بسرعة وتجيني تريدين تفسخين هية لعبة خوما لعبة
_اي امي لا تعصبين هوة هيج سوو الي تشوفوا مناسب
طلعت امي واني صافنة شنو هالموقف الي انحطيت بي هسة شراح يصير وهذا حيدر شوكت يولي متت ياربي اريد حل اطلع من مصيبة ادخل بمصيبة اكبر منها
مرت الايام وطلبت من شهاب الخط يجيني مااريدة هوة يوصلني والناس تباوع ويجي يوم بابا يلكفني لهذا كتلة شيصير خل يصير وهذا حيدر انتة شوفلك حل ويا تعبت اني
مر اسبوع عن انفصالي من حيدر وجان الوضع طبيعي وهادئ خابرتني ملك جان تكول:
_شسمة مدري شلون اكلج بس..
_شنو خوما صاير شي؟؟
_باعي بيبي مصرة تجي تخطبج اليوم ..شهاب منعها بس هية مصرة وتكلة انتة مو تحبها وتريدها خل نفض السالفة قبل لا تروح البنية
_خرب حظي وين اروح اطير بيبيتج ليش متصبر لحد ما يروح هاذ العلة
_شمدريني ولج نوب مصرة عليكم شهاب يحجي ويكول عيب من الناس هسة فسخت بس هية ابد وتعرفين بيبي بعد عنادها عناد
_عزا ملك هسة شسوي
_اهدي اختي اهدي باعي خوما رح تجيب الشيخ وياها ويعقد بس تجي تخطب بالحجي وعادي الوضع لاتبينين شي
_ماادري لج اني ليش هيج حظي زين امج شكالت!!
_امي مو كلش مقتنعة كالت البنية خوش بنية وأهلها خوش ناس واني اموت على امها بس منين طلعتلي بسالفة الخطوبة وكلت تحبها وهية جانت مخطوبة
بس بيبيتي سكتتها
كالت معليج صار شي وراح ومدري شنو اني اريد اجمعهم لان متفاركين وحجي بيبي الشاعري مدري منين اجة
_اخخ منك ياشهاب ما لكيت غير الخطوبة
_باعي كومي هسة اتجهزي اتوقع امي خابرت امج هسة شوية ونجيكم
سديتة من ملك واني العن حظي العاثر خرب حظج يااماني منين جا تجيني المصايب سمعت صوت امي كالت رح يجونة خطار تعالي انظف البيت
التهيت وياها وبعدين كمت حظرت نفسي لحد مااجوي جان التوتر بداخلي مو طبيعية
وكلبي يدك سريع خوف من الي راح يصير...
"جلمود"
ثاني يوم ما شفتة عرفتة طالع اصلا حتى ما يبات بالبيت مدري شعندة عفتة وكلت مراح اهتم ومعلية بي
جانت عمة ندى تحظر اكلات حتى تجي ناز هية وعائلة زوجها التهيت وياها احظر لحد العصر يلا اجوي
جانو عائلتهم بيها هواي ولد اتعجبت شلون هيج ناز رح تعيش ويا هيج احموين هواي
اتوقع جانو ٦ ولد و ٣ بنات واعمارهم متوسطة يعني مااكو فرق عمر بيناتهم هواي؛ ضحكت هاي شنو عبالك استنساخ كلهم بيض وشكر
رحبت بيهم عمتي احسن ترحيب فرحانة بنتها ضلينا نرتب بالسفرة طلعنها بالحديقة جانو حبابين ويسولفون اني بطبيعتي مرات اصير اجتماعية
ومرات اذا مو بمزاجي اي واحد غريب اخلي ياخذ عني فكرة المغرورة والشايفة نفسها..
جان اكو ولد منهم اسمة دلير
من جنت انقل بالأكل اجة يساعدني وهوة يبتسملي سألني:
_دلير:ناوی تۆ چییە(مااسمك)
_جلمود: جَلمُود
_دلير: مانای بەرد؟ (معنى الصخرة)
_جلمود:بەڵێ (نعم)
دلير: ناوی من واتای چییە؟ (ما معنى اسمي اذا)
_جلمود: بەهێز و بوێر(قوي وجريء)
ضحك وكال:
دلير: تۆ زیرەکیت و جوانيت (انتِ ذكية وجميلة)
ساعدني هوة يباوعلي مااهتميت بس من كعدت اشو اجة كعد بصفي محجيت شي لان همة عدهم عادي واحنا كاعدين اجة جبل
صاحتة عمتي وعرفتة عليهم راد يفوت جوة بس من اجتي عيونة علية وعلى دلير حسيتة عصب
كعد كبالنا جان ميعرف يحجي كردي وهمة ميعرفون يحجون عربي كلش
هاذ دلير ماخذ راحتة وياي ويسولف وجبل اتخيلتة رح يكوم يكتلة من كثر ما خازرة مابقى هواي هوة على هاي الحالة كام واشرلي اجي ورا
استأذنت وكمت منهم واني اعرف شراح يحجي طبيت جوة شفتة واكف ويفرك بوجهة اباوع على اذاناتة حمرر اول مفتت سد الباب وخلاني ورا
_بعد جان اتقربتي اكثر منة ليش هيج بعيدين!!
_شجاي تحجي ترة هوة الي كعد بصفي مو اني
_جان كمتي لو هسة خجلتي؟
_جبل احترم نفسك ومعليك بية
_اسسكتي لااطلع حركة هذاك العار بيج هذيج المرة لازمتلي واحد وتركصين وهسة هاذ الاشكر همزين رح نروح اشو ماخذة راحتج زايد جلمود هانم
_ادري انتة ليش هلكد حارك دمك متكلي انتة شعليك واصلا هنا عادي عدهم الاختلاط فلا تسوي هيج
_لا يستي مو عادي عندي مطلعين لحد ما يولون فهمتيي واريد تنعاد مرة لخ
_لا عليك الله اشو انتة ماخذ الدور زايد ياابن عمي
لزم معصمي واتقرب اكثر صار قريب إلى درجة نفسة الحار لفح وجهي
_مااريد أذيج خليج هادئة واسمعي الكلمة
ضل يباوع بعيوني وبعدة متقرب لحد مااني نترت ايدة وابتعدت كتلة:
_كتلك من قبل وارجع اكول لاتجاوز حدودك وياي جبل مثل ماانت متريد تعصب علية وتأذيني اني هم مااريد اجرحك
عفتة وطبيت جوة ردت اطلع واشوفة اني مخايفة منة بس اختنكتت حيل ومردت اشوف احد شوية واجت ناز تسلم علية حتى تروح وكالت سألو عليج خصوصا دلير
سألتها على جبل كالت فات من يمنا وهوة معصب مدري وين راح اتنهدت شجاي يصير بية اني ليش هيج هالكد افكر بي وبكلامة
طلعت لكيتهم رايحين؛ لثاني يوم مكدرت انام رحت للأسطبل لكيت جنار موجودة تنظف بالاحصنة شافتني مبين علية الخنكة
جنار: ليش هيج كأنك طالعة روحج؟
_جلمود: مابية شي
_جنار:اني اعرف جلمود لو يصير بركان بداخلها رح تكول مافيني شي واللهي ابوج ما انلام من سماك "بەردێک" (صخرة)
_جلمود: خلص مابية شي صدكي بس اجيت اخذ مدرو افتر بي شوي
_جنار: اخذي اخذي هوة هم كأنو رح يشتاقلج
رحت شبكت الاحصان الي اسمة مدرو كلش احبة يشبه مهرة هواي
_جلمود: واني هم رح اشتاقلة
اخذتة ورحت على المكان الي مابي اي مخلوق غير صوت العصافير والحمام ضليت افتر واني احس مااريد اعوفة
كل معنى الراحة بي اشوف هيح مكان فارغ ومليان طبيعة وحدها راحة ضليت احجي ويا مدرو:
_رح تشتاقلي مدرو؟
اني هم رح اشتاقلك هواي تعرف شنو
الانسان من يبقى وحدة بااغلب الأحيان بعيد عن البشر وعن كل هالمشاكل والضغوطات يرتاح هواي
واني متأكدة من رح اعوفك واعوف هاذ المكان الي احلم اعيش بكوخ صغير هنا رح ترجع
الحياة الي مااريدها اني
ليش الإنسان ميكدر يخلق قدرة بيدة ويحدد منو همة اهلة وناسة ومنو الي يريد وما يريد ليش ننجبر على ناس احنا منريدهم ونتمنى ناس همة مو النا
حسيت نفسي مثل الهبلة واني احاجي الحصان بوسط هيج مكان ضليت امسح على شعرة وابوسة
بقيت تقريبا ساعتين واني افتر ويا مدرو حسيت نفسي ارتاحيت رجعت لكيت عمتي ندى وجبل واكفين قريب على المزرعة
_ندى: وين جنتي بنتي ضل بالي عليج من الصباحيات طالعة والله عبالي صابج شي
باوعت على جبل الي طابك حاجبة ومبين معصب جاوبتها:
_جلمود: جنت يم جنار اخذت خيلها شوية واجيت
_جبل: حظري نفسج رح نطلع
_جلمود: وين؟
_جبل: شنو وين رح نرجع
_جلمود: مو عساس باجر ؟!
_جبل: لا اليوم يلا منتظرج
دخلت جوة مدري شحجي هالانسان كلسع مغير رأية لميت اغراضي من اجيت ما جبت هواي اكثريتهن منا
من اجيت هنا ستايلي اتغير صرت البس اكثر شي فساتين وشعري كمت اسوي مموج حسيتة لايكلي اكثر
حتى من شافني جبل حسيتة متفاجئ بشكلي كملت
كلشي وطلعت يم عمتي ليكتها محظرة دمعتها وكاعدة ضايجة
رحت يمها أقنعها ما تضوج لان رح اروح بقيت شوي اسولف وياها وكتلها توصل سلامي لناز ولزوج عمتي خطية خوش رجال ويعاملني مثل ناز
هستوني طلعت بالحديقة شفت جنار متوجهة النا اجتي حضنتني وتبجي
_جنار عساس انتي القوية ليش تبجين عود اجي قابل رح اموت
_أسس لاتوكولين هيح بس اتعودت عليج شسوي يابنت
المهم ديري بالك على نفسج واتذكريني دائما
_ههه ماشي
باوعت على جبل الي كاعد ولازم جهازة ورجعت كالت:
_بە زووترین کات لەگەڵ ئەم قۆزە هاوسەرگیری بکە (تزوجي مع هاذ الوسيم بأسرع وقت)
_يااا جنار شلزكتي!!
_معلية سوي الي كتلج علية والا اني اخذو منج
_ههههه
حسيت بجبل يباوعلنة وعبالك يعرف من جنار تحجي بالكردي يعرف تقصدة ومتريد يسمع سلمت عليهم واني بداخلي اريد ابقى يمهم
شكد صعب من تعوف مكان وناس انتة تحبهم اكثر شي اكرهة هوة الوداع بس جنت مجبورة اودعهم حتى اتذكرهم دائماً..
اجتي سيارة صاحب السيارة نزل وكأنة يعرف جبل سلم علية وانطة المفتاح وراح
_ليش ما رحنة ويا سيارات الي يرحون سفر
_لا أمن هيج
بقى يمشي حسيتة معصب مني عفتة وتجيت راسي على الجام اباوع على الطريق ومااريد اغمض ويفوتني هاذ المنظر الي احبه
بس ما كدرت لان منايمة ابد بالليل ماحسيت على نفسي غير غافية
صحيت على صوت وهوسة فتحت عيوني شفت جبل كاعد بمكانة ويسولف ويا شرطي على سيطرة مدري شنو
الي افتهمتة منهم هاذ الشرطي مدري عسكري يعتذر من جبل لان واحد من الواكفين متلاسن ويا ومعاملة بطريقة مو حلوة بس جبل مأدبة لان هيج يتصرف ويا المسافرين
حرك السيارة واني بعدني دايخة مدري بيش الساعة سألتة:
_بعد شكد ونوصل؟
_بعد اكو طريق لاتحطين راسج على الجام ينظرب
كلبت روحي على جهتة وتجيت راسي على الكرسي واني اباوعلة بعيون نعسانة اراقبة هوة يسوق لابس نظارات وهادئ رغم طابك حاجبة مدري شنو الي مضوجة بس طابك حاجبة عبالك متعارك ويا احد
غفيت بعد ما جنت مكابلتة واباوع علية مدري ليش!! رغم جنت نايمة بس احس باايدة وهوة يوخر شعري من خدي لو من يتلمس عيوني ويمرر ابهامة على حاجبي
واني عبالي حلم وماادري بنفسي
لحد ما صحاني كال تقريبا وصلنا جنت ااعدل بشعري جان يسألني:
_ليش هيج مسوية بشعرج
_شبي محلو!
_لا حلو بس شنو سبب التغير؟
_هيج ردت اغير
_بعد لا تكصي كلما ضجتي خلي يطول
_هاي شمدريك؟!
مجاوبني وبقى يسوق هوة شعري يجي على نص ظهري ومااحب اطولة ولا اكصرة كلش
احبة متوسط لهذا كلما حسيت بملل اجيت كصرت منة بس استغربت شمدري اني أكصر بي من اضوج!!
دخلنا على منطقة تشبه منطقتي تقريبا نزلت من السيارة واني اباوع على البيت جبير وحلو بس عندي بيوت الي بالقرية رغم بسيطة وصغيرة احلا من البيوت الفخمة والراقية
درت وجهي اشوف جبل جان ينفتح الباب الي كبالي وتطلع منة صديقة طفولتي الي حيصيرلي سنة مفارقتها
صحت بصوت مكتوم:
_أماني...!