رواية ياما تجرعت المرارة عشانك / للكاتبة أديم الراشد رواية مميزة

الجزء الخامس عشر من رواية ياما تجرعت المرارة عشانك للكاتبة أديم الراشد

💜🍃💜🍃💜
🍃💜🍃💜
💜🍃💜
🍃💜
*💜ــــــــــــــــــــــــــــــــــــــــــ💜*

الجزء الخامس عشر
جلس ابو طراد وتكلم بدر: يبه انا اقول لو املك الاسبوع الجاي احسن لا تطلع لي شغله تحوس علي كل شي بسويه
ابو عمر:انا ي ابوي ماعندي مشكله بس ظروف اريام اختك
بدر:اي ادري يبه عشان كذا بخليها عشاء عائلي بينا بس ولا بنكبرها ودي يبه اضمنها في ذمتي قبل لا يحصل اي شي ثاني
ابو عمر: اذا كذا ي ابوك ماهي مشكله ابد نكلم عمك شوي ونتفق معه ونحدد وان شاء الله خير
ابو طراد:الله يوفقك وانا عمك هذا هو الراي
قام بدر:انا اجل بطلع لدوامي واكمل اللي بقى منه
ابو عمر:الله معك ابوي
طلع بدر وتجدد حماسه من جديد وراح لشركه علي وصل وراح لمكتب علي وماحصله جاء طراد من وراه:بدير عندنا وش تبي في كل مكان تطلع حشى ي مروان تلودي
بدر: لا حول الله اذا ركزت ي ابو بريص بتلقاني جاي مكتب علي وعلي اخوي يعني انت مالك دخل
دخل طراد المكتب وهو يتفاخر بمشيته:واذا ركزت ي بدير اني شريك مع اخوك طيب وانا مدير يعني صوتك مايرتفع علي
قرب بدر لطراد وصار يخنقه بشماغه:مدير نفسك مدير ايش نفسه
سحب طراد الطفايه اللي قباله وكانت معباه زقاير وكبها على بدر اللي هرب قبل توصله وهو يضحك عليه بدر من عند الباب:اسمع بقولك شي
طراد:مابي اسمع اخرج من مكتبي
بدر:ههههه خرجت روح العدو قول امين اسمع بس ترا يمكن ملكتي الاسبوع الجاي
طراد بمزح:وانا وش دخلني فيك عانيه ماني جايب عانيه
بدر:ههههه مابي عانيتك خلها لك بس اقولك عشان اقهرك واحر قلبك واتشفى ي عزابي
طراد :هههههاو ضحكتني انا احتر على الزواج ي ربي لا تبلاني خلني كذا مرتاح
بدر:نشوف من يسامر ليلك اذا كلهم تزوجوا وجلست تسامر نجوم ليلك لحالك
طراد:جعلني اسامرها دايم لحالي اهم شي مرتاح واذا بغيت اتزوج بتزوج ناس بكامل قواهم العقليه موب مجنن ي ربي لك الحمد
بدر فهم قصده وضحك :المهم اذا قررت اعمل حسابك بتساعدني
طراد:اي وش وراي انا غير احوس حول عيال ال حاكم واساعد واداري وامسح دموع
جاء بدر وقرب من طراد وهو يبوسه:لا خلا ولا عدم ي ابو بدر
طراد: اهب وجهك انا اسمي ولدي بدر ناقص مجنن انا
طلع بدر اللي يضحك وهو عارف انه كله مزح لو جد الجد اول واحد بيوقف طراد ..
..

عند علي اللي وصل لريم وحصلها قالبه الغرفه فوق تحت والملابس في كل مكان دخل ضمها : افا والله ي خلف ابوي وجدي وش بك ليش كل ذا الزعل
ريم:ما حصلت شي
علي :ماعليه بندور ونحصل واذا ما حصلنا رحنا واشترينا مافي شي يحمل زعلك
ريم :واذا ما حصلت كيف بحضر
علي:والله والله والله لو تروحين بخيشه ان كل اللي حضروا ما يجون ربعك
ريم ابتسمت: اترك المجامل عنك وقوم دور لي شي
علي اشر على فمه وهو يضحك : اي بقوم
علي قام وهو يضحك وبدأ يحوس بين الملابس وكل ماطلع شي ما يعجبها واخير بعد عناء اقتنعت بفستان قصير ليموني وجلس علي ينسق لها الكماليات اللي بالقوه اقنع ريم فيها
علي:اوووف بالقوه خلصنا ي ربي وش ذا العناد
ريم :يوه منك عشان اذا قلت ما اعرف وش البس تفهم شعوري
علي وقف قبالها وهو يسحبها توقف : والله اللي في مثل جمالك ما يحتار انتي تزينين اللبس ما يزينك
٠٠

عند شيخه اللي كانت قالبه البيت قلب واقفه بالصاله ومعها كوره ولا يمر احد ما تصقعه فيها ومجمعه البزران وتمغط فيهم والصراخ قايم بالبيت جاء ناصر على صوت صراخ البزران وانفجع :شيخوه وجع
شيخه :وش عندك
ناصر:وش بك على العيال
شيخه:بلعب
ناصر :لعبوا فيك الجن وخري عنهم وخري
شيخه وجهت الكوره له وشاتت بكل قوتها وصكت ناصر براسه اللي طاح وهو يصارخ وانحاشت ركض لغرفتها وهي تضحك
فز ناصر وهو يتحلف فيها وقام يشوف عيونه اللي ضربتها الكوره وشافها حمرا حيل :حسبي الله عليك والله لاوريك بس انتظري والله ما تسلمين من فعلتك هاذي
شيخه وهي تضحك:والله محد قالك تلقف
ناصر :هين اوريك
طلع ناصر وهو يداري عينه وشيخه راحت تنام ولا كنها سوت شي ولا كأنها بعد ساعتين بتروح لعزيمه وجمعه ومطنشه شغل البنات والحوسه
٠٠٠

عند نجلا اللي كانت منسدحه بالصاله دخل علي وريم وهي ما انتبهت وكانت غافيه قرب علي وهو يمشي بشويش وصاح في اذنها وفزت وهي تصرخ علي من وراها:هههههههه بسم الله عليك
نجلا :وجع ي شيخ وجع انت وذا الطبع اللي مدري من وين جايبه
علي:بسم الله روقي ترا ما سويت شي
نجلا :الله عليك كل ذا ولا سويت شي تنتظر تذبحني وتقول سويت شي
علي: انت وش بك روقي اسف معاد امزح معك
صد وهو يسوي نفسه زعلان ولحقته نجلا اللي هدت :تعال ي دب انت بعد فجعتني وانا نايمه ويبي يزعل
علي:وش دراني انك نايمه
نجلا وهي تقرص خده:على فكره صاير زعول
ريم وهي واقفه:الله الله الحين ماسلمتي علي وفوق ذا تقرصين زوجي وتزعلينه
نجلا :وعووه عليك انتي وزوجك مالت عليه وعليك وعلى خدوده معك ..

ضحكت ريم وجات تسلم عليها وراحت نجلا تجهز لبدر ثيابه لانها بعد ما تحب الخدم تقرب من ملابس اخوانها مع ان بدر ماعنده مشكله
٠
وعلي وريم دخلو جوا يسلمون على الباقين
وبعد ربع ساعه وصل بدر وسلم على الكل
بدر:وين كنت اليوم جيت ادور مالقيت الا طراد اللي مو مقصر بشره ويحتك فيني مدري وش به ذا اليومين
علي:هههههه طراد اليومين هاذي يدور الشر يدور المشاكل كل يوم وانا اتناقر معه تمسيكته غلط انا رحت البيت وهو جلس بعد ما طلع قلبي
بدر:قسم بالله ياهو منفلت انفلاته مجنون
علي: تراه كل شوي يمسك على شي وشكله ذا الايام ماسك علينا
نجلا جات من ورا:بدر جيت يلا شوفني جهزت لك ملابسك عشان تلبس وتجي تتغدا اكيد جاي جوعان
علي :زمااان ي نجيل عن ذا الدلع صار كله لبدر
نجلا :وش اسوي انت تزوجت خلاص
بدر وهو يضم نجلا :خليك منه اللي باعك بيعيه خلي الدلع لي انا جعلني ما انحرم من الحنيه ي رب
علي :وعوه منك ي شيخ ما كنك بتبيعها وتروح لشيخه اللي والله لو تعفن ما التفت لك
بدر:خليها وش عليك انت
نجلا :يووووه مناقر في كل مكان
علي: وش بك انتي اليوم قافله معك
نجلا:ولا شي بس مصدعه وانتم بعد ازعجتوني بصراخكم خلاص بدر روح البس
علي قام لها وهو صدق يشوف مزاجها مو رايق :اسف لذا الدرجه راسك يوجعك اوديك المستشفى
بدر وقف من جهتها الثانيه: نجلا حبيبتي اذا تبين اوديك
نجلا : لا ماهي محتاجه الحين اكل مسكن ويهدى
علي وبدر فعلا خافو عليها من وجهها مايسر طلع بدر يلبس وسحب علي نجلا وجلسها وراح يجيب لها دوا
ريم:نجلا وش فيك
نجلا :مدري ي ريم مدري
ريم:بسم الله عليك وش صاير لك
نجلا: يمكن تعب مدري وش يطلع
ريم:زين خلي علي يوديك المستشفى
نجلا :لا هانت خف احسن من اول
جاء علي واعطى نجلا المويه والدواء وقال بحنيه: نجلا حبيبي خليني اوديك اذا تعبانه لذا الدرجه
نجلا :لا ي علي مافيني شي بس خليني اروح اريح تعب نوم بس
علي :خليني اوصلك
نجلا:لا تبالغ ي علي كله صداع
طلعت نجلا ترتاح وعلي يراقبها بخوف التفت لريم:وش فيها
ريم:ما ادري ماقالت شي
سكت وهو يفكر وش فيها اما بدر اللي قابلها وهي طالعه
بدر:نجلا
نجلا:هلا بدر
بدر:مابتتغدين معنا
نجلا :لا مالي نفس
بدر:نجلا الله يهديك مايصير لازم تاكلين
نجلا:يوه ي بدر لا تضغط علي
بدر :طيب طيب خليني اوصلك
سندها ووصلها لغرفتها وساعدها تنسدح وجلس عند راسها:اذا احتجتي المستشفى قولي لي
نجلا:طيب
باس بدر راسها وطلع وسكر الباب
٠
٠
نزل تحت وحصلهم متجمعين تحت جلس يتقهوى ودخل عمر :الله الله متجمعين
عبيد:لا تقنعني انك جاي صدفه انت تدري عن الجمعه قبله بأسبوع
عمر:انت وش دخلك لا جيت في بيتك تعال تكلم
عبيد:اصلا ماني مدخلك بيتي
دخل عمر يسلم وطارو عياله لريم ونطوا عليها يسلمون عليها
علي:وجع انت وياها خير وش انتم شايفينها
عمر:يوجعك وش بك عليهم هذا وهم يسلمون عليها
علي: مالت على ذا السلام بغوا يكسرونها
عمر :الشرهه عليهم اللي يسلمون تعالو ي بابا تعالوا خلوه يخيس هو وزوجته
علي بمزح : خذهم استغفرالله قرود قرود
بدر:مايسوى عليهم السلام مساكين
علي:والله وانا صادق اجل عياله اللي الواحد قد الاسطوانه بينطون على ريم اللي كنها الخيزران لا والله معصي
عمر :يالله وربي لو بيجي ريم شي كان ماتت منك وانت بحملهم عشرين مره
علي : عاد انت تدور الزله انا ما ارمي عمري عليها
ابو عمر:بس بس قوموا على الغدا
وقاموا تغدوا والكل فقد نجلا اللي كانت الغايبه الحاضره دايما وكلهم يحبونها ولا يرضون عليها شي دايم غامرتهم بحنيتها مع انها اصغر وحده لكن كلهم يلجأون لها حتى نوره وعمر وابوها
٠٠

في بيت ابو ناصر كانت شيخه جالسه بجنب ابوها ومتربعه وتأكل بكل اريحيه وناصر بس يخزها خز وناوي لها نيه
فواز:نويصر وش بها عينك
ناصر:وش بها عيني من المجرمه الله جنب ابوي
شيخه:هههههه قد قلت لكم لا تقطعون علي وناستي وش حاشرك ابي افهم وش حاشرك
ناصر:الله عليك تستانسين على حساب عيالي
ابو ناصر:وش فيه وش مسويه
ناصر:تخيل يبه صافتهم كلهم على الجدار وتمغطهم بالكوره وليتها الكوره خفيفه لا كورة الملاعب القويه
ابو ناصر:شيخه وش ذا ماتخافين الله فيهم
شيخه:انا ما لعبت معهم لين اخذت موافقتهم
فواز:وهم وش عرفهم مساكين
شيخه:يوه ياخي خلاص معاد بلعب معهم وجع ازعجونا بعيالهم هين بس خلوني يجي عندي عيال بس
فواز وناصر طارت عيونهم فواز:انتي ماتستحين على وجهك هاه وش ذا اللسان عيب عليك عيب
شيخه:وش قلت انا
ابو ناصر:خلصنا انت وياها تغدوا وقوموا فارقوا
سكتوا وصاروا يتغدون وشيخه كل ماشافت ناصر والا فواز يناظرون صارت تلعب بحواجبها لهم وهم مايقدرون يسون شي ..

في بيت ابو عمر بعد الغدا رجعوا اجتمعو بالصالون وقف عمر وهو يقول :ابي ابشركم بشاره
ابو عمر: هات الله يبشرك بالخير
عمر:ان شاء الله وان قاله الله ان بيشرف العايله فرد جديد من اسرتي
بدر وعلي وعبيد ضحكوا على تعبير عمر:وجع وش يضحك انت وياها
بدر:ابد سلامتك كمل
عمر:المهم ان بعد ٨ شهور بيجي لي بنت او ولد
ابو عمر:ماشاء الله على البركه الله يتمم ويرزقك برها
علي:يوه ناقصين اسطوانات نحنا
عمر:اقول اص بس باقي نشوف عيالك مالت عليك وعلى عيالك
ابو عمر:والله انك ي عمر كل مالك تزيدنا كبر بعيالك
عمر:وش دعوه يبه موب انا لحالي اللي متزوج هاذي نوره كل سنتين ولد وعلي على الطريق يعني الكبر فيكم فيكم وبدير بعد جاي على الطريق
الكل كانوا يعلقون ويسولفون حول الموضوع الا علي اللي انفتح جرحه من جديد وتذكر الشي اللي طول وقته يحاول يسج وينساه
تذكر عقمه اللي كاسر ظهره ومخليه كل ليله تنزل عينه من عين ريم وينسحب من حضنها اذا تخيل انها بتروح وتخليه اذا عرفت انه عقيم غاص بهمه وضاق صدره وهو يدعي ربه يفرجها من سابع ابوابه ..

اما عند ريم اللي كانت تحلم فعلا بطفل يجمعها بعلي ويوثق علاقتهم طفل يشبه علي بكل شي ناظرت علي وهي تشوفه سارح وشارد وملامحه ثابته تعمقت في وجهه الوسيم وروحه الحلوه وحنيته اللي مهما طغت عصبيته الا انها تفضحه وتظهر ..
علي اللي كان حاس بنظرات ريم وفاهم عليها بس عجز يلتفت لها ويشاركها الشعور فيه غصه تمنعه صحى على صوت عمر:هييييه علوش وين وصلت
علي يحاول يبتسم:ابد قريب
ابو عمر:وش تفكر فيه
عمر:ماعليك مني انا عيالك بيجون تريلات هههههههههههه
علي: ي ثقل الطينه ي شيخ وخر بس خل اروح انام ازين
ام عمر: اقعد يامو لسى بدنا نشرب شاي
علي:ماعليه يمه عليكم بالعافيه انا بروح انام لي شوي من فجر الله صاحي
بدر:لا تقول بتروح لبيتك
علي:ي رجل وش ذا الحيل اللي بيوديني بيتي لا بنام فوق بغرفتي
ابو عمر:اجل توكل على الله
بدر:اجل خلني اقوم انا بعد واريح
٠
طلع علي ولحقه بدر :علوش عليان وقف
علي:وش فيك
بدر:تعال تعال ابيك بشغله
علي:وش فيه
بدر: تعال بغرفتي
راح علي معه لغرفته وجلس على السرير وهو يوف بدر يسكر الباب وجاء ركض :اسمع
علي:وش بك انطق
بدر:انا كلمت ابوي اليوم عشان الملكه طيب وقلت بسويها عشا بس عشان اريام انت عارف وبسويها الاسبوع الجاي
علي:طيب بالمبارك الله يتمم عليكم
بدر:خل الكلام هذا ماخوذ خيره
علي : وش تبي طيب لحقتك الطفاقه من الحين
بدر:يوه ي علي اسمعني ي رجل
علي:قول طيب
بدر:اسمع تقوم الحين وتطلع جوالك وتدق على شيخه وتقول لها كل اللي قلت لك بشوف ردة فعلها
علي:قول والله
بدر:والله
علي:اقول قم ضف وجهك قال دق على شيخه قال
بدر: ي علي دخيلك يمكن ماهي راضيه تبي حفله يمكن ماتبيها الاسبوع الجاي
علي:عني انا جايز لها الوضع
بدر:لا لا ي علي دخيلك
علي بنذاله:الله واكبر عليك جاي تبيني اسمعك صوت محارمنا
بدر:اقول اكل تبن قال محارمنا صوت شيخه حافظه عن ظهر غيب هي خلت فيها محارم حافظها صوت وصوره
علي:وبعد يتكلم
بدر:يالله ي علي اخلص
بعد طلعت الروح وافق علي ودق على شيخه وبدر يراقب الجوال
ردت شيخه وهي تصارخ:لعنه انت وعيالك ازعجتنا ..نعم انت
علي:سكنهم مساكنهم اركدي شوي يامال الضرس
شيخه:اقول ريحنا انت الثاني وش تبي
علي:وش بك حاضرين معك
شيخه:لحول وش تبي انت الحين
علي : من مزعلك
شيخه:اسكت ياخي ناصر ذا يبي من يجمعه هو وعياله ويحرق فيهم
علي:ههههه ليه
شيخه حكت لعلي كل اللي صار وعلي ميت ضحك وصوت ضحكه واصل لاخر الحاره وبدر المفجوع وفي نفس الوقت يضحك بشويش
علي:مامعه حق صراحه
شيخه:تطقطق انت الثاني
علي:وانتي بقره ذولا بزران وشلون طاوعك قلبك تمغطينهم
شيخه: ي ربي ي النعومه ما مغطتهم بقوه لكن اوريهم السامجين بيتمنون بعيالهم لكن صبرهم علي بيرزقني ربي بعيال واشوف احد يتكلم
انفجر علي من الضحك هو وبدر وبدر منفجع من جراءة شيخه الفضيعه واللي ما تحسب حساب لكلامها علي كان يضحك
شيخه:وانت مانك فالح الا بضحك عجل جيب لنا بزر نلعب معه
اختفت ضحكة علي وبدا يتدارك وضعه:عيالي مالك شغل فيهم المهم اسمعي جايب لك خبر
شيخه: وشو وش صار مادريت عنه
علي:وانتي فيه شي يتخبى عنك يمال الوجع اركدي خليني اكمل
شيخه:اخلص
علي:شوفي بدر قالي انه بيسوي الملكه الاسبوع الجاي وبيسويها بس عشاء يعني بدون حفله عشان اريام ما تنحرج وانتي ادرى اذا ماعندك مشكله يعني حاب ياخذ موافقتك حول الموضوع
شيخه:يممممه بي عن وجهه ياخذ رايي من قدي
علي:افا والله وتغيرتي وصرتي تخقين
شيخه:مالك شغل انت قوله جعلني فدا
علي:شيخه ارفعي علومك ..

شيخه:اوووف منك انت بعد ما احد ياخذ راحته عندك
علي:ماتنعطين وجهه انتي
شيخه:لا لا جد اسمع انا ما عندي مشكله ابدا وجايز لي وازين بعد انه ماسوا حفله صراحه مالي خلق حنة امي وفوزيه مكياج ولبس وازعاج ولا لي خلق مشاكل في ملكتي بعد
علي:وليه المشاكل
شيخه: والله انت تعرف اني ما اجامل واي وحده ترفع ضغطي برنها رن بتوطى في بطنها مالي خلق صراحه رسميات وزود عليها ليش الكلافه يخلي فلوس الحفله بجيبه يحتاجها في وقت ثاني
علي انفجر ضحك على بدر اللي فعلا مصدوم ولا ضحك حتى بدر كان منفجع ما توقعها لذا الدرجه ما تهمها المظاهر وساحبه على الكل وكبرت في عينه انها تفكر لبعيد وماهي مثل كل البنات
علي:زين على زين اجل فارقي الحين بطس انام واقول له ماعندك مشكله
شيخه بمزح وهي تبي ترفع ضغط علي ومادرت ان بدر يسمع:بوس لي خشمه وقوله شيخه تقول الحمدلله مانك مثل اخوك ابو نص شعر
علي انتهى من الضحك لدرجة ما قدر يتنفس وسكر الجوال في وجهها وهو يدري انها تجاكره واذا تركها زياده بتجيب العيد ماقدر علي يوقف من الضحك على شيخه وعلى بدر اللي ساح في هدومه من الصدمه والخجل والضحك طلع علي وهو يسحب نفسه سحب وراح لغرفته وهو يضحك
اما بدر كان يضحك وهو مصدوم منها :يلعن ابليسها هاذي والله ينخاف منها وش ذا الجراءه يمه منها
٠٠٠

عند شيخه اللي اتكت وهي تفكر في يوم الملكه وبدر وجلست تضحك على شكلها بس وقامت تلبس عشان تروح لجمعة البنات
٠٠٠٠٠

في بيت الجد حاكم
كانت العمه ساره تدق على راكان ما يرد عليها
عبد العزيز :يمه اكيد نايم ولا يرد
ساره:ولعنته هاللي مايستحي ما كبرت في نفسه يشوف البنت اللي بتصير زوجته تعبانه ولا جاء حتى يزورها
عبد العزيز سكت وهو عارف السالفه:ماعليه يمه اكيد عنده شغل
الجد حاكم:مو عذر هذا مو عذر
صيته :عشتوا بعد تبونه يزورها وش يبي في وحده عميا
صرخ الجد عليها :قومي فارقي من هنا لا اذبحك الحين
قامت صيته وهي تحلطم ودها لو العمى في نجلا وعلي ومقهوره ليش انها ما راحت وتشمتت
٠
٠
عند راكان اللي لا ليله ليل ولا نهاره نهار ومحروق على اريام بس مايدري وش يسوي يدري لو فكر بس انه يقرب من حارتهم بيذبحه علي وخايف عليها وضايق ويدري انها ماتقدر ترد على الجوال وتمنى لو يقدر يشوفها بس مابيده حيله
٠٠

بعد العصر طلعت ريم لعلي تصحيه لصلاة دخلت وحصلته رامي نفسه وغاطس بنومه واضح انه تعبان اللي يشوفه يقول مرمي برصاص مو نايم ضحكت عليه وتقدمت وبدت معاناتها انها تصحيه وهو ولا كأن احد يناديه وبعد جهد وجهيد تحرك علي وهو يناظرها ببلاهه :من انتي
ريم انفجعت بعد شوي غمض علي وفتح وتذكر انها ريم زوجته وجلس يضحك:يوووه من زمان ما نمت ذا النومه
ريم:وجع فجعتني قلت فقد الذاكره الحين
علي:والله العظيم اني فعلا نسيتك على بالي للحين عزابي
ريم دفته وطاح من فوق السرير : اللي اخذ عقلك يتهنى
قام علي وهو يضحك عليها: ومن بياخذ عقلي غيرك هاه
ريم:اي اضحك علي اضحك
علي : وانا لي عين اضحك عليك الله يهديك
ريم ناظرته :علي
علي :عيوني
ريم:تسلم عيونك بس تخيل عندنا طفل الحين وينطط هنا بينا
ارتجف داخل علي وضاق صدره وحاول يجاريها بضيق : ان شاء الله بيصير عندنا وبنفرح فيه ونكبره
ريم حضنت علي بقوه وهي تبوس يده :ان شاء الله ويصير كذا زيك بكل شي
ابتسم على اللي ضاق من صدره وشد عليها وهو يدعي ربي ما يحرمه ذا النعمه
ريم:احسك ما تحب الاطفال
علي:عادي احبهم بس ماني متعلق فيهم اذا حصلتهم لعبت معهم واذا ماحصلتهم ما دورتهم
ريم:ان شاء الله عيالنا بتتعلق فيهم غصب عنك
ابتسم علي وهو يقوم بيصلي ويطلع لطراد :ان شاء الله
راح يتوضى ونزل يصلي بالمسجد وريم صارت تتجهز للجمعه
٠٠٠
٠
عند بدر اللي كان ناوي ينام بس طار النوم عنه وهو يفكر بشيخه ويضحك عليها وعلى هبالها وايقن ان حياته بتكون حلوه معها بس وين يودي قلبه اللي تعلق بمهره انزعج وهو خايف يظلم شيخه معه اللي وجودها نادر تعوذ من ابليس وقام يصلي ويدعي ربه انه يختار له مافيه خير
٠٠٠

عند نجلا اللي صحت وتحس خف الصداع واخذت دش ولبست وجهزت ونزلت لاريام تساعدها قابلها بدر
بدر:نجلا حبيبتي كيفك الحين
نجلا : الحمدلله احسن
بدر:يالله شدي حيلك ولا تستسلمين للمرض
نجلا :ماعليك شاده حيلي
قطع عليهم شيخه اللي جايه تركض بعبايتها ولا شافت بدر وتزحلق وتقوم وتركض وهي تصارخ :نجلا نجلا فكيني من ابو نص شعر بيخرب علي كشختي
نجلا وبدر تجمدوا من اللي يشوفونه وشافوا علي جاي يركض وبيده عقاله وهو يتحلف فيها واول ما شاف بدر صرخ وانفجر ضحك وهو يشوف شيخه تحوس بالصاله ولا شافت بدر وتحسبه عبيد جات تركض ووقفت ورا بدر:عبيد عبيد افزع لي وانتبه لا يجي اخوك الثاني ويشوفني كأني باتمان ويهون عن العرس ..

نجلا وعلي اغمى عليهم من الضحك وشيخه تضحك ولا انتبهت
لف بدر ولا حب يحرجها ونزل من الدرج وهو يضحك بشويش شيخه كانت تناظر فيه :اخس ي عبود صاير طويل
شوي طلع عبيد من غرفته:والله اني عارف انك هنا
التفتت شيخه وانفجعت :عبييد
عبيد:ايوه عبيد
صرخت شيخه وهي تسب وتلعن علي وعلي هرب للمسجد قبل تذبحه وهو يسمع صراخها فالبيت كله شيخه اللي راحت تركض لغرفة نجلا وهي تلطم نفسها وبتموت من البكى والفشله ...(اللي صار ان شيخه جات من بيتهم وقابلت علي عند الباب وهي ماره سحبت شماغه وعقاله ودفته وراحت ركض وعلي لحقها )..
٠
٠
عند بدر اللي كان طايح قبال الباب ولا هو قادر يتحرك من الضحك وعلي قباله نفس حالته جاء ابو عمر وانفجع منهم
ابو عمر:وش فيه وش صاير
ما احد تكلم من الضحك وجاء عبيد اللي ماهو مستوعب وش صار :مدري يبه طلعت على صوت ضحكهم بس شيخه موجودة اكيد سوت شي
ابو عمر فهم ان شيخه السبب وضحك وبالقوه قومهم وراحوا المسجد وعلي وبدر اللي قطعوا صلاتهم خمس مرات في الاخير رجعوا يصلون في البيت بعد ما أكلوا تهزئ من ابوهم قدام الكل
٠٠٠

شيخه اللي قلبت الغرفه فوق تحت وهي تصفق في نجلا وتحلف في علي وتحوس وتلطم في نفسها من الفشيله وتدعي بكل قوتها على علي اللي ماقصر في فشيلتها عند بدر
نجلا :خلاص ي بنت الناس
شيخه:وش خلاصه عسى مالك خلاص انا وين اروح بعمري وين هن باقي شي ماشافه بدر ي ربي
دخلت ريم :بسم الله شيخه وش فيه
انقضت شيخه على ريم وانحاشت ريم اللي حست ان علي السبب دخلت غرفتها وسكرت الباب وهي تضحك على شكل شيخه : ي ويلي الحين وش يفكني منها
سمعت صوت علي يضحك وفتحت الباب :علي تعال
دخل علي وهو يمسح دموعه من الضحك وجهه احمر ريم ضحكت من ضحكه وقالها علي السالفه وامسكت الهستيريا مع ريم بعد
سمع علي بدر يتنحنح برا فتح الباب وهو يضحك:ما يحتاج تتنحنح حلال كل شي شفته ههههههه
بدر ما مسك نفسه وضحك ودخل غرفته
وشيخه تسمع ضحكهم برا وتهبد في الجدران من الفشله
ونجلا انحاشت خافت تقلب عليها هي بعد واريام كانت تسمع الضحك ولا تدري وش السالفه جات نجلا وهي تضحك وقالت لها وضحكت اريام وهي تقول بنفسها(وين كنت عن كل ذا الوناسه قبل )
٠٠٠٠

عند طراد اللي يدق على علي لين مات ما احد رد عليه وحول على بدر نفس الشي وحول على ابو عمر رد عليه
ابو عمر: هلا ي ابوي
طراد:هلابك ي عم كيفك
ابو عمر: الحمدلله انت كيفك
طراد :كويس عمي حبيت اسالك علي عندكم
ابو عمر:ايه علي فوق
طراد:وليه مايرد لا هو ولا بدر
ابو عمر:لا تساأل من اليوم وانا اسمع الا ضحكهم وفضحوني في المسجد بالضحك
طراد:لا اله الا الله وشهو له ذا كله
ابو عمر :مدري لكن بقوله الحين يرد عليك
طراد:لا هنت جعلك سالم
سكر طراد وهو مستغرب من الضحك اللي يقوله وليش مايردون حرك واتجه لبيت ابو عمر
٠٠

اما نجلا كانت تدور على العيال واحد واحد وتقولهم يتوكلون على الله لانه خلاص بيجون البنات
بدر:بناكلهم يروحون لقسم الضيوف باقي ما جهزنا
نجلا:بدير ترا شيخه هنا يعني اطلع ازين لك
بدر:وش بتسوي شيخه يعني
نجلا :ماله داعي الفضايح يعني
بدر:وش فضايحه
نجلا :يوه ي بدر البنت بتاخذ راحتها بتروح بتجي وانت فيها اطلع وريحنا لاني لو رجعت لها وانا ما طلعتكم بتفرشني
ابتسم بدر واخذ اغراضه وطلع وراحت نجلا لعبيد
عبيد:يووووه وش ذا البنات ينطقون تحت لين نقضي
سمع صوت شيخه من ورا :عبيدوه فارق ازين لك باقي عينك طويله وتتربص للبنات
عبيد:انتي وش دخلك
شيخه:قسم بالله لو اطلع لين اطلع من الغرفه ابوك مايفكك مني تيسر وبلا كثرة كلام
طلع عبيد وهو يدري انها تسويها وراحت نجلا لعلي ودقت الباب
علي كان جالس يراقب ريم وهي تجهز ويشوفها محتاسه بنفسها
علي :هدي بشويش على نفسك
ريم:يوه ي علي ماعندي وقت
علي :عندك بس قولي انتي مطيره نفسك
ريم: يوووه وين العقد
علي قام وهو يضحك:تعالي هنا اشوف
جلسها وصار يلبسها العقد والحلق والاسوار والخاتم وهو يضحك من توترها اللي على الفاضي
وقفت ويم وصارت تصلح شعرها ومكياجها وبعد ما قضت لبست الفستان..
علي : والله لو بيدي ما اخليك تطلعين لهم
ريم :ليش
علي : اخاف عليك والله من العين اللي تشوف ما تسمي واغار عليك من اللي يشوفونك
ريم : يوه منك لا تحرجني الحين وبعدين انا ارقي نفسي
علي : معلوم بترقين نفسك بس حتى يضيق صدري ي شيخه
ريم : بسم الله عليك من الضيقه
دق الباب
نجلا :علي يلا عشان البنات بيجون...والا كملت الا شيخه رفست الباب ودخلت
وصرخت هي ونجلا
علي:وجع وش تصرخون منه
شيخه:يمه منك انت وهي قالت ايش قالت اخاف ..
طلع علي وتركهم وشيخه استفردت بريم :تعالي تعالي وشلون جبتي راسه
ريم باحراج:وجع وش جبتي راسه ..

عند طراد اللي اول ما وصل وشاف علي نازل نزل عليه بعقاله
طراد:الحين انت وش شايف نفسك هاه يومك ما ترد الا بعد اعلانات وبعد مايدرون كل الناس اني ابيك
علي: هههههههه ياخي والله ماتدري وش صار معي
طراد قرب من علي :وش صاير استاذ علي وش القنبله اللي مخترعها وش الانجاز العظيم اللي سويته
..

اما عند البنات اللي كانوا يتقهوون ويسولفون ويضحكون نطت وحده من صديقات اريام خاقه على بدر:اقول اريام وش صار على اخوك المزيون
ريم وشيخه فتحوا عيونهم اريام:اي واحد
سولاف :بدر ي زينه يخق باقي عزابي احجزوه لي خلاص
شيخه طارت عيونها :وش قلتي عيني
سولاف :اقول احجزوا بدر زينه يجنن هادي ورايق احسن من هذاك اللي بس معصب ونفسه
نجلا حاولت تتدراك الوضع وهي تشوف ريم وشيخه فحموا :سكروا الموضوع ما يستاهل
اريام:سولاف ترا بدر خطب وعلي زوجته موجوده يعني
سولاف :واذا ماقلت الا الحق لكن بدر متى خطب عساه ما خطب وحده ماهي من مقامه
شيخه انتفضت عليها وطبت عليها ومسكتها من شعرها:انتي ما تعرفين تسدين حلقك وتستحين هااه
سولاف :وخري ي مريضه
شيخه:من ناحية مريضه مريضه لكن استحي واوريك كيف تخقين وتنتقدين
وتوطت في بطنها والبنات يحاولون يوخرونها وبالقوه لين بعدوا شيخه عن سولاف وطلعت سولاف وهي تبكي
اريام:شيخه الله يهديك وش سويتي
شيخه:احسن هذا اللي ناقص بنات اخر زمن
نجلا:ههههههههه ايوه نعلن الحب والولاء لبدر يعني
شيخه تورطت:اقول انكتمي بس انا دافعت عن علي ليش تقول انه نفسيه وانا ما احب الحال المايل
ريم:كفو والله
نجلا:هههههه ي ابوي انا على اللي مايحبون الحال المايل
كملوا ضحك وسوالف وصديقات اريام كلهم مخروشات من شيخه
٠٠٠

اما عند علي وطراد اللي كالعاده يتضاربون في المقهى علي بيطلب قهوه بحلا اللوتس وطراد مايطيق حتى ريحة حلا اللوتس وداق دين ويمين ما يجيبه علي وعلي معند الا بيجيبه ويتقهوى عليه وصوتهم في كل المقهى
طراد:والله ما تجيبه ياخي خاف الله فيني ما احبه ما احبه
علي:انا اشتهيته ابيه نفسي فيه بتقهوى عليه وش تطلبني
طراد:يالليل المبزره اذا رحت لبيتك اطلبه وتقهوه عليه جعلك تغص به لكن الحين لا لا لا
حامت كبدي ي مسلم خاف الله
علي:مالك شغل تبي تقهوى تقهوى محد قالك شي وانا لي كبدي ولي بطني واكل اللي ابي مالك ش غ ل
طراد انفقعت مرارته :طيب خليني اتقهوى وبعدين اطلبه ي علي
علي ماكانت نفسه مره في اللوتس بس كذا يبي يحرق دمه: معليش
طراد طنقر وقام ومسكه علي :انطق باقي ما تقهويت
طراد :فارقني ياخي تقهوى لحالك
علي:امش ي مسلم امزح عليك اصلا ما طلبته بس كذا اجاكرك
طراد: قول والله
علي :وربي ي خبل اصلا انا معاد احبه دامك ماتحبه
طراد رجع :ايوه كذا ارجع تراك من يوم تزوجت قايم تنرفزني
علي:هههههههههههههه ي ذا الزواج اللي جننك
طراد:صراحه يعني انت مره اوفرت صاير تجاكر بشكل فضيع صاير تقهر وساحب علي والله ولا عاد تلتفت لي زين انك ترد على اتصالاتي
علي دقق في طراد:انت تتكلم جد والا تمزح
طراد اللي طقت روحه فعلا: لا اتكلم جد تراك من جد من يوم تزوجت وانت متغير نوعا ما ورب البيت صرت فعلا اشتاق لك ماعاد اشوفك الا في الشركه وبالصدفه اشوفك براها ماهي حاله ياخي
علي انفجع ما توقع طراد زعلان كذا ولا توقع انه مقصر معه لذا الدرجه قام وجلس جنبه:طراد الله يهديك كل ذا بقلبك وبعدين انت تدري اني صارت علي مسؤوليه زياده
طراد بضيق:ي علي الله يرحم والدينك لا مسؤوليه ولا شي انت قبل كانت تقوم القيامه عندك ومع ذلك كنت تدق وتراسل واذا مارديت عليك ترسل وتبلغني وش يصير معك حتى يوم كانت مشاكلك مع ريم فوق راسك كنت تدق واشوفك أكثر من مره لكن الحين ماش اذا مادقيت انا ماتدق انت
علي:انا اسف وربي لكن ماتوقعت اني قصرت كثير اذا هذا عتبك على عيني وراسي وابشر باللي يرضيك كم طراد عندي
طراد:مابي شي انا ابي ترجع علي صديقي اللي ادق عليه واشكي له ولا احس اني اتطفل عليه
علي :بسم الله ي طراد وش اللي قالبك كذا
طراد قام : ولا شي بس تعودت عليك بزياده
وراح طراد وعلي كان مصدوم وش اللي قلبه كذا وش اللي حارقه اول مره يشوفه كذا
اما طراد اللي كان ضايق وهو يحس فعلا علي بعيد عنه ماعاد هو مثل قبل تغير كثير قبل كان مجرد ما يمر ساعتين ما شاف طراد يجي لين البيت وامس طول اليوم ما شافه ولا دق حتى عليه ماكان غيران لا بس تعود على علي في كل صغيره وكبيره في حياته ..علي اللي فز وهو يحاول يستوعب زعل طراد وضيقه ولحقه حصله واقف بيركب السياره:طراد طراد
طراد:نعم ي علي
علي:افا ي خوي وش ذا الزعل
طراد:انا ماني زعلان انا عتبان ..

علي: والله العظيم اني اسف ما توقعت اني ابتعدت لذا الدرجه واذا على كذا حقك علي وانت تدري انك تسوى اهلي كلهم ولك عيوني
طراد كان ساكت قرب علي وهو يضمه :خلصنا عاد انت عارف كل شي
طراد: وخر عاد لا عاد تعيدها
علي:هههههههه هيا فضها سيره
طراد:امش نرجع نتقهوى بس هات فكنا من اللوتس
علي :لا لا بنتقهوى في مكان ثاني
طراد:وين
علي :امش بيروق لك
ركبوا وحركوا علي مدرك انه فعلا اهمل طراد ذا اليومين وانشغل مع ريم وطراد اللي عمره ما سحل ولا نساه حتى في اصعب اوقاته
٠

عند بدر اللي كان يتمشى هو وفواز وجلسوا في اقرب مقهى قابلهم وهم مندمجين بالسوالف
فواز:اقول بدر وش صار على اريام
بدر:باقي ما ندري وش بيصير
فواز بتردد :طيب شفتوا علاجها بالخارج
بدر:ايوه ابوي يتابعه بيشوف اذا لها مجال بينقلونها
فواز :زين انا سألت بأمريكا اذا لها مجال وحصلت في اطباء كثير يستقبلون حالتها
بدر:زين اجل خلنا نقول لابوي وانت اعطيني قايمه عنهم وان شا الله خير
فواز:جهزتها اصلا وقلت برسلها على عمي بالايميل بس قلت اسالك قبل
بدر:لا ماعليك ارسلها سريع
فواز:زين
٠٠٠

عند علي وطراد اللي نزلوا بكل حماس وهم كالعاده معاهم المويه وبخاخات الثلج  ولا قصروا في بعض وكل واحد طلع بكومة تراب ووسط لعبهم وحوستهم تعرض لهم شله مش طبيعيه وابتدوا يذبون كلام ويتكلمون بكلام مو حلو وبدا علي يفقد السيطره على نفسه وازدادت النقاشات بينهم وارتفع صوتهم وابتدت بينهم هوشه من لا شي ودخلوا علي وطراد في هوشه عريضه طويله وكانوا الشله معهم سكاكين وطعنوا علي بعضده واول ماشاف طراد الموقف وسمع صرخة علي انجن واخذ حديده كانت تحته وبدا يضرب فيهم من غير ادراك وشعور وبدوا الناس يدخلون ويفككون بينهم راحوا الشله وطراد ركض لعلي اللي ماسك عضده وسكين باقي فيه ماكان في طراد اي اصابه الا ضربه بسيطه في راسه سند علي:علي علي انت طيب
علي:طيب طيب انت فيك شي
طراد: لا استند علي
ركب طراد على السياره وربط على عضده بشماغه واسرع وركب السياره وشخط للمستشفى
طراد:الله يهديك ي علي كان طنشت المرضى هذول
علي: الله عليك وش رايك تبيني اسكت لهم
طراد:ماقلت اسكت بس انت تعرف ذا الاشكال بيدخلونا في مصايب واضح انهم ماهم طبيعين
علي:ولعنتهم
طراد:اسمع زين تهورك هذا بيوديك في ستين داهيه ي علي انت ماشاء الله عليك شجاع ولا تخاف لكن حط في بالك الكثره تغلب الشجاعه وهذولا بلا المفروض مانرد عليهم طنشهم في ستين داهيه روحك اولا واغلى
علي بتهور:معصي وانا اخو نجلا
سكت طراد وهو يعرف مدى العناد والتهور اللي براس علي طول عمره يقدم ولا يفكر وش عواقب امره ما يعرف تروى ويهدي عجز فيه وعجز يفهمه ان ذا التهور بيوديه في ستين داهيه
(علي كان عكس طراد في كل شي طراد كان صبور ويتروى وابدا مو متهور ولاهو عصبي باله وسيع وبايع الدنيا ولا يتصرف اي تصرف الا بعد تفكير مديد ونادر ما يطلع عن طوره ويتصرف بجنون واذا كان علي معاه ينسيه صبره بتهوره ويرميه معه بالمشاكل )وقفو عند اقرب مستشفى قابلهم ونزل طراد ونزل علي معه استقبلوه الطوارئ وبدوا يعالجون يده وطراد واقف فوق راسه ونفسه يهبده عند العناد اللي فيه
٠
٠
عند ابو عمر اللي كان عند ابو ناصر في بيته
ابو عمر:زي ماقلت لك ي ابو ناصر بدر مايبي شوشره عشان اخته ويبيها عائليه بس بينا ونبي رايك وراي شيخه
ابو ناصر:رايكم سديد ي ابو عمر وانت موافق على اللي تبونه واذا على شيخه مناسبها الوضع وانت تعرف مالها بذا كله
ابو عمر:اي والله الله يسعدها ويتمم عليهم
ابو ناصر:امين ومتى حابين تسوونها
ابو عمر:خلها الخميس الجاي وش رايك
ابو ناصر :الله يكتب اللي فيه الخير الخميس الخميس
دخل فواز:ماشاء الله عمي هنا
ابو عمر:اي والله حي الله فواز
فواز:الله يحيك كيفك ي عم
ابو عمر:بخير وانت
فواز:كويس توني كنت بجيك
ابو عمر:امر ي ابوي
فواز:مايأمر عليك ظالم بس قبل اسبوع سويت بحث عن المستشفيات والاطباء اللي يستقبلون حالة اريام وحصلت كثير وعرضت عليهم الحاله وافقوا وطلبوا يشوفونها ويشخصونها قلت اكلمك
ابو عمر:تقولها صادق ي فواز
فواز:ايه ي عمي وهذا التقرير تقدر تشوفه
اخذ ابو عمر التقرير وهو الفرحه مو واسعته وقف وراح يضم فواز وهو يمسح دموعه:الله يفرج كربك ي فواز والله والله اذا تشافت اريام لك مني اللي تبيه
فواز: انا يا عمي بأذن الله ضامن شفاها بس ودي بطلب وتحققه لي
ابو عمر:اللي تامر فيه يحضر
فواز: انا مطلبي اريام على سنة الله ورسوله انا باخذها وبعالجها دامني رايح رايح
ابو عمر وابو ناصر تفاجأو من طلب فواز الغريب تكلم ابو عمر بصعوبه:والله ي ابوك ما تغلى عليك لكن اريام عمياء و ...

قاطعه فواز:اريام عماها بسبب اصابه وفي اي لحظه ممكن تسترد نظرها وهذا شي مايعيبها بنظري وانا مستعد اتحملها واداريها عمري كله بعد اذنك واذن ابوي
عمر السكوت من هول الصدمه واستغربوا ان فواز من دون سابق انذار طلب الطلب الغريب استانس ابو عمر فيه وفرح لانه ما بيلقى واحد زي فواز بياخذ بنته ويحرص عليها ويعالجها
ابو عمر:ابشر يبه انا بكلم البنت والباقي على الله
فواز:الله يكتب اللي فيه الخير
٠
٠
عند البنات كانوا متجمعين ويضحكون على شيخه وفصلاتها
ريم:انا اقول ان الدافع كان عشان بدر
نجلا :حركات شيوخ صارت تحب
شيخه:شوفي انتي وياها من زمااان ما جلدت ترا قسم لو اقوم لدق فمك ي ريم لخليك بدال تبويس علي جبس مستشفيات وانتي الثانيه لمي نفسك لا احوسك هنا وش دخلك كان عن بدر كان عن جد بدر مالكم شغل
نجلا:وش قلنا نحنا وبعدين سولاف صادقه بدر ينخق عليه ويحتاج وحده ناعمه زيه
قامت شيخه ورفعت كمومها:اوريك النعومه كيف هربت نجلا وهي تقول :امزح تعوذي من ابليس
تركتها شيخه اللي طنشت كلامهم وكل اللي صار انها ماتبي احد يتكلم في بدر لا بشينه ولا بزينه وراحت تلبس ونزلت عشان السواق وقابلت عمها بطريقها :مرحبا الف ي صاحب الظل الطويل
ابو عمر:هلا بالشيخه وين رايحه مبكره اليوم بالعاده ماتطلعين الا تسكرين اخر لمبه معك
شيخه: افا ي عمي اجل انا مأذيتكم
ابو عمر:لا بس هذا يدل انك صاحبة بيت
شيخه:وش اسوي صراحه مليت من عيالك الحمير ما ينعطون وجه يعني بلا زعل ي عمي امسكهم وفهمهم الاسلوب خلهم كذا زيك
ابو عمر بمزح :عيالي صاروا حمير والله ما ندري من الحمار
شيخه:افا ي عمي لكن تمون تمون نعتبرها جرح منك ودرس من الزمن
ابو عمر ضربها على راسها:توكلي توكلي الله يعوض على ابوك وامك
شيخه:من عيوني لو تبي عمري هديه تبي شي ي عمي
تو ابو عمر بينطق وقاطعته شيخه: الله يرحم والدينك لا تقول ابي شي مالي خلق قول ابي سلامتك
ابو عمر:هههههه سلامتك ي ملسونه
طلعت شيخه وهي تضحك وشافت سيارة فواز وركبت :غريبه مو كان بيجي السواق
فواز:كنت موصل عمي وقلت اجيبك بطريقي وبعدين ردي السلام
شيخه:وعليكم السلام اسفه نسيت
فواز: وبعد انتي تراك مره اخذه راحتك في بيت عمي ولا كأن فيه رجال
شيخه: اوف ي فواز مافيه احد كلهم برا
فواز:دايم مو بس اليوم خفي رجلك عن ذا الروحات اللي كل يوم وانتي شايله قشك ورايحه عندهم ولا تنسين ان بدر بالبيت 
شيخه:اووووه واذا بدر بالبيت ولعنته انا عند نجلا واذا مره غيرت رحت لعمي او علي لا جيت وبدر ولا جاني ريحني عاد
فواز: اقصري صوتك واسمعيني زين بيت عمك تنسينه لين تتزوجين سامعه
شيخه:فواز الله يرحم والدينك ريحنا من ذا الموضوع وسكره بلاش تكبر بيني وبينك على الفاضي
سكت فواز اللي كان موسوس من سالفة اريام وخايف يتكرر معهم اللي صار والشيطان حاضر بكل مكان خصوصا ان شيخه على نياتها وتنجر ..اما شيخه كانت مطنقره من سولاف وزاد عليها فواز اللي مدري وش مشكلته مع وجودها في بيت عمها
٠
٠
عند علي وطراد اللي قضوا من المستشفى وطلعوا وطراد متحامل على علي وزعلان عليه ومع ذلك منتبه له وقف طراد عند اقرب محل عصيرات بطريقه وطلب لهم عصير
علي:بس مالي نفس بالعصير اطلب لي قهوه
طراد التفت له :علي بلاش تعابطني الحين وتطلع جنوني بتشرب العصير اقل شي يصحصحك ويرجع لون وجهك اللي شحب من كثر مانزفت والقهوه انساها الحين مالي خلق اجادلك بحرف واحد ولا تطلعني من طوري احسن لك
سكت علي وهو يشوف طراد فعلا طلع من طوره ولا يبي يناقشه يدري به معصب بعد شوي اخذ طراد العصير ومده على علي وهو ساكت وحرك وتكلم بغضب :وين اوديك بيتك والا بيت ابوك
علي:لا بيتي ماله داعي يشوفون يدي ويقلقون
طراد : زين دق على زوجتك خليها تجهز عشان نمرها
طلع علي جواله ودق على ريم وقالها تجهز بيمرها وياخذها وطراد اتجه لبيت ابوه
علي:وين رايحين
طراد:بجيب لك ملابس تلبسها عن ملابسك اللي مليانه دم بلاش تشوفها زوجتك وتصجنا مالي خلق حنه
نزل طراد وابتسم علي لطراد اللي طول عمره مهما عصب وزعل وتضايق الا انها يشيل همه ويخاف عليه ولا يحب يشوفه ضعيف
رجع طراد وهو ماسك بيده بنطلون وقميص فتح الباب من جهة علي :تعال انزل البس في المجلس الخارجي ...
نزل علي واخذ منه الملابس وساعده طراد ونزل معه ثوبه وطلع وخلاه يلبس لبس علي البنطلون بالقوه وسمع دق طراد على الباب  دخل طراد وفي يده القميص نزل فنيلة علي الداخليه وبدا يساعده بلبس القميص سكر الازارير لعلي وجمع ملابس علي القديمه واخذ اغراضه منها ورماها بالزباله
طراد:يلا عشان ما نتأخر على زوجتك
ركبوا وحركوا باتجااه بيت ابو عمر وهم كلهم ساكتين علي مايبي يتكلم ويزعل طراد اكثر وطراد ما يبي يتكلم وتكبر بينهم وصلوا بيت ابو عمر ونزلت ريم اللي استغربت السياره ووقفت نزل علي الشباك :ريم تعالي طراد بيوصلنا

تقدمت ريم وركبت وردت السلام وردوا عليها وحرك طراد والسكوت سيد الموقف استغربت ريم سكوتهم وخمنت انهم متهاوشين او شي
٠٠

عند بدر رجع للبيت وحصل الدنيا هدوء استغرب واتجه لغرفة نجلا ودق الباب وفتح حصل نوره ونجلا جالسين
بدر:غريبه مالكم حس
نوره :تعباااانين
نجلا :انا اعتبر جثه خلاص
بدر:هذا وهي جمعة بنات
نوره :والبلا جمعة البنات راح نص وقتنا نفرق شيخه وسولاف
بدر:وشو
نجلا:ولا شي ماعليك منها
بدر:الا علي وش السالفه
نوره قالت لبدر السالفه واستغرب بدر موقف شيخه وكيف حبته بذا السرعه ووصلت معها تدافع عنه
٠
عند طراد وصل علي ونزلت ريم ودخلت البيت نزل علي وطراد معه  مد طراد الادويه لعلي :خذ انتبه لها بأوقاتها لا تنساها واذا تعبت او احتجت شي على طول دق علي سامع
علي :ابشر
صد طراد بيمشي بس مسكه علي : بتروح وانت زعلان خلاص ي اخي فضها سيره مكتوب ومقدر
طراد : لا ترمي اغلاطك على القدر ي علي وبعدين انا ماني زعلان على الهوشه لا اذا حظر وقتها روحي قبلك بس انا زعلان من تهورك في كل شي ولا تفكر بالناس اللي خايفين عليك ويبونك ي علي انا اليوم معك وبوقف وافزع معه لكن بكره افترض اني ماني معك افترض انك طحت بيدين عيال الحرام وتكاثروا عليك انا ادري انك قدها وتصدها بس ي علي الحياه تحتاج تنازلات اتركهم عنك واسفهم عشاني عشان زوجتك عشان امك عشان ابوك ي علي محد منا مستعد يعيش تجربه جديده في تهورك ويبكي فقدك محد مستعد منا يكمل حياته وانت مانك معه ي علي عشان اللي يحبونك تنازل واتركهم وفكر قبل كل شي لا تنزل نفسك لهم بيتمكنون منك سوا بالغدر او الكثره انتبه لنفسك ولو مره وبطل تدوخنا وراك سبع دوخات صرت اخاف انك تطلع لحالك ي علي انت مانك ابو سنه او سنتين انت رجال عرض بطول جرب مره تصبر وتتجاهل وشوف كيف بتعيش
علي انحرج من كلام طراد :ابشر من عيوني بحاول بس انت لا تروح وانت زعلان مني تدري بي مايجيني نوم وانت زعلان مني
طراد:اوعدني قبل كل شي انك تنتبه لنفسك
علي :ابشر كم طراد عندي انا
تقدم علي وحضن طراد اللي بادله الحضن وهو يشد عليه وخايف فعلا على علي من نفسه ابتعد علي وهو يناظر طراد:لا تقول تبكي
طراد وهو يصد ويمسح دموعه: مالت عليك ماعاد. بقى الا هي ابكي عليك بس اني لاعت نفسي من ريحة الدم
علي ابتسم وهو يدري انه كذاب ويعرفه مثل الريشه ادنى شي يأثر فيه : معليش ي كذاب معليش
طراد ابتسم :هذا اللي انت فالح فيه بس تقهرني وتطقطق بعد المهم انتبه لنفسك وانتبه ليدك لا تجهدها شوي شوي
علي :ابشر من عيوني
طراد: يلا سلام
علي :فمان الله
ركب طراد سيارته وتحرك لبيتهم وعلي دخل بيته وهو يحمد ربه اللي عوضه بصديق عن مليون صديق التفت يدور ريم ..
       انتهاء الجزء ...
*💜ــــــــــــــــــــــــــــــــــــــــــ💜*
لاتنسوووا التصويت للرواية
i💜
🍃💜i
💜🍃💜i
🍃💜🍃💜i
💜🍃💜🍃💜i