#لعائلتنا_اسرار
الحلقه :الثانيه عشر
بقلم :فاطمه سالم الورفلي
........................................................................•🌸•🌸•🌸•🌸
بمرحلة معينة من حياتك بتوصل لقناعة إن أهم شي أهلك بخير ، والباقي كله يتعوض🖤
🌸🌸🌸🌸
عندي اني :
بعد مرور ايام.. واني ندير في البيتزا للعشي . . رن تليفوني.. خديته من على الطاولة.. واني نحط في الطاجين في الكوشه.. وفتحت الخط.. وصكرت الكوشه
اني :ها ايوه شيوم كيف حال
شيماء :بخييير.. و وينك انتي يا للا!.. معقوله امي ليها اسبوع جايبه.. وانتي عارفه .. وما تجيش يا محجوبه!
اني نطقطق على الطاوله بصوابعي بطريقه متتاليه.. ومنحرجه..ونفكر في كدبه نقولها :امم والله شن بنقولك الحق.. مشاغل وانتي عارفه .. وهكي
شيماء :تي شن هم المشاغل حتى صغار ما عندك انتي؟
اني :اخخ محتاجه نرتاح يا وخيتي نرتااح محتاجه والله
شيماء :ترتاحي !..ما اهو انتي متزوجه مرتاحه .. شن تبي اخر!.. هدا حل مناسب باش ترتاحي
اني : نبي تكلميني! نبيك يعني تتكلمي معاي، تسمعيني، مش تسيبيني ..وادوريني وقت المصلحه والحاجه....نبيك تحضنيني وتطبطبي عليا على الاقل!..مانبيش حلول..اني ندور علي الحب..على اختي....على ابسط حقوقي..أني ضعيفة ومكسوره وخايفة طول الوقت، وحلولك مانبيهاش ياشيماء
-"في اوقات محتاج تتكلم من غير ما حد يصححلك افعالك..او شي اخر، او غلط، لان مافيش حد مايغلطش.. مافيش حد اتعامل بمنتهي الانسانية مع ناس اذيته بمنتهي الوقاحة وللاسف مش مدرك انه هدا غلط اصلا.. وقتها مش مهم لا حلول..ولا نصايح..اكتر من الفضفضه..وقتها تبي شخص عشان تحكيله، تحكيله وبسسسس..تحكي واللي قدامك يطبطب ويواسيط.. حد يشيل معاك مش يجلدك ويزيدك على ما بيك..هز صح انك تلقى اللي يفكرلك طول الوقت شي حلو..بس الحزن مايبيس عقل..يبي حضن وطبطبة وتقدير للمشاعر .. بس الاهم ان يكون الشخص هدا.. شخص الصح.. لي ما يجرحكش فوق جرحك.. ما يزعلكش فوق زعلك.. والمهم ما يجاملكش.. يكون يديرلك كل هدا من الكل كل قلبه🍃"
......
-نرجعو لروايتنا🌸
شيماء :افف خلاص خلاص عاد مش فاضيتلك محجوبه سلام "وفصلت الخط "
-اتكيت على الرخامه.. وسندت ايديا عليها وتنهدت.. شوي سمعت صوت تطقطيق.. رفعت راسي شفت خطاب..
خطاب :احمم بتمشي لهلك!
اني زفرت وقعمزت على الكرسي.. وحطيت ايدي على خدي.. وخانقتني العبرة :اا لالا توا غدوا الصبح نمشيلهم
خطاب خش وقعمز على الكرسي وهو يشبحلي :همم شن مدايرتلي يا ام شدوق!
اني ابتسمت لا اراديا شبحتله :ام الشدوق!.. هههه جديده هدي
خطاب مبتسم :ايي ام شدوق زي البقرة الضاحكه
اني ضحكت :لااا هلبا هكي..
خطاب :نهاارك طفي الكوشه شكلها نحرقت
-نتفضت من مكاني.. ونضت طفيت الكوشه.. وفتحتها.. جيت قبالتها
خطاب :تنصهدي هك ابعدي شوي
اني بعدت شوي و ابتسمت واني نطلع في الطاجين:همم مش ملاحظ انك قعدت تتكلم زي كلامي!
خطاب قرب وقسم من البيتزا وقال وهو ياكل :عادي وين المشكله!
اني هزيت راسي يمين يسار نضحك :غر استني نقصها.. المهم قتلك غدوا لما بتمشي لشغلك ارفعني لحوش هلي
خطاب :اووك.. تنسيش الكاميرات.. همم طيبه زيديني
اني بضحكه: على هالحال اني طاجين وانت طاجين.. البيتزا ما عنديش معاها الروح
خطاب ياكل وهايم وفمه معبي: همم امم عادي
اني :غر راك تشرق 😂
-كلنا ماكلة..وكل واحد رقد في مكانه كالعاده.. بس كل واحد قضى ليلته بشكل اخر.. بنسبه ليا نشبح لزوايا الدار.. كل يوم يفوت.. محسوب عليا.. وح نرجع للجحيم حوش هلي.. بس هل ح نرتاح بعد ما تنحبس صالحه!.. مش معروف.. اما بنسبه لخطاب مزال خاطره في البيتزا 😂.. نبصر نبصر.. خطاب شخص خطير.. مهما كان عنده روح الدعابه والعفوية.. لكن جانب الجدية والغموض هي الطاغيه.. فاا مش ح نقولو لشنو يفكر خلي كل حاجه في وقتها❤لان كل شي في وقته حلو ولو 😉..
-صباح يوم الثاني🍃..
-نضت.. ناشطه.. طول نضت من مكاني... جهزت اول شي شنطه حطيت الكاميرات ولصقه وتليفوني.. وخشيت للحمام حشاكم.. توضيت.. وطلعت صليت..وبدلت..طلعت من الدار لقيت خطاب نايض ودايرلي قهوه ومسخن البريوش معاه
اني :اشششيه على النشاط.. صباحوو.. صباح النشاط
خطاب حاط ايد في جيبه.. زايده شاد الطاسه :قريب هربت عنك.. غر لما سمعت صوت باب الحمام انفتح درتلك فطورك.. فييسسع وقت وقتت
اني رشفت رشفه من القهوه :همم زي ما نحبها اني!.. خبرة صار عرفت كل شي عليا.. همم اصلا واتيه اني
خطاب ابتسم وحط صبعه على راسه اشر عليه :ولوو عيب عااد هههه
اني شربت القهوه كلها في رشفه وحده :هيا توا ناكل البريوش في السياره.. سخن السياره.. ما بين لبست وشاحي
خطاب :اوك
-وبالفعل طلع خطاب من الحوش بيسخن السياره.. واني لبست وشاحي.. وخديت شنطتي والمفاتيح وبريوشي اهم شي عاد 🤤.... وطلعت من الحوش.. صكرت الباب بالمفتاح.. وركبت في السياره.. وعم الصمت🔇.. تماما.. ما فيش صوت سوى صوت الانفاس.. ونسمه بارده تخش من الروشن.. تلامسنا.. لعند ما وصلنا.. نزلت.. وصكرت باب السياره.. وفتحت شنطتي.. وبدت المهمه.. خطاب شادلي الطريق.. واني بديت ندير في اللصقه ونلصق في الكاميرات.. مره في حاشيه الباب.. مره في جنب الجرس.. مره قريب الباب.. والخوف راكبني خايفه حد يشوفني.. كل شوي نشوف وراي.. والعرق يصب مني.. والخوف يسري في جسمي.. ما كملتش تلصيق الا واني قريب قلبي وقف..بين ما اني نلصق.. خطاب يراقب في الوضع.. لعند ما كملت.. وشيرتله بيدي.. وخشيت لحوش صالحه.. وزي ما تعرفو فتحلي بوي الباب..وخشيت ..حطيت كاميره على ايد الكرسي ولقيت شي تحت الفراش.. جيت بنشوفه.. خشت عليا صالحه.. استنيتها لين طلعت . . وحولت الفراش.. و ياريتني ما حولته.. لقيت سحر ايي سحر .. معاش عرفت ما ندير.... بلعت ريقي.. خديت تليفوني من الشنطه.. خايفه..نشبح يمين يسار.. ونرعش.. خديت نفس.. وصورت السحر.. واول ما صورته.. سمعت صوت خطوات تقرب.. خفت.. رديت الفراش مكانه.. وخشت عليا شيماء..
شيماء :خيير
اني متوتره :اا اهلين احم اهلين
شيماء قعمزت على الصالون :بااهي لي جيتي وتفكرتيني يا حنه
اني ابتسمت مجامله :ههه ايي
شيماء :افف لكن مش من الصبح عاد!.. قلقتينا
اني :حوش بوي يا سمحه راك تنسي بس
شيماء شهقت: اشيييه وطلعلك لسان يا للا
اني نضت :افف سلام مش ضايقتكم سلامتك ياحنه
-وطلعت.. بدون ما تعبرني شيماء ولا حتى تكلمني.. بس للاسف صار شي مش في الحسبان.. خطاب لقيته ماشي.. تأففت.. وجيت بنمشي لي امي.. بس سمعت صوت ما عمري توقعت نسمعه نهائي بعد هالوقت
:محجووبه
-التفتت .. واني مش قادره نصدق وداني من الصوت لي سمعته.. ولا نصدق عيوني من الشخص لي شفته "محمد ".. ايي محمد
محمد :اهلا كيف حال نبي نقولك شي
اني تنهدت :بخيير ..شنو ان شاء الخير!
محمد : من ساعة ما سيبنا..نحاول نهرب من اللحظة هدي
اني استغربت :لحظة !؟..شنو معلش شن قصدك؟
محمد طبس راسه وقال :اللحظة .. اللي نفتح فيها سرير القديم...اللي ماصكرناش بابه
اني عقدت حواجبي :لا القديم اصكر بابه بالقفل والمفتاح من لما اخترت تختار لي اخترته..
محمد :مش بمزاجك الحكايه
اني بعصبيه :وانت بعتني بمزاجك.. وجي الوقت لي ندير فيه كل شي بمزاااجي يا محمد.. وكل شي اصكر.. كمل.. انتهى.. وقف عند اخر لحظه .. وهدي اللحظه لي نقدر نقول فيها مافيش شي صار.. اي مافيش لان مافيش شي صار بينا ليه اعتبار.. باش نعتبره.. او حتى نفكر مجرد تفكير ندير اعتبار.. لان كله وهم سراب يا محمد.. كله وهم.. وخلاص معاش نبي نسمع منك.. ولا ليك.. ولا حتى عليك
محمد :يا سبحاان الله قداش تغيرتي؟
اني :لا ما تغيرتش.. تغيرت نظرتي فيك بس.. وصححتها
محمد :عندك الحق لي تبي تقوليه قوليه.. عارف ما عنديش ما نحكي بيه ولا عليه.. ما نقدرش شي نقوله الا انه سامحيني ونبي نقولك شي لازم تعرفيه
اني متمالكه اعصابي بالغصب :واللي هو؟
محمد :.... يتبع
............................................................................
قفشات بسيطه تعلن انتهاء حكايتنا ❤.. قريب نودعو كل بطل فيها ❤.. ويلا حبايبي رايكم وتوقعاتكم وتفااعلو بجد ضغطت على روحي باش نكتبها لعيونكم والله ❤
#فاطمه_سالم_الورفلي