لعائلتنا اسرار

التامنه

#لعائلتنا_اسرار
الحلقه :التامنه
بقلم :فاطمه سالم الورفلي
............................................................................
مفيش حاجه بتمشي بسهولة، اللي بيمشي بياخد من روحنا حاجات عمرها ترجع مره تانيه
🌸🌸🌸🌸🌸🌸
عند صالحه :
-اول ما طلعت من المقر.. وروحت لحوشها هي والبوسيفي.. وهي ارض الله مش سايعتها.. مش من الفرحه!.. لا طبعا.. من نار الانتقام.. وهي تاخد وتتوعد لي محجوبه.. الناس لي زي صالحه.. بمجرد ما تغلط فيهم على حسب ما يقولو.. بس انت في الاساس تبي تصلح منهم.. وتوقفهم عن ذنبهم وطغيانهم وتمردهم.. وحتى لو فنيت حياتك عشانهم.. زي ما دارت محجوبه وتزوجت عشان شيماء.. وعشان صالحه تطلع.. بس برضو مع ذالك مش ح يشوفو لي السيئ الحسن.. لي الجانب الحلو.. مش ح يشوفو لك اصلا بصوره كويسه.. لان اولا "كل الناس ترى بعين طبعها🍃".. ثانيا ما تراجيش من شخص غاضب ربي.. يكون كويس معاك .. وثالتا خلينا نشوفو تمردها لعند وين ح يوصل..

-"صالحه تكلم في سليمه بتليفون"

صالحه :درتيلها لي قتلك ولا شني!

سليمه :يا حنه تبي الحق ما عرفت كيف ندير.. الناس حايطينها من كل مكان.. حتى مشيت معاها لحوش عربها ما عرفتش كيف.. الناس بيشهدو عليا بعدين

صالحه :ما منك فايده.. لاقيني بس لاقيني من الشق

"قصدها بالشق.. في شق في السور....خدت صرة وطلعت صالحه من الحوش.. ومشت للشق لقت سليمه

صالحه :هاك بري حطيها قدام حوش سعديه

سليمه :عطيني القرشين مش على الابيض ره

صالحه كشرت وجهها :تي باهي غر بري بس

-وبالفعل مشت سليمه لعتبه حوش سعديه.. طبعا تحت انظار صالحه تختبر فيها.. باش تتأكد من كلامها لي قالاته مبكري حقا او لا.. بس مع ذالك ما كنتش بس صالحه تراقب.. لا برضو في شخص اخر مراقب كل شي.. وسمع كل شي.. تعالو نقوولكم كيف.. يتبع
🌸🌸🌸🌸🌸🌸
عند سندس :
السيد نصدم:القتل!.. اوو هلبا.. " سكت شوي وقال ".. لكن نقدر منو تبي تقتلي يا قطة!

سندس :خطاب

السيد :قصدك خطاب المختار!

-سندس تنهدت وهزت راسها..

سندس :اليووم ره

زهرة جت جايه وسمعتها :شن هو اليوم!.. همم تخططو من وراي صار!

-سندس ارتبكت..

السيد ضحك :لالا عيب عاد قصدها اليوم نجيبلها كيكه.. قالت نجحت في امتحان.. قتلها خلاص مالا تبي الزرده!.. قالت اليوم ههه.. " وشبح لسندس ".. مشي هكي ولا!؟

-سندس نصدمت من هدوئه وكيف يحكي بطريقه مرتبه بدون توتر لا شي شوي قالت في خاطرها " شكله اسطا في الكذب "

السيد :مش هكي ولا يا سندس!

سندس توترت :اا اي اي ونبيها بشكلاطه ره

السيد :ايي من حقك.. يا قرسون يا شاب تعال

زهرة نحرجت :والله ما في داعي.. تو نوريك يا فرخه

القرسون جي وقف عليهم :اي نعم تفضل يا باشا

السيد اشر على سندس :قوليله كيف تبيها هي.. هدا احسن مطعم فيك يا ليبيا

سندس :الصوت والهيئة كأن بحر

السيد :ههه لالا هدا مسبح.. والصوت هدي نافورة اهوينها بحدا الكاشير

سندس شبحت لي نافوره :اهاا ما انتبهتش

-هدا التصحيح.. في حلقه السابعه قلت بحر بلعاني باش نشوف هل في تركيز او لا 👀❤.. بس مالقيتش حد مركز.. يبقى ركزوو ح اخطاء بسيطه باش نشوف نباهتكم وتركيزكم في الروايه ركزوو ثم ركزوو في تفاصيل ندير هي مفاتيح لابواب حلقات الجايه 🍃

-"بينما السيد فاتح تليفونه.. زهرة وسندس قعدو يهدرزو "

زهرة :خوك هدا خلاص توا طيارته لابدة على وصوله لي مالطا

سندس :ختلنا ختل

زهرة :ريتييه اوو

سندس :ماما عندي امتحان غدوا خلي نروحو هيا

السيد حط تليفون على الطاوله:لا خليكم خيركم

زهرة :لالا خلاص مرة تانيه نعوضوها سلامات

السيد :و التورته

زهرة :اها ايي نسيت.. ماشي اني نمشي نسخن السياره.. وتاخدها سندس.. بس الحساب نص بالنص ره.. "وفتحت شنطتها وطلعت الفلوس ".. هدي 25 شفت اسعار الكيك في المنيو لابد 50

السيد :ههه مااشي مقبوله منك بس اخر مره ره

زهرة :لالا طول ما بتعزمنا احني بندفعو

السيد :هكي مش عزومه هي عاد

زهرة :عاادي كل شي معانا غير

السيد :هههه مااشي هي بسلامه

زهرة :سلام اهو بنسخن السياره سندس راك تعطلي

سندس :حاضر

-تبعدت زهرة هك.. والسيد شبح لي سندس

السيد :التورته واتيه من مبكري.. اني بعت لي الشيف ان يأخر بيها.. مش تشوفي فيا شاد التليفون

سندس استغربت :اها بس ليش؟..

السيد طلع كرت من جيبه :هدا كرتي.. باش نتفاهمو على كل شي

سندس :تمام تو نبعتلك رساله اني تكون وقت قبض روحه

السيد برفعه حاجب :طلع عندي ما تحكي يا قطه همم حلوه القطه وهي شرسه

سندس نحرجت :اا وين التورته!

السيد طق بصوابعه :يا الشيف غلف لي التورته لو سمحت

-وفي غضون لحظات بس سلموها لسندس

السيد :ان شاء الله تعجبك.. صحه وهناء

سندس :تسلم.. هيا سلام

السيد :سلام

-السيد.. قعد يشوف لي سندس وهي تتبعد عنه.. ويغني في راسه موال.. زعما شنوو 🙄.. خلونا نعرفو بعدين كل شي في وقته حلو ولا لا 😉

-خلونا طيب نمشو بعد ساعتين.. لان الساعتين.. ما صار شي فيهم.. الا انه روحت زهرة وسندس.. وزهرة بدلت حوايجها ورقدت.. لان العامل العمر ليه دور ما تنسوش 🍃.. اما بنسبه لسندس ما غيرتش حوايجها.. وطول نقزت على الكيكه.. وكل نفس.. وقضمه.. تلحقها الف فكرة.. بعد تفكير طويل.. اسندت على مخدتها.. وبلعت ريقها.. خدت تليفونها من بحداها.. وعلى طول بعتت رساله لي منو!.. هي عندكم تلاته تواني.. 1..2..3..بعتت لي السيد 👀.. ها شني صدفت معاكم 🙄❤.. لو صدفت معاكم قولولي في التعليقات عشان ح يكون ليكم اختبار.. خلينا نرجعو توا لروايتنا..

سندس بعتت رساله :" خلاص هدا الوقت المناسب اقتل خطاب "

السيد :"اعتبري جنازته توا "

-سندس ضحكت.. وقعدت تلف في التليفون بصوابعها بشكل دائري.. و شبحت للتليفون وابتسمت.. خداته.. واتصلت بي.... يتبع
🌸🌸🌸🌸🌸🌸
عندي اني :
لين وصلت للحوش.. ولقيت سيارات وجي راجل قبالتي..

الراجل :ارجعي وين ما كنتي

-قعدت صافنه فيه.. والشخص هدا شايفته بس وين ويين بسس!..

الراجل :ارجععيي قتلك

-وخرت خطوتين وقعدت نشوفله.. وبين اني واققه سمعت خطاب يعيط..

خطاب :اقتلوووها اقتلووها تواا

-هو قال هكي واني خلااص عرفت روحي انتهيت.. لفيت وعطيت لراجل بظهري.. وجيت بنمشي.. بس واني عيوني على الباب وبنطلع خلاص من السور.. سمعت صوت السحبه.. ايي سحبه المسدس..

الراجل :اثبتي مكانك

-دقات قلبي تسارعت.. انفاسي شارفت على الانقطاع.. الدم في عروقي جمد.. مافيش حل قدامي.. حتى الهروب ح يعلن موتي.. غمضت عيوني وعصرتهن.. لعلى وعسى نطلع من الكابوس هدا.. ويطلع حلم.. يطلع حلم ونلقى روحي جنب امي وفي حضنها.. بس للاسف هدا اني لي نقول فيه حلم.. حلم خلاص هدا.. حلم ومش ح يتحقق.. وهدي الساعه ح تكون ساعه موتي..

الراجل :تحركي من مكانك ولفي وجهك ليا

-حاسه روحي مراقبه من مكان..

الراجل يتنفس بقوه:خفيي روحك بسررعه

-بلعت ريقي.. وقعدت نمشي.. وكل خطوه.. نقول خلاص نهايتي قربت.. لنقنها قربت.. ومش عارفه ليش جي على بالي ابو محمود لي في باب الحاره لما قال ارربت ارربت 😂.. التفاهة احيانا مش وقتها.. بس مع هدا الخوف هو سيد الموقف.. ما خديتش الموضوع بأستهتار.. لان الاجواء.. وكل شي لي شفته وسمعته يربك.. يخوف.. يخليك تموتي في ارضك وتكون هدي ساعتك.. من الهدوء لدرجه اصوات انفاسنا مسموعه.. اعتقد حتى صوت دقات قلبي مسموعه يخي نسمعت وفات.. هدا غير انه مافيش ذرة امان في قلبي ولا حتى ثقه في خطاب.. يمكن عشان طريقه زواجي منه مش حلوه.. او يمكن ما شفتش منه شي حلو.. او يمكن وبلاصح ما شفتش في حياتي يوم حلو اصلا.. والكل غدروا بيا.. اي هدا السبب لي نقدر نقول هو لي خلاني مش مطمنه لحد.. بين ما اني نمشي.. وصوت ساعه الراجل.. هي قادرة انها تعلن ساعه ودقيقة موتي ..

تك تك..

-اهو قريب نخشو للحوش..

تك تك

-تقطعنا شويه لحظات للموت

تك تك

-اهو قدام باب الحوش مباشرة اني

تك تك..

-انفتح الباب

تك تك

-خش الراجل.. وخشيت وراه

تك تك..

-شبحت يمين.. يسار.. ظلام.. تك تك....... ولي صار صدمني.... يتبع
............................................................................
الرواية شارفت على الانتهاء.. كنت بنطولها الحق.. بس الامتحانات والضغط ح يمللو الروايه من التأخير.. فاا ادعو لي غدوا امتحان نحو نصفي.. وايي ره تنسو قولو رايكم وتوقعاتكم.. وهل صادفكم التوقع او لا.. لو صادفكم قولولي باش نديرلكم مسابقه حبايبي نحبكم❤
#فاطمه_سالم_الورفلي