لعائلتنا اسرار

التالته

#لعائلتنا_اسرار
الحلقه :التالته اضافيه
بقلم :فاطمه سالم الورفلي
............................................................................
عندي اني :

خطاب :امم زي ما تعرفي سندس بنت عمك كنت ضحيه من ضحاياه من بعدك انتي طبعا.. فا ح يكون شرطي هو نبي ناخد حقي

شيماء برفعه حاجب:انت ناويها بالشر يعني!

خطاب :اووف!.. ليش من قالك هكي!.. اني قلت هكي توا!

-شبحنا اني وشيماء لبعض مستغربين..

خطاب :ههه تو نفهمكم.. اني شاري بالحلال وبشرع الله

شيماء نصدمت :يعنيي!

خطاب شبحلي :يعني نتزوج محجوبه.. مقابل نساعدكم

شيماء :وكيف بتساعدنا

خطاب :نتكفل بي امك .. بس لازم توقع تعاهد .. في حالة دارت شي غلط او كررت لي داراته ح تنحبس مؤبد ومش بعيد تنحكم بالاعدام.. عاد سحارين محكوم عليهم بالقصاص

شيماء :وكيف بدير!

خطاب :لعند توا الادلة ما سلمتهنش للنيابة.. قاعدات عندي في الحوش.. فا لو توافقو نحرقهم وخلاص.. لان الاسحار كلهن تم فكهم.. وانتم ورايكم!

شيماء شبحتل بترجي والدموع في عيونها :محجوبه وافقي هيا

-اني بلعت ريقي.. ونشوف لي خطاب بأبتسامته المستفزه يشبحلي.. ويبرم في القلم على ايده.. مع اصوات الساعه

⏰تك تك

شيماء :وافقي محجوبه هيا بالله عليك

خطاب :ها يا محجوبه خيرك مش موافقه ولا شنو!

اني :وين بوي!

خطاب :بوك موافق اطمني

شيماء شدت ايدي :هيا بالله عليك محجوبه.. مش قتيلي ح نساعدك !

- بينما جبدت ايدي منها  اني .. ونطربق في صوابعي.. وعيوني يسرحن يمين يسار.. بوي وافق في سبيل صالحه!.. يعني بوي معاملته لينا مش مجرد سحر.. يعني السبب هو كبده غليظه علينا.. او بلاصح عليا .. مش مدورني

شيماء :مش قتيلي لو الحل تكون روحي نعطيها

-حايسه في كومه افكار.. اصوات جنبي بسيطه بس كفيله انها تشتتني.. ومن بينهم صوت الساعه..

⏰تك

⏰تك

-دقات قلبي متسارعه.. ومن بين هدا كله.. تفكرت محمد.. اي محمد.. لي دمرني وعشمني.. ومع ذالك ما حبنيش حتى ذرة حب.. مش عارفه ليش تفكرته.. يمكن عشان كان الالم لي سببهلي اقوى من كل شي.. او بسبب خلاني نجهد في حبه بي كل حواسي وعواطفي.. وكل ذرة حب فيا.. ليه.. يمكن او حتى اكيد حبيته اكتر من نفسي.. دللته دلال ام لولدها.. خفت عليه خوف اكتر من ايي شي.. عطيته كل وقتي.. حتى لو هو مش معاي تفكيري كله بيه.. كنت عايشه على ذكراه.. واسمه وصوته.. وصورته.. كل حاجه فيه.. نعرف عنه كل شي.. امتى ينوض ساعه 11..ونوض قبله بساعات.. وكل شوي نستنى امتى ينوض باش نتصل بيه.. ونسمع صوته لي رقدت على حسه.. نسمع صوته بلهفة بشوق.. على رغم ملياش الا ساعات سمعته.. كنت نقابل فيه كل مره بلهفة وحب اكتر من لي قبلها.. كنت متولعه بحبه.. واخد اكبر حيز في حياتي.. او بلاصح نقدر نقول هو كل حياتي من حين ما وعيت وهو ملازمني.. حوشهم قدام حوشنا.. هدا غير انه ديما يجينا.. بس توا في شي تغير واللي هو  .... "" المشاعر هي الوحيدة التي لا تعود بعد رحيلها " 🖤 !.. ومش ح ترجع.. وقعد في مكان لهيب نار الانتقام.. عاميتني وكلت كل العواطف لي نكنيها ليه في جوف قلبي.......... قطع على حبل افكاري صوت شيماء..

شيماء تحرك في ايدها على عيونها :محجووبه هيي وين سرحتي

"وحان الان اعلان القرار وتصريح به "

⏰تك

⏰تك

خطاب :فكرتي محجوبه!

⏰تك

⏰تك

شيماء مدتلي طاسه مايه والدموع متمركزه في عيونها لين تلمع :اشربي مايه محجوبه.. عارفه القرار لي بتخديه هو مصير حياتك.. بس مش ح تندمي ان شاء الله

⏰تك

⏰تك

-مديت ايدي.. خديت الطاسه منها.. والانظار محاصرتني..

⏰تك

⏰تك

شيماء تنهدت:محجوبه بالله عليك ساعديني

خطاب :خليها تاخد وقتها في التفكير..

⏰تك

⏰تك

-رشفت رشفه من المايه.. وحطيت الطاسه على طاولة المكتب

⏰تك

⏰تك

خطاب :شن قرارك

اني زفرت :قراري هو.... يتبع
............................................................................
عند سندس :

-وطلعت بالسياره.. ولما وصلو لنص الطريق.. نزلت سندس.. وامها باش يبدلو الاماكن.. بس شافو سليمان مع مراه

سندس حلت عيونها على وسعهن :مامااا

زهرة بلعت ريقها :اركبي لسياره انتي بس اركبيي

-سندس تشوف ومصدومه.. سليمان واقف ومعاه مراه تعتبر في عمر الثلاتينات.. لابسه سروال ضيق.. وبلا وشاح.. و بلوزه قصيره..

زهرة شبحتلها:اركبييي ما طلعلينيش عن طوري

-نخلعت سندس من صوت امها المفاجئ.. ركبت السياره فيسع.. وركبت امها حتى هي.. وصكرو البيبان

زهرة :ريتي بوك.. اخرة العمر واقفلي مع الفرخات.. اشبح من وين طلعتلي هدي

سندس :ماما خلي ننزلو

زهرة :اسكتيي .. كله من بوك.. بوك بيخوخمني

-وقعدو يشوفو لي سليمان والمراه.. لعند ما حتى هما ركبو السياره وحركو من مكانهم.. وقعدت زهرة اطارد فيهم.. من شارع لشارع.. من طريق لطريق بس في بعد بينهم شوي عن يلاحظ سليمان السياره.. لعند ما سليمان وقف السياره.. طول زهرة فتحت الروشن.. باش تسمعهم..

المراه :حبيبي ارفع الاكياس ثقال عليا

-جي يجري سليمان نازل من السياره.. طبس خدي الاكياس منها.. ولما رفع راسه.. جت عيونه على زهرة في السياره نصدم.. وفي اللحظه هدي.. فاض صبرها زهرة.. وفتحت الباب ونزلت والنار تقدح من عيونها..

زهرة ايديها في نصها :حبيبي صاار!.. ومخلياتك خاتم في صبعها.. وانت زي الدلدول.. تي انت الدلدول بطوبته.. تزازي بيها

المراه حطت ايدها على فمها ايدها التانيه على ظهرها:ييي متوحشه حبيبي مني هادي!

سندس طارتلها وجتها تجري غوله وفي ايدها غربال :تو نوريك التوحش على اصوله اني "وهجمت عليها.. وشعرها كله في ايديها.. والمراه تعيط.. وسليمان بيناتهم.. وزادت هجمت زهرة عليهم تضرب في المراه على بطنها.. عرفت انها حامل من حركه ايدها على ظهرها.. والناس تلمدت عليهم.. وما حولت سندس منها لين نص شعر المراه في ايديها.. والمراه خلوها في حاله.. متلوحه على الوطا.. وسليمان قعد يعاني فيها.. هن خافن وركبن يجارن لسياره وتحركن بيها..

سندس :ماما شكلنا قتلناها ولا شني حي علينا من بابا

زهرة ترعش ويادوب شاده الستيرسو :ان شاء الله يلحقها عقابها متزوج علياا!.. مخليني بين السحارات.. ومنافسني بعدين يطلع متزوج عليا!..

سندس :ماما اجري فيسع امشي لعيت خوالي خير ما يلحقنا بوي

زهرة :مانيش خايفه منه اني مانيش خايفه منه

سندس :ماما خلي نمشو لحوش خوالي هياا

زهرة :اسكتييي الا ما نكلم خالك اطلبيلي خالك.. اطلبي

-سندس خدت تليفونها ورنت على خالها .. وانفتح الخط

سندس :هاك ماما خودي تليفون

زهرة :افتحي المايك

سندس :فتحته

زهرة :ايوه عبد الجليل

عبد الجليل :ها يا زهرة كيف الحال

زهرة :تعال لي لحوشنا

عبد الجليل :شن في!

زهرة :تعال لي للحوش يا عبد الجليل تعال بس.. تعااال بنهببل من هالراجل لي عطيتوني ليه تعاال

عبد الجليل تنهد: غر صلي على النبي بس شن في!

زهرة :تعاال وجيب سلاحك قتلك تعااال

عبد الجليل :غر فهميني راسي من رجليا

زهرة :تعااال يا عبد الجليل قتلك

عبد الجليل :به باه هاني جايك تم

-وصكر الخط

سندس:ياام بعقلك تقولي هكي انتي عارفه خالي شني ولا

-زهرة وقفت السياره.. ونزلت ولقت عبد الجليل و.... يتبع
............................................................................
رايكم وتوقعاتكم تفاعلو حبايبي حلقه اضافيه ❤.. لو تفاعلتو اكتر ح نزيد حلقه اطول اليوم ❤
#فاطمه_سالم_الورفلي