عشقت انفاسك
الحلقه 6
كتبتلها (5 هههه عليك عنصريه باهي موافق شن تبي اديري )
( بنتعرف علي حد خاطب ولا متزوج ع الفيس وشوفه كيف بيخون مرته ويقعد يهدرز امعاي )
كتبتلها (😲حييي عليك خطه بتخربي حوشه هكي ) كتبت( بنهدرز امعاه 5 دقايق بس ونحدفه وندزلك الدردشه اتحق بعيونك حقيقتكم) كتبتلها (تم)
قررت في هاديك الوقت اني نربح التحدى خشيت علي ايميلي الآخر درت تعديل خاطب ودزيتلها طلب صداقه ومش عارف كيف فاتت عليها وافقت
(السلام عليكم انا اسمي زينب ممكن نتعرفو )
(وعليكم السلام أوخيتي )
(أنا عمري 19 انت كم عمرك )
قعدت تبعت في رسائل امتع تبي تتعرف وطيحني بس انا منردش
بعد 5 دقايق فتحت ايميلي الآخر وبعتلها
(ها الوقت كمل وين صورة الدردشه )
بعتت(😠 اشويه ونبعتلك رقم الكرت بس والله الوقت كان قصير ) بعتلها (😂 ديري الحق ع الوقت توا )
اشويه وبعتت ع الخاص رقم الكرت انا معبيتاش وبعتلها صورة الدردشه امتع راني انا الي كنت امعاك وكرت 10 بعتت (يعني نعتبرها هزيمتك)
كتبتلها ( اعتبرتها ) كتبت (بس حركه مش حلوه الي درتها) كتبت (الغايه تبرر الوسيلة )
(عند ولاء)
الساعه 1:30 انكلم في هشام مشغول
عاودت لين رد
هشام ** ها حبي
ولاء** فمن كنت اتكلم
هشام ** من انا كنت راقد
ولاء** يعني انا هبلت نسمع فيه ايقولي مشغول
هشام ** مش هكي بس بلكي نقالك
ولاء** هشام معاش اتكلمني
وصكرت قعدت نبكي
(عند هشام )
عاودت لولاء قفلت نقالها بعدها سعاد بدت اترن شيك عش البنت هذا متقلقش بكل دوختلي راسي كانت اتكلم فيا قبل مااتكلمني ولاء صكرت عليها بعتتلي رساله
(هشومي رد عليا) درتلها حظر وقعدت انجرب في ولاء بس مزال مقفل طارتلي صكرت النقال ورقدت
(عند ليلى)
نضت الصبح بحتت في أحمد مزال راقد طبست عليه بسته علي خده ومشيت بندير الفطور
اشويه ولحقني جئ تعنقني من وراء
أحمد ** صباح الخير ياعروستي
ليلى** صباح النور ياروحي
أحمد ** الله 😍روحك
ليلى** ايه روحي
أحمد ** باهي وحتى انت روحي
ليلى** والله
أحمد ** ههههه والله
ليلى** مريم مريم جت وخر
أحمد** صباح الخير مريومه
مريم** ثباح النور
احمد خدي مريم وقعمز هو وياها في الصاله ونا قعدت انفكر أمس كملنا زواجنا قدام ربي بس مش عارفه ليش حاسه اني متضايقه يمكن لان أحمد مقاليش أن حاسس اتجاهي بمشاعر حب وعلي الرغم من الي صار امس بس يمكن منظري اغراه
رعشني كالعاده محسيتش بشئ الي وهو حاط يديه علي كتفئ
أحمد ** السمح فيش يفكر
ليلى** متعياش من تخويفي انت
أحمد ** هههه انحب انشوفك لما ترعشي اتنطي ومنظرك يضحك
ليلى** اتحب اتشوفني وانا راعشه بس
أحمد ** ليلى شن في شن شاغل بالك
ليلى** لا شئ
أحمد ** ليلىىى إلا شئ هذا معناها وراها قصه كبيره
ليلى ** امممم أحمد مش نادم علي أمس
أحمد ** اممم قصدك الشئ الي صار بينا
ليلى** ايه
أحمد ** انت نادمه
ليلى** لا
أحمد ** باهي ليش
طبست راسي وقلتها
ليلى** لاني انحبك
أحمد ** وحتى انا مش نادم لاني انحبك حتى انا
رفعت رأسي وضحكتله
ليلى** والله
أحمد ** ههه والله
(عند أحمد )
مش عارف شن احساسي مش عارف الشئ الي درته أمس صح ولا غلط هناء لو عرفت هتزعل وانا منبيش نزعلها وليلى مش عارف شن انحس امعاها مرات انحس اني حبيتها ومرات انحس انها اتهون عليا لما نتعارك مع هناء مش عارف شن الاحساس الغريب هذا بس الي نعرف توا اني منبيش نخصر هناء وليلى توا انحل موضوعها اشوي اشوي ونسافر بعدها
أحمد ** ليلى هيا تمشى لهلي
ليلى** اشويه نلبس حبيبي بس
أحمد ** يانا علي منا حبيبك .مطولش ياحبي
ليلى** حاضر ياعيوني
(عند ليلى)
عرفت من نبرت صوت أحمد لما قالي نحبك أن مش متأكد وانا حاسس بأنه خان هناء امس
وانا قررت بنخش فالتحدي هنخليه يحبني مش هنخرب علاقته بهناء بس من حقي ندافع عليه وانا ماصدقت لقيته .زينب عندها حق
أحمد من الصاله ** ها ليلى مزال مجهزتيش
ليلى من الدار** طالعه طالعه يااحميده
أحمد ** يانا علي قوليها اخره
ليلى** أح مي ده
أحمد ** قلبي قلبي بيوقف
ليلى** سلامت قلبك ياقلبي
أحمد ** والله
ليلى ** هههه والله
مشينه لحوش اعيالي وكالعاده سلمت عليهم وقعمزت مع زينب نهدرزو وهو ركب لهناء كنت نغلي مش عارفه ليش كل مانتخايله امعاها توا
شكلي بديت انغار عليه
(عند أحمد )
أحمد ** صدقيني ماصار شئ بيني وبينها
كنت نهدي في هناء لأنها حامقه مني علشان سيبتها أمس ومشيت ليلى .مقدرتش انقوللها علي صار بيني وبين ليلى منبيش نجرح مشاعرها هيا مرتي وكل حياتي وانا لما شفتها بالحاله هذا زدت تلخبطت حسيت بروحي ندمت علي ليلة أمس .وفي نفس الوقت مش نادم ووووه بنهبل خلاص
هدت هناء اشويه وصدقتني ونزلت سلمت ع الكل الا ليلى
وليلى كانت تبحت فيا وانا مقعمز جنب هناء غمزتلها بدون مايلحظ حد طبست رأسها وتحشمت .مسمحها لما تتحشم
طلعت برا نبي انولع دخان لحقتني ليلى فكاته من فمي
ليلى** التدخين ضار بالصحه
أحمد ** لولو هاتيه
ليلى** إلا
أحمد ** نزعل راه
ليلى** عادي ازعل خير ماتموت
هناء** انت اي وخري علي راجلي
أحمد رعشت لما سمعت صوت هناء دفيت ليلى
أحمد ** هنو تعالي تعالي
معاش عرفت شن اندير نبي انرقع الموقف لانا هناء دخلت وليلى كانت اقريبه مني
هناء** احميده حبيبي البنت هذا ضايقاتك
أحمد ** هناءءء
هناء** ايه شن هناء.. انا نحكي جد كان ضايقاتك قولي نعرفها شغلها
أحمد ** لا ياحبي انسى مصار شئ
ليلى مشت وكان باين عليها قريب تعيط
قعدت جنب هناء اشويه ولعت الدخان وهي موقفتنيش كيف مادارت ليلى
كنت انفكر في الحركه الحقيره الي درتها لي ليلى ليش مرديتش علي هناء ودافعت علي ليلى لا خليت هناء تحسابها تتحرش بيا
معاش قدرت نتحمل رميت الدخان وخشيت ليلى كريتها من يدها لدار زينب كانت فاضيه وليلى كانت تبكئ
أحمد ** لولو سامحيني
ليلى😢😢😢😢
أحمد ** أنا آسف سامحيني ياروحي انحبك
ليلى** كداب لو اتحبني حقه راهو دافعت عليا وقلتلها هذا مرتي قدام ربي وخلقه بس انت خايف تجرح مشاعرها
معرفتش شن انرد لاني بروحي مش عارف الاجابه
طبست راسي
ليلى😢😢😢😢** وخر نبي نطلع
أحمد ** سامحيني قبل
ليلى ** أحمد وخر
أحمد ** لا لين اتقولي سامحتك
ليلى** سامحتك هي وخر بنطلع
أحمد ** مش عارف حاسها مش من قلبك .انقولك حاجه عطيني بوسه علي خدي بش انصدق ونخليك تطلعي
ليلى😘😚
أحمد ** يانا علي منك قتلك علي خدي بس انت شكلك منحرفة ههه اطلعي هي
(عند ليلى )
طلعت ونا مازلت حايره نعرف أن أحمد يمشى فيا وهو مزال مش فاهم وضع الجديد فجأه القئ روحه واخد زوز بس مستحيل نتخلئ عليه بنحارب عليشانه
مشيت لصاله زينب دزتني بنشد محمد ولد أحمد اصغير كان ابروحه مسكته بين يديا كان يبكى فجأه خشت هناء وقعدت اتعيط بصوت عالي
هناء** حييييي ياأحمد تعال ضرباته ضرباته الحق مرتك الجديده تضرب في ولادك الصغير
جئ أحمد وبحت فيا ألقي محمد بين يديا ويبكي أحمد كان باين عليه حامق جئ فك مني محمد وعطاه لهناء ورجعلي
أحمد ** 😠 معاش تقربيه فاهمه
هناء** انقولك ضرباته والولد يبكئ قريب يشرق ياأحمد الحق
بحت أحمد في ولده ألقي وجهه أحمر من العياط
فجأه حسيت بيد عطتني كف. أحمد رفع يده وضربني
أحمد **😠آخر مرا اديرهي سمعتيني .وتوا اقلبي وجهك
ودفني
جت زينب
زينب ** أحمد شن درت خيرك مع ليلى
أحمد **😠 تضرب فيه يازينب
زينب** لا اتبصر ليلى مستحيل اديرها
أحمد ** القيتها ماسكته بروحها في الدار وهو يبكئ وهناء شافتها وهي تضرب فيه صح ياهناء
هناء طبست رأسها
أحمد ** صح ياهناء ردي
هناء** مش عارفه ياأحمد مش عارفه
ومشت تجرئ طلعت
زينب ** ياأحمد محمد ولدك حرارته مرتفعه وأمه سيباته عندي انا نبي نمشئ انجيب مقياس الحراره لأن كاين يبكئ فقلت لي ليلي اتجئ اتشده يعني هيا كانت اتسكت فيه ياأحمد
(عند أحمد )
في اللحظه هذا تمنيت الوطأ تنشق وتبلعني معاش قدرت انبحت في ليلى نسمع فيها تبكئ عارف مش هتسامحني مديت يدي عليها .مش عارف خيرني يمكن لاني متلخبط وحاسس بالذنب اتجاه ليلى
وهناء
أحمد ** لولو بحتي فيا
ليلى😢😢😢
طلعت تجرى وسيبتني لحقتها القيتها طالعه هيا والصغار بتروح علي رجليها لحقتها بالسياره وقعدت نمشي بالشويه
أحمد ** ليلى اركبي بلاش اعناد
أحمد ** قتلك اركبي نتفاهموا
أحمد ** ليلى ردي عليا
خشت للحوش بسرعه وصكرت الباب .بديت اندق
أحمد ** ليلى افتحي خلي نحكوا مع بعض
دق دق دق
أحمد ** لولو عمري افتحي الباب بنحكي معاك بس
ليلى من وراء الباب ** 😢عدي لهناء احكي معاها وارقد غادي معاش اتجيني انا
أحمد **😠 ليلى افتحي احسنلك
ليلى** 😢 قتلك مش فاتحه عدي لهناء تفتحله
طارتلي منها
أحمد ** 😠 ايه بنمشئ لهناء وخلى اعناد ينفعك باهي
وركبت في السياره ومشيت لهناء
هناء** احميده نحطلك شئ تأكله
أحمد ** كيف شن ياهنو
هناء** جبنه تن قشطة الي تبيه
أحمد ** لالا ياعمري كملي مسلسلك وانا خاش بنرقد بعدين الحقيني
خشيت للدار وبدون مانغير دبشي ارتميت ع السرير
قعدت انفكر ..انا شن درت ليلى ماتستاهل إلا كل خير بس الخير هذا مش هيجيها مني انا انحب هناء ومنبيش نجرحها منبيش اندمر عيلتي اكيد هناء لما تعرف الي بيني وبين ليلى هتقولي يانا ياهيا وانا منبيش نخصر هناء وحتى ليلى منبيش نخصرها نبيها اتكون ليا ليا ابروحي. بس انحبها وولا لا مش متأكد الي نعرفه انا هيا اتحبني ووانا لا زم انحل المشكله هذا بسرعه .هنسافر مع هناء هذا الي متأكد منه .وليلى أن شاء الله اتسامحني
بس توا رايفت عليها واجد .مسكت نقالي وبعتلها رساله
( رايفت عليك واجد ) راجيت اشويه مردتش
بعتت اخره ( مش هتقولي حتى انا )
مردتش طارتلي اتصلت بيها كم مرا مردتش في الاول وبعدين ردت
ليلى** نعم اتفضل
أحمد ** ليلى خلاص عاد انا اسف
بدت تبكئ
أحمد ** لولو اسكتي تحرقي فيا هكي
ليلى** 😢انت الي حرقتني .تعرف ياأحمد عماد كان يضرب فيا أحرف من هكي بس مكنتش اندور بس كف خلاني مجروحه تعرف ليش لأنك مهم عندي
أحمد **😳 ياروحي اسكتي خلاص سامحيني بالله عليك معرفتش شن صارلي
ليلى** لو سامحتك المره هذا
هتعاودها اخره وآخره وتقعد زي عماد
أحمد ** ليلى اسكتي متقوليش هكي انا مستحيل نرفع يدي عليك مرا اخره
ليلى😢😢😢😢😢
أحمد ** هسسسس خلاص ياعمري اسكتي
أحمد ** لولو كان جيت توا تفتحيلي الباب
ليلى** لا متعبش روحك
أحمد ** يعنى عقاب
ليلى** أحمد بنصكر زياد يبكئ
صكرت مني ليلى وانا حاسه مزالت زعلانه .يمكن توا تقعد تكرهني وهذا احسن بش متتأثرش لما انسافر .بس كيف تكرهني انا منقدرش نتحمل هكي هيا اتحبني ونا عاجبني الوضع هكي .وووه بنهبل
رقدت
( عند حسام )
اليوم معنديش نيه نمشئ للكليه فتحت النت وبعتت للبنت الي أمس كان اسمها زينب( صباح الخير يامتعقده )(صباح النور )(ها شن رأيك في تحدي كيف أمس 😜)( أنا توا في الكلية بعد انروح ساهل )
صكرت النت وعديت للورشة عند ياسر راجل سمر اختي
ياسر ** شن الجو يانسيب
حسام ** اكويس ماشيه وانتم كيف حالكم
ياسر ** الحمد لله نخدم من الصبح لليل ويالا املحق
حسام ** عندك شئ اليوم
ياسر** والله أحمد صاحبي عازمني ع العشئ اليوم
حسام ** ياعيني ياعيني عزام وصقع
ياسر ** هي شن رأيك تمشى امعايا اصلا انا نبي انعرفكم ع بعض
حسام ** تي لا يارا شن دخلني بين واحد وصاحبه
ياسر** اسكت اسكت بتمشئ يعنى بتمشئ اصلا حتى أحمد يبي يتعرف عليك
(عند ياسر)
وافق حسام ع العزيمه وانا وصلت للحوش بنغير دبشي .
سمر ** حبيبي رجعت
ياسر** ايه سموره
سمر ** تعال نبيك
ياسر ** نعم
مشيت قعمزت جنبها مسكت ايديا
سمر** حبيبي عندك افلوس
ياسر** عليش ياروحي
سمر** عرس سهى بنت خالتي قريب وانا نبي قفطان جديد
ياسر** ياعمري مش شريتي قفطان مليكش واجد
سمر ** ياسو هذاك شافوني بيه كلهم
ياسر** يعنى لازم كل يوم لبسه شكل
سمر** ايه ياحبيبي خيره اخصاره فيا
ياسر** لا ياعيوني مش اخصاره فيك .خليني توا ندوش وبعدين ساهل
خشيت ندوش وانا انفكر من وين بنجيب حق القفطان الجديد انا راجل حالتي المديه مش اكويسه يادوب قادر نصرف ع الأكل والحوش .عمي مصطفى كان معاه حق عمي مصطفى بو سمر هما جماعه بدخ وسمر متعوده ع الدلع والدلال ولما مشيت نخطب فيها عمي قالي هالكلام قالي بنتي مش هتقدر تقعد امعاك لأنها متعوده علي العيشه المرفه
بس بنحاول بندير جهدي منبيش نستسلم
طلعت غيرت ومشيت لحسام بش نأخده ونمشؤ لاحمد
(عند أحمد)
خبرت أمي اني بنعزم ياسر ونسيبه ع العشئ وهي مقالت شئ بس طلبت مني انجيب ليلى اتساعدها لأنها فالحه في التطيب
اتصلت بليلى وقلتلها وهي وافقت بس معاملتها ليا كانت بارده بكل
خشت للمطبخ اول ماوصلت وهناء كانت فوق
أمي ** أحمد قول لمرتك لاخره اتجي اتساعدنا
زينب ** لنقنا فكنه منها خليها في حوشها خلى جونا رايق
أحمد ** زينبببب
زينب ** ماقلنا شئ خلاص تو نسكت
بحتت في ليلى كانت غارقه في التطيب مش مركزه علي كلامنا .وكأن في عقلها شئ
أحمد ** ليلى خلي اللحم كبير باهي
بحتت فيا وكشخت
زينب شكلها لاحظت الشئ هذا طلعت ونادت علي امي تلحقها
وانا وليلى قعدنا بروحنا في المطبخ قربتلها
أحمد ** رايفت عليك ياعمري
ليلى** حول مش وقتك
أحمد ** ليلى كنك امعاي غلطت وطلبت السماح خلاص بلاش دلع
ليلى** انا ندلع يااحمد
أحمد ** تي احلى دلوعه في الدنيا سامحيني
ليلى** ايصير خير
أحمد ** لا توا اتسامحيني اصلا اليوم جاي عندك انا
ليلى** مش هنفتح الباب
أحمد **ليلى زودتها راهو
ليلى** عندي شرط كان تبي اتجي .اتقول لهناء علي وضعك الجديد وان زواجي انا وياك مش ع الورق بس وتعدل بينا يعني يوم عندها ويوم عندي. هذا شرطي
مشت وخلتني واقف مصدوم
مش عارف شن اندير القيت روحي راكب لهناء وبدون تفكير
أحمد ** هناء نبي انقولك حاجه .ليلى مرتي زي ماانت مرتي يعني ليها حقوق زي ماليها واجبات وانا عطيتها اسم الزوجه يعني تزوجت انا وياها وكملنا الزواج وفهمك كفايه وانا هنا بش انقولك اني هنكون يوم عندك ويوم عندها
شبحت في روحي في المرايه** لالا أخيه الكلام هذا
كنت ندرب كيف بنقول لهناء بس هيا سمعتني وخشت اتخبط
هناء** كيف ياأحمد كيف ادير فيا هكي مش قتلي مش هتقرب عليها
يتبع