عشقت انفاسك
الحلقه 11
(عند ساره)
باتي اتفق مع يوسف أن الفرح هيكون بعد اسبوعين . طبعا لاسئلني لا خدأ شوري
سمر طلبت من ياسر صوره ليوسف بش اطمني اشويه يعني ع الاقل نعرف شكله
وجابتلي الصوره كان منظره حلو حبيت شكله بشرته حنطيه طوله متوسط نعطيه أصغر من 31 لابس بدله عربيه ولحيته واصله لنهاية رقبته وبداية صدره .بس باين من عيونه انه واعر
طبعا باتي خدأ نقالي بس انا خديت نقال نهله مرت معاد وكلمت طارق وخبرته انهم يبو يزوجوني
والحقير قالي ان شاء الله ربي يهنيك ولو عزمتيني بنجي . كنت عارفه انه عقاب فرخ صايع بس مش عارفه ليش سمعت كلام صحباتي وكلمته
كنت مقعمزه انقشر في البطاطه في المطبخ بش اندير العشاء . ونهله كانت اتساعد فيا . سعاد وعائشه يضمن في دار الخزين مع امي
نهله سكنت عليا إرشادات ونصائح كيف نتعامل مع يوسف لأن نهله عندها خبره لانه باتها حتى هيا شيخ .حكتلي كيف يعامل في امها وكيف محترمه
مرت سعاد علينا وطبعا لازم تستفز نهله قعدت تعطي في رأيها في كلام نهله وحكت علي بنت خالها زوجها مدين ومنكد عليها حياتها
خلاص حسيت بروحي بننفجر فيهن يلقحن في الكلام لبعضهم علي احساب مشاعري
قريب فصلت عليهن علي خشت سمر
سمر / كنت ماره من جنب المطبخ سمعت كلام نهله وسعاد خشيت عليهن حزيت ع العركه نهله ركبت بعد رمت كلمه لسعاد قالتلها. .. انا راكبه انجهز روحي مودي حبيبي بايت عندي اليوم وخلاص اشوي وجاي معاش يتحمل بعدي ياروحي
سعاد رقالها خشت لشقتها ولمت اصغارها معاها
قعدت مع ساره هديتها اشويه وقلتلها أن ياسر عاجبه يوسف واجد واكيد حتى انت هتحبيه . مفيش مشكله لو كان واعر أو متدين اشويه اكيد انت بمعاملتك هتخليه يتغير
حاولت نقنعها بس مزالت حايره وخايفه
تعشينه ولمينه الحوسه مع بعضنا وركبت لشقتي
ادوشت وجهزت الطاوله حطيت موالح شاريتهن من النت ايهبلن ثلاته أنواع وسلطات ومشروب
حطيت اشموع ورشيت ورد كنت حابه اندير جو رومانسي لياسر لأنه الفتره الاخيره كانت علاقتنا مش اوي .لبست روب قصير طلقت شعري مع ميكب خفيف .وقعدت نرجى فيه
وراجيت وراجيت بس مجاش
خلاص حسيت بروحي نعست ورقالي لميت الطاوله ومسحت المكياج ومشيت رقدت
ياسر / رجعت متأخر للحوش كنت في العمل فاتح مشروع اخره غير مشروع مصنع الميه . نبي انحافظ علي افلوسي منبش انضيعهن ع الفاضئ .لو قعدت هكي بدون ماندير رأس مال ليا هيكملن افلوس الورث وهترجع معاناتي مع سمر مر اخره . بس توا هي اكيد فرحانه بيا . معيشها زي ماكانت عايشه عند هلها مغرقها افلوس
تأخرت في المشروع هو مطعم امتع وجبات خفيفه . مشروع في بدايته كنت انرتب في المكان.مع مجموعه من الأصدقاء وشركاء في العمل
روحت خشيت لشقه مضلمه اكيد سمر راقده بحتت في الطاوله القيت شموع وجو ورد
يلعنجدي اكيد زعلت . خشيت لدار القيتها راقده . غيرت دبشي وجيت شورها طبست عليها بستها علي خدها فطنت بيا ناضت اتلف في شعرها فوق
