عشقت انفاسك
الحلقه 16
( عند أحمد )
مشيت اندور في ليلى خطمت شور دروج هناء
😲😲😲 القيت ليلى طايحه وفاقده الوعئ
جيتها نجرئ وبديت انادي في امي
مسكتها وكانت تنزف
جت امي حطت عليها وشاح وطلعت بيها لسياره زي المهبول
رفعتها للمستشفى. دخلوها طول للعمليات
بعد ساعه طلع الدكتور
الدكتور ** يعوضكم ربي خير ان شاء الله البيبي طاح بس المدام ليلى حالتها اكويسه تقدر اتقول مستقره نوعا ما
أحمد **لا حول ولا قوة الا بالله المهم ليلى بخير نقدر انشوفها دكتور
الدكتور ** بس مطولش
أحمد / خشيت عليها في الدار وانا نقاوم في ادموعي .ولدي عدئ سلومه راح الله غالب
قعمزت جنبها في السرير كانت مغمضه اعيونها
مسكت يدها وبستها ناضت فتحت اعيونها
ليلى ** أحمد انا وين . شن صار
أحمد ** ليلى لا لا اركحي متنوضيش وعر عليك
ليلى ** أحمد شن صار
أحمد ** 😢 طحتي من الدروج
ليلى ** البيبي ياأحمد شن صار فيه
أحمد **تي اركحي في مكانك
ليلى **😢 أحمد شن صار
أحمد ** يعوضنا ربي خير ان شاء الله
ليلى ** 😢😢 لا متقولهاش 😢😢
أحمد / قعدت اتعيط خشت عمتي فاطمه قعدت اتهدئ فيها وخشت الممرضه
/
/
/
(عند هشام )
هشام ** والله ماتاكلي نزعل منك را
ولاء ** حبيبي معادش خاطري
هشام ** الكشيك هذا بس عشان خاطري
ووكلتها
هشام ** وهذا عشان خاطر ليلى
ولاء ** هكي غش
وكليت
هشام ** وهذا عشان خاطر
ولاء / نضت وسيبته ع الصفره
هشام ** ولاء تعالي كولي قتلك
ولاء ** هشومي حبيبي والله شبعت
هشام ** باهي خلاص بس انا مزال مشبعتش تعالي قدامي بش تفتحي نفسي
ولاء / جيت قعمزت جنبه قعد يبحت فيا
ولاء ** هيا كول
هشام ** مسكت يدها بستها ** وكليني انت
ولاء / قعدت انوكل فيه وهو يبحت فيا
هشام / انحبها ومش عارف كيف بيصير فيا لو صارلها شئ اعيوني قعدن يدمعن نضت من جنبها منبهاش اتشوفني خشيت للحمام
ولاء / ناض فجأه من جنبي لحقته
طلع من الحمام اعيونه حمر باين عليه كاين يبكئ
ولاء ** شن في
هشام ** مافي شئ
ولاء ** هشاام شن في
هشام / تعنقتها ** انحبك
ولاء ** وهذا عليش تبكئ
هشام ** مكنتش نبكي انا راجل
ولاء ** باهي ياراجل حول بنتك دخان خنقتني
هشام ** اه والله معاك حق ماشئ انغيره التيشيرت هذا عالقه فيه البنه
خشيت لدار وخليتها اتلم في حوسة المطبخ
انغير في دبشي رن نقالي
هشام ** الو
أحمد ** الو هشام كيف حالك وحال ولاء
هشام ** الحمد لله كيف حالكم انتم غادي
أحمد ** والله الحال مش باهي ليلى طيحت العيل
هشام ** لاحول ولا قوة الا بالله ربي يعوض أن شاء الله
أحمد ** أن شاء الله ياربي
هشام ** كيف حالك ليلى توا
أحمد ** اهو باهي وخلاص اليوم كتبولها خروج
هشام / سمعت ولاء تنادي صكرت من أحمد ومشيت خبرتها
ولاء **😢 ياناري يااوخيتي مسكينه كانت فرحانه بيه
هشام ** ربي يعوضهم أن شاء الله مازالوا اصغيرين والعمر قدامهم
ولاء ** هات نقالي بنكلمها
هشام ** وين نلقاه
ولاء** فوق التلفزيون
ولاء / كلمت ليلى
ليلى ** الو حبيبتي
ولاء ** لولو كيف حالك توا
ليلى **😢 باهي الحمد لله على كل حال
ولاء ** معاش اتعيطي بكره تحملي مرا اخره وتجيبي غيره وغيره وتعبي الحوش فروخ ويهبلوك
ليلى **😊
ولاء ** ايوه هذي ليلى أوخيتي ربي يعوضك حبيبتي
ليلى ** أن شاء الله.
ولاء** لولو كيف صار هكي
ليلى ** لما اتروحي انخبرك .انت كيف حالك وحال هشام
ولاء ** الحمد لله اكويسين اليوم ماشين للملاهي هو وعدني ......وبحتت في هشام
هشام ** قربتلها ومسكتها من خدودها وبستها علي خدها
ولاء / بعدت النقال ** تحشم انكلم في اختي كان سمعاتك توا
ليلى ** ولاء خلاص بعدين انكلم شكلك مش فاضيه 😊 وهشام قاعد
ولاء / صكرت من ليلى وعديت هزبته وهو يضحك عليا البارد
/
/
/
( عند حسام )
فتحت باب المربوعه ومشيت شور حوش عمي ياسين القيت هديل مقعمزه بر في الجنان تبكئ
جيت قعمزت جنبها .جت بتنوض مسكتها من يدها
حسام ** قعمزي نبيك
هديل** شن تبي مني خلاص الي عندك قلته امبدري
حسام ** هديل اسمعيني ... حقه صار بينا شئ
هديل ** ومزال تسأل قصدك مش مذكر
حسام ** مش مذكر ياهديل مش مذكر كنت شارب واجد كنت سكران سكران
قعدت اتعيط
حسام ** كيف يصير توا
هديل ** منعرفش بس الي نعرفه ان لو اهلي عرفوا هيقتلوني
حسام ** باهي ليش ممنعتينيش
هديل ** حاولت .انا بعد سمعت دوشه في الجنان نزلت بنشوف نحسابه اهلك رجعوا شفتك خشيت للمربوعه جيت بنسألك علي اهلك خشيت القيتك تقلع في قميصك جيت بنطلع انت جيتني وقعدت اتقولي حبيبتي كنت عارف اني مش هنهون عليك
قعدت اندف فيك كتفتني وقعدت اتقولي انا انحبك وبعدين
قعدت تبكى
حسام ** خلاص اسكتي
هديل ** الي أمس كانت انا ياحسام مش زينب
حسام ** اه يازينب
وقفت بحتت فيها ** اليوم في الليل جاين نخطبوك
هديل ** وزينب
حسام ** مدخلكش تو خلي انصلحوا غلطتنا بعدين ساهل
مشيت وسيبتها وحاسس بغصه في قلبي
رن نقالي زينب صكرت عليها ودرت حظر
سامحيني حبيبتي بس منبيش نجرحك انا حقير وانت تستاهلي
واحد خير مني
/
/
/
( عند سمر )
نبيه يتربه اشويه بيش مزال يمد يده روحنه من سلوى وقاعده عند هلي وهو يرن 24 ساعه مرا انرد وعشره انطنش
..بس هو اكيد تو واخد راحته مع الست رشا
حاسه بالغيررره معاش قدرت نهى صاحبتي عندها سياره طلبت منها نعدوا للمطعم امتاعه
ومشينه خدينه طاوله وقعمزنه هو مش قاعد
نهى ** شكله مش جاي
سمر ** غير اصبري اشويه اكيد راحت عليه نومه وتو ينوض
اشويه وخش يارووحي رايح ارقيق وعيونه إرهاق
ياسر / خشيت القيتها مقعمزه هيا ونهى فرحت واجد
خشيت انصبح علي رشا
ياسر ** صباح الخير ....وعليت صوتي وانا نقول
** شيك صبح مسمحه عسلللل وبحتت فيها
نهى ** 😂 تي هذا يلقحلك في الكلام
سمر ** خليك منه ديري روحك متشبحيش فيه
سمر / قعدت انبحت فيه وهو يهدرز مع هذك الكلبه الي أسماها رشا
ياسر / تي عارفها قاعده اتبحت ووالعه فيها النار نار الغيره ياحبيبي . قعدت اندير في جو انهدرز ونضحك امتع مش مدورها بس مرا مرا انبحت فيها تي رايحه اتهبل😍
سمر / حرقلي دمي مش مدورني بكل
سمر ** لو سمحتي
ياسر / جت رشا بتمشى وقفتها
ياسر ** استني تو انا انشوفهم الزبائن هذيما
مشيت وقفت عندهم
ياسر ** اتفضلي شن طلبك يامدام ....وماسك ضحكتي
سمر ** نهى قوليله منبوشي هو نبوا الست رشا قالوا معاملتها سمحه في ناس قالوها .....وبحتت فيه
ياسر ** رشا مش فاضيه تو تحملوني وخلاص حتى لو معاملتي اع
سمر ** مش غير اع متنطاقش
جت نهى بتنوض مسكتها
سمر ** خليك وين ماشيه
نهى ** انخليكم تتفاهموا
سمر ** نبيك نتفاهم معاه
ياسر/ سيبتها ومشيت لرشا انهدرز معاها وهي تشتغل
سمر / خلاص دمي فاير نبحت فيها هي الصراحه سمحه سوريه عاد وهو يهدرز ومنسجم
وقفت ومشيت للحمامات خلاص معاش نقدر نتحمل نبحت فيهم
ياسر / لحقتها وراجيتها قدام الباب
طلعت مسكتها من يدها ورفعتها لمكتبي
سمر ** حول يدي
ياسر / دخلتها وطربقت الباب بالمفتاح
ياسر ** رايفت واجد
سمر / دفيته
ياسر ** ياسر حول عيب عليك مكان عمل هذا
ياسر ** باهي هيا روحي معايا وساد من الزعل يتهيألي كفايه هكي مش شايفه منظري رايح مبهدل بدونك
سمر ** لا والله شايفاتك مروقك وجوك سمح وتهدرز وتضحك
ياسر ** هههه تغاري ياسمحه تي بلعاني نبي نخليك تغاري وتعرفي قيمتي
ياسر / قربتلها ** انا منقدرش انعيش بلاك الليل معاش نرقد فيه معاش نأكل وجوي ديمه شين روحي اقليبي خلاص
سمر ** حول منبيش انروح تو انا مزال زعلانه منك ولا نسيت الكف
وطلعت وسيبته
مشيت لنهى قلتلها هيا وركبت في السياره طول
ياسر / مشيت لنهى وكيف ماتفقنه مدتلي مفاتيح سيارتها وعطيتها مفاتيح سيارتي بيش تروح بيها
ومشيت ركبت جنب سمر في السياره وصكر الأبواب
سمر / كنت انراجي في نهى جاء هو ركب جنبي جيت بننزل الباب مصكر شبحت نهى ركبت في سيارته ومشت فهمت خطتهم
قعدت اتخبط في الباب
سمر ** افتحلي نبي ننزل ياسر افتح الباب
ياسر / ولعت السياره ومشيت
ياسر**تو نفتحلك بس بعد نوصلوا
سمر ** وين رافعني
ياسر ** رافعك انت وحبيب باته للاستراحه انغيروا جو ونصفوا القلوب
سمر ** وانا نبيش نمشئ هيا نزلني
ياسر / قعدت انصفر
/
/
/
( عند يوسف )
ليا كم يوم مضايق من طريقة لبس ساره مش عاجبني بس متحمل وساكت نبي نوصللها تفكيري بطريقه متحسش بيها انها تهزيبه أو تحكم فيها
يوسف ** ساره حبيبتي نوضي ديريلي فطور را انا جعان
ساره / كنت راقده بحتت في الساعه
ساره ** حبيبي را الساعه 7 توا مزال بدري ارجع ارقد وحتى انا مزال خاطري في النوم
يوسف ** راد الله عليا انوض نقلي دحي بروحي وخلاص
مشيت للمطبخ اشويه ولحقتني
ساره ** ميهونش عليا الشيخ يوسف
ودرتله فطور وفطرنا انا وياه
ساره ** حبيبي نبي نطلب منك طلب
يوسف ** انت تأمري
ساره ** اهلك متفقين علي مشيه للمصيف
يوسف ** ايه به والمطلوب
ساره ** خاطري نمشي بس خواتك قالن انك متحبش تمشئ
يوسف ** ايه حبيبتي فكينه جو شين اكيد معبي شباب
ساره ** يوسف علي شاني والله خاطري نمشي
قعدت اتزن لين وافقت
يوسف ** خلاص بس تلبسي عبايه
ساره ** نلبس فراشيه غير نمشئ ههههه
يوسف ***ههههه باهي البسي فراشيه ياحجه ساره** انبصر حبيبي را
يوسف ** سرو معتز ولد اختي مروه جاي عندي توا
ساره ** هذا الي يقرأ سادس
يوسف **ايه حبيبتي
ساره ** وعليش جاي
يوسف / درتلها بعيوني امتع شن السؤال هذا
ساره ** ههه تي لا مش قصدي حوش خاله امتى مايبي يتفضل
يوسف** جاي بيأخذ درس عندي .. امالا شن 😎 يبي يطلع شيخ زي خاله
ساره / قربتله وقرصتله خدوده ** نجيه ياربي الشيخ
يوسف ** سرو الولد قريب يجي نوضي ديريلي قهوه قبل يجي وتعالي نشربوها مع بعضنا
ساره / درتله قهوه وشربنا اشويه وجاء معتز
خش قعمز في الصاله
ويوسف قعد يشرحله خطمت شورهم سمعت اشويه كلام
يوسف / كنت ندويله ونرفع في صوتي بلعاني نبيها تسمع
يوسف ** ظهر في هذا القرن أشكال جديده وتفصيلات غريبه كل واحد منها يدعى انه حجاب
فظهر منها عباءات واحجبه مزخرفه لاتغض عنهن الأبصار
لأنها تسر الناظرين ..........
التبرج سنه جاهلية قال تعالى ( ولا تبرجن تبرج الجاهليه الأولى ) فكيف ترضى المسلمه أن تنسب الي الجاهليه وقد اختارها الله من أمة محمد ( كنتم خير أمه أخرجت للناس )
التبرج مقرون بالشرك.....
***********(من كتاب العجب العجاب في أشكال الحجاب )
ساره / نسمع فيه ومنسجمه كلامه سمحححح
القيت روحي مقعمزه جنب معتز ونسمع
يوسف / روح معتز وهي مزالت مقعمزه
يوسف ** نوضي حبيبتي ديريلي شئ ناكله
ساره ** انديرلك سندوتش ع السريع وبعدين كملي باقي الكلام الي كنت تدوي فيه لمعتز
يوسف / ناضت تجري للمطبخ ههههه ورجعت
ساره ** هاك هيا
يوسف ** ههههه تي ساد اليوم بكره انكملوا
ساره ** لا لا أوفي كملي توا
يوسف ** باهي علي خاطر كلمة أوفي
وقعدت نتناقش انا وياها هي تقول في رأيها وانا مصلحتها ونعطي فيها في دليل من القرآن
ساره ** حديث ممتع معاه القيت روحي فاهمه الدنيا غلط ياريت نفسي قويه إيه ونطبق الكلام بس نفسي ضعيفه وهذي مشكلتي
/
/
/
( عند ليلى )
روحت للحوش تاعبه امي قعدت عندي وأحمد يرعش عليا مسيبنيش دقيقه ويكر في العصير والفواكه
أحمد ** هي اتفضلي عمتي / ومديت لعمتي فاطمه عصير ومشيت شور ليلى
أحمد ** هي اتفضلي حبيبي
فاطمه **احم احم / شرقت بالعصير
أحمد ** بسم الله / نضت بنجيب اميه ناضت هيا وقالتلي تو ناخد بروحي ومشت
ليلى ** حمادي عيب
أحمد ** تي شن درت انا
ليلى ** معقوله اتقولي حبيبي قدام أمي
أحمد ** هيييي والله مانتبهت لروحي . تي كله منك هبلتيني
ليلى / اشويه وجت عمتي عفاف وزينب وخوله وهناء يطمنن عليا
طبعا انا عارفه من دار فيا هكي هناء دفتني شفتها لما برمت قبل انطيح ونبي نفضحها توا
امقعمزين كلهم حتى أحمد
ليلى** ياجماعه نبي انقوللكم حاجه
أحمد ** اتفضلي
ليلى ** نبي انقوللكم انا الانسانه هذي واطيه وحقيره وهيا السبب في موت ولدي هناء الي دفتني من الدروج هي دارت هكي
أحمد / خلاص معاش فهمت شئ بدت ليلى أتوجه في الاتهامات لهناء وهناء تنكر وتعيط
خوله ** ليلى خلاص حرام عليك انت مرا بعيالك حرام عليك تفهمي هالبريئه مش كان ضرتك وتكرهيها تتهمها هالاتهام
ليلى ** انت شن تفترشي
خوله ** انقول في الحق ياأحمد هناء كانت معايا طول الوقت في هذك اليوم
ليلى ** كذابه وحق ربي كذابه ياأحمد هيا الي قالتلي ارفعيلها الساعه رفعتهلها وانا نازله دفتني
أحمد ** ليلى عيب شن كذابه هذي اختي الكبيره
ليلى **أحمد 😢😢 كنك اتنت عليا
أحمد ** منتش بس انت اكيد تتخيل
ليلى / سيبتهم ومشيت لداري
خوله / بحتت في هناء امتع راني عارفه انك انت الي دفيتها بس حابه نستر عليك لاني حتى انا مش طايقها الي أسماها ليلى وهذا شئ مشترك بينا
/
/
/
(عند زينب )
حسام ليه ايام ميردش ع الفيس ولا علي اتصالاتي
اليوم كالعاده مشيت للكليه وهو مجاش ليه ايام ميجيش وحسني خايفه عليه ومشغوله اول مره يديرها
حسام / مضايق ومهموم وجوي شين خطبت هديل ولبسنه الدبله وليا كم يوم مطلعتش من الحوش ومعاش انرد علي زينب
اليوم قررت انواجه لبست ومشيت للكليه
زينب / مكسده انا ونوال في الكفيتيريه
زينب ** صار هكي
نوال ** ايه مالك راح يهدرز امعايا في الفيس
زينب ** اهي اهي ياعيني ع الحب
شفت حسام جاي من بعيد نضت نجري شوره 😍 رايفت عليه حبيبي
بس لحظه 😲 في دبله في يده
أصحابه جاين يباركوله
** مبروك ياباشا
** الف مبروك ياعريس
** تتهنئ يابو الشباب
** أن شاء الله سمحه زيك
** امتى العرس
** تي حب واحد مع بنت العم
😲😲😲😲😲😲😲😲
يتبع
~~Safa Abdullah ~~
