ကုန်းမြေကြီး၏ အရှင်သခင်ဝမ်ဖေး( Book - 2)

အပိုင်း (၄၆) - ဇနီးလေးရဲ့ ညီငယ်သေးသေးလေး

ဖူနန်းတော် တွင် အိမ်တော်ထိန်း နှစ်ယောက်ရှိပေသည်။ အိမ်တော်ထိန်းကြီးလီက လက်ထောက်မျှသာ ဖြစ်ပြီး အဓိကအိမ်တော်ထိန်း မဟုတ်ပါချေ။

အိမ်တော်ထိန်းခေါင်းဆောင် မှာ မုတ်ဆိတ်မွေးနှင့် လူလတ်ပိုင်းအရွယ်ဖြစ်သည်။ သူက အိမ်တော်ထိန်းဆု ထက် အရွယ်ငယ်သော်ငြား နူးညံ့ညင်သာသည့် အပြုံးတစ်ခုကို ဆင်မြန်းထား၏။ အိမ်တော်ထိန်းကြီးလီနှင့် ယှဥ်ကြည့်လျှင် သူက ပိုမို ချဥ်းကပ်ရလွယ်မည့်ဟန် ပေါ်သည်။ သို့သော် ဒါက အန်းကျီယန် သူ့ကို ပထမဆုံးအကြိမ် မြင်ဖူးခြင်း မဟုတ်ပေ။

မနေ့က လက်ထပ်ပွဲအခမ်းအနားတွင် အိမ်တော်ထိန်းဖူကို လောင်ဝမ်ရယ် နှင့် သိပ်မဝေးသည့် ဘေးတစ်နေရာတွင် ရပ်နေတုန်း သူတွေ့ခဲ့ရသည်။ ထိုအချိန်က သူ အလျှင်အမြန် တစ်ချက်မျှ ကြည့်လိုက်ရုံသာ ဖြစ်ပြီး သေချာ စေ့စေ့စပ်စပ် မကြည့်လိုက်မိပါချေ။ ဒီမနက် ထွက်သွားမည့်အချိန်မှ သူ့ကို ကြားဖူးပြီး အမှန်တကယ် သေသေချာချာ မြင်ဖူးခြင်းပင် ဖြစ်သည်။

"ဝမ်ရယ်... ကျေးဇူးပြုပြီး စိတ်ချလက်ချ နေပါ...ကျွန်တော် လောင်ဝမ်ရယ် ကို စောင့်ရှောက်ထားလိုက်ပါမယ်"

ဖူယိက ခေါင်းငြိမ့်ပြီး ပြုံးလိုက်လေ၏။ သူ့ရဲ့ အမူအရာမှာ ရိုကျိုးဟန်လည်း မရှိသလို စိတ်ကြီးဝင်နေသည့်ဟန်နှင့်လည်း မတူပါပေ။ အစေခံတစ်ယောက်နှင့် တူရမည့်အစား ဖူဝူထျန်း၏ အကြီးအကဲ ပုံစံနှင့်ပင် တူနေလေသေးသည်။ ဆိုရလျှင် သူ့ရဲ့ မျိုးရိုးနာမည် ဖူ ဆိုသော စာလုံးကို ကြည့်ရုံဖြင့် သာမန်အစေခံတစ်ယောက် မဟုတ်နိုင်ကြောင်း သိနိုင်ပေသည်။

အန်းကျီယန် သိလိုက်ရသည်က သူနှင့်ဖူဝူထျန်းတို့၏ လက်ထပ်ပွဲကြီးမှာ အိမ်တော်ထိန်းခေါင်းဆောင် ကိုယ်တိုင် တစ်ယောက်တည်း ဦးစီးဆောင်ရွက်ခဲ့ခြင်းဖြစ်သည်ကိုပင်။

ထိုအချိန်၌ ဖူဝူထျန်း က ပြောလာပြန်၏။

"ထပ်ပြီးတော့ အိမ်တော်ထိန်းခေါင်းဆောင်ကို ဝမ်ဖေးလေးရဲ့ ညီငယ်ကိုပါ စောင့်ရှောက်ပေးဖို့ ဒုက္ခပေးရဦးမယ်။ ကျွန်တော့်ဇနီးလေးရဲ့ ညီငယ်သေးသေးလေးက အသက်လေးလပဲ ရှိသေးတာဆိုတော့ ပိုပြီး ဂရုစိုက်ပေးပါဦး"